DANƖƐLƖ THƖ̃ YƖ KPƖƖSƆ
Caca thɩ̃ yɩr: Banakɩɩr
8
1 Bɛlsajaar jamanaa balãther yɛraakɛ a cʋʋnɩ jamana dʋʋra, mɛr Danɩɛl, mɩ yɩrɛ thɩ̃ yɩr kpɩɩ wo ɔbɔɔkɛ cacadaar karɔnɩ. 2 Mɩ n kɔɔ hɩɩnɛ thɩ̃ yɩraalera, dɩɩ do Suujɩ dɩ kɔ̃tɩɩna mɩ kɔɔ ha, Elam bəənnə. Dɩ mɔ̃ mɩ n hɩɩnɩ dəəlelaale, dɩɩ do wo Ulaɩ kɔlɔ̃ nʋɔra mɩ kɔɔ ha.3 Dɩ mɩ ɓar ƴɩɛ dɩ ma n hɩɩn a yɩ banakɩɩr dɩ jɩɩl mɩɩr nʋɔra a hana ʋ̃ gbana yeɲɔ, sɩ bɩɛl kɔɔ gbaanɛ a jɔ bɩɛl. Sɩ ʋ̃ gbãale, ɔr pɩrɔnɛ a phu. 4 Dɩ mɩ yɩrɛ banakɩɩra dɩ jɛ wi phã paar na ɔɔ ʋ̃sɔ, a bir jɛ bil ʋrɛ wire na n jalnɩ dɩ pɛr ɲɔ̃bɔɔ, a bir jɛ ka wire na n jalnɩ dɩ pɛr ɲɔ̃bɩlã. Dɩ nʋ̃ bɩɛllakɛ na n puno dɩ laanaa ga, tibil bɩɛllakɛ na hana punone na taa tibil ɔɔ fãgara ga. Gɩrɛ a n ƴaalnɩ, gɛr a n cʋʋ, dɩ a n 'lire fãga da n pɛr bɔɔ fɛw.
5 Dɩ mɔ̃ mɩ n kpɩɛrna gɩnɩ, mɩ yɩrɛ bʋkɩɩr dɩ the wi lõ paar a kpaar thɩɩ fɛw a fi da n pɔna, sɩ a n sa thɩɩ woa. Bʋkɩɩra hananɛ ʋ̃ bɩɛlɩkɛ kpaanɩ nʋɔ yinə yeɲɔɔ thɩ̃thɩɩn. 6 Dɩ a pɔr phaphapha a dã banakɩɩrɩlera hananɩ ʋma yeɲɔɔle mɩ kɔɔ yɩnɩ dɩ jɩɩl mɩɩr nʋɔra. A car pʋɔra na ɔɔ fãga fɛw. 7 Dɩ mɩ yɩɩrɛ da n pɔ banakɩɩraale na nĩkhii. Dɩ a thʋʋrɛ a khaarʋ ʋma yeɲɔɔle, sɩ banakɩɩrɩle na puno a laanaa ga. Dɩ a gbaarɛ kpɛɛ thɩɩra a saarʋ, sɩ tibil bɩɛllakɛ na hale na taa banakɩɩrɩle ɔɔ ɲɔ̃kɔɔa'. 8 Dɩ bʋkɩɩrɩle 'lire fãga kɔ̃tɩ̃ɩ ka. Sɩ ɔbɔɔkɛ a 'lini punone dɩɩ dã thu, ʋ̃ kɔ̃tɩ̃ɩlera khar. Dɩ ʋma yenãakɛ kpaanɩ nʋɔ phure a ee gɛla yenanaakɛ jɩɛ n thenɩ ƴũu.
9 Dɩ ɔɔ ʋ̃sɔɔraalera, ʋ̃ bu bɩɛl phure bɩɛlla a ha fɩɩʋ da n khɔ̃ a ee bil ʋrɛ wire na n jalnɩ dɩ pɛr ɲɔ̃bɔɔ na wi phã paar, a eena dɩɩkɛ ɓɔnanɩ a jɔ fɛw. 10 Dɩ ʋnɛɛlera jʋʋnɛ foo a dã ƴũu kokena, a tɔ ɩkha, a tɔna ƴepələ̃bi ɩkha a kpɛɛ thɩɩra a saar wɩ na nɛɛ. 11 Dɩ a khəire ɔɔbaara foo a jʋʋnnakɛ a dã ʋrɛɛkɛ dʋɔnɩ kokenaa kɔ̃tɩ̃, a pɩɛr wire koo bonɩɩkɛ wɩ n jiirəənɩ, a kʋɛnanakɛ paarɩkɛ dʋɔnɩ ɔɔ sãasɩ pa. 12 Ʋ̃ buule punone ƴũu kokena, a kʋɛna wire koo bonɩɩkɛ wɩ n jinɩ dɩɩ do sopuu cʋʋrɛ dɔ kɩrʋ. A dʋnanɛnakɛ sobɔr thɩɩra a faa, a 'linə punone ɔɔ thɩ̃sɔraakɛ a n cʋʋnɩ. 13 Dɩ mɩ nɩɛrɛ tɩɩ phu bɩɛl da n mɩɩ, dɩ tɩɩ phu kpɩɩ bule ʋrɛra n mɩanɩ aa: «Ʋmɔ̃ bɔɔ thɩ̃ yɩrɩɩlera fɩ yɩnɩ wire koo bonɩ ji thɩmɩɩra na puureekɛ n kʋɛanɩ thɩ̃ɛɛ thɩmɩra na thɩ̃ yɩrɩɩkɛ fɩ yɩnɩ pa phuukɛ kʋɛanɩɩdara na ƴũu kokenanaakɛ ʋ̃ buulera saarnɩ na nɛɛ thɩmɩra na pʋɔr na dã»? 14 Dɩ a so marɛ aa: «Dɩwɩlʋ na dɩtɩnɛ gbɩlanɩ yeɲɔ na tãather (2 300) na kar ɓo, sɩ wɩ bir wɩ phʋɔl pa phuu wo».
