Danɩɛlɩ Thãgba bɩɛl
9
1 Caca yɩɛrɩkɛ Asierusɩɩ bikuun Darɩyusɩɩkɛ dɔnɩ Mɛɛdɩdaar gbanɩ jamana dʋʋr Kalde bəənə, 2 caca yɩɛraalera a donɩ jamana, mɛr Danɩɛl, mɩ yɩ gɛr sɛbɛsɔɔra a jɩ dɩɩ do yɛna kpalãther ɲʋɔrɩkɛra Jerujalɛm dɩɩ na wɩɛlnɩ na dana, mɔ̃kɛ Thãgba Kɔ̃tɩn kɔɔ sonɩ ɔɔ mɩmɩɩ Jeremɩna teenanɛ gɩ dã mɛ̃. 3 Dɩ mɩ fire ƴɩɛ a ee Thãgbaakɛ dɔnɩ Kɔ̃tɩn dɩ ma n bɩɛlʋ dɩ ma n ƴɛɛnaa, a linə nʋɔ, a tona bɔrɔ, a bʋlna thoo. 4 Mɩ bɩɛlɛ Thãgba Kɔ̃tɩn, ɩ̃ Thãgba, a cananaa dɩpaar mɩɩ:«Pha Kɔ̃tɩn, Thãgba wabʋʋkɛ n kɔnɩ maar, fɩ n fʋrɛ afɩ nɔ bɩɛl ʋlfɛ na ha bulole wɩrɛraakɛ n naan fɩnɩ dɩ wa n hɩɩna afɩ jɔfʋsɔ! 5 Sɩ cʋʋrɛ sopuu, sɩ cʋʋrɛ dɩɩ. Sɩ puurore ka, sɩ laan, a kɛr sa faa afɩ jɔfʋsɔ na gɩrɛ fɩ sonɩ. 6 Sa kɔɔ pɛ nũu afɩ thɔ̃darasɔraakɛ dɔnɩ afɩ mɩmɩɩsɔa'. Sɩrakɛ wɩ kɔɔ mɩɩrɛ afɩda asɩ jamanasɔ na asɩ tɩɩ kɔ̃tɩ̃sɔ na asɩ thɩsɔ na tɩbɩla fɛw dɩɩra. 7 Fer wer fɩ sarɛ yaa Kɔ̃tɩn, sɛrɛ sɛr hana yicuru mɔna gɩ hanɩ nĩ gɩrɛ Judaa toora na Jerujalɛmdarara na Ɩjɩrayɛl bɩsanana fɛw, na wɩrɛra wɔrɔnɛnɩ na wɩrɛra hʋnɔnɛnɩ dɩɩsɔɔra fɛʋʋkɛ fɩ weele wɩnɩ a pɛ dɩɩ do fɩl gõgolõsɔɔkɛra wɩ hana farnɩ dɔ kɩrʋ. 8 Thãgba Kɔ̃tɩn ya, sɛr hana yicuru ƴɩɛra, sɛrɛ na asɩ jamanasɔ na asɩ tɩɩ kɔ̃tɩ̃sɔ na asɩ thɩsɔ, gɩdonɩ sɩ cʋʋ farɛ sopuu. 9 Kɔ̃tɩn asɩ Thãgba fɛr dʋɔn bɔ fʋdaar na sopuu faadaar, sɩ dɩ sɩ ɩɩrna far lãʋ. 10 Sa kɔɔ pɛ fɛr Thãgba Kɔ̃tɩn asɩ Thãgba nũu, a kpaan afɩ jɔfʋsɔraakɛ a kɔɔ hanɩ ɔɔ thɔ̃darasɔɔkɛ dɔnɩ afɩ mɩmɩɩsɔ dɩ wɩ ha sa'. 11 Ɩjɩrayɛl bɩsana fɛw kʋɛrɛ afɩ jɔfʋ, a lɛ̃ hʋɛra, wa pɛ fɩ nũuə'. Gɛr gɩ dɩ sʋ̃ɔsɔ na ʋlfɛrɛsɔɔkɛ kɔɔ kherenenɩ afɩ thɔ̃daar Mʋɩjɩɩ jɔfʋra 'li sɩ gɩdonɩ sɩ cʋʋrɛ sopuu fɛr Thãgbara. 