11
1 Ɔbɔɔkɛ Jeju kɔɔ dɩɩrnɩ ɔɔ kpãkpãadara yʋɔr yenyɔ thɩ̃ɛɛkɛ pɩ, a ther le a jal da-n dɩɩr tɩbɩla da-n mɩɩna wɩ Thãgbaa thɩmɩɩ awɩ dɩsɔra.
2 Jãakɛ wɩ kɔɔ fʋnɩ a to khaɩra, a nɩɛrɛ thɔmaakɛ Kirisiti n cʋʋnɩ, dɩ a thʋɔn ɔɔ kpãkpãadara wɩ jala bulenee ayɛwɔɔ:
3 Fɛr dɔ ʋrɛɛkɛra na ɩnanɩ yaa, agɩbo dɔ sa-n pɩɛr tɩɩ kpɩɩ?
4 Dɩ Jeju birse wi: Nɩ kɛra birə a sɔ Jana gɩrɛɛkɛ nɩ-n nɩɛnɩ na gɩrɛɛkɛ nɩ-n yɩnɩ:
5 Yarasɔ n yɩrɛ, nɛ kʋɛdarasɔ n sar bɔɔbɔɔ, gbulosɔɔ gbuul pɩrɛ, dɩ nʋrasɔ khɛrrɛ, dɩ khesɔ n ɩɩrɛ dɩ wɩ the khirera, dɩ bɔdara nɩɛrɛ Thãgbaa tutugo bʋɔɔ thɩmɩɩ.
6 Sɩ gɩ da ʋrɛraakɛ ma doronɩ nɛ baradaa ga.
7 Ɔbɔɔkɛ tɩbɩlaakɛ kɔnɩ na pɩ, Jeju mar da-n mɩɩ tibil jɔɔle Jãadara aa: Anye nɩ kɔɔ ka jal bəənnə a hɩɩn? Poo balãsɩɩkɛ jɩɛ n khəəfəni gɩ ya?
8 Dɩ anye nɩ kɔɔ jal yɩ? Kuunikɛ n tɔnɩ kẽkẽ ɓʋ̃ɔ gɩ ya? Nɩ hɩnɛ wo wɩrɛɛkɛ n tɔnɩ kẽkẽ ɓɔna fãgadaraa cɔ wɩ-n ha.
9 Dɩ anye nɩ kɔɔ jal yɩ? Thãgbaa bobon gɩ ya? Mɩ so narɛ, sobɔr gɩ, bɩɛlɩkɛ jɔnɩ Thãgbaa bobon gɩ.
10 Jãada dɔ gɩrɛ kheranɩ kɩɛr Thãgbaa sɛbɛraakɛ ayɩ: «Hɩnɛ, mɛr Thãgba thɔna ɩ̃ thɔ̃thɔ̃, dɩ na kʋʋl fɩ ƴɩɛ, a gbɛbɩrɩ fɩ hʋɛ afɩ ƴɛ kʋʋlɔ.»
11 Sobɔr mɩ so nar, wɩrɛ fɛʋraakɛ khɛra n kɔnɩɩ thɩ̃thɩɩn, bɩɛl na hale a ɩɩr a kɔ̃tɩ̃ a jɔ Jã Batɩsɩtɩ kpɩɩraka'. Sɩ ʋrɛ kanɩ do dabuu fɩɩʋ ƴũ fãgadaarɩ dɩra, a kɔ̃tɩnɛ a jɔ Jã.
