20
1 Gɩdonɩ ƴũ fãgadaarɩ dɩ gɩ hʋrɛ cɔdaar kũu bɩɛlɩkɛ thɛnɩ cʋɔrɔ duuro phiphiphi, da-n ƴaal thɔ̃ dona a pɛr ɔɔ lɔɔ.
2 Dɩ wɩ gʋʋrɛ kha na thɔ̃ donaale dɩɩ do a na ha wɛr wi bɩɛl thɔ̃ lɩmɩnɛɛ lɩmɩ, agɩpɩ dɩ thɔ̃ wɩ ɔɔ lɔɔ.
3 Dɩ a ther khɛ yɔ kpãa bɔɔ a yɩ wɩ̃ tibil, dɩ wɩ too ƴatɔɔ mɔlɔ.
4 Dɩ so war: Nɛrɛ dakha, nɩ jala ɩ̃ lɔɔ, agɩpɩ ma ha nɛr gɩrɛɛkɛ na teana nɩnɩ.
5 Dɩ wɩ jal. Dɩ a bire the wo ʋlkhɔɔ na mɔ̃ wire ɩnɩ da-n dʋɔr a cʋʋ ɔmɛna wo.
6 Dɩ dʋɔrɔ a bire the wo a yɩ wɩ̃ tibil ɩkhasɔ dɩ wɩ too, dɩ bule wi. Mɔ̃gɩdo dɩ nɩ too kɩɛrra dɩ wire na-n pɩna, sɩ na-n do thɔma ga.
7 Dɩ wɩ birsee: Tibil na gba sɩ thɔma ga, gɛr gɩ. Dɩ a so warɛ: Nɛrɛ dakha, nɩ jala ɩ̃ lɔɔ.
8 Ɔbɔɔkɛ wire n lonɩ, cɔdaar kuunilera hɩnanɩ lɩɛra sor ɔɔ thɔ̃daraa hɩɩndaarra ayɩ: Wɛ thɔ̃ donana a lɩma wɩ awɩ war, sɩ kɔɔ fɔna sɩka pɩra a danana ƴɛ kʋla.
9 Wɩrɛ kɔɔ jalanɩ thɔmana dʋɔrɔ, wɛr bɩɛlbɩɛl 'lɛr wi bɩɛl thɔ̃ lɩmɩnɛɛ lɩmɩna oti.
10 Dɩ ƴɛ kʋla pɔr pɩpɩɩ paar dɩ wa-n kpɩɛr waa, ɩna 'lɛr jɔɔ, sɩ wɛr bɩɛlbɩɛl dakha 'lɛr wi bɩɛl thɔ̃ lɩmɩnɛɛ lɩmɩna oti.
11 Dɩ mɔ̃ wɩ 'lɛnɩ thale, wɩ ɩɩrnanɛ khʋ̃ɛ cɔdaar kuunnaale dɩ wa-n so ayɩ:
12 Wɩrɛ pɩrɔnɩ a ɩ̃ a cʋʋ lɩɛr bɩɛl dɩbara, fɩ hɩɩn wɛr dɩɩ ka mãkhana sɛrkɛ vɔɔnɩ thɔmana, dɩ ɩtʋɛ be sɩ dakha ga do kpãkpalã ga.
13 Dɩ birse tibil bɩɛl wɛrra: Ɩ̃ kuun wei, ma dɩ far fɩɩʋraka'. Ga do mɔ̃ sɩ gʋʋrnɩ kha fɩ kɔɔ ture wi bɩɛl thɔ̃ lɩmɩnɛɛ lɩmaa?
14 Gba gɩrɛ dɔnɩ afɩda a kɔna. Mɛr ƴaalɛ ɩ̃ ha ʋrɛ dɔnɩ sɩka pɩr mɔ̃kɛ mɩ ha fɩnɩ.
15 Ma hana hʋɛ na cʋʋna ɩ̃ thɩ̃sɔ mɔ̃kɛ mɩ-n ƴaalnaa? Agɩbo fɩ-n bel mer gɩdonɩ mɩ hananɛ ha bulo filɛ ya?
16 Dɩ Jeju so war ayɩ: Mɛ̃ sɩka pɩra na fi na do ƴɛ kʋla, sɩ ƴɛ kʋla n fi wɩ do sɩka pɩra.
17 Mɔ̃ wɩ hanɩ hʋɛra dɩ wa-n jal Jerujalɛm, Jeju kpar kpãkpãadara yʋɔr yenyɔ dɩ wɩ ha kha pa kpɩɩ, dɩ le hʋɛrara a so war ayɩ:
18 Nɩ hɩnɛ, Jerujalɛm sɩ-n jal gɩrɛ, ka wa fʋnɩ mɛr tibili Bikuun na ha bonɩ jidaar kɔ̃tɩna, na jɔfʋ dɩɩrdarasɔ, dɩ wa pɛ mar so kʋnanɛ,
19 sɩ na gba mɩ na ha ca kpala, dɩ wa mãa mɛr, wa ciil mer dakha na khasa, sɩ wɩ gba mɩ wɩ kpa kʋkʋ thɩrʋra. Sɩ wire yẽther wirera ma ɩɩrɛ na the khirera.
