5
1 Mɔ̃ Jeju yɩnɩ tibil jɔjʋɔɔle, a jʋʋnɛ gɔ̃gʋɔna ƴũ a too, dɩ ɔɔ kpãkpãadara tɔr a wɔrɔ̃ɔ.
2 Agɩpɩ dɩ ma da-n dɩɩr wɩ thakɛ ayɩwɔɔ:
3 Gɩ da wɩrɛraakɛ jɩɛnnɩ dɩ thu thɩ̃ɛ n ɓɔr wɛr, gɩdonɩ ƴũ fãgadaarɩ dɩ wɛr hɩna.
4 Gɩ da wɩrɛraakɛ n bɩɛnnɩ, gɩdonɩ Thãgba na cʋʋ wɛr dɩ wa faa haar.
5 Gɩ da wɩrɛraakɛ dɔnɩ hɛlɛlɛ fɩldara, gɩdonɩ wɛr na hɩna thɩɩkɛ.
6 Gɩ da wɩrɛraakɛ n gbɛ̃gbɛrɛnɛnɩ gɩrɛ saranɩɩ cʋʋra, gɩdonɩ Thãgba na cʋʋ wɛr dɩ wa 'li dɩbara.
7 Gɩ da wɩrɛraakɛ n dɔnanɩ tɩbɩla bʋɔ, gɩdonɩ wɛr Thãgba na dona bʋɔ.
8 Gɩ da wɩrɛraakɛ hananɩ ha phuu, gɩdonɩ wɛr na yɛ Thãgba.
9 Gɩ da wɩrɛraakɛ n cʋɛnɩ ha ɩɩ dɩ ga-n hale, gɩdonɩ wɛr wa-n we Thãgbaa bɩsãsɔ.
10 Gɩ da wɩrɛraakɛ wɩ-n kpooronɩ dɩɩ do fɩl sarʋ dɔ nɔɔ, gɩdonɩ ƴũ fãgadaarɩ dɩ wɛr hɩna.
11 Gɩ da nar ɔbɔɔkɛ wɩ-n nɩɩr nɩnɩ dɩ wa-n kpoona nar, dɩ wa-n kʋɛna anɩ isɔ na sõso bɩɩ, dɩɩ do mɛr dɔ nɔɔ, gɩdonɩ mɛ̃ wɩ kɔɔ kpoo Thãgbaa bobonasɔraakɛ kɔɔ kʋlɛ nɩnɩ ƴɩɛ.
12 Nɩ dɔ daʋ na-n fʋ nɩ na-n kãka, gɩdonɩ anɩ khaardaakɛ na 'lɛnɩ Thãgbaa dʋɔ, ga kɔ̃tɩnɛ.
13 Nɛr dʋɔn laan thɩɩra, sɩ ado laan bir dasɩ a mɩla bã, mɔ̃ wa fʋ sɩ na cʋʋ gɩ dɩ ga bir na hana mɩlalɛ? Ga dor ga bɔr bã, khuirə wa dʋna na faa mɛ̃, dɩ tɩbɩla na-n saar na nɛɛ.
14 Nɛr dʋɔn dahɩrɛ tɩbɩlala fɛʋ thɩɩra. Dɩɩkɛ wɩ thenɩ gɔ̃gʋɔna na puno na kera'.
15 Dɩ wa-n pɛ dɔɔ lãphana a suuro bɩlãkpʋʋnna', sɩ bilela wɩ-n dɛ̃ɛ dɩɩ hɩrɛ wɩrɛ fɛʋʋkɛ hanɩle cɔ bɩnɔ.
16 Nɩ dɔ anɩ dahɩrɛ na-n hɩrɛ tɩbɩlaa ƴɛra thale, wɩ puno wa-n yɩ anɩ thɔ̃ bɔsɔ, wa-n dʋbɩ anɩ Thɩɩkɛ hanɩle ƴũu i.
17 Na-n kpɩɛr waa mɩ ɩnɛ ɩ̃ kʋkʋʋl Thãgbaa jɔfʋa', dɩ Thãgbaa bobonaa so ga. Ma ɩ̃ ɩ̃ kʋkʋʋl ga, sɩ ɩ̃ ka ɩ̃ cʋʋ gɩrɛ fɛʋ jɔfʋ n ƴaalnɩ ga-n cʋɛ.
18 Gɩdonɩ sobɔr mɩ so nar, a fʋna bɔɔkɛ ƴũ na thɩɩ hanɩle na jalna na pɩna, dɩkhaa thɩ̃ bu fɩɩʋ na halerakɛ jɔfʋra gɩ do gɩ kʋkʋʋla', foo thɩ̃ɛ fɛʋ n cʋʋ gɩ dã oti.