12 Fɩ cʋʋrɛ gɩrɛra fɩ kɔɔ mɩɩnɩ pɛ sar, sɛrɛ na asɩ kɔ̃tɩ̃sɔɔkɛ kɔɔ thɔɔnɛ sɩnɩ. Fɩ pɛ sarɛ thɩlke kɔ̃tɩna. Thɩɩraakɛ fɛw, thɩlke caarɩle na dã dɩkhãa pa a ho ʋrɛ dananɩ Jerujalɛm dɩɩra ga. 13 Gɩ daan mɔ̃kɛra gɩ kɔɔ kherenɩ Mʋɩjɩɩ jɔfʋ sɛbɛra. Thɩlke caarɩkɛ dã sɛr, sɩ sa ƴɛɛ fɛr Thãgba Kɔ̃tɩn asɩ Thãgba ga, sa kɛr dakha sa faa asɩ dɩpasɔa'. Sa kpɩɛrna sobɔrɩkɛ fɩ kɔɔ mɩɩna'. 14 Gɛr dɔ kɩrʋ dɩ fɛr Thãgba Kɔ̃tɩn pɛ sar thɩlkɩɩrɩkɛ sobɔra. Gɩdonɩ fɛr Thãgba Kɔ̃tɩn asɩ Thãgba sarɛ gɩrɛ fɛʋraakɛ fɩ cʋʋnɩ, sɩ sa kɔɔ pɛ fɩ nũuə'. 15 Nɛnɛ̃ɛkɛ yaa Kɔ̃tɩn asɩ Thãgba, fɛrɛkɛ kɔɔ tenɩ afɩ too Ejipiti dɩɩra na afɩ fãga ɲɔ̃, a the ire foo a dana nĩkɛ, sɩ cʋʋrɛ sopuu, sɩ hananɛ dɩpaar. 16 Kɔ̃tɩn yaa, sɛrɔ afɩ nĩkhi na afɩ cɩ̃cɩmã Jerujalɛmnaakɛ dɔnɩ afɩ dɩ na afɩ gɔ̃gɔ̃ phu gɩ do afɩ fɩl sar dɔ nɔɔ. Gɩdonɩ asɩ sopuusɔ na asɩ thɩsɔɔ dɩpasɔ dor nɔɔ dɩ wɩrɛ fɛʋʋkɛ diə sarnɩ na n kʋɛ Jerujalɛm dɩɩ ire dɩ wa n kʋɛna afɩ too i. 17 Nɛnɛ̃ɛkɛ asɩ Thãgba yaa, pɛ nũu mɛr afɩ thɔ̃daarɩ bɩɛlla na ɩ̃ ƴɛɛra. Afɩ naw dɔ kɩrʋ yaa Kɔ̃tɩn, birə kɛra ƴɩɛ pɩɛr afɩ pa phurəəkɛ wɩɛlɛnɩ. 18 Ɩ̃ Thãgba ya, pɛ nũu a nɩɛnɛ! Khɛra yinə a hɩnɛ kʋɛrɛɛkɛ dana sɩnɩ, hɩnɛ dɩɩkɛ ka wɩ n kɔɔ wenɩ afɩ i! Gɩdonɩ ga do asɩ fɩl sar cʋʋra sɩ n ƴɛɛ fa', sɩ afɩ bɔjɩ kɔ̃tɩ̃ dɔ kɩrʋ 19 Kɔ̃tɩn yaa, pɛ sɩ nũu! Kɔ̃tɩn wei, jɛ sɩ bʋɔra ! Kɔ̃tɩn yaa, pərə sar! Cʋɛ thɩ̃ɛ khə̃khə̃ gɩ do afɩ naw dɔ kɩrʋ yaa ɩ̃ Thãgba! Gɩdonɩ wɩ n wer afɩ i dɩ wa n pɛ afɩ dɩra na afɩ toora.
Yɛna kpalãther nyʋɔrɩ kɩr.
