14
1 Ga bɔɔlera Ɛrɔɔdɩ fãgadaar buu kɔɔ nɩɛ mɔ̃ Jejuu i the n kpaarnɩ, a so ɔɔ thɔ̃darara ayɩ:
2 Jã Batɩsɩtɩ gɩ, ɔr ɩrɛ a the khirera, gɛr gɩ dɩ puno da-n cʋʋ ga nɔ kpaa thɩ̃sɔɔle.
3 Gɩdonɩ Ɛrɔɔdɩra kɔɔ fʋrɛ Jã a li a to khaɩra. A cʋʋrɛ thale gɩ da Ɛrɔdɩadɩraakɛ dɔnɩ ɔɔ õkuun Filipii khɛr.
4 Gɩdonɩ Jã n kɔɔ sʋʋraarɛ dɩ yɩ: Ga teena dɩ fa tee afɩ õkuuni khɛr na hea'.
5 Dɩ a-n ƴaalɛ a kʋʋ, sɩ dɩɩ do tibil jɔ dɔ nɔɔ dɩ maar na-n fʋʋ, gɩdonɩ wɩ-n hɩɩnɛ Jã dɩ do Thãgbaa bobon.
6 Sɩ wireekɛ wɩ kɔɔ kɔnɩ Ɛrɔɔdɩ, ga wiile daan dɩ wɩ hana fɛtɩ; le Ɛrɔdɩadɩɩ bikhɛr lõ da-n sa bɩna wɩrɛraakɛ wɩ wenɩɩ thɩ̃thɩɩn, dɩ gɩ kɔɔ dar Ɛrɔɔdɩra;
7 dɩ mɛ̃ a kɔɔ ʋlfɛ ayɩ, ɩna haarɛ thɩ̃ɛ wo thɩ̃ɛɛkɛ a na bɩɛlnɩ.
8 Dɩ ɔɔ nɩ kɔɔ tʋɔrɛ pɛr ayɩ ayɛ: Pɛ mɩ kɩɛr dapaara Jã Batɩsɩtɩɩ yʋ kpɛ̃kpɛrɛ̃ biro.
9 Dɩ haar n kɔɔ helle fãgadaarɩle, sɩ gɩdonɩ ɔɔ ʋlfɛɛle na wɩrɛ a wenɩ fɛtɩra dɔ nɔɔ, dɩ so ayɩ, wɩ hanaa.
10 Dɩ a thʋɔn khaɩra dɩ wɩ jal a kʋ Jã a kur yʋʋ.
11 Dɩ wɩ gbaar yʋʋra a pɛr kpɛ̃kpɛrɛ̃ biro a pɔna ha khebir, dɩ khebir gba jalna ha ɔɔ nɩ.
12 Dɩ Jãa kpãkpãadara pɔr a gba khire a dʋ, sa jal a mɩɛ Jeju.
13 Ɔbɔɔkɛ Jeju nɩɛnɩ gele, a faarɛ sa gba gborõo a the le, a jal dɩkhãa pa bəənnə, dɩ tibil jɔ nɩɛrɛ a the dɩɩsɔra a kpaaraa na nɛɛ.
14 Dɩ ɔbɔɔkɛ a-n thenɩ gboroona, a yɩrɛ tɩbɩlaale tə̃tə̃tə̃ dɩ wa-n kʋʋ bʋɔ, dɩ a kpɛɛrɛ awɩ khodara.
15 Ɔbɔɔkɛ dɩɩ dʋɔrnɩ, kpãkpãadara tɔr pʋɔraa a sʋʋraa: Paarɩkɛra sɩ hanɩ bəənnə gɩ, dɩ bɔɔ 'lire kar. Bɩlanɛ tibil jɔɔkɛra, wɩ jal dɩ biisɔra, wɩ the dɩkɔ wɩ kho.
16 Dɩ Jeju birse wi: Ga teena wɩ kɔna ga, nɛrɛɛ thɛthɛ n hana wɩ dɩkɔ wɩ kho.
17 Dɩ wɩ sʋʋraa: Sa hana thɩ̃ɛ saagado buru yemɔɩ na thʋma yenyɔ dɩbara gaaga.
18 Dɩ a sor: Nɩ gba ɛna ha mɩ.
19 Dɩ a sor tibil jɔraalera wɩ tɔɔ ka hʋɔn hanɩ. Dɩ a gbaar buru yemɔɩɩlera na thʋma yenyɔɔle, a gba ƴɩɛ ƴũ sa bɩɛl Thãgba pɛr. Sɩ agɩpɩ, dɩ kuur burura a ha kpãkpãadara, dɩ kpãkpãadara gba tɩnɛ tibil jɔɔle.