19 Dɩ gɛr gɩ ʋrɛɛkɛ na kʋɛanɩ jɔfʋsɔɔkɛ bɩɛl, a jɔfʋ buu gɩrakɛ fɩɩʋ dɩ ntɛ kʋɛ, sɩ da-n dɩɩr tɩbɩla wa-n cʋɛ ɔmɛ̃, ɔr wa we dabuu ƴũ fãgadaarɩ dɩra, sɩ ʋrɛɛkɛ n hɩnɛ gɩnɩ sɩ da-n dɩɩrna tɩbɩla wa-n cʋɛ ɔmɛ̃, ntɛɛle wa-n we kɔ̃tɩn ƴũ fãgadaarɩ dɩra.
20 Gɩdonɩ mɩ so narɛ, ado anɩ fɩl sar na ba jɔfʋ dɩɩrdara na jɔfʋ bʋ dʋdarasɔɔda ga, na lõ ƴũ fãgadaarɩ dɩra yuuraka'.
21 Nɩ kɔɔ nɩɛrɛ mɔ̃ wɩ kɔɔ sonɩ mamadarara ayɩ: «Fa-n kʋ tibilə'.» Ʋrɛɛkɛ na kɔnɩ tibil, a na 'lɛr kɩɩlɛ.
22 Sɩ me wer mɩ so narɛ gɩrɛ: Tibil wo tibilikɛ nĩkhi haar, kɛ na fʋnɩnakɛ ɔɔ omina, a na 'lɛr kɩɩlɛ. Dɩ ʋrɛɛkɛ na nɩrɛnɩ ɔɔ omi, gɩ daan dɩ wa kɩɩlnaa Juifi so gʋʋrdaraa ƴɛra, dɩ ʋrɛ na sɔnɩ ɔɔ omina nayɩ, də̃bəl haa, gɩ daan dɩ ntɛɛle na jal bu paar dɔɔra.
23 Dɩ gɛr gɩ ado fɩ-n 'laarɛ khaardaa Thãgba fʋɔr paar dɩɩ do le fɩ jɩnanɛ afɩ omi hananɛ sor na fɛrɛ,
24 faa le afɩ khaarda Thãgba fʋɔr paar sa jala nɩ gʋʋr kha sor na afɩ omi ɓo gɩ pɩ, sɩ fɩ bir fɩ jal fɩ 'laa afɩ khaarda dɩphã.
25 Nɩ kuune kha kɔrɔ na afɩ sodaar, bɔɔkɛ nɩ hanɩ kha hʋɛra dɩ na-n jal. Agado mɛ̃ gaa, afɩ sodaar na gba fɛr na ha so kɩɩldaar, dɩ so kɩɩldaar na gba fɩ dakha na ha gardɩ, dɩ gardɩ na gba fɩ na to khaɩra.
26 Sobɔr mɩ so far, fa the liir kpɩɩraka', phaphapha fɩ lɩmɩ afɩ mũsũ koo fɩ pɩ.
27 Nɩ kɔɔ nɩɛrɛ dɩ wɩ so ayɩ: «Fa-n ƴaal khɛ kpɩa', fa-n ƴaal kuun kpɩa'.»
28 Sɩ me wer mɩ so narɛ gɩrɛ: Tibil wo tibilikɛ n hɩnɛnɩ khɛr ƴaƴaal hɩɩnʋ, gɩ dor a ƴaalɛ khɛrɩle le ɔɔ hara a pɩ.
29 Ado afɩ nyɔ̃bɔ yi do far baradaa, te dɔna faa ƴɔɔ, gɩdonɩ ga ba farɛ ado afɩ tomɩ ɓã bɩɛl bu, gɩ baar gɩrɛ wa gbanɩ afɩ tomɩ koo na dʋna bu paar dɔɔra.
30 Ado afɩ nyɔ̃bɔ nyɔ̃ do farɛ baradaa, kuro dɔna faa ƴɔɔ, gɩdonɩ ga ba farɛ ado afɩ tomɩ ɓã bɩɛl bu, gɩ baar gɩrɛ wa gbanɩ afɩ tomɩ koo na dʋna bu paar dɔɔra.
