Ɩjɩrayɛl jamana dɩɩ na bũburone
13
1 Ɔbɔɔkɛ Efɩrayɩmɩ məlsɔ n hanɩ nʋɔ,Maar n fʋlɛlɛ tɩbɩla dɩɩ kar.
Wɛr kɔɔ hɩna fãga Ɩjɩrayɛl dɩɩra.
Sɩ mɔ̃ wɩ n fʋɔrnɩ Baal, wɩ pɛr dɩɩ awɩbarara.
Gɛr dɔ nɔɔ dɩ wɩ khiir.
2 Sɩrakɛ wɩ n bor 'lo dɩ wa n cʋʋ sopuu.
Wɩ n ber thɩl bii na dɛ bulookɛ wɩ hɩlnɩ;
Thɩla gɩɩkɛ wɩ cʋʋnɩ na awɩ kpɩɛr.
Gɛr fɛw ɲɛ̃ thɔ̃ jɩna cʋɛ gɩ.
Wɩ n sor awɩdara aa:
«Wɩrɛ n jeni bonɩɛ na tɩɩ ye
Wa gburõkhure a na fʋɔr na ɓol thɩl!»
3 Dɩ gɛr gɩ wa bũburone dapaara mɔ̃ duur thuthuure n bũburonɩ,
Wa bũburone mɔ̃ duur mɩ̃ɛ n jɛbɩnɩ
Wa hor bile ɓallaakɛ jɩɛ n bɩ̃bɩlanɩ bile gbʋʋlɔ a faa.
Wa hor isiirikɛ n thɛnɩ na jʋ̃ʋkaar.
4 Sɩ mɛrɛ, mɛr dʋɔn Thãgba Kɔ̃tɩn anɩ Thãgba;
Dɩɩ fʋna bɔɔraakɛrakɛ nɩ kɔɔ hanɩ Ejipiti dɩɩra.
Na jɩ Thãgba kpɩɩ saagado mɛr gaaga,
Dɩ taadaar kpɩɩ na hale saagado mɛr gaaga.
5 Mɛrɛ, mɩ jɩ nɛr bə̃ kparara,
Dɩɩraakɛ kporanɩ phãphãphã.
6 Ɔbɔɔkɛ Ɩjɩrayɛl bɩsana 'lɛnɩ kho paar,
Wɩ khor dɩkɔ a hi.
Dɩ mɔ̃ wɩ khonɩ dɩkɔ a hi,
Wɩ ɩɩrnanɛ i ƴaalɛ.
Gɛr gɩ dɩ wɩ diinə mɩ.
7 Ma ho warɛ sidũ'ũu.
Ɩ̃ ho war kpe,
Ɩ̃ nɔ wɩ hʋɛra.
8 Ma ɩɩrna wɛr gɩ ho ursi nɩɩkɛ wɩ fʋlɛnɩ ɔɔ dabisɔ,
Ɩ̃ cɛcɛbɛ awɩ kũkũsɔ.
Sɩ̃ kho wɩ mɔ̃ sidũ'ũ nɩɩ n khonɩ nʋmɩ.
Hɔ̃ nʋma na cɛcɛbɛ wɛr.
9 Gɩrɛ n bũburone nɩnɩ yaa Ɩjɩrayɛl bɩsana,
Gɛr dɔ mɔ̃ nɩ gba mɩnɩ dɩ̃ do anɩ sodaar.
Sɩrakɛ mɛr dɩbara na kɔɔ punone na bul nɩ.
10 Ka anɩ jamanana ha?
A taa nɩ anɩ dʋɔsɔ fɛw.
Kana anɩ sogʋʋrdarasɔɔra ha ? Wɩrɛra nɩ n kɔɔ soronɩ wɩ hana nɩ jamana na kɔ̃tɩnasɔ !
11 Mɩ ha nɛr jamana na nĩkhii,
Ma taarɛ jamanana na nĩkhiirə.
12 Efɩrayɩmɩ məlsɔ dɩpa hale a too.
Awɩ sopuusɔ hale dɩ ga n pɩɛr.
13 Ga nɩ wɛr mɔ̃ walɛ n nɩnɩ khɛr bi kɔ̃ bɔɔ.
Bɩsaan gɩɩkɛ na hananɩ kpɛsɛra'.
Ɔɔ the bɔ daan sɩ aa tu a the ɔɔ nɩɩ bɩnɔa'.
14 Ma taarɛ Ɩjɩrayɛlɩ bɩsana khĩdi dɩɩ ɲɔ̃kɔɔ,
Ma taa wɛr khirrə.
Khir yaa, kana afɩ fãgaakɛ fɩ n kʋnanɩ ha?
Khĩdi dɩɩ yaa, kana afɩ punona fɩ n bũburonanɩ ha?
Bɔ fʋʋr pɩrɛ ɩ̃ ƴɛra.
15 A Efɩrayɩmɩ məlsɔ 'li dɩbararakɛ mɔ̃ awɩ omɩsɔɔ thɩ̃thɩɩn,
Sɩ jɩɛɛkɛ n thɛnɩ wi phã paar na ɩnɛ,
Thãgba Kɔ̃tɩnɩ jɛ gɩ dɩ ga n ɩɩr bə̃ kparaara.
A na ʋnɛ awɩ ɲɔ bu ka gɩ khɩ,
A cʋʋ awɩ birsɔ ɲʋɔn n ɩ.
Lãlara na khɩɩrɛ thɩ̃bi ɓɔna fɛw lẽle thɩ̃ thɩɩn cʋɔrɔ.