Balãther thɩ̃ yɩr: Pɩpɩɩ bɔ thɩmɩaakɛ thɔ̃thɔ̃ thui mɩɩnɩ
10
1 Siirusɩɩkɛ dɔnɩ Pɛrsɩ jamanaa balãther yɛraakɛ a cʋʋnɩ jamana dʋʋra, Danɩɛlɩkɛ wɩ n wenɩ Bɛltɩsajaar nɩrɛ thɩmɩɩr bɩɛlɩkɛ thɛnɩ Thãgbaa pa. Sobɔr thɩmɩɩr gɩ waa gel dɩ ga n nɩna nɩwɛ kɔ̃tɩ̃ɩkɛ na ɩnanɩ. Dɩ a gbaar nũu thɩmɩɩrara a jɩrɔ kɩrʋ thɩ̃ yɩraale.2 Dabɔɔle mɛr Danɩɛl, mɩ cʋʋrɛ jɩmasɩ yẽther ha kʋɛrɛra. 3 Ma kɔɔ kho dikor bʋɔa', ma to nʋʋn na dɩvɛ̃ nʋɔra, dɩ niin gɩ dɩ̃ thir a pɩɩrna jɩmasɩ yẽtherɩla'.
4 Dɩ yɩɛrɩ caca sɩporɩ wire kpelẽ yenana, mɩ kɔɔ hale Tɩgɩrɩ mɩɩr nʋɔra, kɛ dɔnɩ mɩɩr kɔ̃tɩ̃ɩ. 5 Dɩ mɩ kɔɔ ɓar ƴɩɛ ɩ̃ hɩɩn, a yɩ kuun bɩɛl dɩ to lɛ̃ kɩ̃kɩɩn, sa khɩmɩ Ufaajia dɛ kile lophɛrɛ isirera. 6 Ɔɔ tomɩ hor bokaarɩkɛ wɩ n wenɩ Kɩrɩjolɩtɩ, dɩ ɔɔ ƴɛ na n carbara mɔ̃ thãgba n khonɩ jɔ dɩ ga n cabara, dɩ ɔɔ yisɔ ho dɔlɩnanɛ, dɩ ɔɔ ɲɛ̃ gbolsɔ na ɔɔ nɛgbalãsɔ na n hɩl a ho ther sɩɛɛkɛ wɩ lɔɔrnɩ, sɩ ɔɔ wi na n tii a ho tɩɩ jɔjʋɔɔ wi. 7 Mɛr Danɩɛl dɩbara, mɛr bɩɛl kɔɔ yɛ thɩ̃ yɩrɩɩle. Tɩbɩlaakɛ kɔɔ hanɩ kha na mɛrɛ, na kɔɔ yɩ thɩ̃a', sɩ maar fʋlɛ wɛr, dɩ wɩ caalɛ wa n wʋɔn. 8 Dɩ mɩ kɔɔ jɩɩlɛ, mɛr bɩɛlla dɩ ma n hɩɩn thɩ̃ yɩr kɔ̃tɩ̃ caarɩle. Dɩ fãga ɓɔr mɛr, dɩ ɩ̃ ƴɛ debɩ a phɩlko, a ho mɔ̃ thɩ̃ɛ n hɩnɩ, dɩ fãga fɩɩʋrakɛ na ha mar bã. 9 Dɩ mɩ nɩrɛ ɔɔ thɩmɩɩr wire, dɩ mɔ̃ mɩ nɩɛnɩ, tomɩr khiir mer dɩ̃ təə ji a sumo thɩɩra. 10 Dɩ tibil tha marɛ a fʋ mɩ dɩ̃ ɩɩr na jẽu a wurõwu nɛkhilə na ɲɛ̃pɛla thɩɩra. 11 Agɩpɩ, a so marɛ aa: «Danɩɛl, fɛr kɛ Thãgba nanɩ jɔɔ ka gba nũu thɩmɩɩraakɛ ma mɩɩ fɩnɩ. Ɩrɛ jɩlɛ ka fɩ hanɩ, gɩdonɩ fɛrra wɩ thɔ̃ mɩ nɛnɛ̃. Ɔbɔɔkɛ a mɩɩ mɩnɩ thale, mɩ ɩɩrɛ jɩɩl dɩ ma n jẽ.
