NƲMA YENÃAKƐ DANƖƐL YƖNƖ THƖ̃ YƖRA
Caca nʋmɩ: Sidũ'ũukɛ hananɩ sɩgbʋra gbɛla
7
1 Caca yɩɛraakɛ Bɛlsajaar donɩ jamana Babɩlɔn dɩɩra, Danɩɛl dəəle, a yɩna thɩ̃ yɩr ɔbɔɔkɛ a hanɩ ɔɔ phɩ̃ para. Dɩ a kherere dəəlela a mɩɛ thɩmɩɩr yʋ kɔ̃tɩnasɔ.2 Dɩ Danɩɛl gbaar thɩmɩɩr da n mɩɛ aa: «Mɩ n kɔɔ hɩɩnɛ ɩ̃ thɩ̃ yɩrra dɩtɩnɔ, dɩɩ do jɩɛ gɩ a the gɛla yenana le ƴũu dɩ ga n phʋ̃ laɲɔ̃ kɔ̃tɩɩna. 3 Dɩ mɩ yɩrɛ nʋ̃ kɔ̃tɩna yenãakɛ wabɩnɛnɩ tə̃ətə̃ə dɩ wɩ the laɲʋɔna, a ha dɩɩdɩɩ, wa ho kha fɩɩʋraka'. 4 Caca nʋmɩ honanɛ sidũ'ũu sa hana sɩgbʋra gbɛla. Mɔ̃ mɩ n hɩɩnɩ, mɩ yɩrɛ nʋmɩna dɩ wɩ phɩɩr ɔɔ gbɛlsɔɔra faa, sa fʋʋ dɩ ɩɩr jɩɩlna nɛɛ yeɲɔ a ho tibil, dɩ wɩ tʋʋraa tibil haar.
Balaɲɔ nʋmɩ: Nʋmɩɩkɛ wɩ n wenɩ ursi
5 Dɩ hɩnɛ, mɩ yɩrɛ balaɲɔ nʋmɩ da n hona nʋmɩɩkɛ wɩ n wenɩ ursi, dɩ ɩɩr jɩɩl (na khir nɛɛ), sa hana gɛlbi khubo yẽther ɔɔ nɔra, ɲɩmana. Dɩ wɩ sʋʋraarɛ aa: «Ɩrɛ jɩlɛ kɩbɩ, a khɔ nʋʋn jɔɔwɛ.
Balãther nʋmɩ: Nʋmɩɩkɛ hananɩ yʋʋ yenã
6 Agɩpɩ, mɩ n hɩɩnɛ a yɩ nʋ̃ kpɩɩ da n hona kpe, sa hana 'lomin gbɛla yenã khiro. Dɩ nʋmɩɩlera kɔɔ hananɛ yʋʋ yenã, dɩ wɩ gbaar fãgadaar dʋʋr a haa.
Balanã nʋmɩ: Nʋmɩɩkɛ hananɩ ther nyɩma
7 Agɩpɩ, mɩ n kɔɔ hɩɩnɛ ɩ̃ dəəlsɔɔrara dɩtɩnɔ a yɩ balanã nʋmɩɩkɛ n kɔnɩ maar ka a kpaa nʋɔ, a hanana fãga dɩɩ və̃vĩə. Nʋmɩna kɔɔ hananɛ ther ɲɩ̃ kɔ̃tɩnasɔ; a n khor thɩ̃ɛ, dɩ cɛcɛbɛ gɩ, gɩrɛ sɛnɩ dɩ fɔfɔrɔ gɩ na nɛɛ dɩ faa. A tirore ha kpɩɩ na caca nʋmasɔɔle fɛw, a hananɛ ʋma ɲʋɔr. 8 Dɩ mɩ n kɔɔ hɩɩnɛ ʋmaalera, a yɩ ʋ̃ buu fɩɩʋ dɩ phu agɩ thɩ̃thɩɩn, dɩ caca ʋmasɔɔle, ʋma yẽther phɩɩrɛ ɔɔ ƴɛbʋrɔ sa sɩɩraa. Sɩ ʋ̃ buulera hananɛ yinə dɩɩ ho tibil yinə, a hana nʋɔ da n vənə kuune jɔɔ.