20 Le Jebedee bikonaa nɩ pɔ na ɔɔ bikuunsɔ a gulẽga sa bɩɛl Jejura dɩkha.
21 Dɩ bulee ayɩ: Anye fɩ-n ƴaal? Dɩ birse Jeju: A fɩ gba fãga, 'laanɛ hʋɛ dɩ ɩ̃ bikona yenyɔɔkɛ bɩɛl n too afɩ nyɔ̃bɔra, bɩɛl n too afɩ nyɔ̃bɩlana.
22 Dɩ Jeju birse wi: Na jɩ gɩrɛ nɩ-n bɩɛlna'. Na punone na yɔ thɩ̃ yɔnanɛɛkɛ dɔnɩ bɔ gaarɛɛkɛ ma yɔnɩ ya? Dɩ wɩ birsee: Ɔɔ, sa punone.
23 Dɩ a bire birse wi wo: Sobɔr gɩ wer, na punone na yɔna ɩ̃ thɩ̃ yɔnada. Sɩ ado ɩ̃ nyɔ̃bɔ toora gɩ, na ɩ̃ nyɔ̃bɩlã toora, ga do ɩ̃ pa gɩ ha dɩ ma 'laa hʋɛa', sɩ wɩrɛ dɩbara ɩ̃ Thɩ gbɛbɩrɔnɩɩda gɩ.
24 Sɩ ɔbɔɔkɛ kpãkpãadara yʋɔrɩle kɔɔ nɩɛnɩ gele, nĩkhii kɔɔ fʋlɛ wɛr õkona yenyɔraale.
25 Dɩ Jeju we wer dɩ wɩ pɔ, dɩ so war ayɩ: Nɩ jɩrɛ dɩ ca kpalaa fãgadara n ʋʋnɛ tɩbɩlala kpɛ, dɩ wɩrɛ dɔnɩ kɔ̃tɩna n cʋʋ warɛ fãga dɩɩ pho ka.
26 Sɩ na-n ka jɩna mɛ̃ gɩ ha anɩ thɩ̃thɩɩna'. Sɩ tibil wo tibilikɛ n ƴaalɛnɩ ɩnɩ-n dɔ kɔ̃tɩn, dɔ ɔr n ka a do anɩ thɔ̃daar.
27 Sɩ tibil wo tibilikɛ n ƴaalɛnɩ ɩnɩ-n dɔ ƴɛ kʋl anɩ thɩ̃thɩɩn, dɔ ɔr n ka a do anɩ dee.
28 Dɩ mɛ̃ mɛr tibili Bikuun ɩ̃, ga do dɩ tibil na do mar thɔma ga, sɩ mɩ ɩnɛ ɩ̃ ka ɩ̃ do thɔma ɩ̃ 'laana ɩ̃ yi gɩ birse tɩbɩla bərəəm.
29 Ɔbɔɔkɛ wɩ-n thenɩ Jeriko, tibil jɔjʋɔ bərəəm kɔɔ kpar Jejura.
30 Dɩ yara yenyɔ kɔɔ hale a too hʋ nʋɔra. Dɩ ɔbɔɔkɛ wɩ nɩɛnɩ dɩɩ do Jeju n ka, wɩ mar dɩ wa-n hulẽ ayɩ: Kɔ̃tɩn, Davɩdɩɩ Bikuun, jɛ sɩ bʋɔra.
31 Dɩ tibi. jɔɔle mana wɛr ayɩ, wɩ pɩra. Sɩ wɩ bire jɩɩ hulẽ kheu ayɩ: Kɔ̃tɩn, Davɩdɩɩ Bikuun, jɛ sɩ bʋɔra.
32 Dɩ Jeju jɩɩl sa we wɩ a bule wi: Anye nɩ-n ƴaal ɩ̃ cʋɛ nar?
33 Dɩ wɩ birsee: Kɔ̃tɩn, asɩ yi sɩ-n ƴaal gɩ khɛra.
34 Dɩ bʋɔ fʋ Jeju dɩ tha awɩ yirə, dɩ dapaara dɩ wɩ bir yɩ dɩ wa-n kpaaraa.