12 A fʋna Jã Batɩsɩtɩɩ bɔɔ a dana nɛnɛ̃kɛ, wɩ-n pɛrɛ fãga dɩ wa-n lõ ƴũ fãgadaarɩ dɩra, dɩ wɩrɛ n pɩɛrnɩ fãga, wɛr hɩna.
13 Gɩdonɩ Thãgbaa bobonasɔ fɛʋ na jɔfʋ, gɩ kɔɔ mɩɩrɛ Thãgbaa so a dana Jãa bɔɔ.
14 Dɩ ado nɩ ƴaalɛ nɩ tu gi, ɔr dɔ Elɩra teananɩ a ɩna.
15 Ntɛɛkɛ hananɩ nũu dɩ nɩna, dɔ a na-n pɛ nũu.
16 Ana ma cʋna nĩdaraakɛ dɩphã ya fɛ? Wɩ hʋrɛ bɩsanasɔɔkɛ n tɔɔnɩ ƴatɔɔ, dɩ wa-n we awɩ 'walãkhasɔ dɩ wa-n so:
17 Sɩ kɔɔ ʋnɛ bɩɩl nɛrɛra, sɩ na kɔɔ sa ga, sɩ kɔɔ khɩɩrɛ nɛrɛra, sɩ na kɔɔ ba'.
18 Gɩdonɩ Jã kɔɔ ɩnɛ, aa-n kɔɔ kho dɩkora', aa-n kɔɔ yɔ thɩ̃a', dɩ wɩ jɩɩl sa yɩ: Kɔ̃tɛɛbuu hanaanɛ.
19 Dɩ mɛr tibili Bikuun ɩ̃ wo, a thɩ̃ɛ mɩ-n kho, a thɩ̃ɛ mɩ-n yɔ, dɩ wɩ jɩɩl wo sa yɩ: Hɩnɛ, kũu kɛ̃kɛbɩ gɩ, a dona ta yɔn, war gbadara na sopugodaraa kuun gɩ. Sɩ gɩrɛɛkɛ Thãgbaa kpɛsɛ n cʋʋnɩ n nɩnanɛ dɩ sobɔr har kpɛsɛrɛɛlee pa.
20 Le Jeju ma da-n phaan dɩɩsɔɔkɛ a kɔɔ cʋʋrɔnɩ ɔɔ nɔ kpaa thɩ̃sɔ jɔɔ, gɩdonɩ ha debire na kɔɔ hala', ayɩ:
21 Ga puu farɛ Korajɛ̃ dɩɩ, ga puu farɛ Bɛcaɩda dɩɩ, gɩdonɩ ado nɔ kpaa thɩ̃ɛɛkɛ cʋɛnɩ anɩ thɩ̃thɩɩn kɔɔ cʋʋrɛ mɛ̃ Tɩɩr na Sɩdɔ̃ dɩɩra, wa kɔɔ mãa debire haar kɛkɛkɛ, sɩ na to bɔrɔ na bʋlna thoo.
22 Gɛr gɩ dɩ ɩ̃ so nar: Wireekɛ Thãgba na kɩɩlnanɩ tɩbɩla, Tɩɩrdara na Sɩdɔ̃daraa kɩɩlɩkɛ wa 'lɛnɩ na khɩɩr mɔ̃ anɩ kɩɩl na khɩɩrna'.
23 Sɩ fɛrɛ Kapɛrnayʋm dɩɩ, Thãgba na khəi fer na jʋʋnna ƴũ ya? Ǝ̃'ə̃, Thãgba na gbumo fer dɩ fa thʋ khĩdi dɩɩ. Gɩdonɩ ado nɔ kpaa thɩ̃ɛɛkɛ kɔɔ cʋɛnɩ afɩ pa Sɔdɔm gɩ kɔɔ cʋʋ, ga dor a na kɔɔ hale na dana nĩ.
24 Gɛr gɩ dɩ ɩ̃ so nar: Wireekɛ Thãgba na kɩɩlnanɩ tɩbɩla, Sɔdɔmdaraa kɩɩlɩkɛ wa 'lɛnɩ na khɩɩr mɔ̃ anɩ kɩɩl na khɩɩrna'.
25 Ga bɔɔlera Jeju gba thɩmɩa da-n mɩɩ ayɩ: Thɩrɛ, mɩ-n fʋɔr fɛr, fɛrkɛ dɔnɩ Kɔ̃tɩn thãgbara ƴũ na thɩɩra, gɩrɛraakɛ fɩ kɔɔ kernɩ thɩ̃ɛsɔɔkɛra kpɛsɛdarara na thɩ̃ jɩnana, sa gba gɩ a nɩna bɩsã bii.
26 Ɔɔ Thɩrɛ, fɛr gɩ kɔɔ da haar dɩ fɩ cʋʋ mɛ̃.
27 Ɩ̃ Thɩ gbaar thɩ̃ɛ fɛʋ a dʋ mɩ nyɔ̃kɔɔ, sɩ tibil na jɩ Bikuun saagado Thɩrɛ gaaga, dɩ tibil na jɩ Thɩrɛ dakha saagado Bikuun gaaga, saagado wo Bikuunna ɔr ƴaalɛ a nɩrɔ n taa ga.
28 Nɩ ɩna mɛrɛra, nɛrɛ fɛʋʋkɛ n vɔɔnɩ kɛ n heenenɩ dakha heendaakɛ dɩbarɔnɩ, dɩ ma ha nɛr hɩɩrɛ.
29 Nɩ tɔ kpeleleekɛ dɔnɩ ɩ̃da, dɩ nɩ to ɩ̃ dɩɩrsɔ, gɩdonɩ hɛlɛlɛ fɩldaar na ha jodaar ha mɩ, dɩ na 'lɛr hɩɩrɛ anɩ hara.
30 Gɩdonɩ ɩ̃ kpeleekɛ ma to nɩnɩ, gɩ habarɛ; dɩ ɩ̃ heendaakɛ ma heen nɩnɩ, ga dɩbɩrɔa'.