Nebukadinejaar mɩɛrɛ ɔɔ dəəl
4
1 Mɛr Nebukadinejaar, mɩ kɔɔ hale ɩ̃ cɔ a toorakɛ ba, a hinə daw ɩ̃ jamana cɔ. 2 Dɩ mɩ dəəle dəəle dɩtɩ̃ bɩɛl, dɩ maar fʋ mɩ. Dɩ kpɩɛrɛɛkɛ ɩna marnɩ ɩ̃ phɩ̃ para, na thɩ̃ yɩrɩkɛ mɩ yɩnɩ, gɩ pɛ marɛ jẽu na sobɔr. 3 Dɩ mɩ sor wɩ kpa Babɩlɔn kpɛsɛdarasɔ fɛw a ɛna ɩ̃ ƴɛbʋrɔ, wɩ ti dəəleelee kɩr wɩ ha mɩ. 4 Dɩ dɔdɔɔdara na wɩrɛ n jɩɛnɩ thɩ̃ɛ ƴepələ̃bera na Kalde dɩthɩdara na bʋradarasɔ ɩnɛ. Dɩ mɩ mɩɛ wɛr dəəlela, sɩ wa puno ti ɔɔ kɩr a ha ma'. 5 Dɩ pɩpɩɩ paar, Danɩɛlɩkɛ wɩ n wenɩ Bɛltɩsajaar, kɛ ɔɔ i n honanɩ ɩ̃ thãgba i, a ɩnɛ jɩɩl ɩ̃ ƴɛbʋrɔ. Thãgba phuusɔɔ thu haaraarɛ. Dɩ mɩ mɩɛɛrɛ dəəlela ayɩ: 6 «Bɛltɩsajaar, fɛr dɔdɔɔdaraa kɔ̃tɩ̃, kɛ mɩ jɩnɩ fɩ hananɛ thãgba phuusɔɔ thu afɩ bɩnɔ, a dona tibilikɛ thɩ̃ gbul bɩɛllakɛ na n kherona', mɩɛnɛ mɩ thɩ̃ yɩrsɔɔkɛra mɩ yɩnɩ dəəlelaa kɩr. 7 Yɛkɛ thɩ̃ yɩrsɔɔkɛra mɩ yɩnɩ dəəlela, ɔbɔɔkɛ mɩ kɔɔ hanɩ ɩ̃ phɩ̃ para. Mɩ n kɔɔ hɩɩnɛ a yɩɛ dɩɩ do:Ɔɔ yʋ jʋʋnɛ foo a dã thãgbara ƴũu.
Dɩ thɩ khu paarsɔ fɛw, wɩ n 'laarɛ dɩ wa n yɩɩ.
9 A bɔrɛ faa a lu gbibi,
A se be dakha jɩrkpɩrɩ.
A n 'laarɛ dikor thɩ̃ caara fɛw.
Dɩ hɔ̃ nʋma n pɔ ɔɔ kɩrɔ a 'lɛ ɩtɩɩr,
Ɔɔ jɛ̃sɔɔra 'lominə ƴũu n too,
Ɔɔ pa thɩ̃ ye fɛw n 'lɛ awɩ dikor.
10 Dɩ thɩ̃ yɩrsɔɔlera mɩ yɩnɩ thuirə ɩ̃ phɩ̃ para, mɩ n kɔɔ hɩɩnɛ dɩɩ do:
Tɩɩ phu bɩɛlɩkɛ n jʋrɛnɩ thɩ̃ɛ fɛw da n hɩɩn gɩ a the ƴũu da n gbũ.
11 Dɩ a hulene nɔ khɩɩr thaa aa:
«Nɩ kuro thɩrʋʋkɛ, a gbʋʋlɛ ɔɔ jɛ̃sɔ;
Nɩ pɩba faa, a bɩ̃bɩlanɛ be a faa.
Nʋmaakɛ hanɩ ɔɔ ballɔ, wɩ caalɛnɛ,
'Lominə n ubə ɔɔ jɛ̃sɔɔra!
12 Sɩ nɩ sɛ kɩraara na ɔɔ nɛsɔɔra le thɩ bɩnɔ,
Sa lie na ther jɔrkɔ̃ na ther sɛ jɔrkɔ̃.
