4
1 Agɩpɩ Thu Phuu thɔɔ Jeju a jalna bəənnə Satã n fifilənee.
2 A kɔɔ lire nʋɔ a cʋʋna wire kpalanyɔ na dɩtɩnɛ kpalanyɔ, agɩpɩ kɔmɛr fʋʋrɛ.
3 Dɩ fifilədaarɩlera tɔr dã a sʋʋraa ayɩ: Ado Thãgbaa Bikuun fɩ do, sɔ bokananaakɛ gɩ debi gɩ do dɩkor.
4 Sɩ dɩ Jeju birsee: Gɩ kherere Thãgbaa sɛbɛra ayɩ: «Ga do dɩkor dɩbara na hana tibil yirə', sɩ thɩmɩa fɛʋʋkɛ n thɛnɩ Thãgbaa nɔra gɩ.»
5 Agɩpɩ dɩ Satana bir kpaa a jalna dɩ phuurəəkɛ dɔnɩ Jerujalɛm, a jʋʋnna Thãgba fʋɔr cɔ kɔ̃tɩɩna ƴũ, sa sʋʋraa:
6 Ado Thãgbaa Bikuun fɩ do, ubo je thʋnɔ, gɩdonɩ gɩ kherere ayɩ: «Thãgba na pɛrɛ ɔɔ thɔ̃thɔ̃daar thusɔ wɩ tɛ fɩ, a mɛ̃ gaa fa ber nɔɔ bokaarra.»
7 Dɩ Jeju sʋʋraa: Gɩ kherere dakha wo ayɩ: «Fa-n fifilə Kɔ̃tɩn afɩ Thãgba a hɩɩna'.»
8 Dɩ Satã kpaa wo a jalna jʋʋnna gɔ̃gʋɔnaakɛ gbaanɔnɩ dɩɩ ka, a nɩɩraa fãgadaar dɩɩsɔ fɛʋʋkɛ hanɩ thɩɩra na awɩ nyɔ̃kor bɔ,
9 sa sʋʋraa: Fɛr ma ha thɩ̃ɛ fɛʋʋkɛra ado fa gburõkure na fʋɔr mɩ.
10 Dɩ Jeju sʋʋraa: Hala jala pal Satã. Mee gɩ kherere ayɩ: «Kɔ̃tɩn afɩ Thãgba fa fʋɔr, dɩ ɔrra dɩbara fa doro thɔma.»
11 Agɩpɩ Satã sɩɩraa, dɩ hɩnɛ, Thãgbaa thɔ̃thɔ̃daar thusɔ pɔr dɩ wa-n haa gɩrɛ n danaanɩ.
12 Ɔbɔɔkɛ Jeju nɩɛnɩ dɩ wɩ fʋrɛ Jã a to khaɩra, a kɛrrɛ bir lõ Galile.
13 Mɛ̃ a the Najarɛtɩ dɩɩra a jal too Kapɛrnayʋm mɩɩr nɔ nʋɔra Jabʋlɔ̃ na Nɛfɩtalɩ bəənnə.
14 Gɩ do mɛ̃ gɩrɛ Ejaɩ Thãgbaa bobon sonɩ dã oti, gɩ sor:
15 «Jabʋlɔ̃ dɩɩ na Nɛfɩtalɩ dɩɩ, mɩɩr nɔ hʋɛ, kɛ hanɩ Jʋrdɛ̃ iiro, Galile ca kpala.
16 Tɩbɩlaakɛ hanɩ dabirəra, wɩ yɩrɛ dahɩrɛ kɔ̃tɩ̃ɩ, na wɩrɛɛkɛ hanɩ khĩdi dɩ birəra, dahɩrɛ carã warɛ.»
17 A fʋna ga bɔɔlera Jeju ma da-n mɩɩ Thãgbaa thɩmɩɩ dɩ yɩ: Nɩ deba haar, gɩdonɩ ƴũ fãgadaarɩ dɩ bɔ daan.
18 Mɔ̃ Jeju n jalnɩ na Galile mɩɩr nɔ nʋɔ, a yɩrɛ õkona yenyɔ, Sɩmɔ̃ɔkɛ wɩ-n wenɩ Pɩɛr gɩ, na Ãdire ɔɔ õkuun, dɩ wa-n dʋna thʋ̃ pherdaakɛ n hɔnɩ jɔ̃ lanyʋɔnɔ, gɩdonɩ thʋ̃ pherdara ha wɩ.
19 Dɩ a so warɛ: Na-n kpa mar, dɩ ma cʋʋ nɛr na-n ƴaal tɩbɩla thʋ̃ khaa.
20 Dɩ dapaara, wɩ faarɛ awɩ thʋ̃ pherdasɔ sɩ wa-n kpaaraa.
21 Dɩ bir tɔ na jal wo a yɩ wɩ̃ õkona yenyɔ, Jakɩ Jebedee bikuun, na Jã ɔɔ õkuun, dɩ wɩ ha kha na awɩ thɩ Jebede gboroona, dɩ wa-n gbɛbɩ awɩ thʋ̃ pherdasɔ.
22 Dɩ a we wer, dɩ dapaara wɩ faarɛ gborõo na awɩ thɩ sɩ dɩ wa-n kpaaraa.
23 Dɩ Jeju kɔɔ kpaarɛ Galile dɩɩra fɛʋ, da-n dɩɩr tɩbɩla thɩ̃ɛ Juifisɔɔ Thãgba fʋɔr cɔnanɔ, da-n mɩɩna tutugo bʋɔɔkɛ dɔnɩ ƴũ fãgadaar doda, da-n kpɛɛna khoosɔ dɩɩdɩɩ fɛʋ, na tãdarasɔ dɩɩdɩɩ fɛʋ tɩbɩlaa thɩ̃thɩɩn.
24 Dɩ ɔɔ i kpaarɛ Siri dɩɩra fɛʋ. Dɩ wɩ kpar wɩrɛɛkɛ kho caar dɩɩdɩɩ fʋnɩ dɩ wa-n gaar, na wɩrɛɛkɛ n 'wãganɛnɩ: Kpãkpũdara, na ji khidara, na gbãgbarasɔ a pɔnanaa dɩ a kpɛɛ wɛr.
25 Dɩ tibil jɔjʋɔ ther Galile, na Dekapol, na Jerujalɛm, na Jude, na Jʋrdɛ̃ iiro dɩ wa-n kpaaraa.