20 Dɩ wɛr fɛʋ bɩɛlbɩɛl kɔɔ khor a hi phi, sɩ wɩ gbaar dakuruukɛ wɩ tɩnɛnɩ sa sɩ, dɩɩ hi kpona yʋɔr yenyɔ.
21 Sɩ wɩrɛ kɔɔ khɔnɩ, wɩ thɔɔrɛ kona gbɩlanɩ yemɔɩ, sɩ wa ther khɛra na bɩsana a pɛra'.
22 A gele pɩ dapaara, Jeju tɔr ɔɔ kpãkpãadara pɛr, dɩ wɩ lõ gboroona wɩ kʋʋlʋʋ ƴɩɛ wɩ iir gɩ̃ iiro, ɔbɔɔkɛ a na-n bɩlanɩ tibil jɔɔle.
23 Dɩ ɔbɔɔkɛ a bɩlanɩ tibil jɔɔle pɩ, a gbaar jal jʋʋn gɔ̃gʋɔna dɩbara a bɩɛl Thãgba. Dɩ ɔbɔɔkɛ dɩɩ dʋɔrnɩ, a hale dɩbara.
24 Sɩ gborõo 'lire ha mɩɩr nɔ thɩ̃thɩɩn, dɩ nyʋɔn ubi dɩ ga-n be gborõole, gɩdonɩ jɩɛ wɩ telẽ.
25 Dɩ ɔbɔɔkɛ dɩɩ n lɔrnɩ wɩllɛ, Jeju gbaar da-n pɔ ɔɔ kpãkpãadarara da-n ɩɩr mɩɩr nɔ nyʋɔnna ƴũ.
26 Ɔbɔɔkɛ wɩ yɩɩnɩ da-n ɩɩr nyʋɔnna ƴũ, maar fʋlɛ wɛr dɩɩ ka, dɩ wɩ sor aa: Khĩdidaar ga do. Dɩ gɩdonɩ maar fʋlɛ wɛr, wɩ mar dɩ wa-n hulẽ.
27 Dɩ Jeju so war dapaara ayɩ: Nɩ pɩɛr 'lar mɛr Jeju gɩ, na-n do maar n fʋ na'.
28 Dɩ Pɩɛr birsee: Kɔ̃tɩn, ado fɛr gɩ, sɔ mar ɩ̃ ɩɩr dakha mer nyʋɔnna ƴũ ɩ̃ pɔ far.
29 Dɩ sʋʋraa: Ɩna. Dɩ Pɩɛr the gboroona a ɩɩr nyʋɔnna ƴũ da-n jal Jejura.
30 Sɩ mɔ̃ a yɩnɩ jɩɛ dɩ ga-n the na fãga maar fʋʋrɛ, dɩ a mar da-n mʋʋ nyʋɔnɔ a hulẽ aa: Kɔ̃tɩn, taa mɩ.
31 Dɩ dapaara Jeju 'laa nyɔ̃ɔ fʋʋ sa sʋʋraa: Fɛr ha pɛ 'lũdaar, mɔ̃gɩdo dɩ fa-n baalɔ?
32 Dɩ ɔbɔɔkɛ wɩ lonɩ gboroona jɩɛ kurre.
33 Dɩ wɩrɛ hanɩ gboroona pɔr a gburõku, dɩ wa-n fʋɔr Jeju dɩ wa-n sona aa: Sobɔr gɩ, Thãgbaa Bikuun fɩ do waa gel.
34 Dɩ ɔbɔɔkɛ wɩ kɔɔ iirni iiro pɩ, wɩ jaal a dã Jenejarɛtɩ khʋra.
35 Dɩ ɔbɔɔkɛ tɩbɩla paarɩlera jɩnɩ Jeju, wɩ thɔnanɛ thɩmɩa paar fɛʋ ga bənəəle. Dɩ wɩ kpar khodarasɔ fɛʋ a pɔnanaa.
36 Dɩ wɩ-n phʋʋrʋʋrɛ a ha nɩ hʋɛ ɩna-n thar ɔɔ kẽkẽ nɔrarakɛ dɩbara dɔrɔɔm. Dɩ wɩrɛ fɛʋʋkɛ kɔɔ thaaraanɩ, awɩ kho kpɛɛrɛ.