Bɛlsajaar jamanaa thɩmɩ: Khere gbul gʋʋra
5
1 Wi bɩɛl, Babɩlɔn jamanaakɛ, wɩ n wenɩ Bɛlsajaar cʋʋrɛ fɛtɩ kɔ̃tɩ̃ɩ a wena ɔɔ tɩɩ kɔ̃tɩ̃sɔ gbɩlanɩ. Dɩ a ɲɔr dɩvɛ̃ na wɛr. 2 Mɔ̃ dɩvɛ̃ fʋʋnɩ, a 'laarɛ hʋɛ aa, wɩ pɔna bʋla minəsɔɔkɛ dɔnɩ dɛdaa na dɛ bulodaasɔɔkɛ ɩnɩ thɩ Nebukadinejaar kɔɔ khɩɩnɩ Jerujalɛm Thãgba fʋɔr cʋɔrɔ, ɩnɩ n ɲɔna dɩvɛ̃, na ɩnɩ khɛrsɔ na ɩnɩ wɛdaarsɔ na ɩnɩ tɩɩ kɔ̃tɩ̃sɔ. 3 Dɩ wɩ pɔnanɛ dɛ bʋla minəsɔɔra wɩ kɔɔ khɩɩnɩ Thãgbaa cɔ, Jerujalɛm Thãgba fʋɔr cʋɔrɔ. Dɩ jamana na ɔɔ tɩɩ kɔ̃tɩ̃sɔ na ɔɔ khɛrsɔ na ɔɔ wɛdaarsɔ na n ɲɔna dɩvɛ̃. 4 Mɔ̃ wɩ ɲɔnɩ dɩvɛ̃ na pɩ, wɩ mar wa n kpãga thãgbasɔɔkɛ wɩ cʋʋnanɩ dɛ na dɛ bulo na ther sɩɛ na ther na thɩrʋ na bokaar.5 Dɩ liir dapaara, tɩɩ ɲɔ̃ɔ ther dɔ carã hɩrɛra a ma dɩ ga n khere sɛbɛ be go bulola jamanaa cɔ. Dɩ jamana yɩrɛ ɲɔɔna dɩbara dɩ ga n khere. 6 Dɩ maar fʋrɛ jamana dɩ phɩlko, da n jẽ, dɩ nɛkhilə na n bekha. 7 Dɩ a hulene nɔ khɩɩr aa, wɩ kpa wɩrɛɛkɛ n jɩɛnɩ thɩ̃ɛ ƴepələ̃bera na Kalde dɩthɩdara na bʋradarasɔ a pɔna. Dɩ jamana gbaar thɩmɩɩr a so Babɩlɔn kpɛsɛdarara aa: «Ntɛɛkɛ na jɩɛnɩ sɛbɛ beekɛ kherenenɩ na so, a na tinə kɩrʋ na mɩɛ mɩ, wa tʋʋrɛ kẽkẽ ɓɔ̃ sɩɛ kpakpakpa na dɛ lẽbuu fʋɔrɔ. Ɔr na dʋɔn balãther tibil Babɩlɔn jamana dɩɩra» 8 Dɩ jamanaa tɩɩ kpɛsɛsɔ fɛw pɔr lõ, sɩ wa jɩ sɛbɛ bera kherenenɩ a na so, a na ba tinə kɩrʋa'. 9 Dɩ maar jɩɛ fʋ Bɛlsajaar jamana dɩ phɩlko, dɩ kpɩɛrɛ ɲaɲaan dakha ɔɔ tɩɩ kɔ̃tɩ̃sɔ na sobɔr.
