Jakɔbɩɩ məlsɔɔ dɩpasɔ
12
1 Efɩrayɩmɩ məlsɔ dii marɛ na sõsor,Dɩ Ɩjɩrayɛlɩ cɔdara dii mar na fɩɩlɛ.
Judaa məlsɔ n ɩɩrɛ kha 'lo na Thãgba,
Wɩ mar yʋʋ Thãgba Phuurə.
2 Jɩɛ n haanɛ Efɩrayɩmɩ məlsɔ.
Wɩ n weere jɩɛɛkɛ thɛnɩ wi phã paar dɩ wa n kpaan.
Wire koo wɩ n tɔr sõsor na tɩɩ phʋʋnɛ dɩ wa n dɛɛnɔ.
Wɩ ʋlfɛnanɛ Asɩrɩdara nɔ bɩɛl ʋlfɛrɛ.
Wɩ n 'laarɛ niin dɩ wa n ha Ejipitidara, wɩ kurnə kuune.
3 Thãgba Kɔ̃tɩn har da n kɩɩlna Judaa məlsɔ,
Dɩ a na ɩɩrnanɛ Jakɔbɩ məlsɔ gɩ mɩɛ kha na awɩ fɩl puukɛ wɩ hananɩ.
A na lɩmɩ wɛr gɩ mɩɛ kha na awɩ cʋʋ pasɔ.
4 Jakɔbɩ kɔɔ fʋrɛ ɔɔ õkuun nɔtilə̃tire,
Bɔɔraakɛ wɩ hanɩ awɩ nɩɩ bɩnɔ,
5 Dɩ ɔbɔɔkɛ a khɔnɩ kuun, a nɔɔnanɛ Thãgba.
A nɔɔnanɛ thɔ̃thɔn thue, a 'lɛ kəəre;
Dɩ a khɩɩrɛ, sa bɩɛlʋʋ a bɔnanɩ.
Betɛl dɩɩra Jakɔbɩ yɩrɛ Thãgba.
Dɩ le Thãgba mɩɩna sɩ.
6 Thãgba Kɔ̃tɩn dʋɔn Thãgba kokenaa kɔ̃tɩ̃.
Thãgba Kɔ̃tɩn dɔ ɔɔ i. Thale wɩ n wɩɩ.
7 Sɩ nɛr Jakɔbɩɩ məlsɔ, nɩ kɛra birə anɩ Thãgbara.
Nɩ fɔrɔ fɩl sarʋ na fɩl telẽe.
Nɩ dɛɛnɛ nũ pɛrɛ anɩ Thãgbara bɔɔ fɛw.
8 Efɩrayɩmɩ məlsɔ hor Kanãa ƴaƴaba; wɩ hananɛ thɩ̃ dʋbɩ mɩ̃ɛdasɔɔkɛ na telenena'.
Wɩ nar wa n yu tɩbɩla.
9 Efɩrayɩmɩ məlsɔ n sor aa: "Sobɔr gɩ sɩ ler; sɩ hananɛ lẽle thɩ̃ɛ, sɩ asɩ thɔna sɩ 'lɛ gɩ.
Wa yɩ sar dɩpa bɩɛllakɛ kɛ dɔnɩ sopuə'".
10 Sɩ mɛrɛ, mɛr dɔ Thãgba Kɔ̃tɩn anɩ Thãgba
A fʋna bɔɔraakɛrakɛ nɩ kɔɔ hanɩ Ejipiti dɩɩra.
Ma bire na cʋʋ nɩ wo na n cɔ kẽkẽ waʋsɔ,
Mɔ̃kɛ fɛtɩ kpa jɛ wiresɔ kɔɔ hanɩ.
11 Mɩ mɩɩnanɛ ɩ̃ mɩmɩɩsɔ,
Mɩ 'laarɛ thɩ̃ yɩrsɔ a dɛbɩ;
Dɩ mɩ gbaar ɩ̃ mɩmɩɩsɔ a sona sokpaasɔ.
12 Gɩdonɩ gõgolõdara Galaadɩdara do,
Wa bũburone sobɔr.
Wɩ n jinəne nasɔ bonɩɛ Gɩlgal,
Dɩ awɩ bonɩ ji pasɔ dor bokanaakɛ deranɩ lɩɛsɔɔraakɛ wɩ kʋʋlnɩ.
13 Jakɔbɩ car jal Aram dɩɩra.
Ɩjɩrayɛl dor thɔma sɩ a puno a 'lɛ khɛr.
Khɛr dɔ nɔɔ dɩ khe nʋma.
14 Thãgba Kɔ̃tɩn gbaar ɔɔ mɩmɩɩ a tinə Ɩjɩrayɛl bɩsana Ejipiti dɩɩra a thena,
A gbaar ɔɔ mɩmɩɩ a pɛr da n hɩɩn wɩ.
15 Efɩrayɩmɩ məlsɔ kʋrɛ Thãgba Kɔ̃tɩn nĩkhii jɔɔ ka.
Dɩ awɩ kɔ̃tɩn na gbaar tɩbɩlaakɛ wɩ kʋʋrnɩɩ sor a na pɛ war.
A na lɩmɩ wɛr beesireekɛ wɩ n beesʋʋnɩ.