Ɩjɩrayɛl kɔ̃tɩna cʋʋrɛ puure
5
1 Nɩ pɛ gɩrɛ nũu yaa, bonɩ jidara!Ɩjɩrayɛlɩ cɔdara yaa, nɩ pɛ nũu !
Nɩ gbarɔ nũu yaa, jamanaa cɔdara!
Gɩdonɩ nɛr kɩɩlʋ telẽ,
Gɩdonɩ nɩ dor pheru ɩ̃ toora Mɩsɩpa dɩɩra,
Nɩ do warɛ kẽkẽ wi pheru Tabɔɔr gɔ̃gʋɔnnɔ.
2 Gõgolõdara kʋʋrɛ tɩbɩla jɔɔ ka Sɩtɩm dɩɩra,
Dɩ mɛrɛ, ma pɛ wɛr fɛʋra sor.
3 Mɛrɛ, mɩ jɩrɛ Efɩrayɩm,
Dɩ Ɩjɩrayɛl na wɔ̃ ɩ̃ ƴɛra ga,
Gɩdonɩ fɛr Efɩrayɩm,
Fɩ cʋʋrɛ bɔdɛl thɔma,
Dɩ Ɩjɩrayɛl biserore dɩbara Thãgbaa ƴɛra.
4 Awɩ cʋʋ pasɔ na n ha wɩ hʋɛ dɩ wa kɛr na bir mɛr awɩ Thãgbara ga,
Gɩdonɩ bɔdɛl cʋʋ thue har awɩ thɩ̃thɩɩn
na mɔ̃ wa jɩnɩ mɛr Thãgba Kɔ̃tɩna'.
5 Ɩjɩrayɛlɩ i ƴaal n kɩɩlnaanɛ.
Ɩjɩrayɛl na Efɩrayɩm na jiire gɩ do awɩ dɩpa dɔ nɔɔ.
Juda dakha na bararɛ awɩ kha.
6 Wa jaal wɩ ji bonɩɛ na awɩ nasɔ na awɩ banasɔ wɩ ƴaalna mɛr Thãgba Kɔ̃tɩn,
Sɩ wa yɩ ma',
Gɩdonɩ mɩ tɔr hʋnɔna wɩ.
7 Wɩ fɩɩlɛ mɛr Thãgba Kɔ̃tɩn,
Sa kɔ̃ bɔdɛl besɔ.
Dɩ nɛnɛ̃ sɩpo pha bɩɛlla wa bũburone na awɩ thɩ̃sɔ.
Efɩrayɩm məlsɔ na Judaa məlsɔ ker kha kʋʋr
8 Nɩ ʋna banake ʋnɛ Gɩbea dɩɩra
A ʋna tutuu Rama dɩɩra,
Na n bɛ koke hulẽbe Betɩ-Avɛn.
Bɛ̃jamɛ̃, dɔ bʋrɛ kʋʋr hale afɩ khiro!
9 Efɩrayɩm na debire na do bə̃ kparaa wireekɛ ma pɩɛraanɩ sor.
Mɩ n sor Ɩjɩrayɛl caarsɔɔra thɩ̃ bɩɛlɩkɛ dɔnɩ sobɔr.
10 Juda kɔ̃tɩna hor tɩbɩlaakɛ n gɔnɩ dɩ wɩ lõ tibil kpɩɩ pɛlla.
Ma deer warɛ ɩ̃ nĩkhi ga n cel ɲɔ khaa.
11 Efɩrayɩmɩ məlsɔ 'lɛr kpoore,
Kɩɩlʋ wɩɛl wɛr koo,
Gɩdonɩ wɩ ƴaalɛ wa n kpa awɩ thɛthɛɛ jɔfʋra.
12 Dɩ mɛrɛ, ma hor barsɛ Efɩrayɩmɩ məlsɔɔra
Ɩ̃ ho kho kɩɛlna Judaa cɔdarara.
13 Efɩrayɩmɩ məlsɔ yɩrɛ awɩ kho,
Dɩ Judaa məlsɔ yɩ awɩ kho kɩɛlna
Efɩrayɩmɩ məlsɔ jaal Asɩrɩdaraa pa,
wɩ thʋɔn thɔ̃thɔna Yarɛbɩ jamanaa pa,
Sɩ jamanaale na puno na kpɛɛ nɩ dɩ thɩɩ gɩ a pɛ anɩ khora ga.
14 Gɩdonɩ mɛrɛ, ma hor sidũ'ũu Efɩrayɩmɩ məlsɔɔra,
Ɩ̃ ho sidũ'ũu ɓolʋ Judaa cɔdarara.
Mɛrɛ, mɛrɛ ma cɛcɛbɛrɛ sɩ na jal,
Ma gbaar na jalna sɩ tibil na puno na taa mara'.
15 Ma jaal, ma kʋɔn ɩ̃ cɔ
gɩ dana bɔɔkɛ wa canɩ awɩ dɩpasɔ, sɩ wɩ kɛr wɩ bir mar.
A wɩ ha ha kʋɛrɛra, wa ƴaal mɛr.