9 Dɩ mɔ̃ mɩ n hɩɩnɩ,
Mɩ yɩrɛ jamana too paarsɔ dɩ wɩ thɩɩn,
Dɩ kɔ̃tɩ̃ bɩɛlɩkɛ hanɩ le mamara kɛkɛ pɔr a too.
Ɔɔ kẽkẽ bulolole a ho nɛɛjɩ,
Dɩ ɔɔ yʋsũusɔ bulolo phɩlphɩlphɩl a ho bana bulo suune.
Ɔɔ jamana too pa hor dɔlɩnanɛ,
Sɩ ɔɔ jamana too pa nɛsɔ na n hona dɔkhãbe.
10 Dɔɔ hale dɩ ga n the ɔɔ ƴɛbʋrɔ a ho mɩɩr ɲʋɔnɩkɛ n celanɩ,
Tɩbɩla gbɩlanɩ der paar yemɔ̃ hale dɩ wa n fʋɔrʋʋ,
Dɩ tɩbɩla gbɩlanɩ kɔ̃tɩ̃ɩ gbɩlanɩ yemɔ̃ hale a jɩɩl ɔɔ ƴɛra.
Dɩ sogʋʋrdara toore,
Sɩ dɩ sɛbɛsɔ phubi.
11 Dɩ mɩ n hɩɩnɛ ʋ̃ buulera
mɔna a n mɩɩnɩ
kuun və̃ thɩmɩaale,
Dɩ ma hɩɩnɛ a yɩ nʋmɩɩle dɩ wɩ kʋ a bũburõo,
A pɩɛ dɔɔra dɩ hɩ̃.
12 Sɩ wa nʋ̃sɔɔle sɛnɩ,
Wɩ phʋʋn wɛr awɩ puno,
Sɩ wɩ tɔr yire pɛ war phaphapha gɩ dana bɔɔ gbe.
13 Dɩ mɩ n kɔɔ hɩɩnɛ ɩ̃ dəəlsɔɔrara dɩtɩnɔ,
A yɩ tibil bɩɛl da n gbũ,
Ndɔlɔ̃panana ƴũu, da n hona tibili bikuun.
Dɩ a tɔr da n pɔ kɔ̃tɩ̃ bɩɛlaakɛ hanɩ le mamara kɛkɛ,
Dɩ wɩ kpaarɛ a pɔnanaa.
14 Dɩ wɩ haarɛ fãgadaar dʋʋr na cʋʋr na jamana dʋʋr,
Dɩ tɩbɩla fɛw na caarsɔ, na tɩbɩla ca thɩmɩara fɛw, n fʋɔrʋʋrɛ.
Ɔɔ fãgadaar do, bɔɔ khorr fãgadaar dʋʋr gɩ, kɛ na dɔnɩ dapɩnana',
Dɩ ɔɔ jamana do na kʋɛ yuurəka'.
Caca thɩ̃ yɩrɩ kɩr
15 Mɛr Danɩɛl, kpɩɛrɛ kɔɔ ɲaɲaan mɛr ɩ̃ bɩnɔ, dɩ thɩ̃ yɩrsɔɔle fʋ mɩ maar jɔɔ ka. 16 Dɩ mɩ tɔr wɔrɔ̃ tibil bɩɛl wɩrɛraakɛ kɔɔ hanɩle a bulee gɩrɛ dʋɔnɩ kɩrʋ 'lɩmɩnakɛ thɩ̃ɛsɔraalera fɛw. 17 Dɩ a ture a mɩɛ mɩ kɩrʋ aa: «Nʋ̃ kɔ̃tɩna yenãale fɩ yɩnɩ dɩ wɩ wabɩ tə̃ətə̃ə, jamana yenã wɩ n nɩna, kɛ na ɩrɛnɩ thɩɩraakɛ. 18 Sɩ Kəkəədaarɩ tɩɩ phusɔ na 'lire jamana dɩɩ a na hɩ̃ bɔɔ fɛw waa khorr vʋ̃ʋ.»