Danɩɛl mɩɛrɛ khere gbuli kɩr
10 Jamanaa nɩ nɩɛrɛ jamana na ɔɔ tɩɩ kɔ̃tɩ̃sɔɔ hulẽbi, dɩ a lʋʋn le dikor kho paar a so aa: «Thãgba n hana fɩ yi gbãa yaa jamana! Fa n dɛ a phɩlkoa'! 11 Kuun bɩɛl hakɛ afɩ jamana dɩra a hana thãgba phuusɔɔ thu. Afɩ thɩɩ bɔɔ, wɩ kɔɔ yɩɩraarɛ hɩrɛrɛ na jɩɩr na kpɛsɛrɛɛkɛ hɔnɩ thãgbasɔɔ kpɛsɛ. Gɛrra dɔ kɩrʋ dɩ afɩ thɩ Nebukadinejaar jamana kɔɔ pɩɛraa dɩ do kɔ̃tɩn dɔdɔɔdarara na wɩrɛraakɛ n jɩɛnɩ thɩ̃ɛ ƴepələ̃bera na Kalde dɩthɩdarara na bʋradarara. Thale afɩ thɩ jamana kɔɔ cʋʋ. 12 Gɩdonɩ wɩ kɔɔ yɩrɛ kuunaalera wɩ n wenɩ Danɩɛl, ʋrɛ jamana kɔɔ dʋnɩ ire Bɛltɩsajaar dɩ hana thɩ̃ jɩ thuiikɛ kãasɩnɛnɩ a jɔ fɛw na jɩɩr na yʋ bʋɔ na punone dɩ tinə dəəl kɩra. A n mɩɛrɛ thɩ̃ɛsɔɔkɛ babaranɛnɩ, dɩ 'laana the paar thɩ̃ɛsɔɔraakɛ khiirnonɩ. Wɩ wɩɛ a ɩ̃, a na mɩɛrɛ kɩrʋ.»
13 Dɩ wɩ pɔnanɛ Danɩɛl a lona jamanaa ƴɛra. Dɩ jamana gbaar thɩmɩɩr a bule Danɩɛl aa: «Fɛr dʋɔn tibil bɩɛl Judaa tooraakɛ ɩ̃ thɩ kɔɔ fʋlɛnɩ Juda dɩɩra a ɩnaa? 14 Mɩ nɩɛrɛ afɩda dɩ wɩ yɩ fɩ hananɛ thãgbasɔɔ thu. Aa wɩ n yɩrɛ hɩrɛrɛ afɩ pa na jɩɩr na kpɛsɛrɛɛkɛ teronɩ ha kpɩɩ. 15 Wɩ kɔɔ kpar tɩɩ kpɛsɛsɔ na wɩrɛɛkɛ n jɩɛnɩ thɩ̃ɛ ƴepələ̃bera a ɩna mar, wɩ hɩnɛ sɛbɛ beekɛ kherenenɩ sa mɩɛnɛ mɩ kɩrʋ. Sɩ wa puno a mɩɛ agɩ kɩrsɔa' 16 Dɩ mɩ nɩɛrɛ dɩ wɩ so fɩ n punone dɩ fɩ ti kɩrʋ. Aa fɩ n mɩɛrɛ thɩ̃ɛsɔɔkɛ babaranɛnɩ, dɩ fɩ 'laana the paar thɩ̃ɛsɔɔraakɛ khiirnonɩ. Ado fɩ puno nɛnɛ̃ a so sɛbɛ beekɛ kherenenɩ a tinə kɩrʋ a mɩɛ mɩ, wa to fer kẽkẽ ɓɔ̃ sɩɛ kpakpakpa na dɛ lẽbuu fʋɔrɔ. Fɛr na dʋɔn balãther tibil Babɩlɔn jamana dɩɩra»
