3
1 Ga bɔɔlera Jã Batɩsɩtɩ ɩɩr da-n mɩɩ Thãgbaa thɩmɩɩ Jude bəənnə da-n so ayɩ:
2 Nɩ deba haar, gɩdonɩ bɔɔ daan dɩ ƴũ Eãgadaar na-n gba fãga.
3 Jana dɔ ʋrɛ Ejaɩ Thãgbaa bobon kɔɔ sonɩ ayɩ: «Tibil wire gɩ dɩ ga-n hulẽ bəənnə ayɩ: Na-n gbɛbɩrɛ hʋɛ Kɔ̃tɩnna, na-n wɛbɩrɛ ɔɔ hʋ bisɔ gɩ pɔlɔ.»
4 Kɩ̃kɩɩnɩkɛ wɩ cʋʋnanɩ nyɔɔmɛɛ sũu Jana n kɔɔ to, dɩ khɩmɩna lo phɛrɛ pelela. Sɩ toosõo na thʋʋr n kɔɔ dɔ ɔɔ dɩko.
5 Dɩ Jerujalɛmdara na Judedara fɛʋ, na wɩrɛ fɛʋʋkɛ thɛnɩ Jʋrdɛ̃ mɩɩr khʋra, n kɔɔ pɔr ɔɔ pa,
6 dɩ wɩ cã awɩ sopugosɔ, sɩ da-n kpɛɛ wɩ nyʋɔnɔ Jʋrdɛ̃ mɩɩrra.
7 Sɩ mɔ̃kɛ a yɩnɩ jɔfʋ bʋ dʋdara na wɩrɛ n yɛnɩ khi ɩɩrɛ na hala', dɩ wa-n pʋɔraa jɔɔjɔɔ a kpɛa wɩ nyʋɔnɔ, a so warɛ ayɩ: Nɛr sikori bisɔ, amɛ sɔ nar nɩ fuo Thãgbaa nĩkhirəəkɛ na ɩnanɩ?
8 Na-n sɛ beekɛ n nɛnanɩ anɩ ha debi.
9 Na-n too na kpɩɛr anɩ hara waa ayɩ, Abɩraham dʋɔn anɩ mama thɩ kɔ̃tã', gɩdonɩ mɩ so narɛ dɩ bokanaakɛrakɛ Thãgba punone a cʋʋ gɩ dɩ gɩ debi a do bɩsana Abɩrahamna.
10 Dɩrakɛ kpãkpo 'lire leere thɩr nɛ kuur leere, dɩ thɩrʋ wo thɩrʋʋkɛ na-n sɛnɩ bi bʋɔa', wa kurre na dʋna dɔɔ.
11 Me wer nyʋɔnɔ mɩ-n kpɛɛ nɩ dɩ na debi haar, sɩ ʋrɛɛkɛ na kpaanɛnɩ, a hananɛ fãga a jɔ mɩ, dɩ ma hɩɩrʋʋrakɛ a na julẽ ɔɔ nɛfaa ga. Ɔr, Thu Phuurə na dɔɔra a na kpɛɛ nɩ.
12 Dɩ jʋ jɛ nyɔ̃kpʋʋn hale dɩ fʋrɔ ɔɔ nyɔ̃kɔɔ. A na jɛr jɔ a gba jʋ be a pɛ ɔɔ thʋ̃ bɩnɔ, sɩ a thii laagbee dɔɔraakɛ na dɔnɩ thɩ̃ khiirnənə'.
13 Ga bɔɔlera Jeju the Galile, a pɔ Jʋrdɛ̃ mɩɩrra Jãa pa a kpɛa nɩ nyʋɔnɔ.
14 Sɩ Jã kɔɔ bor sa so ayɩ: Mɛr ka teena fɩ kpɛa mɩ nyʋɔnɔ, sɩ dɩ fɩ ka ɩ̃ marɩ?
15 Dɩ Jeju birsee: Nɛnɛ̃ wer, sɛ gar gɩ ha mɛ̃. Gɩdonɩ gɩ teenanɛ dɩ sa cʋʋ thɩ̃ɛ fɛʋʋkɛ saranɩ. Dɩ Jã na kɔɔ banaa bã.
16 Dɩ dapaara ɔbɔɔkɛ wɩ kpɛɛnɩ Jeju nyʋɔnɔ dɩ na the, hɩnɛ thãgbara ƴũ phubire dɩ yɩ Thãgbaa Thu da-n gbũ a ho puusɩ̃ɛ a pɔ lʋʋnaa.
17 Dɩ hɩnɛ, nʋɔ ther le thãgbara ƴunə a so ayɩ: Ʋrɛɛkɛ dʋɔn ɩ̃ Bikuunikɛ mɩ-n nanɩ, a lõ mer haar kpɛ.