7
1 Na-n fi do kɩɩldara ga, dɩ mɛ̃ Thãgba na do nar Kɩɩldaara'. Mɔ̃ nɩ fi nɩ do kɩɩldara, mɛ̃ Thãgba na do nar Kɩɩldaar.
2 Gɩdonɩ mɩɛda ca ʋrɛ nɩ-n kɔɔ mɩɛnanɩ thɩ̃ɛ, ɔr wa mɩɛna na ha nɩ.
3 Mɔ̃gɩdo dɩ fɩ ka gar yire hɔ̃ phɩɩnaakɛ hanɩ afɩ omii yiro, sɩ fa-n ka dɩ fɩ hɩɩn kparrɛɛkɛ hanɩ afɩ yiroə?
4 Wo mɔ̃ fa fʋ sɩ na so afɩ omina nayɩ: Jɩlɛ ɩ̃ ti hɔ̃ phɩ̃ɩkɛ ha fɩnɩ yiro, sɩɩ dorakɛ kparrɛ hale afɩ yiro?
5 Fɛr bɩnɛ yenyɔdaar, te kparrɛɛkɛ hanɩ afɩ yiro ɓo, le fa jɩɩ yɩ hɔ̃ phɩ̃ɩkɛ hanɩ afɩ omii yiro dɩphã a na ti.
6 Na-n gba Thãgbaa thɩ̃ a na ha bena ga, anaa wa kɛrna fɛr a na cɛcɛbɛ fɩ. Na-n gba dakha anɩ dɛ thɩ̃ a na dʋna sɩthɔra ga, anaa wa bɩɩrnanɛ thɩɩ.
7 Na-n bɩɛlnɛ na 'lɛr, na-n ƴaalɛ na yɩɛrɛ, na-n bɛ loo wa khɛr nɛr.
8 Gɩdonɩ tibil wo tibilikɛ n bɩɛlnɛnɩ a-n 'lɛr, dɩ ʋrɛɛkɛ n ƴaalɛnɩ a-n yɩɛrɛ, dɩ ʋrɛɛkɛ n bɛnɩ loo wa khɛrʋʋrɛ.
9 Ʋmɔ̃ɔ tibil anɩ thɩ̃thɩɩn ɔɔ bi na bɩɛllɔ buru dɩ na haa bokaar?
10 A thʋm a bɩɛl a haa sii?
11 Ado nɛrɛɛkɛ dʋɔnnɩ tɩɩ puusɔ jɩ thɩ̃ bʋɔ a na ha anɩ bisɔ, mɔ̃ ga thʋ̃ na da anɩ Thɩraakɛ hanɩle ƴũ na pɔna, a na gba thɩ̃ bʋɔ na ha wɩrɛɛkɛ n bɩɛlnɛnaa?
12 Thɩ̃ɛ wo thɩ̃ɛɛkɛ nɩ-n ƴaalnɩ tɩbɩla na-n cʋɛ nar, nɛrɛ dakha na-n cʋɛ ga thɩ̃ ca wɛrra, gɩdonɩ gɛr dɔ gɩrɛ Mʋɩjɩɩ jɔfʋ na Thãgbaa bobonaa so sonɩ.
13 Na-n lona na lõfonʋɔɔkɛ 'luruneni fɩɩʋ, gɩdonɩ lõfonɔ pɩɛ hə̃ə na hʋ pɩɛ hə̃ə dʋɔn gɩrɛ n jalananɩ bu paar, dɩ wɩrɛ kɛ harɔnɩ wɩ jɔrɛ ka.
