Wa fʋlɛlɛ Ɩjɩrayɛl bɩsana a na jalna ca kpɩɩsɔ thɩ̃thɩɩn
9
1 Ɩjɩrayɛldara yaa, na n kãka ga.Na n hinə daw ca kpɩɩsɔɔ kha ga,
Gɩdonɩ nɩ bor anɩ Thãgba a faa
sa ca na n kpa thãgba kpɩɩsɔɔra a ho bɔdɛlla,
Nɩ nar na n 'lɛ anɩ bɔdɛl lɩmɩ paar fɛʋʋkɛ wɩ n dernɩ bile a be.
2 Sɩ bileekɛ wɩ n dernɩ gbʋʋlɔ a be na nĩikɛ wɩ n tinɩ nĩ ti paar, na puno na hi na'.
Dɩ dɩvɛ̃ phaakɛ nɩ n pɩɛrnɩ nɩ 'lɛ, na 'lɛ ga.
3 Efɩrayɩmɩ məlsɔ na too Thãgba Kɔ̃tɩnɩ dʋɔ bã',
Wa kɛrɛ na bir Ejipiti.
Dɩ wa khor dikorɩkɛ dɔnɩ awɩ sãasɩ le Asɩrɩ dɩɩra.
4 Wa bir na ji dɩvɛ̃ bonɩɛ Thãgba Kɔ̃tɩnna bã'.
Awɩ bonɩsɔ na daaraa ga.
Ga ho warɛ yilə̃bi dɩkɔ.
Dɩ wɩrɛ fɛʋʋkɛ na khɔ gɩnɩ na lɩrɛ;
Awɩ nɔ khoda ga do dɩbara,
Sɩ ga lõ Thãgba Kɔ̃tɩnɩ cɔa'.
5 Aɲe na cʋʋ kpa jɛ wire,
kɛ dɔnɩ Thãgba Kɔ̃tɩnɩ fɛtɩ wi ya fɛ?
6 Hɩnɛ wɩ n jaal gɩdonɩ awɩ dɩ kpolole
Ejipiti na tee wer,
Mɛ̃ɛfɩ dɩɩ n do awɩ khi dʋ pa.
Hɔ̃ puu na thiri awɩ thɩ̃ ɓɔ̃sɔɔra,
Uu n khɔ̃ gɩ tee awɩ kẽkẽ wasɔ.
7 Bɔɔ daan, kɛ Thãgba na kɩɩlna wɩnɩ,
Bɔɔ daan, kɛ Thãgba na lɩmɩ wɩnɩ gɩrɛ wɩ cʋʋnɩ.
Dɔ Ɩjɩrayɛldara n jɩ gɩ!
Nɩ n sor: "Yʋʋ bure Thãgbaa mɩɩmɩɩ,
Kuunɩkɛ henənɩ Thãgbaa thu n mɩɩrɛ bʋlabʋla,
Sɩ gɩ the anɩ dɩparaakɛ kɔ̃tɩnanɩ ka
Na laar kɔ̃tɩ̃ɩkɛ nɩ n laarʋʋnɩ.
8 Ʋrɛ n gɩɩlɛnɩ da n hɩɩna Efɩrayɩmɩ məlsɔ,
Mɛr Thãgbaa mɩmɩɩ gɩ.
Mɩ har kha na ɩ̃ Thãgba.
Sɩ wɩ n pher mer phera ɩ̃ ka para fɛw.
Wɩ n kɛ̃kɛrɛna mɛr foo dɩ wɩ dana ɩ̃ Thãgbaa cɔra.
9 Wɩ mʋʋrɛ kʋɛrɛra a pɩɩr,
Mɔ̃kɛra gɩ kɔɔ kanɩ mamara Gɩbea dɩɩra.
Thãgba Kɔ̃tɩn na jɩnanɛ awɩ dɩpa,
A na ɩɩrna wɛr gɩ do awɩ sopuusɔ dɔ kɩrʋ.
10 Mɩ yɩrɛ Ɩjɩrayɛl bɩsana
Dɩ wɩ ho dɩvɛ̃ thɩr beekɛ hanɩ bə̃ kparaara.
Mɩ yɩrɛ anɩ thɩ kɔ̃tɩ̃sɔ
Dɩ wɩ ho caca beekɛ fɩgɩ thɩrʋ n senɩ.
Sɩ mɔ̃ wɩ jalnɩ dã Baal-Peɔr
Wɩ gbaar awɩbara a ha Baalɩkɛ dɔnɩ yicur thɩl;
A debi a do kpɔ̃kpɔrɔ̃ thɩ̃ɛ mɔ̃ thɩ̃ɛɛkɛra wɩ n fʋɔrnɩ hanɩ.
11 Efɩrayɩmɩ məlsɔɔ i dʋbɩ na buri mɔ̃ 'lomin n ubini.
Bi kʋɔn na hale bã'
Pɛmɛrdaar na hale bã'
Pɛmɛr lʋʋn na hale bã'.
12 A wɩ hananakɛ bɩsana a haan
Sɩ ma kʋʋr wɛr, ma sɩ war wɩ khɔ̃a'.
Dɩ wo ga puu warɛ ɔbɔɔkɛ ma hʋnɔna wɩnɩ.
13 Ɔbɔɔkɛ mɩ kɔɔ yɩnɩ Efɩrayɩm bəən,
A kɔɔ hor thɩrʋʋkɛ wɩ thelnɩ ɲɔ nʋɔra pa bɔbʋɔra.
Sɩ Efɩrayɩmɩ məlsɔ na kpar awɩ bɩsãsɔ na jalna na ha ʋrɛ na kʋrɛ wɩnɩ.
14 Thãgba Kɔ̃tɩn yaa, cʋɛ thɩ̃ɛ.
Sɩ aɲe wer fa cʋʋ wɩrakɛ tɔr?
Cʋɛ awɩ khɛrsɔɔ pɛmɛɛr na n kʋɛ,
Awɩ ƴɩlɛ̃sɔ na n hana ƴɩlɛ̃ ɲʋɔna'.
15 Dɩ Thãgba Kɔ̃tɩn bir so : «Wɩ nɩnanɛ awɩ puu gbelẽ gbelẽ Gɩlgal dɩɩra.
Dɩ liir mɩ ɩɩrna wɩ laarɛ,
Dɩɩ the awɩ cʋʋ pa puusɔɔra.
Ma weele wer ɩ̃ cɔ na faa.
Ma na wɩ bã'.
Awɩ kɔ̃tɩ̃sɔ fɛw dor lãlana.
16 Efɩrayɩmɩ məlsɔ 'liri sor.
Wɩ khɩrɛ mɔ̃ thɩrʋ n khɩnɩ na nɛɛ.
Wa hana məlle kpɩɩ bã.
Dɩ adorakɛ wɩ hana bɩsana,
Ma bũburone awɩ bɩsãsɔɔra wa n tunənə'.
17 Ɩ̃ Thãgba na bo wer na faa,
Gɩdonɩ wa pɩɛ nũə'.
Dɩ wa n kpaarɛ baba par fɛw ca kpɩɩsɔɔ thɩ̃thɩɩn.»