19
1 Ɔbɔɔkɛ Jeju mɩɩnɩ thɩmɩaakɛ dɩɩ pɩ, a ther Galile a jal Jude khʋra, Jʋrdɛ̃ mɩɩr iiro.
2 Dɩ tibil jɔjʋɔ tə̃tə̃tə̃ kɔɔ kpaaraarɛ, dɩ le a kpɛɛ wɩ khoo.
3 Dɩ jɔfʋ bʋ dʋdarasɔ pʋɔraarɛ dɩ wa-n fifiləə ayɩ: Hʋɛ hale dɩ tibil na faa ɔɔ khɛr gãgã dɔɔraakɛrakɛ a yɩɩraanɩ ya?
4 Dɩ birse wi: Na kɔɔ yɩɛ Thãgbaa sɛbɛra, dɩ «kuun na khɛr thɩ̃ Tidaar kɔɔ cʋʋ caca fʋ paaraa»?
5 Mee a kɔɔ sor ayɩ: «Gɛr dɔ kɩrʋ dɩ kuun na lee kha na ɔɔ thɩ na ɔɔ nɩ, sɩ a ɓã kha na ɔɔ khɛr, wɛr yenyɔ n gbɛbɩ wɩ do tibil bɩɛl.»
6 Gɩ do mɛ̃ wa do yenyɔ bã, sɩ wɩ coore kha a do bɩɛl. Gɛr gɩ gɩrɛ Thãgba coornɩ dɩɩ do bɩɛl, tibil na-n lee ga.
7 Dɩ wɩ bulee wo ayɩ: Dɩ a thale gɩ, mɔ̃gɩdo sɩ dɩ Mʋɩjɩ kɔɔ 'laa hʋɛ ayɩ: «Kuun n hana ɔɔ khɛr he kuur sɛbɛ sa weaa a faa?»
8 Dɩ birse wi ayɩ: Anɩdara khiinoni dɔ kɩrʋ dɩ Mʋɩjɩ kɔɔ 'laa hʋɛ nɩ wea anɩ khɛrsɔ na faa. Sɩ caca fʋ paar, ga kɔɔ ha thaka'.
9 Sɩ mɩ so narɛ, tibil wo tibilikɛ na faanɩ ɔɔ khɛr, sɩ ga do kũn kpɩɩ ƴaalɛ ga, sa bir he khɛ kpɩɩ, khɛ kpɩɩ ƴaal sopugo a cʋʋ.
10 Dɩ ɔɔ kpãkpãadara sʋʋraa aa: Dɩ ado thale thɩɛna na ha kuun na khɛrra, gɩ baarrakɛ dɩ tibil na he khɛra'.
11 Dɩ birse wi: Tɩbɩla fɛʋ na tu thɩmɩɩrɩka', sɩ wɩrɛ dɩbara wɩ hanɩ punone.
12 Gɩdonɩ wɛ hale kɛ awɩ nɩsɔ kɔnɩnakɛ dɩ wɩ do kʋ̃bʋʋ, sɩ wɛ hale wo kɛ tɩbɩla cʋʋnɩ dɩ wɩ do kʋ̃bʋʋ. Wɛ hale wo ƴũ fãgadaar doda donɩ nɔɔ dɩ wɩ too kpakpaar. Gɛr gɩ ʋrɛɛkɛ punoneni a na tu thɩmɩɩrɩkɛ, a to.
13 Dɩ tɩbɩla kɔɔ gbaar bɩsã bii a pɔna Jejura a dɛɛnɛ war nyɛ̃ɛ sa bɩɛlnɛ Thãgba pɛ war. Sɩ kpãkpãadara kɔɔ phaanɛ wɩrɛ pɔna wɩnɩ.
14 Dɩ Jeju sor: Nɩ dɔ bɩsã bii na-n ɩ̃ mar, na-n pɩɛr Gɩdonɩ wɩrɛ hɔnɩ bɩsana, wɛr ƴũ fãgadaar do mana.
15 Dɩ a dɛ̃ɛ warɛ nyɛ̃ɛ sa the le a jal.
16 Le tibil bɩɛl tɔ pɔ a bule Jeju ayɩ: Dɩɩrdaar, anye dɔ thɩ̃ bʋɔɔkɛ teananɩ ɩ̃ cʋɛ a 'lɛ yire khorr?
17 Dɩ Jeju birsee: Mɔ̃gɩdo dɩ fa-n bule mi gɩrɛraakɛ bʋɔnɔnɩ? Bɩɛl dɩbara haanle kɛ bʋɔnɔnɩ. Ado fɩ-n ƴaalɛ fɩ 'lɛ yire khorr, na hɩnɛ Thãgbaa jɔfʋsɔ.
