8
1 Ɔbɔɔkɛ Jeju kɔɔ thenɩ gɔ̃gʋɔna da-n gbũ, tibil jɔjʋɔ kɔɔ kpaaraarɛ.
2 Dɩ gbuul bɩɛl pʋɔraa, a gburõku ɔɔ ƴɛra, sa sʋʋraa: Kɔ̃tɩn, ado fɩ ture fɩ punone cʋʋ mɩ dɩ ɩ̃ gbuul pɩ.
3 Dɩ Jeju 'laa nyɔ̃ɔ a thaaraa sa sʋʋraa: Mɩ ture afɩ gbuul n pɛ. Dɩ dapaara ɔɔ gbuul pɩɩraa.
4 Agɩpɩ Jeju sʋʋraa: Jɩɛ dʋ bʋrɛ fa-n so tibillə ga, sɩ jala nɛna Thãgbaa bonɩ jidaar mɔ̃ fɩ hanɩ, a 'laanɛna phɔphʋɔl thɩ̃ɛɛkɛ Mʋɩjɩ kɔɔ sonɩ, gɩ nɩna tɩbɩla fɛʋ dɩ fɩ kpɛɛrɛ.
5 Mɔ̃kɛ Jeju kɔɔ lonɩ Kapɛrnayʋm, sɔrasɛ tamaa kɔ̃tɩ̃ bɩɛl pʋɔraarɛ da-n phʋʋrʋʋ thakɛ ayɩwɔɔ:
6 Kɔ̃tɩn, ɩ̃ thɔ̃daar hale a gbãgbar, a phɩ̃ le cʋɔrɔ da-n 'wãga jɔɔ ka.
7 Dɩ Jeju sʋʋraa: Mɛrɛ, ma jaal a na kpɛsɛɛ.
8 Dɩ sɔrasɛ tamaa kɔ̃tɩnna birsee ayɩ: Kɔ̃tɩn, ma teena dɩ fa lõ ɩ̃ cɔa', sɔ nɔ haarɩkɛrakɛ dɔrɔɔm, sɩ ɩ̃ thɔ̃daar na kpɛɛrɛ.
9 Gɩdonɩ mɛrɛ dakha, mɩ hananɛ ɩ̃ kɔ̃tɩ̃sɔɔkɛ jɔ mɩnɩ, dɩ mɩ hananɛ dakha sɔrasɛsɔɔkɛ mɩ jɔnɩ. A mɩ so bɩɛlla: Jala, dɩ jal. A mɩ so bɩɛlla wo ayɩ: Ɩna, dɩ ɩ̃. A mɩ so ɩ̃ thɔ̃daarra: Gʋɛ gɩrɛ, dɩ cʋʋ.
10 Dɩ ɔbɔɔkɛ Jeju nɩɛnɩ dɩ mɩɩna thale pɩ, nʋɔ kpagʋʋrɛ dɩ so wɩrɛraakɛ n kpaaraanɩ ayɩ: Sobɔr mɩ so nar, Ɩjɩrayɛl dɩɩrarakɛ, ma kɔɔ yɩ tibil bɩɛllakɛ dɩ thʋ̃ hana ha pɛrɛ dɩɩ kɔ̃tɩ̃ thaka'.
11 Dɩ gɛr gɩ mɩ so narɛ gɩrɛ, tibil jɔjʋɔ na ther wi phã paar na wi lõ paar, a na too dɩko kho paar na Abɩraham, na Ɩjakɩ, na Jakɔbɩ ƴũ fãgadaarɩ dɩra.
12 Sɩ wa dʋnanɛ ƴũ fãgadaarɩ dɩɩ bɩsãsɔ jɩɛra dabirə paar na faa, ka wa bɩnɩ wa-n yɩrna nyɩma.
13 Agɩpɩ Jeju sor sɔrasɛ tamaa kɔ̃tɩnaale ayɩ: Kɔna, mɔ̃ fɩ pɛrnɩ haar ɔmɛna ga ha; dɩɩ do wa bɔraalera thɔ̃daarɩlee kho kpɛɛrɛ.
14 Agɩpɩ Jeju gbaar jal Pɩɛrɩ cɔ, a yɩ Pɩɛrɩ khɛrɩ nɩ dɩ phɩ̃ na tomɩ kporre,
15 dɩ a thaaraarɛ nyɔ̃ɔ dɩɩ do ɔɔ tomɩ kpor ɩɩraarɛ, dɩ pal ɩɩr a teguu kpakpaalɛ.
16 A dɩɩ dʋɔr, wɩ kɔɔ kpar kpãkpũdara jɔɔ a pɔnanaa. Dɩ a weere kɔ̃tɛɛbiisɔ na thɩmɩɩ bi bɩɛl, a kpɛɛna dakha khodara fɛʋ.
