9
1 Dɩ Jeju kɔɔ lʋʋn gboroona a iir lanyʋɔn, sa gba kɔ̃ ɔɔ dʋɔ.
2 Dɩ hɩnɛ, wɩ kɔɔ gbaar gbãgbarʋʋkɛ n phɩnanɩ phɩ̃ paar a pɔnanaa. Dɩ mɔ̃ Jeju yɩnɩ awɩ ha pɛ, a sor gbãgbarʋra: Pɩɛr 'lar ɩ̃ bɩsã, afɩ sopugo hɛl farɛ.
3 Dɩ wɩ̃ jɔfʋ dɩɩrdarasɔ n sor na awɩ bɩ̃ ayɩ: Thãgbaa i kuunikɛ n kʋɛ.
4 Dɩ mɔ̃ Jeju jɩnɩ awɩ kpɩɛr, a bule wer ayɩ: Mɔ̃gɩdo dɩ nɩ hana kpɩɛr puu thakɛ anɩ bɩnɔ?
5 Gɩmɔ̃ yɔɔnɛ sorra: Afɩ sopugo hɛl farɛ gɩ yaa, agɩbo ɩrɛ jala gɩ?
6 Sɩ mɔ̃ na fʋnɩ sɩ na jɩ, dɩ mɛr tibili Bikuun hananɛ hʋɛ thɩɩra dɩ ɩ̃ faana sopugo, sa bir so gbãgbarʋra: Ɩrɛ, gba afɩ phɩ̃ pa na kɔna.
7 Dɩ a ɩɩrɛ da-n kɔ̃ ɔɔ cɔ.
8 Mɔ̃ tibil jɔɔle yɩnɩ gele, maar fʋlɛ wɛr dɩ wa-n dʋbɩ Thãgbaakɛ hananɩ tɩbɩla ga puno caale.
9 Dɩ Jeju tɔr na jal gbe, a yɩ kũu bɩɛlɩkɛ wɩ-n wenɩ Matiə dɩ too war gba paar da-n tee war, dɩ sʋʋraa: Na kpa mar. Dɩ Matiə ɩɩr da-n kpaaraa.
10 Dɩ Jeju kɔɔ har dɩko kho paar cʋɔrɔ, dɩ war gbadara jɔɔ na sopugodara kɔɔ toonanɛ kha Jeju na ɔɔ kpãkpãadarasɔ.
11 Mɔ̃ jɔfʋ dɩɩrdara yɩnɩ thɩ̃ɛ thale, wɩ sor ɔɔ kpãkpãadarara: Mɔ̃gɩdo dɩ anɩ dɩɩrdaar na-n kho dɩkɔ na war gbadara na sopugodarasɔ?
12 Dɩ mɔ̃ Jeju nɩɛnɩ gele, a so warɛ: Ga do tɩɩ khena n kɔɔ ƴaalɛ dɔtɔrɔa', sɩ wɩrɛ gɩ-n khonɩ gɩ.
13 Nɩ jala na dɩrɛ a jɛ thɩmɩɩrɩkɛɛ kɩr, kɛ sɔnɩ Thãgbaa sɛbɛra ayɩwɔɔ: «Bɔ donanɛ mɛr Thãgba n ƴaal, ga do bonɩ jir ga.» Gɩdonɩ ga do fɩl sardara mɩ ɩ̃ ɩ̃ ƴaala', sɩ sopugodara wɛ.
14 Le Jã Batɩsɩtɩɩ kpãkpãadarasɔ pɔ Jejura a bulee: Mɔ̃gɩdo dɩ se wer na jɔfʋ bʋ dʋdarasɔ na-n li nʋɔ, sɩ afɩ kpãkpãadarasɔ wer na-n li nʋɔa'.
15 Dɩ Jeju birse wi: Nɩ-n kpɩɛrɛ dɩ wɩrɛɛkɛ wɩ wenɩ herra na punone wa-n bɩ bɔɔkɛ wɩ hanɩ kha na khɛr he ya? Sɩ wiresɔ na hale wa hɛl warnɩ khɛr he. Le wa li nʋɔ dɩphã.
16 Tibil na gba kẽkẽ phaa na kur na bɛbɩna kẽkẽ tɩ̃a', gɩdonɩ daphaale na-n haalɛ datɩ̃ɩ, gɩ do gɩ ka ɓəəre dɩphã waa a ka puuro ka.
17 Wa-n gba dakha thʋʋrɩkɛ dɔnɩ daphaa a pɛ bʋla tɩɩna ga. A wɩ cʋʋ mɛ̃, bʋlaa na wɩɛlɛ dɩ thʋʋr na deer, gɩ do bʋlaale kʋɛrɛ mɛ̃. Sɩ wɩ-n pɛr thʋ phaa bʋla phaara oti dɩɩ gbɛbɩ too.
18 Ɔbɔɔkɛ Jeju kɔɔ hanɩ da-n mɩɩ wɩ ga thɩmɩɩsɔɔkɛ, kɔ̃tɩ̃ bɩɛl pɔr dã a gburõkuraa ƴɛ thɩ̃thɩɩn sa so: Ɩ̃ bikhɛr khire ga pʋɔr pa', sɩ ɩna a dɛɛnaa nyɛ̃ɛ a na bɩre na hana yɩre.
