10
1 Agɩpɩ dɩ Jeju we ɔɔ kpãkpãadara yʋɔr yenyɔ a ha wɩ punone dɩ wa-n weena kɔ̃tɛɛbi hɔ̃hɔlasɔ, wa-n kpɛɛna khoosɔ dɩɩdɩɩ fɛʋ na tãdarasɔ dɩɩdɩɩ fɛʋ.
2 Thɔ̃thɔna yʋɔr yenyɔɔ isɔra ha gɩrɛ: Gacadaar Sɩmɔ̃ɔkɛ wɩ-n wenɩ Pɩɛr na ɔɔ õkuun Ãdire, Jakɩ Jebedee bikuun na Jã ɔɔ õkuun,
3 Filipi na Bartelemɩ, Tomasɩ na Matiəəkɛ dɔnɩ war gbadaar, Jakɩ Alfee bikuun, na Tade,
4 Sɩmɔ̃ɔkɛ dʋɔnnɩ gbɛ̃gbɛrɛ̃ tibil, na Judasɩɩkɛ thɛnɩ Karɩyɔtɩ dɩɩra, kɛ lirenanɩ Jeju.
5 Wɛr dɔ yʋɔr yenyɔɔkɛ Jeju kɔɔ thɔnɩ a so war thakɛ ayɩ: Na-n jal thɩldaraa pa ga, na-n lõ Samarɩdarasɔɔ dɩsɔra ga.
6 Sɩ nɩ ka na jala Ɩjɩrayɛl ca wɩrɛra bureni a ho banaa.
7 Sɩ mɔ̃ nɩ-n jalnɩ na-n mɩa ayɛ, bɔɔ n daan dɩ ƴũ Fãgadaar na-n gba fãga.
8 Na-n kpɛɛnɛ khodarasɔ dakha, na-n ɩrɛ khesɔ khirera, na-n cʋɛ gbulosɔɔ gbuul ga-n pɩ, na-n wea kɔ̃tɛɛbiisɔ na faa. Khaar nɩ 'lɛ, na-n 'laanɛ khaar.
9 Na-n gba dɛ a fʋrɔa', na-n gba war dɩ war yɩra gɩ a to lokaara';
10 na-n fʋrɔ kpakpaar lokaara', na-n gba kẽkena yenyɔa', na-n to nɛfaa ga, na-n fʋrɔ gbʋʋla', gɩdonɩ thɔ̃daar teenanɛ haanɛ.
11 Dɩ dɩ kɔ̃tɩ̃ dɔɔraakɛ na lonɩ, a dɩ buurə gɩ, nɩ bulene ado tibil hale kɛ teananɩ a na tee nɩ. Nɩ tɔɔ le ntɛɛ pa phaphapha gɩ dana wireekɛ na thenɩ le.
12 Sɩ ado na lõ cɔ dɔɔra, nɩ kɔɔ fʋɔrɛɛ.
13 Ado cɔ dɔɔ teere kha, anɩ ha ie n ɓananaa, sɩ ado cɔ dɔɔ na tee kha ga, anɩ ha ie n birə nar.
14 Ɔbɔɔkɛ wa-n tee nɩna', dɩ ga do wɩ-n pɛ anɩ thɩmɩɩ nũu dakha ga, nɩ thɛ cɔ dɔɔrara agɩbo dɩ dɔɔrara, sa kpɛɛnɛ thɩlãkobe anɩ nɛra.
15 Sobɔr mɩ so nar, wireekɛ Thãgba na kɩɩlnanɩ tɩbɩla, Sɔdɔmdara na Gɔmɔɔrdaraa kɩɩlɩkɛ wa 'lɛnɩ na khɩɩr mɔ̃ dɩɩlee kɩɩl na khɩɩrna'.
16 Sɩ nɩ hɩnɛ, banaa nɩ ho dɩ ɩ̃ thɔ̃ kpesɔɔ thɩ̃thɩɩn; gɛr gɩ nɩ kpɛsɛnɛ sii kha sa hana hɛlɛlɛ a hɔ puusɩ̃ɛ.
17 Sɩ na-n jɩɛ dʋ bʋrɛ tɩbɩlala, gɩdonɩ wa fʋlɛ nɛr na jalna kɩɩl paar, wa ciil ner na khasa Juifisɔɔ Thãgba fʋɔr cɔra.
18 Mɛr na dɔ nɔɔ dɩ̃ wa fʋlɛ nɩ na jalna gobanɛrsɔ na fãgadarasɔɔ ƴɛra, gɩ mɩɩ wɩ anɩ ha pɛda na ca kpala dakha.
19 Sɩ ɔbɔɔkɛ wa liirna nɩnɩ, na-n dɛ mɔ̃kɛ na mɩɩnɩ, agɩbo gɩrɛɛkɛ na sona'. Gɩrɛ na sonɩ na ɩ̃ narɛ ga bɔraalera.
20 Gɩdonɩ ga do nɛr na mɩa ga, sɩ anɩ Thɩɩ Thu gɩɩkɛ na mɩanɩ le anɩ bɩnɔ na ha nɩ.
21 õkuun na liirnanɛ ɔɔ õkũu bɩnɔ dɩ wa kʋ; ɔmɛ̃ thɩrɛ na cʋʋ na ɔɔ bɩsã. Bɩsana dakha na ɩɩrɛ na tɛna thɛ na nɛ na cʋʋ dɩ wa kʋʋr wɩ.