17 Dɩ Danɩɛl birse jamana aa: «Fɔrɔ afɩ khaarda a hana tɩɩ kpɩɩ. Sɩ ma sor sɛbɛ beekɛ wer kherenenɩ a na tinə kɩrʋ na mɩɛ fɩ. 18 Jamana wei, Thãgba Ƴũu Pərdaar kɔɔ har afɩ thɩ Nebukadinejaar jamana dʋʋr na kɔ̃tɩɩnɛ na cʋʋr na i dʋbɩrɛ. 19 Dɩ kɔ̃tɩɩnɛɛlera Thãgba kɔɔ haanɩ dɔ kɩrʋ, tɩbɩla fɛw na caarsɔ thɩmɩara fɛw, wɩ n kɔɔ maarɛ dɩ wa n jẽ ɔɔ ƴɛbʋrɔ. A n kɔɔ kʋʋrɛ wɩrɛ a n ƴaalnɩ, sɩ dɩ sɩrɔ na yire wɩrɛ a n yaalnɩ. A n khəire wɩrɛ a n ƴaalnɩ, sɩ dɩ wur wɩrɛ a n ƴaalnɩ. 20 Dɩ mɔ̃ a bʋnɩ yʋʋ, a khɩɩr haar, a thʋ̃ da n so kuune, wɩ tinəəne ɔɔ jamana too para dɩ 'lee ɔɔ i dʋbɩ. 21 Wɩ weguure tɩbɩlaa thɩ̃thɩɩn a faa, dɩ ɔɔ ha fi a ho nʋ̃ haar da n cɔna hɔ̃ kũkənəsɔ. Dɩ wɩ n haarɛ hʋ̃ɔ da n kho mɔ̃ na n khonɩ, dɩ mɩ̃ɛ n the ƴũu dɩ ga n jiirəə, phaphapha dɩ jɩ dɩphã dɩ Thãgba Ƴũu Pərdaar dʋɔn dakpɩɛ tibil wo tibiləəkɛ dʋɔnɩ jamana, dɩ a n 'laarɛ jamana dʋʋr dɩ ha ntɛɛkɛ daaraanɩ. 22 Sɩ fɛr Bɛlsajaarɩkɛ dʋɔnɩ ɔɔ bikuun, fɩ kɔɔ jɩrɛ gelela fɛw, sɩrakɛ fa wur afɩbara ga. 23 Fɩ khəire afɩbara dɩ fa n kpɛ Kɔ̃tɩnɩkɛ hanɩle ƴũu, mɔ̃ fɩ cʋʋnɩ dɩ wɩ pɔna bʋlaminəəkɛ kɔɔ hanɩ ɔɔ cɔ, dɩ na n ɲɔna dɩvɛ̃; fɛrɛ na afɩ tɩɩ kɔ̃tɩ̃sɔ na afɩ khɛrsɔ na afɩ wɛdaarsɔ. Dɩ fɩ n kpãgarɛ thãgbasɔɔkɛ wɩ cʋʋnanɩ dɛ bulo na dɛ na ther sɩɛ na ther na thɩrʋ na bokaar, kɛ dɔnɩ thãgbasɔɔkɛ na n yɛna', wa n na', wa hana jɩɩra'. Sɩ fa ka dʋbɩ Thãgbaakɛ fɔrɔnɩ afɩ fesu na afɩ yi, ɔɔ ɲɔ̃kɔɔa'. 24 Gɛr dɔ kɩrʋ dɩ thɔna ɲɔ̃ haarɩle dɩɩ khere kherereekɛ. 25 Yɛkɛ gɩrɛɛkɛ kherenenɩ: «Mene, mene, tekɛl, parsɛ̃. 26 Dɩ yɛkɛ gɩrɛ gɩ sonɩ: Mene: Kɩrʋ dʋɔn therre. Thãgba therre afɩ jamana do, a pɛr khu paar. 27 Tekɛl: Kɩrʋ dʋɔn wɩ kpɛr na kilə. Wɩ pɛ fɛr kiləla a kpɛ, dɩɩ do fɩ habarɛ. 28 Parsɛ̃: Kɩrʋ dʋɔn tɩnɛnɛ. Wɩ tɩnɛnɛ afɩ jamana dɩ, a ha Pɛrsɩdara na Mɛɛdɩsɔ.
29 Dɩ dapaara, Bɛlsajaar 'laarɛ hʋɛ aa wɩ tɔ Danɩɛl kẽkẽ ɓɔ̃ sɩɛ kpakpakpa na dɛ lẽbuu fʋɔrɔ. Aa wɩ hulene, Danɩɛl dʋɔn balãther tibil Babɩlɔn jamana dɩɩra, kɛ n kpaanɛnɩ jamanana.
30 Dɩ ɔ dɩtɩnɔɔlera, wɩ kʋrɛ Bɛlsajaar, Babɩlɔn jamana.