7
1 Ɔbɔɔkɛ mɩ ƴaalnɩ ɩ̃ kpɛɛ Ɩjɩrayɛldara awɩ khora,Gɛr Efɩrayɩmɩ məlsɔ dɩpasɔ na Samarɩdaraa cʋʋ pa puusɔ yɩrrɔ.
Wɩ n fɩɩlɛ tɩbɩla,
Yo na n lʋʋn cɔnanɔ
Yu hɔ̃hɔla ha hʋɛra dɩ wa n phʋʋn tɩbɩla.
2 Sɩ wa n kpɩɛr awɩ bɩnɔ,
Dɩ mɩ jɩrɛ awɩ puu fɛʋʋkɛra wɩ n cʋʋna'.
Nɛnɛ̃ awɩ thɔ̃ puusɔɔra fʋ wɛr.
Mɩ to garɛ yire.
3 Wɩ n fɩɩlɛ jamana na awɩ cʋʋ pa puusɔ dɩɩ daaraa,
Dɩ wɩ cʋʋ kɔ̃tɩnasɔ na awɩ fɩɩl thɔ̃sɔ dɩɩ da war,
4 Wɛr fɛw kpore khɛr kpɩɩ na kuun kpɩɩ ƴaaldaara,
a ho buru hɩ paarɩkɛ buru hɩdaar pɛnɩ dɔɔ dɩ kpor phãphãphã.
A n sɩrɔrɛ dɔ kpa pɛrɛ,
A fʋna bɔɔraakɛ a gbʋranɩ buru mɩɩn dɩɩ dana bɔɔkɛ gɩ bʋnɩ.
5 Dawiikɛ wɩ n cʋʋnɩ ɓolle asɩ jamanaa irə,
Tɩɩ kɔ̃tɩnasɔ n ɲɔr dɩvɛ̃,
Dɩɩ pɛr war khoo.
Jamana n faarɛ ɔɔbara tɩɩ mãadarara.
6 Wɩ n tɔr a wɔrɔ̃ɔ na haarɩkɛ kporanɩ a ho camã dɔɔ.
Wɩ n kpore phãphãphã awɩ puu cʋʋra,
Dɩtɩnɔ fɛw awɩ nĩkhi n daarɛ,
Sɩ duuro dɩ ga n lɩ dɔ kɔ̃tɩ̃ khaa.
7 Wɩ kpore fɛw a ho camã dɔɔ,
Wɩ n bũburone awɩ sogʋʋrdarasɔ.
Awɩ jamanasɔ fɛw jiire;
Bɩɛllakɛ awɩ thɩ̃thɩɩn na hulẽ mara'.
8 Efɩrayɩmɩ məlsɔ ɲaɲaananɛ kha na ca kpɩɩsɔ,
Efɩrayɩmɩ məlsɔ debire a ho wamɩɩkɛ wa finə'.
9 Kpakpala n pɩrɛ ɔɔ fãga,
Sɩ aa ja'.
Tɩ̃ɩ fʋʋrɛ,
Sɩ aa ja'.
10 Ɩjɩrayɛldara i ƴaal n pɩɛraarɛ sor.
Wa kɛr bir mɛr Thãgba Kɔ̃tɩn awɩ Thãgbara ga,
Na gɩrɛ fɛʋʋkɛ dananɩ, sɩ wa ƴaal ma'.
11 Efɩrayɩmɩ məlsɔ hor kʋlãpubi də̃bələ,
Wa hana kpɛsɛra'.
Wɩ wer Ejipiti a bulo nɩ,
Sa jal Asɩrɩ dɩɩra bul ƴaalʋ.
12 Sɩ ɔbɔɔkɛ wɩ n jalnɩ,
Mɩ dʋna warɛ ɩ̃ kẽkẽ wi pheru,
A fʋ wɩ mɔ̃ wɩ n fʋnɩ 'lominə;
A naar wɩ dɩɩ mɩɛ kha na mɔna wɩ kɔɔ kpãkpãa warnɩ awɩ kpa jɛra.
13 Ga puu warɛ, gɩdonɩ wɩ fuure a hʋnɔna mɩ.
Wa bũburone gɩdonɩ wɩ ɩɩrna marɛ lãʋ.
Mɔ̃ mɩ hanɩ ma n taa wɩ,
Wɩ kuure sɔ̃sɔ dɩ wa n pɛ mar.
14 Wa n hulẽ mar na awɩ ha fɛʋa'.
Sɩ wa n waal awɩ phɩ̃ para.
Wɩ n lɩɩrɛ awɩ tomɩ gɩ do nɔɔ wɩ 'lɛ bile na dɩvɛ̃,
Dɩɩ do mɛ̃ wɩ hʋnɔna mɩ.
15 Mɛr haanɛ wɩ,
A ha wɩ fãga,
Sɩ dɩ wɩ hana mar kpɩɛr puunə.
16 Wɩ kɛrrɛ sɩ ga do ƴũu Pərdaarra wɩ kɛra'.
Wɩ hor thaakɛ na bʋɔnɔna',
Awɩ kɔ̃tɩ̃sɔ na khiire kʋʋrra
Gɩ the awɩ thɩmɩɩ puusɔɔra.
Dɩ ga cʋʋ wɛr wɩ do maan nɔɔ Ejipiti dɩɩra.