25
1 Ga bɔɔle, ƴũ fãgadaarɩ dɩ ga hʋrɛ khɛ biirə yʋɔrɩkɛ na jɛnɩ kuun pa', kɛ kɔɔ gbaannɩ awɩ lãphãsɔ a jal wɩ caan khɛrɩ ko.
2 Yemɔɩ wɛrra dor də̃bələ, sɩ yemɔɩ do khɛ bi kpɛsɛsɔ.
3 Də̃bələ gbaar awɩ lãphãsɔ sɩ wa kɔɔ gba niinə',
4 sɩ khɛ bi kpɛsɛsɔɔle gbaar awɩ lãphãsɔ a gbana niin na nĩ pɛdaa a fʋrɔ.
5 Mɔ̃ khɛrɩ ko n pʋɔrnɩ pʋɔrra, dayuur fʋlɛ wɛr fɛʋ dɩ wa-n daar.
6 A dɩɩ nɩrɔ hulẽbire ther aa: Nɩ yɛ khɛrɩ ko, nɩ thɛ na caanɛɛ.
7 Dɩ khɛ biirəəle fɛʋ pal ɩɩr a ma dɩ wa-n gbɛbɩ awɩ lãphãsɔ.
8 Dɩ khɛ bi də̃bələəle so khɛ bi kpɛsɛsɔra ayɩ: Nɩ pɛ sar anɩ ninə gbe, gɩdonɩ asɩ lãphãsɔ n khiire.
9 Dɩ khɛ bi kpɛsɛsɔɔle birse wi: Ǝ̃'ə̃, gɩdonɩ ga dã sɩ kha na nɛrɛa', nɩ jala wɩrɛraakɛ n dolonenɩ a thɛ anɩda.
10 Dɩ ɔbɔɔkɛ wɩ jalnɩ wɩ the, dɩɩ do khɛrɩ ko daan, dɩ khɛ bi wele kɔɔ gbɛbɩrɛnɩ pɩ, cʋrrɛ kha a lõ he fɛtɩ cʋgʋʋ, sɩ dɩ loo khaan.
11 Ga too gbe dɩ wa khɛ bisɔɔle pɔ dakha wer dɩ wa-n so: Kɔ̃tɩn, Kɔ̃tɩn, khɛra sɩ loo.
12 Dɩ birse wi: Sobɔr mɩ so nar, ma jɩ na'.
13 Gɛr gɩ a nɩ jɩ na-n jʋrɛ, gɩdonɩ na jɩ wire dɩ bɔɔ ga.
14 Ga hʋrɛ kũu bɩɛlɩkɛ kɔɔ ƴaalɛnɩ a kpaar, a we ɔɔ thɔ̃daarsɔ, a pɛ war ɔɔ lẽle thɩ̃sɔ wa-n hɩnɛ.
15 Dɩ a har bɩɛl war bɔrɔ yemɔɩ, a ha bɩɛl war bɔrɔ yenyɔ, sa ha balãtherdaar war bɔrɔ bɩɛl. A ha wɛr fɛʋ bɩɛlbɩɛl mɔ̃ awɩ puno hanɩ, sa gba jal kpaar paar.
16 Dapaara ʋrɛɛkɛ kɔɔ 'lɛnɩ war bɔrɔ yemɔɩ gbaar jalna da-n ƴabɩna, a 'lɛ yemɔɩ a dɛɛnɔ wo.
17 Mɛ̃ ʋrɛɛkɛ kɔɔ 'lɛnɩ war bɔrɔ yenyɔ 'lɛ yenyɔ wo a dɛɛnɔ.
18 Sɩ ʋrɛɛkɛ kɔɔ 'lɛnɩ war bɔrɔ bɩɛl dɩbara, a jaal a kpe koru a puu le ɔɔ kɔ̃tɩ̃ɩ war faa.
19 A gɩ ɩ̃ a pʋɔr thɔ̃daraalee kɔ̃tɩna bire ɩ̃, a we wɩ wɩ thera war ɩnɩ-n hɩɩn.
20 Dɩ ʋrɛɛkɛ kɔɔ 'lɛnɩ war bɔrɔ yemɔɩɩle tɔr dã na dɛɛnɛ yemɔɩɩkɛ a 'lɛnɩ a so: Kɔ̃tɩn, fɩ kɔɔ pɛ marɛ war bɔrɔ yemɔɩ. Yɛ yemɔɩ phaa mɩ birni 'lɛ a dɛɛnɔ.