17 Dɩ mɛ̃ gɩrɛ Thãgbaa bobon Ejaɩ kɔɔ sonɩ dã ayɩ: «Ɔr kɔɔ wea asɩ tomɩ sɩsɔ a hɛlna asɩ khosɔ a faa.»
18 Mɔ̃ Jeju yɩnɩ tibil jɔ dɩ wɩ jɛ a kpalalaa, a 'laarɛ hʋɛ ɩnɩ-n ire iiro.
19 Dɩ jɔfʋ dɩɩrdaar bɩɛl tɔr wɔrɔ̃ɔ a sʋʋraa: Dɩɩrdaar, ma-n kpa farɛ paar wo paarɩkɛ fɩ-n jalnɩ.
20 Dɩ Jeju birsee: Ɓãɓoisɔ hananɛ awɩ ka, dɩ 'lominə hana awɩ tɛl, sɩ mɛr tibili Bikuun na hana ka ma jəəni yʋa'.
21 Tibil bɩɛl wo kpãkpãadarara sʋʋraa: Kɔ̃tɩn, ha mɩ hʋɛ ɩ̃ jal ɩ̃ dʋ ɩ̃ thɩ bo.
22 Sɩ Jeju birsee ayɩ: Na kpa mar sa sɛ khesɔra wa-n dʋ awɩ khisɔ.
23 Dɩ Jeju kɔɔ lʋʋn gboroona, dɩ ɔɔ kpãkpãadara kpaaraarɛ.
24 Dɩ le jɛkhu kɔ̃tɩ̃ɩ ɩɩr mɩɩr nɔɔra, dɩ gborõo na-n ibi nyʋɔn. Sɩ Jeju wer ha da-n daar,
25 dɩ kpãkpãadara tɔr pɔ a jagʋʋ sa sʋʋraa: Kɔ̃tɩn, taa sɩ sɩ-n khiire.
26 Dɩ bule wi ayɩ: Mɔ̃gɩdo dɩ maar fʋ nɩ, nɛrɛɛkɛ kanɩ hana ha pɛrɛ gbe? Le a ɩɩr a mana jɩɛ na mɩɩr nɔɔ, dɩ thɩ̃ɛ na-n tutugo bã.
27 Dɩ nʋɔ kɔɔ kpaarɛ tɩbɩlaale dɩ wa-n bule ayɩ: Anyee tibil ca ha ʋrɛ ya fɛ, dɩ jɩɛrakɛ na mɩɩr nɔɔ na-n nɩɩ nũu?
28 Ɔbɔɔkɛ Jeju iirni gɩ̃ iiro Gadarɛ̃daraa dʋɔ na pɩ, kona yenyɔɔkɛ hananɩ kɔ̃tɛɛbii ther khi dʋ paar dɩ wa-n caanʋʋ. Wɩ-n kʋrɛ maar ka, dɩ tibil na-n 'la dɩ kana hʋɛɛla'.
29 Dɩ wɩ mar dɩ wa-n hulẽ ayɩ: Anye sɩ ha kha na fɛr, Thãgbaa Bikuun? Fɩ ɩnɛ kɛ fɩ hʋɔl sar, sɩ bɔɔ na dã na paa ya?
30 Sɩ dabulo sɩthɔ jɔɔ wɛ a kɔɔ hale ƴɔɔ dɩ wa-n khʋʋl.
31 Dɩ kɔ̃tɛɛbiirə na-n phʋʋr Jeju thakɛ ayɩ: Ado fɩ wee sɩ, thɔna sɩ sɩ lõ sɩthɔsɔraale.
32 Dɩ a so warɛ: Nɩ jala. Dɩ wɩ thɩɩr a jal a lõ sɩthɔsɔraale bɩnɔ, a tinə wi fɛʋ dɩ wɩ ca birbirbir na gɔ̃gɔ̃ horʋ, a jiir mɩɩr nɔɔra, a khiir le nyʋɔnɔ.
33 Dɩ wɩrɛɛkɛ n khɛ wɩnɩ, wɩ kɔɔ car kɔ̃, a mɩɩ dɩɩra thɩ̃ɛ fɛʋ na gɩrɛ kɔɔ dananɩ kuunnaakɛ kɔɔ hananɩ kɔ̃tɛɛbiisɔ.
34 Dɩ tɩbɩla fɛʋ dɩɩra ther jal Jejuu pa; dɩ ɔbɔɔkɛ wɩ yɩɩnɩ, wɩ phʋʋrʋʋrɛ ayɩ a thɛ nɩ dɩɩra.