Ɩjɩrayɛl jamana dɩɩ bũburone
10
1 Ɩjɩrayɛl bəən kɔɔ hor dɩvɛ̃ thɩr gbɛ̃kɛrɛ̃ɛkɛ n sɩɛnɩ be jɔɔ.Mɔ̃ a n senɩ be jɔɔ,
Ɔmɛ̃ a n hana bonɩ ji paarsɔ jɔɔ.
Mɔ̃ ɔɔ dɩ n jɩɩnɩ ɓɔ̃,
Ɔmɛ̃ a n gbɛbɩ ɔɔ thɩl boka gbuunəsɔ dɩɩ jɩɩ ɓɔ̃.
2 Ɩjɩrayɛl bɩsana hananɛ bɩnɛ yeɲɔ fɩlɛ.
Wa 'lɛr sor awɩ dɩparara wɩ cʋʋnɩ.
Thãgba Kɔ̃tɩn na wɩɛlɛ awɩ bonɩ ji pasɔ,
A cʋɔr awɩ thɩl boka gbuunəsɔ.
3 Sɩ nɛnɛ̃ wɩ n sor aa: « Sa hana jamana ga,
Gɩdonɩ sa ma Thãgba Kɔ̃tɩnna'.
Sɩ aɲe jamanana wer na puno na cʋʋ sar?
4 Wɩ n mɩɩrɛ thɩmɩa bərəəm,
Dɩ wa n ʋlfɛna mɔlɔ ʋlfɛrɛsɔ,
Dɩ wa n ʋlfɛna nɔ bɩɛl ʋlfɛrɛ.
Dɩ gɛr gɩ wa 'lɛ kɩɩlʋ jɔɔ
Mɔ̃ hʋ̃ɔɔkɛ hananɩ kpalʋ n phuni,
Lɩɛraakɛ wɩ kʋʋlnɩ.
5 Maar na fʋlɛlɛ Samarɩdara Bɛtɩ-Avɛnɩ na bu thɩlaa dara.
Wɩrɛ n je wɩnɩ na n bɩrɛ.
Dɩ bonɩ jidaraakɛ n dʋɔraanɩ thɔma na n jɩɩn awɩdara,
Gɩ do awɩ i dʋbɩɩkɛ thɛnɩ awɩ thɩ̃thɩɩn sa faa wɩ dɔ kɩrʋ.
6 Wa jalnanɛ thɩlɩle dakha Asɩrɩ dɩɩra,
Wɩ ha Yarɛbɩ jamana khaardaa.
Dɩ yicuru na fʋrɛ Efɩrayɩmɩ məlsɔ,
Yicuru n fʋ Ɩjɩrayɛldara awɩ kpɩɛr puusɔɔra.
7 Samarɩ dɩɩda pɩrɛ.
Ɔɔ jamana jaal mɔ̃ ɲɔ khɔrɔ̃ɔkɛ hanɩ ɲʋɔnna ƴũu n jalnɩ.
8 Bɛtɩ-Avɛn sãasɩ paarsɔ, kãkɛra Ɩjɩrayɛl bɩsana cʋʋnɩ sopuu na wɩɛrɛ.
Hʋɔn na uu na pho bonɩ ji paarsɔraale.
Dɩ wa sor gɔ̃gɔnana nayɩ: «Nɩ kɛa sarakɛ!
Wɩ so gɔ̃gɔ̃ biisɔra: Nɩ je the sar.»
9 A fʋ Gibea thɩmɩɩra,
Nɩ cʋʋrɛ sopuu yaa Ɩjɩrayɛldara!
Na deba'!
Gɩ teere kha kʋʋr n lõ gɩ kʋʋr Gibea sopuudaraale.
10 Ma naar wɛr mɔ̃ mɩ nanɩ.
Ca kpɩɩsɔ na kpar kha na pɔ war.
A na barã wɩ na jɔrkɔ̃ awɩ so puurəəkɛra wɩ cʋʋnɩ a dɛbɩ.
11 Efɩrayɩmɩ məlsɔ hor na phɩɩrɛsɔɔkɛ wɩ dɩɩrnɩ thɔ̃ dʋʋr.
Dɩ wɩ nar bile ber,
Sɩ ma pɛrɛ kpelele awɩ fɔ bɔbɔsɔɔraalera.
Ma pɛrɛ na sũgburi Efɩrayɩmɩ məlsɔɔra,
Juda bə̃dara na n cɩrɛ
Ɩjɩrayɛldara na n ɓuo.
12 Nɩ dire gɩrɛ saranɩ,
Dɩ na khar gɩrɛ bʋɔnɔnɩ.
Nɩ kpoore lɛ phaa.
Bɔɔ daan dɩ na ƴaal Thãgba Kɔ̃tɩn,
Gɩ dana bɔɔkɛ a na ɩnɩ
A cʋʋ nɩ nɩ hana fɩl sarʋ.
13 Nɩ diire puure, a kha gõgolone,
Dɩ nɩ khor beekɛra anɩ sõsora senɩ
Gɩdonɩ nɩ kɔɔ dɛɛnɛ kpɩɛrɛ anɩ thɛthɛɛ fãgara,
Na anɩ kuun kha jɔjɔraakɛ nɩ hananɩ.
14 Nɔ khena na n ther anɩ thɩ̃thɩɩn,
Dɩ anɩ dɩsɔ fɛʋʋkɛ dɩ bɛr gʋʋ diironɩ na wɩɛrɛ,
Mɔ̃kɛ Salmã jamana wɩɛlnɩ Bɛtɩ-Arbɛl dɩɩ koke wiri,
ɔbɔɔkɛ a wɩɛlnɩ dɩɩ a kʋʋrna dɩdara fɛw.
15 Gɛr dɔ gɩrɛ na dana nɩnɩ gɩ the puu kɔ̃tɩnaakɛ nɩ cʋʋnɩ Betɛl dɩɩra,
Bɔɔraakɛ dɩɩ na n wɩlnɩ,
Ɩjɩrayɛl jamanaada na pɩrɛ.