Thãgbaa naw Ɩjɩrayɛl bɩsanana.
11
1 Ɔbɔɔkɛ Ɩjɩrayɛl bɩsana kɔɔ donɩ bɩsã ɓola, mɩ kɔɔ na wɛr.Dɩ mɩ wer ɩ̃ bikũusɔ, Ɩjɩrayɛl bɩsana, Ejipiti dɩɩra a thena.
2 Sɩ bɔɔkɛ wɩ n wenɩ Ɩjɩrayɛl bɩsana,
Wɩ n tɔr hʋnɔna wɩrɛ n wɛ wɩnɩ.
Sɩ dɩ wa n ji bonɩɛ Baalsɔɔra,
Dɩ wɩ thiir parfɛ̃ thɩl biisɔɔra.
3 Mɛr kɔɔ dɩrɛ Efɩrayɩmɩ məlsɔ ɩɩrɛ,
Dɩ̃ fʋ wɩ ɲɛ̃ɛ.
Sɩ Efɩrayɩmɩ məlsɔ na jɩrakɛ dɩ mɛr n kɔɔ hɩnɛ wa'.
4 Mɩ kɔɔ thɔɔ wɛr na hɛlɛlɛ fɩlɛ,
Mɩ kɔɔ 'liri kha na wɛr dɩɩ the naʋra,
Mɔ̃ tibil n gbanɩ ɔɔ bɩsã dɩ pɛ kũkuno, mɛ̃ mɩ n gba wɩ,
Dɩ ma n ha wɩ dikor
5 Ɩjɩrayɛl bɩsana na kɛr na bir Ejipiti dɩɩra ga.
Sɩ Asɩrɩdaar na dɔ war jamana,
Gɩdonɩ wɩ bor aa ɩna kɛr na bir mara'.
6 Kʋʋr na wɩɛllɛ awɩ dɩsɔ,
A bũburõ awɩ dɩ khuisɔ,
A wɩɛl gɩ,
Gɩ the awɩ kpɩɛr kpalsɔɔraakɛ wɩ hananɩ.
7 Ɩ̃ too firi khiru a pɛ mar.
Wɩ n we wer wɩ birə mɛrɛraakɛ kɛ hanɩ ƴũu,
Sɩ bɩɛllakɛ na n ɓa ƴɩɛ dɩ hɩɩna'.
8 Mɔ̃ ma cʋʋ sɩ na bo nɩ yaa Efɩrayɩmɩ məlsɔɔ ?
Ma punone na fɩɩl nɩ yaa Ɩjɩrayɛl bɩsanaa ?
Mɔ̃ ma fʋ sɩ na cʋʋ nɩ mɔ̃ mɩ cʋʋnɩ Adɩma dɩɩ?
Mɔ̃ ma fʋ sɩ na cʋʋ nɩ mɔ̃ mɩ cʋʋnɩ Seboyɩm dɩɩ ?
Ɩ̃ kpɩɛr ɲaɲaanɛ koo,
Dɩ bʋɔ fʋ mɩ.
9 Ma cʋʋ gɩ mɩɛ kha na nĩkhi khɩɩkɛ fɔ mɩna'.
Ma bir na bũburõ Efɩrayɩmɩ məlsɔ bã;
Gɩdonɩ mɛrɛ, Thãgba mɩ do.
Ma do tibilə'.
Mɛr dʋɔn Tɩɩ phuukɛ hanɩ anɩ thɩ̃thɩɩn.
Ma pɔ na nĩkhiə'.
10 Wa n kpar Thãgba Kɔ̃tɩnna,
Kɛ na ooneni sidũ'ũu kha,
Gɩdonɩ a na oore
Ɔɔ bikũusɔ n the laɲɔ̃ billo wɩ ca wa n pɔ na jẽu.
11 Wa ther Ejipiti na jẽu wa n pɔ 'lomĩ khaa
Wɩ the Asɩrɩ wa n pɔ kʋlãpubi khaa.
Dɩ ma cʋʋ wɛr dɩ wa too awɩ cɔsɔ. Mɛr Thãgba Kɔ̃tɩn, mɛr sɔ.