20 Mɩ har dɩ ma n mɩɩ dɩ ma n bɩɛlna Thãgba, dɩ ma n cana ɩ̃ sopuusɔ na ɩ̃ too Ɩjɩrayɛl bɩsanaa sopuusɔ, dɩ ma n phʋʋrna Thãgba Kɔ̃tɩn ɩ̃ Thãgba dɩ ma n pɛ ɩ̃ Thãgbaa gɔ̃gɔ̃ phurə. 21 Mɔ̃ mɩ hanɩ ma n mɩɩ ɩ̃ Thãgba bɩɛlla, kuunɩkɛra n dɔnɩ Gabɩrɩɛl, kɛ mɩ kɔɔ yɩnɩ caca thɩ̃ yɩrra, a ubire dapaara a tɔ wɔrɔ̃ mɩ dʋɔr bonɩ ji bɔɔ. 22 Dɩ a mɩɩna mɛr, a mɩɛ mɩ aa: «Danɩɛl, mɩ ɩnɛ nɛnɛ̃ɛkɛ ɩ̃ mɩɛ fɩ fɩ jɩ kɩrʋ. 23 Ɔbɔɔkɛ fɩ fʋnɩ Thãgba ƴɛɛrɛ cacara, a 'laarɛ thɩmɩɩr, dɩ mɩ ɩ̃ ɩ̃ mɩɛ fɩ, gɩdonɩ a na fɛr ka. Gɛr gɩ gba nũu thɩmɩɩraakɛ, a jɛ kɩrʋ thɩ̃ nɩrɔrɛraale.
24 aYɛna kpalãther yʋɔr der paar makoɲɔ wɩ dʋ afɩ toodara na afɩ dɩɩkɛ phonɩɩdara,
Gɩ do nɔɔ wɩ cʋʋ puure n khu,
Wɩ cʋʋ dakha sopuusɔ n pɩ.
Gɩ do nɔɔ dɩpaar n phʋɔl,
Sɩ wɩ pɛr fɩl sarʋ gɩ hale khorr,
Gɩ do nɔɔ thɩ̃ yɩrɩɩkɛ fɩ yɩnɩ na bobon thɩmɩɩrɩkɛ mɩanɩ n dã oti,
Wɩ pɛr niin tɩɩ phuusɔ tɩɩ phurə wɩ phiiruu.
25 Gbarɔ yʋʋ a jɩɛ jɩ kɩrʋ!
Kɛkɛkɛ bɔɔlera thɩmɩɩr kɔɔ 'laanɩ ayɩ,
Wɩ kɛra birə a mɛ Jerujalɛm dɩɩ,
A na dana kɔ̃tɩnɩkɛ wɩ phiirni bɔɔ,
yɛna makoɲɔ ga cʋʋ.
Dɩ yɛna kpalãther yeɲɔɔ bɩnɔ,
Wa mɩrɛ Jerujalɛm dɩɩ na ɔɔ gosɔ,
Sɩ bɔ gaar kɔ̃tɩ̃ bɔɔ ga do na sobɔr.
26 A yɛna kpalãther yeɲɔɔle ka pɩ,
Wa kʋrɛ Mesɩ,
Sɩ ga do ɔɔ thɛthɛɛ sora ga.b
Agɩpɩ jamana bɩɛlɩkɛ na ɩnanɩ, ɔɔ too na kʋɛrɛ dɩɩ na pa phuu,
Sɩ ɔɔ khu pa na daan mɔ̃ ɲʋɔn n ɓɛlnɩ a gbʋma.
Dɩ a na kʋɛrɛ thɩ̃ɛ foo
gɩ dana kʋʋrɩ pɩ bɔɔ mɔ̃kɛra kpɩɛrɛ kɔɔ gbanɩ.
27 A na ʋlfɛrɛ nɔ bɩɛl ʋlfɛrɛ na tibil jɔjʋɔ pɩpɩɩ yɛna makoɲɔɔle bɩnɔ,
Sɩ yɛna makoɲɔɔle thɩ̃thɩɩn,
A na pɩɛrɛ bonɩ jir na thɩ̃ bi bonɩ jir.
Gbõgolõdaarɩle na cʋʋrɛ kpɔ̃kpɔrɔnɛ gɩ və̃vĩə,
Phaphapha gɩ dana bɔɔkɛ bũburone na kpɩɛrɛɛkɛra kɔɔ gbaanɩ ɔɔdara,
Na phuroonɩ dɩphã.