19 Agɩpɩ, mɩ ƴaalɛ ɩ̃ jɩɩ jɩ kɩrʋ balanã nʋmɩɩdara, kɛ kɔɔ teronɩ a ha kpɩɩ na wele fɛw, aa hona wela', da n kʋ maar ka, a hana ther ɲɩma, na ther sɛ ɲẽbikhoisɔ, kɛ n khɔnɩ thɩ̃ɛ, dɩ cɛcɛbɛ gɩ; sɩ gɩrɛ sɛnɩ, dɩ fɔfɔrɔ gɩ na nɛɛ dɩ faa. 20 Mɩ ƴaalɛ ɩ̃ jɩɩ jɩ kɩrʋ dakha ʋma yʋɔraale a hananɩ yʋɔ, na ʋ̃ bu fɩɩʋʋkɛ phonɩ, dɩ ʋma yẽther phɩɩr ɔɔ ƴɛbʋrɔ sa sɩɩraa, kɛ kɔɔ hananɩ yinə na nʋɔ da n vənə kuune jɔɔ, a ho a hananɛ fãga a jɔ wele fɛw. 21 Mɩ kɔɔ yɩrɛ ʋ̃ buule da n ke kʋʋr na tɩɩ phuusɔ, da n puno wɩ. 22 Foo dɩ kɔ̃tɩ̃ bɩɛlɩkɛ kɔɔ maanɩ hale gbũ a kɩɩl kɩɩlʋ a ha Ƴũu Pərdaarɩ tɩɩ phusɔ hʋɛ. Mɔ̃ bɔɔle danɩ, le tɩɩ phuusɔ 'lɛ jamana dɩɩ a hɩ̃.
23 Dɩ a so marɛ aa: «Balanã nʋmɩɩle, balanã jamana a n nɩna, kɛ na ɩrɛnɩ thɩɩraakɛ. A na tirore na ha kpɩɩ jamana dɩɩsɔɔra fɛw. A na kʋɛrɛ thɩɩ fɛw, a na saarɛ tɩbɩla thɩɩra na nɛɛ, a na nã wɩ ɓuloɓuloɓulo. 24 Ʋma yʋɔrɩle, jamana yʋɔr wɩ n nɩna, kɛ na ɩrɛnɩ jamana dɩ bɩɛlaalera. Agɩpɩ, jamana kpɩɩ na kpaanɛ awɩ khiro, kɛ na teronɩ na ha kpɩɩ na cacadaraale. Dɩ a na gbune jamana yẽther. 25 A na mɩɩrɛ thɩmɩɩr puunə a na n pɛ Ƴũu Pərdaara. A na hʋɔlɛ Ƴũu Pərdaarɩ tɩɩ phusɔɔra. A na ƴaalɛ ɩnɩ n debɩ Thãgba fʋɔr bɔɔsɔɔ na Thãgba fʋɔr jɔfʋ. Dɩ wa faarɛ tɩɩ phuusɔ na haa gɩ dana yɛna yẽther na dakuru. 26 Agɩpɩ, so kɩɩl bɔɔ na daan. Dɩ wa taaraarɛ fãgadaar dʋʋr, dɩ ɔɔ fãga na kʋɛrɛ a na bũburone khorr vʋ̃ʋ. 27 Jamana dɩɩ na fãgadaar dʋʋr na kɔ̃tɩɩnɛɛkɛ jamana dɩɩsɔ fɛw hananɩ thɩɩraakɛ, Ƴũu Pərdaarɩ tɩɩ phusɔ na hɩna. Dɩ awɩ jamana dɩ, bɔɔ khorrɩ jamana dɩ gɩ. Fãga hɩ̃dara fɛw na n do warɛ thɔma, wa n nɩna wɩ nũu.
28 Thɩmɩɩra, ɔɔ pɩɩr pa ha ʋrɛ. Mɛr Danɩɛl, maar kɔɔ fʋ mɛr ɩ̃ bɩnɔ jɔɔ ka dɩ̃ phɩlko. Dɩ mɩ fʋrɔrɛ thɩmɩaakɛra ɩ̃ hara, dɩ ma n kpɩɛrna gɩ.