Nɩ sɩɛraa le hɔ̃ ballɔ,
Mɩ̃ɛ n the ƴũu ga n jiirəə,
A gbɛbɩna nʋma, a na n kho hʋɔnɩkɛ n phonɩ thɩɩra.
13 Wɩ te ɔɔ haakɛ dɔnɩ tibildaa,
sa tʋɔraa haarɩkɛ dɔnɩ nʋ̃daa,
A toona a dana yɛna makoɲɔ.
14 Thɩmɩɩrɩle ther wɩrɛraakɛ n jʋrɛnɩ thɩ̃ɛ fɛw dɩ wa n hɩɩn.
Dɩ kpɩɛrɛɛle gbaanɩ ther tɩɩ phuusɔɔ pa,
Gɩ do nɔɔ yidara fɛw n jɩ dɩ Ƴũu Pərdaar dʋɔn dakpɩɛ tibil wo tibiləəkɛ dʋɔnɩ jamana.
Dɩ a n 'laarɛ jamana dʋʋr dɩ ha ntɛɛkɛ daaraanɩ,
A n khəirerakɛ ʋrɛɛkɛ dʋɔnɩ sɩkapɩr tɩbɩlala dɩ do jamana.
15 Ɔr dʋɔn dəəleekɛ mɛr Nebukadinejaar jamana dəəlnɩ. Fɛr Bɛltɩsajaar, te kɩrʋ a mɩɛnɛ mɩ, gɩdonɩ tɩɩ kpɛsɛsɔ fɛʋʋkɛ hanɩ ɩ̃ jamana dʋɔ na puno na ti ɔɔ kɩr na mɩɛ ma'. Sɩ fe wer, fa punone, gɩdonɩ thãgbasɔɔkɛ phonɩ, awɩ thu ha farɛ.
Danɩɛl mɩɛrɛ Nebukadinejaar ɔɔ dəəl kɩr
16 Dɩ nʋɔ kpaa Danɩɛlɩkɛ wɩ n wenɩ Bɛltɩsajaar a dana bɔɔ gbe, dɩ maar fʋʋ ɔɔ bɩnɔ. Dɩ jamana bir gba thɩmɩɩr a so: «Bɛlsajaar, fa n do dəəlela na ɔɔ kɩr n kʋ fɩ maara'»! Dɩ Bɛltɩsajaar birsee aa: «Ɩ̃ kɔ̃tɩ̃ ya, afɩ lãlaardara dəəlela kɔɔ teena, dɩ ɔɔ kɩr dakha kɔɔ teena afɩ sodara! 17 Thɩrʋʋlera fɩ kɔɔ yɩnɩ, kɛ khɔnanɩ a wabɩ, a hana fãga ka, dɩ ɔɔ yʋ jʋʋn a dã thãgbara ƴũu, wɩ n kɔɔ 'laanɩ yɩ paar fɛw thɩɩra. 18 Thɩrʋra kɔɔ hananɛ fa bɔy ka, a ser be dakha jɩrkpɩrɩɩ, thɩ̃ caar fɛw n kɔɔ 'lɛr awɩ dikor ɔɔ pa. Hɔ̃ nʋma n kɔɔ jɛr ɔɔ ballɔ, dɩ 'lominə ƴũu na n kɔɔ cɔ ɔɔ jɛ̃sɔɔra. 19 Fɛr dʋɔn thɩrʋʋlera ya jamana. Fɛr wabɩnɛ a hana punone mɛna, dɩ afɩ wabɩra thʋ̃ jʋʋn foo a dã thãgbara ƴũu. Dɩ afɩ fãgadaar do thʋ̃ lɛɛ phaphapha a dã thɩ khu paarsɔ. 20 Fɩ kɔɔ yɩrɛ Tɩɩ phu bɩɛlɩkɛ n jʋrɛnɩ thɩ̃ɛ fɛw da n hɩɩn dɩ the ƴũu da n gbũ, a phã aa: “Nɩ kuro thɩrʋʋle a kʋɛaa. Sɩ nɩ sɛ kɩraara na ɔɔ nɛsɔɔra le thɩ bɩnɔ. Nɩ lie na ther jɔrkɔ̃ na ther sɛ jɔrkɔ̃ a faa hɔ̃ ballɔ, mɩ̃ɛ n the ƴũu ga n jiirəə, a gbɛbɩna hɔ̃ nʋma a na n kho hʋ̃ɔ, phaphapha yɛna makoɲɔ n daanaa gɩ pho.”
