15
1 Le jɔfʋ bʋ dʋdarasɔ na jɔfʋ dɩɩrdarasɔ the Jerujalɛm a pɔ Jejuu pa a bulee:
2 Mɔ̃gɩdo dɩ afɩ kpãkpãadarasɔ na-n kʋɛ asɩ mama kɔ̃tɩ̃sɔɔ so? Gɩdonɩ a wa kho dɩkor, wa-n phʋɔl awɩbara ga.
3 Dɩ birse wi: Sɩ nɛrɛ dakha, mɔ̃gɩdo dɩ na-n kʋɛ Thãgbaa jɔfʋ dɩɩ do anɩ mama kɔ̃tɩ̃sɔɔ so hɩɩn dɔ kɩrʋ?
4 Gɩdonɩ Thãgba sor ayɩ: «Na cɔ afɩ thɩ na afɩ nɩ» dɩ «ado ntɛ nɩɩr ɔɔ thɩ, a ɔɔ nɩ gɩ, wɩ kʋɔ.»
5 Sɩ ner n yɩ: Ʋrɛɛkɛ na sɔnɩ ɔɔ thɩra agɩbo ɔɔ nɩra nayɩ: Thɩ̃ɛɛkɛ ma kɔɔ ha fɩnɩna gɩ bul fi, gɛr mɩ gba dɩɩ do Thãgbaa khaarda;
6 wa tibilile na hana a cʋ ɔɔ thɩ na ɔɔ nɩ bã; dɩɩ do mɛ̃ anɩ mama kɔ̃tɩ̃sɔɔ so cʋʋ Thãgbaa so dɩɩ debi do mɔlɔ thɩ̃ɛ.
7 Nɛr bɩnɛ yenyɔdara, sobɔr Thãgbaa bobon Ejaɩ kɔɔ so anɩdara ger waa, gɩdonɩ a sor ayɩ:
8 «Nɔfaar tibil ca ƴɩrɛ n cʋna mɛr Thãgba pɔɩ, sɩ dɩ awɩ ha hʋnɔna mɩ fĩi.
9 Fʋɔrɛɛkɛ wɩ-n fʋɔr mɩnɩ, mɔlɔ gɩ, gɩdonɩ jɔfʋʋkɛ tɩbɩla pɛrnɩ wɩ-n dɩɩr tɩbɩla.»
10 Dɩ Jeju wer tibil jɔ dɩ wɩ pɔ dɩ so war: Na-n pɛ nũu a jɛ kɩrʋ.
11 Ga do gɩrɛ n lonanɩ tibil nɔɔ, gɛr na cʋgɛɛ dɩ na bisə', sɩ gɩrɛ n kanɩ the tibili nɔɔ, gɛr dɔ gɩrɛ na cʋgɛɛnɩ dɩ na bise.
12 Dɩ ɔɔ kpãkpãadara tɔr pɔ a sʋʋraa: Fɩ jɩrɛ dɩ thɩmɩɩrɩkɛ fɩ kɔɔ mɩɩnɩ dor nɛ baradaa jɔfʋ bʋ dʋdarara bɛ?
13 Dɩ birse wi: Thɩ̃ɛ wo thɩ̃ɛɛkɛ ɩ̃ Thɩ ƴũ na diirnə', nɛɛ wa phɩɩrna na faa.
14 Nɩ sɛ war. Yara wɛ dɩ wa-n thɔɔ yara. Ado yaarʋ na thɔɔ yaarʋ, wɛr yenyɔ fɛʋ na jiire kõkorro.
15 Dɩ Pɩɛr bulee: Mɩɛnɛ sɩ sokpaakɛɛ kɩrra.
16 Dɩ Jeju birsee: Nɛrɛ dakha, jaa jɩɩr 'lũ ner dakha wo koe?
17 Na jɩ gɩ dɩɩ do thɩ̃ɛ wo thɩ̃ɛ fɛʋʋkɛ n lonanɩ tibili nɔɔ, bucuurə gɩ-n ka ɓo, sɩ agɩpɩ dɩɩ the cuuəə?
18 Sɩ gɩrɛɛkɛ n thɛnɩ tibili nɔɔ gɛr dɔ gɩrɛ n thɛnɩ haarra, dɩ gɛr dɔ gɩrɛra n cʋɛnɩ tibil dɩ bise.
19 Gɩdonɩ tibil haarra, le kpɩɛr puu n the, na tɩɩ kʋr, na khɛ kpɩɩ ƴaalɛ na kũu kpɩɩ ƴaalɛ, na bɔdɛl cʋʋrɛ, na yuur, na sõso so jɩɩr, na tibil i kʋɛrɛ.