22 Tɩbɩla fɛʋ na laar nɛr, gɩ do ɩ̃ i dɔ nɔɔ, sɩ ʋrɛ na yɩranɩ na dana khu paar, ɔr na 'lɛ taarɛ.
23 A wɩ kpoo nar dɩ bɩɛlla, nɩ fuo ca ka dɩ kpɩɩra. Sɩ sobɔr mɩ so nar, na kpaar Ɩjɩrayɛl dɩɩ fɛʋ na pɩ sɩɩ do mɛr tibili Bikuun bire ɩ̃a'.
24 Kpãkpãadaar na hale a na kɔ̃tɩ̃ na jɔ ʋrɛ n dɩrɛɛna', dɩ thɔ̃daar wo na hale a na kɔ̃tɩ̃ na jɔ ɔɔ kɔ̃tã'.
25 Gɩ daan dɩ wa hɩɩn kpãkpãadaar mɔ̃ wɩ-n hɩɩnnɩ ʋrɛ n dɩrɛɛnɩ, wɩ hɩɩn thɔ̃daar dakha mɔ̃ wɩ hɩɩnnɩ ɔɔ kɔ̃tɩ̃. Ado wɩ we cɔdaar kuun Bɛljɛbul, dɩ mɔ̃ wa ka na we dɩphã ɔɔ cɔdara?
26 Gɛr gɩ na-n ma wɩ kpɩɩa', gɩdonɩ thɩ̃ɛ na hale na ker sɩɩ do ga yɩraa ga, dɩ thɩ̃ɛ na hale na ha gbul sɩɩ do wa jɩ gaaga.
27 Gɩrɛ mɩ khe narnɩ pa birə paar, nɩ sɔ gɩ dahɩrɛra tɩbɩla n nɩɛ. Gɩrɛ nɩ nɩɛnɩ bʋ̃bʋʋnɛna, nɩ hulene gi nãsʋrɔ.
28 Na-n ma wɩrɛ n kɔnɩ tomɩr, sɩ wa-n puno thue dɩ wɩ kʋaa ga, sɩ nɩ ka na ma ʋrɛ hananɩ punone a na cʋʋ dɩ anɩ thu na anɩ tomɩ na kʋɛ bu paar dɔɔra.
29 Wa-n dolõ 'lominə yenyɔ war be yenyɔaa? Sɩrakɛ bɩɛl na puno na ji thʋnɔ, sɩ agado anɩ Thɩ tuonaa ga.
30 Anɩ thɛthɛɛ yʋsũsɔrakɛ Thãgba ther ger fɛʋ.
31 Gɛr gɩ na-n do maar na-n fʋ na', anɩ the nɔ khɩɩrɛ a jɔ 'lomĩ jɔjɔjʋɔ.
32 Gɛr gɩ tibil wo tibilikɛ na tuon mini tɩbɩlaa ƴɛra, mɛrɛ dakha ma tuure ɩ̃ Thɩraakɛ hanɩle ƴũu ƴɛra.
33 Sɩ ʋrɛɛkɛ bɔ mɩnɩ tɩbɩlaa ƴɛra, mɛrɛ dakha ma bor ntɛɛle ɩ̃ Thɩraakɛ hanɩle ƴũu ƴɛra dakha.
34 Na-n kpɩɛr ha ɩɩ mɩ ɩna ɩ̃ 'laa thɩɩra ga. Ma ɩ̃ ɩ̃ 'laa ha ɩa', sɩ bajɩna gɩ.
35 Gɩdonɩ mɩ ɩnɛ ɩ̃ pɛr leere bikuunna na ɔɔ thɩ, bikhɩɛnna na ɔɔ nɩ, khɛrra na ɔɔ koo nɩ dakha,
36 dɩ wɩrɛ dɔnɩ tibili cɔdara na fien na do ɔɔ lãlaardara.
37 Ʋrɛ n naannɩ ɔɔ thɩ, a ɔɔ nɩ gɩ, a jɔ mɩ aa teena ma'; dɩ ʋrɛɛkɛ n naannɩ ɔɔ bikuun, a ɔɔ bikhɛr gɩ, a jɔ mɩ aa teena ma'.
38 Dɩ ʋrɛɛkɛ na-n gbaannɩ ɔɔ kʋkʋ thɩr dɩ heen da-n kpana mara', aa teena ma'.
39 Ʋrɛɛkɛ n tɛbanɩ ɔɔ yi, ga ka na buurəəre, sɩ ʋrɛɛkɛɛ yi na kanɩ na bu mɛrɛra, ɔr na lɛ waa gel.
40 Ʋrɛ tea nɩnɩ, mɛr a tee, dɩ ʋrɛɛkɛ tea mɩnɩ, ʋrɛɛkɛ thɔna mɩnɩ a tee dakha.
41 Ʋrɛ teanɩ Thãgbaa bobon Thãgbaa bobon teguu, a na 'lɛr khor Thãgbaa bobonɩ kha; dɩ ʋrɛɛkɛ teanɩ tɩɩ sarʋ tɩɩ sar teguu, a na 'lɛr khor tɩɩ sarʋʋ kha.
42 Ʋrɛɛkɛ na cɛnɩ yɔ ie haarɩkɛrakɛ na ha ɩ̃ kpãkpãadaar pɩɛrʋʋkɛ, gɩdonɩ mɛrra a-n kpa dɩɩ do gɛr dɔ nɔɔ, sobɔr mɩ so nar, ntɛ na 'lee ɔɔ khoa'.