18 Dɩ bulee: Gɩmɔ̃ɔ jɔfʋ? Dɩ Jeju birsee aa: «Fa-n kʋ tibilə', fa-n hana khɛ kpɩɩ ƴaala', fa-n hana kũu kpɩɩ ƴaala', fa-n yuə', fa-n sõso pɛ tibilə',
19 na cɔ afɩ thɩ na afɩ nɩ, dɩ na na dakha afɩ 'walãkha tibil mɔ̃ fɩ-n nanɩ afɩbara.»
20 Dɩ daɓolbirile sʋʋraa: Mɩ kɔɔ mãa nɩ ga jɔfʋraale fɛʋ nũu, anye sɛ mɩ cʋʋrɛra 'lo?
21 Dɩ Jeju sʋʋraa: Ado fɩ-n ƴaalɛ fɩ bʋɔnɔ a ka, jala dolone gɩrɛ fɩ hananɩ, a gba hana bɔdara, dɩ mɛ̃ fa 'lɛ lẽle thɩ̃ɛ Thãgbaa dʋɔ, agɩpɩ fɩ ɩ̃ fa-n kpa mar.
22 Ɔbɔɔkɛ daɓolbirile nɩɛnɩ ga thɩmɩɩle, a gbure ƴɩɛ da-n kɔna, gɩdonɩ lẽledaar gɩ na sobɔr.
23 Dɩ Jeju so ɔɔ kpãkpãadarara ayɩ: Sobɔr mɩ so nar, ƴũ fãgadaar dɩ lʋʋn khɩɩrɛ lẽlera.
24 Mɩ bire ma-n 'loro wo: Nyɔɔmɛɛ lõokɛ a na lonɩ mɩsɩmɩ kaarra, ka yɔɔrɛ jɔ lẽlee Thãgba fãgadaar dɩ lõ.
25 Mɔ̃ kpãkpãadara nɩɛnɩ gele, nʋɔ kpaa wɛr jɔɔ ka, dɩ wa-n so ayɩ: Dɩ a thale gɩ, amɛ na punonenakɛ a na 'lɛ taarɛ?
26 Dɩ Jeju hɩɩn wɩ sa so war: Ado tɩbɩlala wer gɩ, thɩ̃ punonaa ga, sɩ Thãgba wer, ɔr n punone thɩ̃ɛ fɛʋ.
27 Le Pɩɛr gba thɩmɩa a sʋʋraa: Dɩ hɩnɛ, sɛrɛ sɩ faarɛ thɩ̃ɛ fɛʋ sɩ sa-n kpa far, anye sa yɩrɔ gɩrɛ kper?
28 Dɩ Jeju birse wi: Sobɔr mɩ so nar, ado mɛr tibili Bikuunna gɩ, ɔbɔɔkɛ thɩ̃ɛ na birni na wɛbɩ ga-n do daphaa, dɩ ma too ɩ̃ i dʋbɩ too paraakɛ dɔnɩ fãga too paar, nɛrɛɛkɛ kɔɔ kpaanɛ marnɩ na toore dakha fãga too pa yʋɔr yenyɔra, sɩ na-n kɩɩlna Ɩjɩrayɛl ca yʋɔr yenyɔ.
29 Dɩ tibil wo tibilikɛ ɩ̃ i na donɩ nɔɔ dɩ na faarɔ ɔɔ cɔ, a ɔɔ õkuunsɔ wɛ, a ɔɔ õkhɛrsɔ wɛ, a ɔɔ thɩ gɩ, a ɔɔ nɩ gɩ, a ɔɔ bɩsãsɔ wɛ, a ɔɔ lɛ gɩ, a na 'lɛr thɩ̃ɛ jɔɔ a na 'lɛna yire khorr dakha.
30 Sɩ tibil jɔjʋɔɔkɛ dɔnɩ ƴɛ kʋla, wɛr na fien na do sɩka pɩra, sɩ sɩka pɩra jɔɔ n fi wɩ do ƴɛ kʋla.