14 Sɩ wɩrɛɛkɛ yɛnɩ lõfonʋɔɔkɛ 'luruneni ka, na hʋɛɛkɛ hanɩ ɓɩnɩnɩnɩ kɛ n jalanɩ yire khorra, wa kpɛra'.
15 Na-n jɩɛ dʋ bʋrɛ sõso bobonasɔra, wɩ-n debire a ho banaasɔ a na pɔ anɩ pa, sɩ awɩ bɩnɔ kpe wɛ, kɛ n phʋnɛnɩ.
16 Sɩ awɩ biikɛ wɩ-n senɩ na jɩna wɩ. Fa khʋnɛ ɓãɓar be ʋsɩɛra ya? Dɩ fa yɛɛrɛ bara dakha pabɩrʋra ya?
17 Thale gɩ, thɩrʋ wo thɩrʋʋkɛ dɔnɩ thɩr bʋɔ, bi bɔɩra a-n se, dɩ thɩr puu na-n se bi puu oti.
18 Thɩr bʋɔ na puno na se bi puə', dɩ thɩr puu na puno na se bi bʋɔ dakha ga.
19 Dɩ thɩrʋ wo thɩrʋʋkɛ na-n sɛnɩ bi bʋɔa', wa kurre na dʋna dɔɔra.
20 Dɩ gɛr gɩ awɩ birəəkɛ wɩ-n senɩ na jɩ wɩ.
21 Ga do wɩrɛ fɛʋʋkɛ n wɛ mɩnɩ Kɔ̃tɩn, Kɔ̃tɩn, na lona ƴũ fãgadaarɩ dɩra ga, sɩ ʋrɛ dɩbara n cʋɛnɩ ɩ̃ Thɩɩkɛ hanɩle ƴũu tuur.
22 Tibil jɔjʋɔ na so marɛ dawiile nayɩ: Kɔ̃tɩn, Kɔ̃tɩn, ga do afɩ i sɩ kɔɔ gba dɩ sa-n tinə Thãgba tukɩrʋaa? Ga do afɩ i sɩ kɔɔ gba a weena kɔ̃tɛɛbiisɔaa? Ga do afɩ i sɩ kɔɔ gba a cʋʋna nɔ kpaa thɩ̃ jɔjʋɔaa?
23 Liir ma so war casɩ nayɩ: Ma kɔɔ jɩ nɩnakɛ kpɩɩa', nɩ hala sa sɛ mɩ nɛrkɛ dɔnɩ sopugo cʋʋdara.
24 Mɛ̃ gɩ tibil wo tibilikɛ nɩɛnɛnɩ ɩ̃ thɩmɩɩsɔɔkɛ a yɩr da-n cʋʋ, a na hʋrɛ kũu kpɛsɛɛkɛ thɛnɩ ɔɔ cɔ boka nã thɛrɛɛra.
25 Dɩ thãgba nyʋɔn n daan, dɩ nyʋɔn be poo a gbʋma, dɩ jɩɛ ɩɩrɛ dɩ ga-n be cʋɔrɩle, sɩ ga jə', gɩdonɩ boka nã thɛrɛɛra wɩ thɩɩ.
26 Sɩ tibil wo tibilikɛ nɩɛnɛnɩ ɩ̃ thɩmɩɩsɔɔkɛ sɩ aa-n cʋa', a na hʋrɛ kũu də̃bəəluukɛ thɛnɩ ɔɔ cɔ gbalãkothɩnna.
27 Dɩ thãgba nyʋɔn n daan, dɩ nyʋɔn be poo a gbʋma, dɩ jɩɛ ɩɩrɛ dɩ ga-n be cʋɔrɩle dɩɩ do gɩ təəre ji, dɩ ɔɔ jirə puurore ka.
28 Dɩ ɔbɔɔkɛ Jeju kɔɔ mɩɩnɩ thɩmɩaakɛ dɩɩ pɩ, nʋɔ kɔɔ kpaarɛ tibil jɔɔle ɔɔ dɩɩrra.
29 Gɩdonɩ a dɩɩr wɛr mɔ̃ a hananɩ hʋɛ, ga ho mɔ̃ jɔfʋ dɩɩrdarasɔ n dɩɩr wɩna'.