AMƆSƖ 9

Balamɔɩ thɩ̃ yɩr: Thãgba fʋɔr cɔ wɩɛr thɩmɩɩ

9

1 Dɩ mɩ yɩrɛ Kɔ̃tɩn dɩ jɩɩl bonɩ ji paara ƴũu

da n so aa:

Bɛ thɩrka yʋsɔɔle,

gɩ do nɔɔ kɩraa n gbugbuyo

khaarɛ gɩ, gɩ jiir tɩbɩlalaakɛ hanɩle,

wɛr fɛw yʋɔ, wɩrɛrakɛ na sɛnɩ,

ma kʋʋr wɛr na bajɩna.

Bɩɛllakɛ wɛra na puno a na ca ga;

bɩɛllakɛ wɛra na puno a na fuuə'.

2 Adorakɛ wɩ gbũ khĩdi dʋɔ,

ma fʋlɛ wɛr na ɲɛ̃ɛ a na hal na thena.

A wɩ jʋʋn thãgbara ƴũu mɔ̃,

Ma ti wer le dɩ wa gbũ.

3 Adorakɛ wɩ jʋʋn Karmɛl gɔ̃gɔ̃ yʋɔ wɩ wʋɔn,

sɩ ma yaal wɛr lera, a na fʋlɛ wɩ.

Ado wɩ mʋrrakɛ laɲɔ̃ bɩnɔ,

wɩ wʋɔn le thɛrɛɛra,

gɩ do nɔɔ ma n yɩ wa',

Ma tire ɲɔ siisɔ a na pɛ war le

dɩ wa dʋɔn wɩ.

4 Adorakɛ awɩ lãlaardara fʋlɛ wɩ

a jalna dee dʋʋra,

Sɩrakɛ ma 'laarɛ hʋɛ wɩ kʋrɛ wɩ le na bajɩna,

Ma ga warɛ yire,

Ɩ̃ cʋʋ wɩ puure,

ga do bɔɔ ma cʋʋ wa'

Thãgba Kɔ̃tɩn dʋɔn ƴũu na thɩɩ fɛʋʋ kɔ̃tɩ̃

5 Ado Kɔ̃tɩn, Thãgba Kɔ̃tɩn, kɛ dɔnɩ kokenaa kɔ̃tɩ̃

thar thɩɩra na ɔɔ ɲɔ̃,

thɩɩ n jɩɩn

Dɩ dɩdara fɛw n ha yilẽbera

Dɩ dɩɩ n khei sɩ da n ji mɔ̃ Ejipiti mɩɩr n cʋʋnɩ.

6 A mɩrɛ ɔɔ cɔ thãgbara ƴũu dɩɩ kɛɛ thɩɩra a ho pər.

Ɔr n cʋɛ laɲʋɔn dɩɩ jʋʋn ƴũu

a do thãgba ɲʋɔn a bir na dã thɩɩra fɛw.

Ɔɔ i n dʋɔn Thãgba Kɔ̃tɩn.

Thãgba n kɩɩlnanɛ Ɩjɩrayɛl bɩsana awɩ dɩpara

7 Thãgba Kɔ̃tɩn sor:

Nɛr Ɩjɩrayɛl bɩsana, nɩ n kpɩɛrɛ

dɩ nɩ baar Etiopidara mɛrɛra wɛ?

Mɩ ti nɩnɩ dɩ nɩ the Ejipiti

Mɩ tire dakha Fɩlɩsɩtɛ̃sɔ dɩ wɩ the Kafɩtɔɔ

A ti Sɩrɩdara dɩ wɩ the Kɩɩr.

Nɩ jɩ gɛr ya na jɩ ga?

8 Mɛr Kɔ̃tɩn, Thãgba Kɔ̃tɩn yɩrɛ

Ɩjɩrayɛl jamana dɩɩ cʋʋ pa puu gɛr gɩ,

Ma bũburoone thɩɩraakɛ na faa.

Sɩ ga do koo ma bũburõ Jakɔbɩɩ məlsɔa'.

9 Ma har lãlaardara hʋɛ

wɩ yɛɛsɩ nɛr Ɩjɩrayɛl bɩsana ca kpalaa thɩ̃thɩɩn mɔ̃

Wɩ n yɛɛsɩnɩ thɩ̃ɛ dɩ

boka bi bɩɛllakɛ na n ka ga.

10 Sopugodara fɛw ɩ̃ toora

Na khiire kʋʋrra;

kɛ dɔnɩ wɩrɛ n sɔnɩ thɩlkɩɩr na ɔrɔna'

thɩlkɩɩr na 'linə'.

Thãgba Kɔ̃tɩn na bire na hɩɩn ɔɔ too

11 Ga wiile ma bire na ɩɩr

Davɩdɩɩ cɔɔkɛ n jeni.

Ma sɔbɩrɛ go ɓɛl paarsɔ,

Ɩ̃ bir ɩ̃ mɩ gɩrɛ jiireni

Ma bire na mɩ, gɩ ha mɔ̃

gɩ kɔɔ hanɩ mamara,

12 Gɩ do nɔɔ wɩ bir

wɩ gba Edɔ̃ɔ mǝlsɔɔ dɩɩkɛ sɛnɩ

na dɩɩ fɛʋʋkɛ ɩ̃ i n weronɩ wɩ hɩ̃.

Mɛr Thãgba Kɔ̃tɩn sɔ,

dɩ ma cʋʋrɛ gɩrɛra mɩ sonɩ.

13 Dɩ Thãgba Kɔ̃tɩn so ayɩ:

Wiresɔ na daan dɩ ʋrɛ n kʋʋlɛnɩ

na n kpar ʋrɛra n khanɩ dɔdɔdɔ

dɩ ʋrɛ n theranɩ dɩvɛ̃ thɩra

na n kpar ʋrɛra n khʋnanɩ be dɔdɔdɔ.

Dɩ dɩvɛ̃ ta phaa na fʋrɛ gɔ̃gʋ̃ɔsɔ ga n cel,

dɩ gɔ̃gɔna na dor dɩvɛ̃ ta haar.

14 Ma bire na gbɛbɩrɩ Ɩjɩrayɛl bɩsana,

dɩ wa bir na mɩ awɩ dɩɩsɔɔkɛ wɩɛllɛnɩ

a na tooro;

Dɩ wa therre dɩvɛ̃ thɩra

A na ɲɔ agɩ dɩvɛ̃;

Dɩ wa kʋʋlɛ nãakʋɔr

a na kho gaa thɩ̃.

15 Ma bire na thɩɩn wɩ awɩ thɩra,

Dɩ tibil na bir na ti wɩ awɩ thɩra,

ka mɩ ha wɩna'.

Mɛr Thãgba Kɔ̃tɩn, anɩ Thãgba sɔ.