Ʋrɛ direnɩ jɩɛ, jɛ kʋkʋʋlʋ a na kha
8
1 Nɩ ʋna banake ʋnɛ a khɛ tɩbɩlala!Lãlaardaar n ber mɛr Thãgba Kɔ̃tɩnɩ cɔ too
Mɔ̃ sɩgbʋra n benɩ nʋmɩ dɩ gba,
Gɩdonɩ wɩ kʋɛrɛ ɩ̃ nɔ bɩɛl ʋlfɛ,
Wɩ ɩɩrnanɛ law ɩ̃ jɔfʋra.
2 Wa hulẽ marɛ nayɩ:
Asɩ Thãgba yaa! Sɛr Ɩjɩrayɛl bɩsana, sɩ jɩ fɛr!
3 Wɩ dʋnanɛ gɩrɛ bʋɔnɔnɩ a faa,
Dɩ gɛr gɩ lãlaardara na weele wer wa n kpaan.
4 Wɩ pɛrɛ jamanasɔ, sɩ ga do mɛr hana wɩ hʋɛa',
A pɛr kɔ̃tɩna sɩ ma jɩrɔ thɩ̃a'.
Wɩ gbaar awɩ dɛ bulo na dɛ a be gɩ thɩla,
Dɩɩ do awɩ bũburõda.
5 Mɛr Thãgba Kɔ̃tɩn bor anɩ na ɓol thɩl a faa yaa Samarɩdara.
Ɩ̃ nĩkhi lɩ narɛ dɔ khaa.
Ʋmɔ̃ɔ bɔɔ ga danakɛ sɩ na hana dɩ paara' ?
6 Gɩdonɩ anɩ na ɓol thɩlla, Ɩjɩrayɛl dɩɩra a the,
Ɲɛ̃ thɔ̃ jɩn ʋkha cʋgɛɛ;
Aa do Thãgba ga.
Dɩ gɛr gɩ Samarɩɩ na ɓol thɩlla na cʋɔrɛ yɩra yɩra.
7 Gɩdonɩ Ɩjɩrayɛl bɩsana diire jɩɛ,
Jɛ kʋkʋʋlʋ wa kha.
Bile na hala'.
Dɩ a gɩ phurəkɛ,
Sɩ ga hana mɩɩna'
Dɩ a gɩ hana mɩɩnakɛ
Sɩ kpakpala na khɔ gɩ.
8 Wɩ thire Ɩjɩrayɛldarara biləbiləbilə
Nɛnɛ̃kɛ wɩ har caarsɔɔ thɩ̃thɩɩn,
A ho thɩ̃ɛɛkɛ tibil na hananɩ ƴaala'.
9 Gɩdonɩ wɩ jaal Asɩrɩ dɩɩra bul ƴaalʋ
A ho hɔ̃ kũkə̃əkɛ n jɩlɛnɩ khuirə kəl.
10 Sɩ Efɩrayɩmɩ məlsɔ wer, wɩ ther wɛdaarsɔ.
Adorakɛ wɩ 'laa khaardaasɔ ca kpɩɩsɔɔra,
Ma kpa wɛr a na gbɛbɩ,
dɩ wa gaar kɛ na gbe
Jamanaa ɲɔ̃kɔɔ.
11 Efɩrayɩmɩ məlsɔ mɩrɛ bonɩ ji paarsɔ dɩɩ kar wa n jiro so hɛl bonɩɛsɔ.
Dɩ bonɩ ji paarsɔɔlera debire do war sopuu cʋʋ hʋɛ.
12 A mɩ khererakɛ ɩ̃ jɔfʋ na agɩ vaar pasɔ yɩra yɩra a ha wɩ,
Sɩ wa gba gɛr gɩ do war thɩ̃ kpakpal.
13 Wɩ n kʋʋrɛ nʋma a jinə mar bonɩɛ,
sa kho nʋʋn.
Mɛr Thãgba Kɔ̃tɩn na n tee ga bonɩɩla'.
Nɛnɛ̃ɛkɛ mɛr Thãgba Kɔ̃tɩn jɩnanɛ awɩ dɩpasɔ.
Dɩ ma ɩɩrna wɛr gɩ do awɩ sopuusɔ dɔ nɔɔ.
Wa kɛrɛ na bir Ejipiti dɩɩra.
14 Ɩjɩrayɛl bə̃dara diinəne ʋrɛɛkɛ te wɩnɩ,
Sa mɩ jamana cɔ ɓɔnasɔ,
Dɩ Juda bə̃dara kur dɩɩ jɔɔ a mɩ dɩ bɛr gʋʋsɔ a kpalalɔ.
Sɩ ma tor dɔɔ awɩ dɩsɔɔra
Gɩ hɩ̃ awɩ jamana cɔ ɓɔ̃sɔɔra.