12 Dɩ a so marɛ aa: «Danɩɛl, fa n do maar n fʋ fa'. Gɩdonɩ a fʋna caca wire, ɔbɔɔkɛ fɩ gbanɩ kpɩɛrɛ a ƴaal fɩ jɩ kɩrʋ, a wur afɩbara Thãgbara, a ture afɩ bɩɛl. Dɩ afɩ thɩmɩɩra dɔ kɩrʋ mɩ ɩnɩ. 13 Dɩ Pɛrsɩ dɩɩ bɛbɛr kɔ̃tɩ̃ var mɛr a dana wire kpelẽ bɩɛl. Sɩ Mɩsɛlɩkɛ dɔnɩ thɔ̃thɔ̃ thuisɔɔ kɔ̃tɩ̃ bɩɛl pɔr a bul mɩ. Gɛr dɔ nɔɔ dɩ̃ pʋɔr le Pɛrsɩ jamanasɔɔ pa. 14 Nɛnɛ̃ dɩphã, mɩ ɩnɛ ɩ̃ mɩɛ fɩ fɩ jɩ gɩrɛɛkɛ na dananɩ afɩ too bɔɔsɔraakɛ na ɩnanɩ. Gɩdonɩ thɩ̃ yɩrɩɩle, pɩpɩɩ bɔɔsɔɔleeda gɩ.
15 Ɔbɔɔkɛ a n mɩɩ mɩnɩ thɩmɩaale, mɩ gʋɛrɛ ƴɩɛ thɩɩra a ɩɩ kɩrkɩrkɩr. 16 Dɩ hɩnɛ, ʋkha tha marɛ nɔfaara da n hona tibil. Dɩ mɩ bire mɩɩ thɩmɩɩr, a so ʋrɛraakɛ jɩlɛnɩ ɩ̃ ƴɛbʋrɔ mɩɩ: «Ɩ̃ kɔ̃tɩ̃ ya, thɩ̃ yɩrɩlera ɲaɲaan mɛr kpɩɛrɛ, dɩ fãga pɩ mɩ fɛw. 17 Mɔ̃ mɛr afɩ thɔ̃daar na puno na mɩɩna fɛr ɩ̃ kɔ̃tɩ̃? Ma hana fãga buurakɛ 'lo bã, fesue n ɓɔr mɛr. 18 Le ʋrɛɛkɛra n hɔnanɩ tibil tha mar wo, a ha mɩ fãga. 19 Agɩpɩ a so marɛ aa: «Fa n do maar n fʋ fa'; fɛrkɛ Thãgba nanɩ. Hanana ha ɩɩ! Pɩɛr 'lar ! Hanana fãga! Mɔ̃ a n mɩɩna mɩnɩ, mɩ bire 'lɛ fãga a sʋʋraa mɩɩ: «Ɩ̃ kɔ̃tɩ̃ yaa mɩa, gɩdonɩ fɩ ha mɛr fãga.»
20 Dɩ a bule mer aa: «Fɩ jɩrɛ gɩrɛ dɔnɩ kɩrʋ mɩ ɩnɩ afɩ pa bɛ? Sɩ nɛnɛ̃, mɩ n kɛrɛ ɩ̃ jal ɩ̃ kɛ̃kɛrɛna Pɛrsɩ dɩɩ bɛbɛr kɔ̃tɩ̃. Dɩ ado mɩ jal pɩ, Gɩrɛsɩ dɩɩ bɛbɛr kɔ̃tɩ̃ na ɩnɛ. 21 Sɩ ma mɩɛ fɛr ɓo gɩrɛɛkɛ kherenenɩ sɛbɛraakɛ hananɩ sobɔr thɩmɩɩr. Tibil bɩɛllakɛ na n bul mɩ ɩ̃ kɛ̃kɛrɛna wɩ, a ga do Mɩsɛlɩkɛ dʋɔnɩ anɩ kɔ̃tɩ̃ dɩbara gaa ga.