31 Gɩ kɔɔ sor dakha ayɩ: «Ado ntɛ na faa ɔɔ khɛr a hanaa he kuur sɛbɛ.»
32 Sɩ me wer mɩ so narɛ: Tibil wo tibilikɛ na faanɩ ɔɔ khɛr, sɩ agado kũu kpɩɩ ƴaalɛ dɔ nɔa', gɩ nɩnanɛ a cʋgʋʋrɛ dɩ debi do kũu kpɩɩ ƴaaldaar, dɩ tibilikɛ na hɛnɩ khɛrɩkɛ wɩ faanɩ, khɛ ƴaal kpɩɩ sopugo a cʋʋ.
33 Nɩ kɔɔ nɩɛrɛ dɩ wɩ kɔɔ so wo mamadarara ayɩ: «Fa-n ʋlfɛ sõso ʋlfɛra', sɩ cʋɛ gɩrɛɛkɛ fɩ kɔɔ ʋlfɛnanɩ Kɔ̃tɩn.»
34 Sɩ me wer mɩ so narɛ: Na-n ʋlfɛ kpɩɩraka', dɩ na-n ʋlfɛrakɛ na Thãgbaa dʋɔa', gɩdonɩ Thãgbaa fãga too pa gɩ.
35 Na-n ʋlfɛ na thɩa', gɩdonɩ Thãgbaa nɛ jəəda gɩ, na-n ʋlfɛ na Jerujalɛm dɩa', gɩdonɩ Fãgadaar kɔ̃tɩ̃ɩ dɩ gɩ.
36 Fa-n ʋlfɛ na afɩ yʋa', gɩdonɩ fa punonakɛ na cʋʋ afɩ yʋsũ bɩɛllakɛ dɩ ga bulolo, agɩbo gɩ biiroə'.
37 Ado nɩ so thɩ̃ɛ ayɩ, ɔɔ, nɩ dɔ gɩ do ɔɔra; anɩ ooho n do oohora, gɩrɛ na hanɩle na ɓaan, ga dor puu cʋʋ hɩ̃daarɩ pa gɩ the dɩphã mɛ̃.
38 Nɩ kɔɔ nɩɛrɛ dɩ wɩ kɔɔ so ayɩ: «A tibil kʋɛ tibil yire, wɩ kʋɛaa yire dakha. A nyɩnɛ a khaa, wɩ khaa nyɩnɛ dakha.»
39 Sɩ me wer mɩ so narɛ: Na-n kɛ̃kɛrɛ̃ kha na tɩɩ puə'. A tibil ka ɓa fɩ nyɔ̃bɔ gbʋaa, birə fe gbʋa kpɩɩ pɩɛraa wo.
40 A tibil ƴaal ɩnɩ-n wɛ fɩ kɩɩl paar a gba fɩ kẽkẽ gburo, birə gba afɩ darã a ɓananaa.
41 A tibil tɔ fɩ na fãga pɛr nɩ jala kha gɩ dã kilə bɩɛl, tɔ kilə bɩɛl pɩɛr gɩ ha yenyɔ.
42 Ʋrɛɛkɛ n bɩɛlnɛ farnɩ thɩ̃ɛ hanaa, fa-n tɔ̃ ʋrɛɛkɛ n ƴaalɛnɩ a pemi far thɩ̃a'.
43 Nɩ kɔɔ nɩɛrɛ dɩ wɩ kɔɔ so ayɩ: «Fa-n na afɩ 'walãkha tibil,» sɩ na laarɛ afɩ lãlaardaar.
44 Sɩ me wer mɩ so narɛ: Na-n na anɩ lãlaardara, na-n bɩɛlnɛ Thãgba na pɛ wɩrɛraakɛ n kpoa narnɩ.
45 Thale na do bɩsana anɩ Thɩraakɛ hanɩle ƴũ, gɩdonɩ a-n cʋʋrɛ ɔɔ wi dɩɩ phã tɩɩ puusɔra na tɩɩ bɔɩsɔra, dɩ cʋʋ dakha nyʋɔn dɩ ga-n dã tɩɩ sarasɔra na wɩrɛra na sarana'.
46 Gɩdonɩ ado nɩ-n nar wɩrɛɛkɛ n naan nɩnɩ, anyee khaarda na 'lɛ? Ga do thalera war gbadara n cʋʋ dakha gaa?
47 Dɩ ado anɩ omi ha nɩ-n fʋɔr dɩbara, anye nɩ cʋʋ dɩɩ tiro a ha kpɩɩ? Ga do thalera wɩrɛ na jɛnɩ Thãgba ga n cʋʋ dakha gaa?
48 Gɛr gɩ nɛrɛ nɩ bʋɔnɔ a ka, mɔ̃kɛ anɩ Thɩ le ƴũ bɔrnɩ a ka.