Thãgba na bire na gba Ɩjɩrayɛl bɩsana dɩ wa do ɔɔ too
2
1 Sɩ dɩkhõo Ɩjɩrayɛl bɩsanaNa bire na jɔr a na ho gbalãkothɩnɩkɛ hanɩ laɲɔ̃ nʋɔra,
Kɛ wa punonɩ na mɩ̃ɛ agɩbo wɩ thera'.
Dɩ paarɩkɛ wɩ n kɔɔ so warnɩ wa do mɛr Thãgbaa toa'
wa bire wa n we wɩ:
Mɛr Thãgba yidaarɩ bikũusɔa.
2 Juda bə̃dara na Ɩjɩrayɛldara na gbɛbɩrɛ pa bɩɛl,
A na hana kɔ̃tɩ̃ bɩɛl.
Dɩ wa ther dɩɩraakɛ wɩ donɩ dea;
Gɩdonɩ wirelera dɔnɩ koke wire Jijireyɛlɩ ɓɛlɛnɔ na kɔ̃tɩnɛ na ka.
3 Nɩ sɔ anɩ õkũusɔɔra: «Amɩ!» Kɩrʋ dʋɔn «ɩ̃ too.»
A sɔ anɩ õkhɛrsɔɔra: «Ruhama!» Kɩrʋ dʋɔn «wɩrɛ wɩ jɩnɩ bʋɔra».
4 Nɩ hana anɩ nɩ dɩɩ, nɩ hana anɩ nɩ dɩɩ,
Gɩdonɩ aa do ɩ̃ khɛra',
Dɩ mɛrɛ ma do ɔɔ koa'.
Dɔ a tiir ɔɔ ƴɛra ɔɔ bɔdɛl jẽsɔ,
A tiir ɔɔ ɩlɛ̃sɔɔra ɔɔ kuun kpɩɩ ƴaal jẽsɔ.
5 A mɛ̃ ga, ma fʋʋrʋʋrɛ todaa, sɩ ɩ̃ sɩɩraa na sãɓɔlɔ̃.
Ma kpaarʋʋrɛ kẽkena, sɩ a ho wireekɛ wɩ kʋɔnɩ.
Ma cʋʋrɛ ɔɔ dɩ gɩ ho bə̃ kparaa.
Ma cʋgʋʋrɛ a ho thɩ kparaa.
Ma cʋgʋʋrɛ ɲɔlkhaa n lɩɛrʋʋ,
6 Sɩ bʋɔ na fʋ mɩ ɔɔ bɩsãsɔɔra ga,
Gɩdonɩ bɔdɛl bɩsana wɛ.
7 Awɩ nɩ cʋʋrɛ bɔdɛl thɔma,
Ʋrɛ kɔna wɩnɩ cʋʋrɛ yicur thɔma.
A n kɔɔ sor aa: Ma ɩɩrɛ na kpa ɩ̃ wɛdaarsɔɔra,
Kɛ n hana mɩnɩ ɩ̃ dɩko na ɲʋɔn,
Na lɛn na lɛ̃,
Na niin na taan.
8 Dɩ gɛr gɩ hɩnɛ,
Ma sɔbɩrɛ ɔɔ hʋ na uusɔ
Ma bã gɛr a na sɔbɩ.
Dɩ a na bir na yɩ ɔɔ hʋsɔ bã.
9 Dɩ a na car na kpaan ɔɔ wɛdaarsɔrara
Sɩ a na 'li wa'
A na ƴaal wɛr, sɩ a na yɩ wa'.
Agɩpɩ a na sor na yɩ: «Gɩ bɔrɛ,
Dɔ ɩ̃ kɛr ɩ̃ bir ɩ̃ ko tɩna,
Gɩdonɩ mɩ kɔɔ hananɛ daw mamara a jɔ nɛnɛ̃.»
10 Aa kɔɔ jɩ dɩ mɛr n kɔɔ hanaa
bile na dɩvɛ̃ phaa na niinə'.
Mɩ haarɛ dɛ bulo na dɛ.
Dɩ a gba gɛr a ha Baal!
11 Dɩ gɛr gɩ ma pɔr na tee ɩ̃ bile, bile kha bɔɔ
Ɩ̃ tee ɩ̃ dɩvɛ̃ pha dɩvɛ̃ thɩr bi khʋ̃ bɔɔ.
Ma teere ɩ̃ lɛn kẽkẽsɔ na ɩ̃ lɛ̃ kẽkẽsɔ,
Kɛra a n kɛɛnɩ sãɓɔlɔna.