19 Dɩ Jeju ɩɩrɛ da-n kpaaraa nakha ɔɔ kpãkpãadara.
20 Dɩ hɩnɛ khɛ bɩɛl gɩ, a kɔɔ hale a hana tɩ̃ɩ a cʋʋna yɛna yuɔr yenyɔ, dɩ a tɔr pɔ Jejura khiro a thaaraaa kẽkẽ nʋɔra.
21 Gɩdonɩ a kɔɔ sor le na ɔɔ bɩ̃ ayɩ: A mɩ punonakɛ a thar ɔɔ kẽkẽ haraakɛrakɛ sɩ ma kpɛɛrɛ.
22 Dɩ mɔ̃ Jeju kɩɩlnɩ a yɩɩ a sʋʋraarɛ: Pɩɛr 'lar ɩ̃ bikhɛr, afɩ ha pɛ kpɛɛnɛ fɩ; dɩ dapaara khɛrɩlee kho kpɛɛ.
23 Dɩ ɔbɔɔkɛ Jeju danɩ kɔ̃tɩnɩ cɔ, a yɩrɛ bel ʋ̃dara na tɩbɩla jɔɔ dɩ wa-n khɔ̃, dɩ a so warɛ:
24 Nɩ tɔ birə gɩdonɩ khebirrə na khə', sɩ a-n daarɛ; sɩ wɩ-n maanʋʋnɛ.
25 Ɔbɔɔkɛ a tini tibil jɔɔle dɩ wɩ thɩɩr, a lʋʋn a fʋ khebirrə nyɔ̃ɔ dɩ pal ɩɩr.
26 Dɩ ga tutugo kɔɔ kpaarɛ paar fɛʋ ga bənəəle.
27 Mɔ̃kɛ Jeju thenɩ le da-n jal, yara yenyɔ n kpaaraarɛ dɩ wa-n hulẽ ayɩ: Jɛ sɩ bʋɔrarakɛ ya, Davɩdɩɩ Bikuun.
28 Dɩ mɔ̃ a lonɩ cʋɔrɔ na pɩ, yaraale pɔr wɔrɔ̃ɔ dɩ bule wi: Nɩ pɛrɛ haar ma punone gelela a na cʋʋ ya? Dɩ wɩ birsee: Ɔɔ, Kɔ̃tɩn.
29 Dɩ le a tha war yinəna sa so: Mɔ̃ anɩ ha pɛ hanɩ, ɔmɛna ga ha.
30 Dɩ awɩ yi khɛrrɛ. Sɩ Jeju jɩɛ kpãkpãa war thakɛ dɩɩ khɩɩr ka ayɩ: Nɩ jɩɛ dʋ bʋrɛ, na-n do tibil n jɩ thɩ̃ɛɛka';
31 sɩ mɔ̃ wa thenɩ, dapaara wɩ mar ɔɔda a be dɩ wa-n wɩɛl ga bənəəle koo.
32 Mɔ̃kɛ wa thenɩ le, wɩ kpar kuunikɛ hananɩ kɔ̃tɛɛbu nɔ madaar a pɔnanaa.
33 Dɩ a weeraarɛ kɔ̃tɛɛbuule sɩ dɩ nɔ madaarɩle na-n mɩɩ thɩmɩa dɩphã. Dɩ nʋɔ kɔɔ kpaarɛ tibil jɔɔle dɩ wa-n so: Sa kɔɔ yɩ thɩ̃ɛ thakɛ Ɩjɩrayɛl dɩɩra kpɩɩraka'.
34 Sɩ jɔfʋ bʋ dʋdarasɔ wer na-n so ayɩ: Kɔ̃tɛɛbiisɔɔ kɔ̃tɩ̃ n hanaa fãga dɩ weena kɔ̃tɛɛbii.
35 Dɩ Jeju n kɔɔ kpaarɛ dɩ kɔ̃tɩnasɔra fɛʋ na dɩ biisɔra, da-n dɩɩr tɩbɩla thɩ̃ɛ Juifisɔɔ Thãgba fʋɔr cɔnanɔ, da-n mɩɩna tutugo bʋɔɔkɛ dɔnɩ ƴũ fãgadaar doda, da-n kpɛɛna khoosɔ dɩɩdɩɩ fɛʋ na tãdarasɔ dɩɩdɩɩ fɛʋ.
36 Sɩ mɔ̃ a yɩnɩ tibil jɔɔle, bʋɔ fʋʋrɛ gɩdonɩ wɩ thʋnɛ vɔɔ dɩɩ ka war, dɩ wa-n puno bã a ho banaakɛ na hananɩ khekha'.
37 Dɩ le a so ɔɔ kpãkpãadarara ayɩ: Jɔ jɔrɛ, sɩ jʋ kha na kpɛra'.
38 Gɛr gɩ na-n bɩɛlnɛ ʋrɛ dɔnɩ Kɔ̃tɩn jʋ kharra a thɔna thɔ̃dara wa-n kha jɔ.