21 Dɩ ɔɔ kɔ̃tɩ̃ sʋʋraa: Gɩ bɔrɛ kpɛ, thɔ̃daar bʋɔ ha fɩ na sobɔ cʋʋdaar. Fɩ kɔɔ dor sobɔ cʋʋdaar thɩ̃ fɩɩʋra, nɛnɛ̃ ma pɛ farɛ dɩ fa do hɩɩndaar thɩ̃ jɔjʋɔra. Lona daʋraakɛ dɔnɩ afɩ kɔ̃tɩ̃ɩda.
22 Dɩ ʋrɛɛkɛ kɔɔ 'lɛnɩ war bɔrɔ yenyɔ tɔ dã a so: Kɔ̃tɩn fɩ kɔɔ pɛ marɛ war bɔrɔ yenyɔ, yɛ kɛ yenyɔ phaa mɩ birni 'lɛ a dɛɛnɔ wo.
23 Dɩ ɔɔ kɔ̃tɩ̃ sʋʋraa: Gɩ bɔrɛ kpɛ, thɔ̃daar bʋɔ ha fɩ na sobɔ cʋʋdaar. Fɩ kɔɔ dor sobɔ cʋʋdaar thɩ̃ fɩɩʋra, nɛnɛ̃ ma pɛ farɛ dɩ fa do hɩɩndaar thɩ̃ jɔjʋɔra. Lona daʋraakɛ dɔnɩ afɩ kɔ̃tɩ̃ɩda.
24 Dɩ ʋrɛɛkɛ kɔɔ 'lɛnɩ war bɔrɔ bɩɛl dɩbara tɔr dã dakha a so: Kɔ̃tɩn, mɩ jɩrɛ fɛr dɔ tibilikɛ afɩda khɩɩrnɩ, dɩ fa-n kha jɔ kãkɛ fa diirnə', dɩ fa-n kha kãkɛ fa kɔɔ jalnɩ woa'.
25 Gɛr gɩ maar kɔɔ fʋ mɩ dɩ ɩ̃ gba afɩ bɔrɔ bɩɛlla a puu thɩɩra. Gɩkɛ gba, gɛr dɔ afɩda.
26 Dɩ ɔɔ kɔ̃tɩ̃ birsee ayɩ: Fɛr thɔ̃daar puu na khãkhal, fɩ kɔɔ jɩrɛ dɩ mɛr dɔ ʋrɛ n khanɩ kãkɛ ma kɔɔ diirnə', dɩ ma-n kha dakha kãkɛ ma kɔɔ jalnɩ thɩ̃a',
27 dɩ gɩ kɔɔ teenanɛna wɩ yɛ fɩ gbaar ɩ̃ war a 'laa kãkɛ ma 'lɛrɔnɩ khor. A mɩ kɛrrɛ bir ɩ̃, ɩ̃ gba ɩ̃da na khor.
28 Dɩ gɛr gɩ, nɩ taaraa bɔrɔ bɩɛlɩle a hananɩ, a hana ʋrɛ hananɩ bɔrɔ yʋɔrɩle.
29 Gɩdonɩ tibil wo tibilikɛ hananɩ thɩ̃ɛ, wa bire na haa na dɛbɩrɔ wo, dɩ na hana gɩ dɩ ga jɩɩ jɔr. Sɩ tibil wo tibilikɛ na hananɩ thɩ̃a', wa tiirəərerakɛ phubi gɩrɛ a hananɩ.
30 Sɩ olela na dɔnɩ bɔ taa thɔ̃daara', nɩ dɔnaa jɩɛra dabirə paar faa, kãkɛ wa bɩnɩ wa-n yɩrna nyɩma.
31 Ɔbɔɔkɛ mɛr tibili Bikuun na-n ɩnɩ na ɩ̃ i dʋbɩ nakha ɩ̃ thɔ̃thɔ̃daar thusɔ fɛʋ, ma toore ɩ̃ i dʋbɩ fãga too para.
32 Dɩ le wa kpa tibil caar fɛʋ na jɛ ɩ̃ ƴɛ thɩ̃thɩɩn, dɩ ma leere wɛ na wɛ, mɔ̃kɛ bana khedaar n leenɩ banaa na bɔ.
33 Dɩ ma pɛr banaa ɩ̃ nyɔ̃bɔra, sɩ ɩ̃ pɛ bɔ ɩ̃ nyɔ̃bɩlana.
34 Le mɛr fãgadaar na so wɩrɛraakɛ hanɩ ɩ̃ nyɔ̃bɔra ɩ̃ yɩ: Nɩ ɩna nɛrkɛ ɩ̃ Thɩ bɔnanɩ, a gba fãgadaar dɩɩkɛ wɩ kɔɔ maanɩ gbɛbɩ nar kɛkɛkɛ thɩɩkɛ ti bɔɔ a hɩna.