21 Yɛkɛ dəəlee kɩrra yaa jamana; yɛkɛ kpɩɛrɛɛkɛ Ƴũu Pərdaar tini fɛr ɩ̃ kɔ̃tɩ̃ jamanana: 22 Wa wee fer tɩbɩlaa thɩ̃thɩɩn fɩ gbɛbɩna hɔ̃ nʋma fa n cɔ, wɩ ha fɩ hʋ̃ɔ fa n kho mɔ̃ na n khonɩ. Mɩ̃ɛ na ther ƴũu ga n ji far, yɛna makoɲɔ n dã far gɩ pho; phaphapha fɩ jɩ dɩ Ƴũu Pərdaar dʋɔn dakpɩɛ tibil wo tibiləəkɛ dʋɔnɩ jamana; dɩ a n 'laarɛ jamana dʋʋr dɩ ha ntɛɛkɛ daaraanɩ. 23 Sɩ mɔ̃ a kɔɔ sonɩ, wɩ sɛ thɩr kɩraara na ɔɔ nɛsɔɔra, gɩ nɩnanɛ afɩ jamana dɩ na toore afɩ too, ɔbɔɔkɛ fa jɩnɩ dɩ ʋrɛ dɔnɩ dakpɩɛ hale ƴũu. 24 Dɩ gɛr gɩ, mɩ n bɩɛl fɛr yaa jamana, to fɩlɛɛkɛ mɩ n ha fɩnɩ. Kho afɩ sopuu cʋʋsɔ sɩ na cʋɛ fɩl sarʋ. Kho dakha afɩ dɩpasɔ, sa hanana bɔ fʋʋr bɔ kʋdarara, dɩ afɩ ha ie na jaal ƴɔɔ.
Nebukadinejaarɩ dəəl daan otirə
25 Gele fɛw daan Nebukadinejaar jamanana otirə. 26 Ɔbɔɔkɛ sɩpora yʋɔr yeɲɔ na pɩnɩ, jamana kɔɔ hale ɔɔ jamana cɔ nasʋrʋ le Babɩlɔn da n kpaar. 27 Dɩ a mar da n mɩɩ aa: «Babɩlɔn dɩ kɔ̃tɩ̃ɩkɛra, ga do mɛr mɩɛ na ɩ̃ puno na ɩ̃ fãga dɩ ɓɔ̃, a dɔ ɩ̃ jamana cɔ, wa n cʋ mɩ, gɩ do ɩ̃ i dʋbɩ dɔ nɔaa?» 28 Aa mɩɩrakɛ a pa', sɩ nʋɔ the ƴũu a so aa: «Fɛrra wɩ n mɩɩna yaa Nebukadinejaar jamana. Wɩ taa farɛ jamana dʋʋr. 29 Wa wee fer tɩbɩlaa thɩ̃thɩɩn, fɩ gbɛbɩna hɔ̃ nʋma fa n cɔ; wɩ ha fɩ hʋ̃ɔ fa n kho mɔ̃ na n khonɩ. Yɛna makoɲɔ na dã farɛ na pho, phaphapha fɩ jɩ dɩ Ƴũu Pərdaar dʋɔn dakpɩɛ tibil wo tibiləəkɛ dʋɔnɩ jamana; dɩ a n 'laarɛ jamana dʋʋr dɩ ha ntɛɛkɛ daaraanɩ.» 30 Dɩ liirə dapaara, gɩrɛra wɩ kɔɔ sonɩ daan Nebukadinejaar a ha oti. Wɩ weguure tɩbɩlaa thɩ̃thɩɩn sobɔra da n kho hʋ̃ɔ mɔ̃ na n khonɩ, dɩ mɩ̃ɛ n ther ƴũu dɩ ga n jiirəə; phaphapha dɩ ɔɔ yʋsũusɔ fi a ho sɩgbʋra suune, dɩ ɔɔ ɲɛ̃bikhosɔ ho 'lomin nebikhoe. 31 Mɔ̃ bɔɔ makoɲɔɔlera wