6
1 Dɩ Darɩyusikɛ thɛnɩ Medɩ dɩɩra gbaar jamana dʋʋr ɔbɔɔkɛ a hananɩ yɛna kpalãther yeɲɔ.Danɩɛl na ɔɔ lãlaardarasɔɔ thɩmɩ
2 Darɩyusɩ yɩɛrɛ dɩɩ bɔr dɩ pɛr kʋmãda tamaa na kpelẽ (120) ɔɔ jamana dʋɔ fɛw wa n hɩɩn dɩɩ. 3 Dɩ a pɛ warɛ kɔ̃tɩna yẽther awɩ yʋɔ, tibil bɩɛl kɔ̃tɩna yẽtheraale dʋɔn Danɩɛl. Wɛr kʋmãdasɔɔle teena wa n mɩɛ awɩ thɔ̃, gɩ do nɔɔ puure na n dã jamana ga. 4 Sɩ Danɩɛl kãasɩrɛ kɔ̃tɩna yeɲɔraale na kʋmãdasɔraale fɛw, gɩdonɩ a hananɛ thɩ̃ jɩ thuiikɛ kãasɩnɛnɩ a jɔ fɛw. Dɩ jamana n kɔɔ ƴaalɛ a pɩɛraa a do kɔ̃tɩn ɔɔ jamana dʋɔ fɛw biləni.
5 Dɩ kɔ̃tɩnaale na kʋmãdasɔ n kɔɔ ƴaalɛ dɩpaarɩkɛ Danɩɛl na cʋʋnɩ jamanaa dɩ hɩɩn thɩmɩra, wɩ puno wɩ pɩɛraa sor. Sɩ wa yɩ fʋ paar fɩɩʋrakɛ dɩ dɩpa buu ga, gɩdonɩ a kɔɔ telene dẽdẽdẽ. Wa n yɩ mə̃mələne ɔɔ pa dɩ dɩpaar ga. 6 Dɩ tɩbɩlaale sor aa: «Sa yɩ dɩpa bɩɛllakɛ Danɩɛla a na pɩɛraa sor, a ga do ɔɔ Thãgbaa jɔfʋ hɩ̃ɩdaa bilo gaaga. 7 Dɩ kɔ̃tɩna yeɲɔɔle na kʋmãdasɔɔle jaal na phananɛ jamanaa pa a sʋʋraa aa: «Darɩyusɩ jamana, Thãgba n hana fɩ yi gbãa fɩ pʋɔr ƴɛrr! 8 Kɔ̃tɩna fɛʋʋkɛ hanɩ afɩ jamana dɩra: lẽle thɩ̃ hɩ̃ɩdara na kʋmãdasɔ na fɩl 'laadarasɔ na gobanɛrsɔ, wɩ gʋʋrɛ kha ayɩ wɩ pɩɛr jɔfʋ khɩɩr fɛr jamanaa irə a sɔ: “Tibil wo tibilikɛ na fʋɔrɛnɩ thãgba kpɩɩ, agɩbo tɩɩ kpɩɩ wire kpelẽ yʋɔrɩ bɩnɔ, sɩ ga do fɛr jamana dɩbara lẽlẽlẽ ga, wɩ dɔna ntɛ sidũ'uusɔɔra, kaara.” 9 Nɛnɛ̃ɛkɛ jamana, to jɔfʋʋlera a ɩarɔ afɩ ɲɛ̃bi jẽ, ga n ha phɩlã paar bã, mɔna Mɛɛdɩdara na Pɛrsɩdaraa jɔfʋ hanɩ, kɛ na n phɩlanɛna'.
10 Dɩ Darɩyusɩ jamana dʋrɛ ɔɔ ɲɛ̃bi jẽ sɛbɛraale na jɔfʋraale.
11 Mɔ̃ Danɩɛl jɩnɩ wɩ pɛrɛ jɔfʋ thale, a lʋʋn ɔɔ cɔ, a jʋʋn lɩ̃gã du ʋrɛraakɛ fɛnɛtɩrɩsɔ khɛrnɩ a ee Jerujalɛm dɩɩ. Dɩ a n gburõkhure dɩ bɩɛl ɔɔ Thãgba da n kpãganaa wi bɩɛl balãther mɔna a n kɔɔ cʋʋnɩ cacara. 12 Dɩ tɩbɩlaale lʋʋn na phananɛ a yɩ Danɩɛl da n bɩɛl ɔɔ Thãgba, da n ƴɛɛnaa. 13 Dɩ wɩ jaal jamanaa pa a mɩgʋʋ jɔfʋʋleeda aa: «Fa kɔɔ ɩɩrɔ afɩ ɲɛ̃bi jẽ jɔfʋraakɛ sɔnɩ ayɩ: “Tibil wo tibilikɛ na fʋɔrɛnɩ thãgba kpɩɩ, agɩbo tɩɩ kpɩɩ wire kpelẽ yʋɔrɩ bɩnɔ, sɩ ga do fɛr jamana dɩbara lẽlẽlẽ ga, wɩ dɔna ntɛ sidũ'uusɔɔra, kaara gaa”? Dɩ jamana so aa: “Ɔɔ, ɔmɛ̃ gɩ mɔ̃ Mɛɛdɩdara na Pɛrsɩdaraa jɔfʋ hanɩ, kɛ na n phɩlanɛna'.” 14 Dɩ wɩ bir so jamanana aa: “Danɩɛlɩkɛ dɔnɩ tibil bɩɛl Judaa toosɔraakɛ wɩ kɔɔ fʋlɛnɩ Juda dɩɩra a ɩna, na therna fɩ fɩɩʋrakɛ yaa jamana, dɩ afɩ jɔfʋʋkɛ fɩ dʋrɔnɩ ɲɛ̃bi jɩɩn ga. Mɛna a n bɩɛl ɔɔ Thãgbara balãther wi bɩɛl.»
15 Mɔ̃ jamana nɩɛnɩ gele, ɔɔ ha kʋɛrɛ jɔɔ ka, dɩ ma da n kpɩɛr mɔ̃ a na cʋʋnɩ sɩ a taa Danɩɛl. Dɩ a dor bʋɔ foo a dana wi lõ bɔɔ sɩ ɩnɩ n tagʋʋ. 16 Sɩ tɩbɩlaale pɔr dapaara jamanaa pa a sʋʋraa aa: «Dɔ fɩ jɩɩ jɩ tue dɛ jamana. Mɛɛdɩdara na Pɛrsɩdaraa jɔfʋra, kpɩɛrɛɛkɛ jamana 'lini tire na n phɩlã yuu bã.»
Wɩ dʋnanɛ Danɩɛl sidũ'ũ kaara, sidũ'ũusɔɔra.
17 Le jamana 'laa hʋɛ aa wɩ pɔna Danɩɛl. Dɩ wɩ pɔnaanɛ a dʋna sidũ'ũusɔɔra, kaara. Dɩ jamana so Danɩɛla aa: «Afɩ Thãgbaakɛra fɩ n fʋɔrnɩ bɔɔ fɛw na yɩrrɛ, a taa fɩ lee!» 18 Dɩ wɩ pɔnanɛ bokaar a sɔbɩna ka nʋɔ. Dɩ jamana ɩɩrɔ ɔɔ ɲẽbi jẽ na ɔɔ tɩɩ kɔ̃tɩ̃sɔɔ ɲẽbi jẽsɔ, gɩ do nɔɔ tibil na n debɩ dɩkha Danɩɛlɩdara ga.
19 Agɩpɩ jamana kɛrɛ bir ɔɔ jamana cɔ a cɔna kɔmɛr cɩ, aa kho dikora'. Aa kɔna wɛdaar ɔɔ cɔa', dɩ daan bʋʋ yire kpei. 20 Mɔ̃ dɩɩ na wɩlnɩ, jamana mãa ɩɩrɛ duuro phiphiphi a jalna phananɛ sidũ'ũ kaara. 21 Mɔ̃ a n wɔrɔnɩ ka nʋɔra, a wer Danɩɛl na ha kʋɛrɛ. Dɩ a bulele Danɩɛl aa: «Danɩɛl, Thãgba yidaarɩ thɔ̃daar, afɩ Thãgbaakɛra fɩ n fʋɔrnɩ na yɩrrɛ, a punone taa fɩ sidũ'ũusɔɔra bɛ?» 22 Dɩ Danɩɛl birse jamana aa: «Thãgba n hana fɩ yi gbãa fɩ pʋɔr ƴɛrr yaa jamana! 23 Ɩ̃ Thãgba thʋɔn ɔɔ thɔ̃thɔ̃ thu dɩ ɩ̃ a kpala sidũ'ũusɔ nʋɔ, dɩ wa cʋʋ mɩ puure fɩɩʋraka'. Gɩdonɩ aa yɩ mar dɩ paar ɔɔ ƴɛra, na afɩ ƴɛra dakha woa'. Ma cʋʋ dɩkhaa puu fɩɩʋrakaa yaa jamana. 24 Dɩ da kɔ̃tɩ̃ɩ fʋrɛ jamana, dɩ 'laa hʋɛ wɩ te Danɩɛl kaara. Dɩ wɩ tii kaara, sɩ wa yɩɩraa khoo fɩɩʋraka', gɩdonɩ a hananɛ ha pɛrɛ ɔɔ Thãgbara. 25 Le jamana 'laa hʋɛ dɩ wɩ pɔna wɩrɛɛkɛra kɔɔ heenenɩ Danɩɛl so khɩɩ, a dʋʋrna wɩ sidũ'ũusɔɔ kara, wɛr na awɩ bɩsãsɔ na awɩ khɛrsɔ. Wa danakɛ thɩɩa', sɩ sidũ'ũusɔ ca caan a cɛcɛbɛ wɩ na khubo fɛw.
26 A gele pɩ, Darɩyusɩ jamana kherere sɛbɛ tɩbɩlala fɛw na caarsɔɔra fɛw, na tɩbɩlaa ca thɩmɩsɔɔra fɛʋʋkɛ hanɩ thɩɩra ayɩ: «Ha ɩɩ jɔɔ n hana kha na nɛrɛ! 27 Mɩ 'laarɛ hʋɛ ayɩ, ɩ̃ jamana dʋɔ fɛw, tɩbɩla na n ma Danɩɛlɩ Thãgba, a na cʋɔnɛɛ.
Gɩdonɩ Thãgba yidaar a do,
Kɛ hanɩle khorr vʋ̃ʋ!
Ɔɔ jamana do na kʋɛ yuurəka'.
Dɩ ɔɔ fãgadaar do na hana khu paar yuuə'.
28 Ɔr n 'laanɛ taarɛ, ɔr n vənə tibil dɩ ti,
Ɔr n cʋɛ jẽ thɩ̃ɛsɔ na nɔ kpaa thɩ̃ɛsɔ,
Le thãgbara ƴũu na kɛ thɩɩra.
Ɔr taa Danɩɛl,
Sidũ'ũusɔɔ nebikhosɔɔra.
29 Dɩ Danɩɛl jɩɛ 'li fãga Darɩyusɩɩ jamana do bɔɔ, a jalna dana Sirusɩɩkɛ dɔnɩ Pɛrsɩdaar ɔɔ jamana do bɔɔ.