35 Gɩdonɩ kɔmɛr kɔɔ fʋ mɛr dɩ nɩ kɔɔ ha mɩ dɩkor; yɔlkhaa kɔɔ fʋ mɛr dɩ nɩ kɔɔ ha mɩ nyʋɔn; mɩ kɔɔ dor kpakpal dɩ nɩ kɔɔ tee mɩ;
36 mɩ kɔɔ hananɛ sãɓɔlɔ̃ dɩ nɩ kɔɔ saa mɩ kɩ̃kɩɩn; gɩ-n kɔɔ kho mer dɩ nɩ kɔɔ pɔ a yɩ mɩ; mɩ kɔɔ har khaɩra dɩ nɩ kɔɔ pɔ a yɩ mɩ.
37 Le tɩɩ sarasɔ na birse mi nayɩ: Kɔ̃tɩn, ʋmɔ̃ bɔɔ sɩ kɔɔ yɩ fɩ na kɔmɛr a ha fɩ dɩkor, dɩ yɔlkhaa kɔɔ fʋ fɩ dɩ sɩ kɔɔ ha fɩ nyʋɔn?
38 Ʋmɔ̃ bɔɔ sɩ kɔɔ yɩ fɩ dɩ fɩ kɔɔ do kpakpal dɩ sɩ kɔɔ tee fɩ, agɩbo na sãɓɔlɔ̃ dɩ sɩ kɔɔ ha fɩ kɩ̃kɩɩn?
39 Ʋmɔ̃ bɔɔ sɩ kɔɔ yɩ fɩ dɩ ga-n kho fɩ, agɩbo dɩ fɩ kɔɔ ha khaɩra dɩ sɩ kɔɔ pɔ a yɩ fɩ?
40 Dɩ mɛr fãgadaar na birse wer nayɩ: Sobɔr mɩ so nar, gɩrɛ fɛʋʋkɛ nɩ kɔɔ cʋʋnɩ ɩ̃ omi bu fɩɩʋra, mɛrra nɩ kɔɔ cʋʋ.
41 Agɩpɩ, ma sor wɩrɛraakɛ hanɩ ɩ̃ nyɔ̃bɩlana: Nɩ hala mɩ jala ƴɔɔ, nɛrkɛ so kɔ̃tɩ̃ɩ heennɩ, nɩ jala lona khorr dɔɔraakɛ wɩ gbɛbɩnɩ thɩɩn Satana, na ɔɔ thɔ̃thɔ̃daar thusɔra.
42 Gɩdonɩ kɔmɛr kɔɔ fʋ mɛr sɩ na kɔɔ ha mɩ dɩkora'; yɔlkhaa kɔɔ fʋ mɛr sɩ na kɔɔ ha mɩ nyʋɔna';
43 mɩ kɔɔ dor kpakpal sɩ na kɔɔ tee ma'; mɩ kɔɔ hananɛ sãɓɔlɔ̃ sɩ na kɔɔ ha mɩ kɩ̃kɩɩna'; gɩ-n kɔɔ kho mer dɩ mɩ kɔɔ har dakha khaɩra, sɩ na kɔɔ pɔ a yɩ ma'.
44 Dɩ le wa birse mi dakha nayɩ: Kɔ̃tɩn, ʋmɔ̃ bɔɔ sɩ kɔɔ yɩ fɩ na kɔmɛr na yɔlkhaa, agɩbo dɩ fɩ kɔɔ do kpakpal, agɩbo dɩ fɩ kɔɔ hana sãɓɔlɔ̃, dɩ ga-n kho fɩ dakha, agɩbo wo dɩ fɩ ha khaɩra dɩ sa kɔɔ cʋʋ fɩ bɔa'.
45 Dɩ le ma birse wi nayɩ: Sobɔr mɩ so nar, thɩ̃ɛ fɛʋʋkɛ na kɔɔ cʋʋnɩ ɩ̃ omi bu fɩɩʋra ga, mɛrra na kɔɔ cʋa'.
46 Dɩ wɛr, wa jaal khorr so 'lɛ paar, sɩ tɩɩ sara n 'lɛ yire khorr.