12 Dɩ nɛnɛ̃ ma pɩɛraarɛ yicuru
Ɔɔ wɛdaarsɔɔra n tʋʋraa yire.
Sɩ tibil na hale na tagʋʋ ɩ̃ ɲɔ̃kɔa'.
13 Ma cʋʋrɛ ɔɔ kãkasɔ fɛw n khu:
«Ɔɔ fɛtɩsɔ na ɔɔ sɩpo pha fɛtɩsɔ na ɔɔ hɩɩr wi fɛtɩsɔ,
Na ɔɔ kpa jɛ kɔ̃tɩ̃sɔ fɛw.»
14 Ma kʋɛrɛ ɔɔ dɩvɛ̃ thɩrsɔ na ɔɔ fɩgɩ thɩrsɔ,
Kɛra a n kɔɔ sonɩ aa:
Gɛr dʋɔn lɩmɩnɛɛkɛ ɩnɩ wɛdaarsɔ ha nɩnɩ.
Ma fi ger dɩ ga do luusɔ,
Hɔ̃ nʋma na n kho gɩ.
15 Ma ɩɩrnaanɛ gɩ the bɔɔraakɛ a n gbanɩ da n dʋbɩna Baalsɔ
da n jinə war latɩkolo bonɩɛsɔ.
A n tor ɲɔ̃ tʋʋsɔ na lẽbiisɔ fʋɔrɔ;
Da n kpana ɔɔ wɛdaarsɔɔra,
Sɩ me wer, dɩ diinə mɩ a faa,
Mɛr Thãgba Kɔ̃tɩn sɔ.
16 Dɩ gɛr gɩ ma cʋrʋʋrɛ
Ɩ̃ jalna bə̃ kparaara,
Ɩ̃ mɩgʋʋ thɩmɩɩ gɩ daara haara.
17 Dɩ liir ma bir na haa ɔɔ dɩvɛ̃ thɩr lɛsɔ.
Dɩ Akɔɔr ɓɛlɛ̃b na bire na hʋraa lõfonʋɔkɛ dɔnɩ ɔɔ nũ pɛ dɛ̃ɛ pa.
Dɩ a na n khɩnɛ nɩɛsɔ mɔna gɩ n kɔɔ hanɩ ɔɔ biir bɔɔ,
Na mɔ̃ gɩ kɔɔ hanɩ wireekɛ a kɔɔ thenɩ Ejipiti dɩɩra.
18 Mɛr Thãgba Kɔ̃tɩn sɔ:
Ga wiile, fa n we mer : «Ɩ̃ ko»
Fa bir na we mɩ : « Ɩ̃ Baal» bã.
19 Ma tire Baalsɔɔ isɔ afɩ nʋɔ na faa,
Wa bir kpɩɩrakɛ a na jɩna awɩ isɔɔ bã.
20 Ga wiile ma cʋʋrɛ nɔ bɩɛl ʋlfɛrɛ n hale ɩ̃ toora
Na hɔ̃ nʋmana hʋɔnɔ, na 'lominənə jɩɛra
Na nʋmanaakɛ n haalɛnɩ thɩɩra na bɩnɛ.
Ma bũburone thaasɔ na bajɩnasɔ na koke thɩ̃ɛsɔ dɩɩra.
Sɩ ɩ̃ cʋʋ ɩ̃ too wa n cɔ na ha ɩɩ ba.
21 Ɩjɩrayɛl, ma gba fɛr na he bɔɔ khor.
Fɩl sarʋ na fɩl telẽ ma hena fɩ
Na sobɔdaar dʋʋr na bɔ fʋʋr.
22 Ma he fer na fɩl telẽ,
Dɩ mɛ̃ fa jɩ mɛr Thãgba Kɔ̃tɩn.
23 Ga wiile, mɛr Thãgba Kɔ̃tɩn sɔ, ma n ture,
24 Ma ture gɩrɛ thãgbara ƴũ n ƴaal marnɩ,
Thãgbara ƴũ na ture gɩrɛ thɩɩ n ƴaalaanɩ,
Thɩɩ n tu gɩrɛ bile na
Dɩvɛ̃ phaa na niin n ƴaalaanɩ,
Wɛr fɛw n tu gɩrɛ Jɩjɩreyɛl n ƴaalnɩ.
25 Ma jalɛ thɩ̃ diire dɩɩra,
Dɩ ma jɩrɛ Lo-Ruhama bʋɔra.
Ma sor Lo-Amɩna ɩ̃ yɩ: «Fɛr dʋɔn ɩ̃ too!
A so mar ayɩ: «Fɛr dʋɔn ɩ̃ Thãgba!»