Thãgbaa kɩɩlɩkɛ a kɩɩlnanɩ Ɩjɩrayɛl bɩsana
4
1 Nɩ pɛ Thãgba Kɔ̃tɩnɩ thɩmɩɩ nũu yaa Ɩjɩrayɛl bɩsana!Thãgba Kɔ̃tɩn har da n kɩɩlna nɛr dɩdara,
Gɩdonɩ na hana fɩl telẽa'
Na do sobɔdara ga,
Na hana Thãgba jɩɩr le dɩɩra ga.
2 Sʋ̃ɔsɔ na tɩɩ fɩɩlɛ,
Tɩɩ kʋr na yuur na khɛ kpɩɩ ƴaalɛ na kuun kpɩɩ ƴaalɛ dɔ gɩrɛ fɩ n yɩnɩ.
Wɩ n gbõgolone khasɔ,
Wɩ n kʋʋrɛ kha bɔɔ fɛw.
3 Dɩ gɛr gɩ, dɩɩ na har yilə̃bera.
Dɩdara fɛw a gbana nʋma hʋɔnɔ
Na 'lominə jɩɛra na kpɛrɛrɛ.
Thʋmanakɛ laɲʋɔnɔ na bũburone.
Thãgba n phaanɛ bonɩ jidara
4 Tɩɩ bɩɛllakɛ na n bana thɩ̃bana ga,
Tɩɩ bɩɛllakɛ na n phaan tibilə ga,
Gɩdonɩ bonɩ jidaar kɔ̃tɩ̃ɩ mɩ hana sor.
5 Na bararɛ dɩwɩlʋla
Thãgbaa mɩmɩaakɛ hanɩ anɩ thɩ̃thɩɩn
Na bararɛ dɩtɩnɔ dakha,
Ma bũburone anɩ nɩ.
6 Ɩ̃ too n bũburone
Gɩdonɩ Thãgba jɩɩr ɓɔr wɛr.
Gɩdonɩ nɛr bonɩ jidara dʋnanɛ jɩɩr a faa,
Ma tiir ner ɩ̃ bonɩ ji thɔna a na faa.
Mɔ̃ nɩ diinəni mɛr anɩ Thãgbaa jɔfʋ a faa,
Mɛrɛ dakha ma diinəne anɩ bikũusɔ a na faa.
7 Mɔ̃ wɩ n lernɩ jɔɔ
Ɔmɛ̃ wɩ n cʋʋ mar sopuu.
Ma debire awɩ i dʋbɩ gɩ do yicuru.
8 Wɩ n khor nʋʋnɩkɛ ɩ̃ too n jinənɩ bonɩɛ awɩ sopuurə.
Dɩ wɩ n tɔ wɛr pɛr dɩ wa n cʋʋ dɩpa ca bɩɛlɩkɛra wɛr dakha n cʋʋnɩ.
9 Gɩrɛ na dananɩ tɩbɩla gɛr na dana bonɩ jidara,
Ma ɩɩr warɛ
Gɩ do awɩ fɩl puu dɔ kɩrʋ.
Ma lɩmɩ wɛr mɔna awɩ cʋʋ pasɔ hanɩ.
10 Wa n khor dɩkɔ sɩ wa hiə',
Wa n cʋʋrɛ bɔdɛl thɔma sɩ wa lerra'
Gɩdonɩ wɩ bor wa n therna mɛr Thãgba Kɔ̃tɩna'.
11 Bɔdɛl thɔma na dɩvɛ̃ cʋʋ wɛr dɩ yʋʋ bu wɩ.
12 Ɩ̃ too n tɛr jɩɛ thɩlalaakɛ wɩ cʋʋnanɩ thɩra,
dɩɩ do thir kuru n mɩana wɩ
Gɩdonɩ bɔdɛl cʋʋ kpɩɛrɛ cʋʋ wɛr dɩ wɩ buur,
Dɩ wa n cʋʋ bɔdɛl thɔma a hʋnɔna awɩ Thãgba fĩi.
13 Wɩ n jire bonɩɛ gɔ̃gɔ̃ yʋʋsɔɔra,
Dɩ wɩ thii latɩkolo gɔ̃gɔ̃ biisɔra,
Wɩ n jire bonɩɛ Sɛn na pepiliye na terebɛ̃tɩa thɩr kɩrɔsɔ,
Kɛ hananɩ ɩtɩ bɔɩsɔ.
Dɩ gɛr gɩ anɩ bikhɛrsɔ na n cʋʋrɛ bɔdɛl thɔma,
Anɩ bikũusɔɔ khɛrsɔ na n phɩɩna kuun kpɩɩsɔ.
14 Ma pɛr anɩ bikhɛrsɔra sor gɩdonɩ wɩ n cʋʋrɛ bɔdɛl thɔma ga,
Dɩ anɩ bikũusɔɔ khɛrsɔra gɩ gɩdonɩ wɩ dor kuun kpɩɩ ƴaaldara ga;
Gɩdonɩ bonɩ jidara thɛthɛrakɛ n thɛ khuirə na bɔdɛl cʋʋdara,
Dɩ wɩ kho bonɩ ji thɩ̃ɛsɔ na khɛr khabaasɔ.
Dɩ mɔna wɩ n sonɩ sokpaa aa : «Tɩbɩlaakɛ na hananɩ bɩ̃ kuurə' na bũburone.»
15 Ado fa cʋʋ bɔdɛl thɔma ya Ɩjɩrayɛl,
Juda na n cʋʋ ɔɔ dɩpa ca bɩɛlla dakha ga.
Na n jal Gɩlgala'
Na n jʋʋn Bɛtɩ-Avɛnb dɩɩra ka Thãgba hanɩ
Sɩ na ʋlfɛ aa:
«Thãgba Kɔ̃tɩn dor yidaara'!»
16 Gɩdonɩ Ɩjɩrayɛl dor lãlan
Mɔ̃kɛ nanɩ lãlan n lanɩ,
Nɛnɛ̃ mɛr Thãgba Kɔ̃tɩn ma n khɩɩrɛ
Mɔ̃ wɩ n khenɩ banaa bə̃ fã pɛnana.
17 Efɩrayɩmɩ məlsɔ ɓaan kha na thɩla.
Nɩ sɛ war!
18 A wɩ ɲɔ dɩvɛ̃ a na pɩ,
Dɩɩ do bɔdɛl thɔmana wɩ too waa khorr.
Awɩ kɔ̃tɩ̃sɔ nar yicur thɔma ka.
19 Jɩɛ na gba wɛr a na jala,
Dɩ yicuru na fʋlɛ wɛr awɩ bonɩsɔra.