20 Gɛr dɔ gɩrɛ n cʋɛnɩ tibil dɩ bise, sɩ a fa phʋɔl afɩbara ga, sa kho dɩkor, gele na cʋʋ tibil da bisə'.
21 Dɩ agɩpɩ, Jeju the le a jal lõ Tɩɩr na Sɩdɔ̃ khʋra.
22 Dɩ hɩnɛ Kanãa khɛr gɩ, a ha ga khʋraalera, a pɔ da-n hulẽ ayɩ: Kɔ̃tɩn, Davɩdɩɩ Bikuun, jɛ mɩ bʋɔra. Ɩ̃ bikhɛr hale dɩ kɔ̃tɛɛbuu na-n hʋɔlɔ jɔɔ ka.
23 Sɩ Jeju na deeraa nʋɔa', dɩ ɔɔ kpãkpãadara tɔ pɔ a sʋʋraa: Weaa a kɔ̃, gɩdonɩ a-n kɩɛr sɛr nʋɔ khiro kpɛ.
24 Dɩ birse wi: Thãgba na thɔ̃ mɩ saagado Ɩjɩrayɛl caraakɛ bureni a ho banaa gaaga.
25 Sɩ khɛrɩle pɔr a gburõkuraa ƴɛ thɩ̃thɩɩn ayɩ: Kɔ̃tɩn, ɩna taa mɩnakɛ.
26 Dɩ Jeju birsee: Ga bɔr dɩ fa gba bɩsanaa dɩko na pɛ benana ga.
27 Dɩ khɛrɩle bir birsee: Sobɔr gɩ wer Kɔ̃tɩn, sɩ bebe n khorrakɛ dakurusɔɔkɛ awɩ hɩ̃hɩ̃sɔ na-n khonɩ dɩ ga-n jaal le dɩko kho paar thʋnɔ.
28 Dɩ le Jeju sʋʋraa: Sobɔr gɩ khɛr, afɩ ha pɛra waa gɩ kɔ̃tɩnɛ. Mɔ̃ fɩ-n ƴaalnɩ, ɔmɛna ga ha. Dɩ wa bɔraalera dɩɩ do ɔɔ bikhɛr kpɛɛrɛ.
29 Agɩpɩ Jeju faa paarɩle sa gbana Galile mɩɩr nɔ nʋɔ da-n jal. Dɩ le a jal a jʋʋn gɔ̃gʋɔna a too.
30 Dɩ le wo tibil jɔjʋɔ tə̃tə̃tə̃ pʋɔraarɛ na nɛ kʋɛdara, na tãdara, na yarasɔ, na nɔ madarasɔ, na wɩ̃ khodaar kpɩɩ jɔɔ. Dɩ wɩ pɔna wɛr a der ɔɔ ƴɛ thɩ̃thɩɩn dɩ a kpɛɛ wɛr.
31 Dɩ mɛ̃ nʋɔ kpaa tibil jɔɔle mɔ̃ wɩ yɩnɩ nɔ madara dɩ wa-n mɩɩ thɩmɩa, na tãdara dɩ wɩ kpɛɛna, dɩ nɛ kʋɛdara na-n sa bɔɔbɔɔ, yarasɔ bir wa-n yɩ. Dɩ tibil jɔɔlera n dʋbɩrɛ Ɩjɩrayɛl Thãgbaa i.
32 Dɩ Jeju wer ɔɔ kpãkpãadara a so war ayɩ: Bʋɔ fʋ mɛr tibil jɔraakɛ, gɩdonɩ wire yẽther ha gɩrɛ wɩ toona mɩnɩ, sɩ wa hana thɩ̃ɛ na khoa'. Dɩ ma ƴaal ɩ̃ bɩlã wɩ na kɔmɛra' agakpaana ga khabɩ wɛr hʋɛra.
33 Dɩ kpãkpãadara sʋʋraa ayɩ: Mɔ̃ sa fʋ sɩ na yɩ kɩɛr dɩkɔ bəənnə thaa, dɩ ga taa bʋɔ dɩ tibil jɔ ca ƴɩrɛ na kho na hi?
34 Dɩ Jeju bule wi: Buru yemɔ̃ nɩ hana? Dɩ wɩ birsee: Makonyɔ gɩ na thʋ̃ yɩra ɩkha.
35 Dɩ a sor tibil jɔraalera wɩ tɔɔ thʋnɔ;
36 agɩpɩ dɩ gba buru makonyɔɔlera na thʋmaalera. Dɩ ɔbɔɔkɛ a bɩɛlnɩ Thãgba pɛr pɩ, a kuure a ha ɔɔ kpãkpãadarasɔ, dɩ kpãkpãadara gba a tɩnɛ tibil jɔɔlera.
37 Dɩ wɛr fɛʋ bɩɛlbɩɛl kɔɔ khor a hi phi, sɩ dakurusɔɔkɛ sɛnɩ kpona makonyɔ wɩ kɔɔ gba dɩɩ hi.
38 Sɩ wɩrɛ kɔɔ khɔnɩ dɩkɔɔlera, wɩ kɔɔ daan kona gbɩlanɩ yenã, sɩ wa ther khɛra na bɩsana a pɛra'.
39 Agɩpɩ dɩ bɩlã dɩphã tibil jɔɔle sa lõ gboroona, a gba da-n jal Magadã khʋra.