15 Dɩ mɔ̃ mɛr Danɩɛl, mɩ n hɩɩnɩ thɩ̃ yɩrɩɩle, dɩ ma n 'lo ɩ̃ jɩrɔ kɩrʋ, hɩnɛ ʋkha pɔr a jɩɩl ɩ̃ ƴɛra da n hona tibil. 16 Dɩ mɩ nɩɛrɛ tibil wire Ulaɩ poo thɩ̃thɩɩn dɩɩ hulẽ a so: «Gabɩrɩɛl wei, mɩɛnɛ kuunɩkɛ thɩ̃ yɩrra a jɩ kɩrʋ.» 17 Dɩ Gabrɩɛl tɔr pɔ paarɩkɛ mɩ kɔɔ hanɩ, dɩ maar fʋ mɛr mɔ̃ a n wɔrɔnɩ, dɩ̃ ji thɩɩra a sumo. Dɩ a so marɛ aa: «Fɛr Danɩɛl, kɛ dɔnɩ tibil, jɛ dɩ thɩ̃ yɩrɩɩlera fɩ yɩnɩ, pɩpɩɩ bɔdaa gɩ.» 18 Dɩ mɔ̃ a n mɩɛ mɩnɩ, tomɩr khiir mer fɛw, dɩ̃ sumo mɛna thɩɩra. Sɩ a tha marɛ a cʋʋ mɩ dɩ̃ ɩɩr jɩɩl kãakɛra mɩ kɔɔ hanɩ. 19 Dɩ a bire so mar aa: «Ma mɩɛ fɛr gɩrɛɛkɛra na dananɩ ɔbɔɔkɛ Thãgbaa nĩkhi na karɔnɩ na pɩ. Gɩdonɩ bɔɔ haleekɛ wɩ dʋnɩ dɩɩ do pɩpɩɩ bɔɔda. 20 Banakɩɩrɩle fɩ kɔɔ yɩnɩ, dɩ hana ʋma yeɲɔ, Mɛɛdɩ na Pɛrsɩ jamanasɔ gɩ n nɩna. 21 Bʋkɩɩrɩle fɩ kɔɔ yɩnɩ na suune vʋɔl vʋɔl, Gɩrɛsɩ jamana a n nɩna. Ʋ̃ kɔ̃tɩ̃ɩle kɔɔ phonɩ ɔɔ yisɔ yeɲɔɔ thɩ̃thɩɩn n nɩnanɛ caca jamana. 22 Ʋma yenãale phonɩ, ɔbɔɔkɛ ʋ̃ kɔ̃tɩ̃ɩle kɔɔ khanɩ, jamana yenã gɩ n nɩna, kɛ na ɩrɛnɩ caarɩlee thɩ̃thɩɩn. Sɩ wa 'li cacadaarɩlee fãga ga. 23 Awɩ jamana doo pɩ bɔɔ, ɔbɔɔkɛ sopuudaraa puu cʋʋ na dʋnɩ tui vʋ̃ʋ, jamana bɩɛl na ɩɩrɛ na yʋ bʋ̃ʋ, a dona fɩ̃fɩɩlda kpɩɛ. 24 Ɔɔ puno na wabɩrɛ ka, sɩ ga do ɔɔ thɛthɛɛ fãgara ga tha'. A na kʋɛrɛ thɩ̃ɛ gɩ kpaa nʋɔ. A na 'lire fãga ɔɔ thɔ̃sɔɔra; a na bũburone punodarasɔ na tɩɩ phuu tibilsɔ. 25 Ɔɔ i the na ɔɔ fãgaakɛ a 'linɩ na fɩɩlɛ na cʋgʋʋrɛ a ɩɩrna i ƴaalɛ ɔɔ hara. A na bũburone tibil jɔjʋɔɔkɛ kɔɔ tɔɔnɩ na ha ɩɩ cɔcɔcɔ. A na khəire ɔɔbara a na n kɛ̃kɛrɛna ʋrɛ dɔnɩ kɔ̃tɩ̃ kpɩɛ kɔ̃tɩnana, sɩ a na bũburone, sɩ ga do tibil bũburonee ga. 26 Dɩ gɩrɛ dʋɔnɩ thɩ̃ yɩrɩɩkɛ fɩ yɩnɩ dɩwɩlʋsɔ na dɩtɩnɛsɔɔdara, sobɔr thɩmɩɩr gɩ waa gel. Sɩ fe wer, fɔrɔ thɩ̃ yɩrɩɩle afɩ bɩnɔ, gɩdonɩ bɔɔkɛ na ɩnanɩ ƴɔɔ fĩi thɩmɩ gɩ n mɩɩ.
27 Mɛr Danɩɛl, tomɩr kɔɔ yɔɔ mɛr a cʋʋna wi jɔjʋɔ, dɩ ga n kho mɩ. Agɩpɩ, mɩ bire ɩɩr dɩ ma n do jamanaa thɔ̃. Nʋɔ kɔɔ kpaa mɛr thɩ̃ yɩraale, gɩdonɩ ma kɔɔ jɩrɔ kɩrʋa'.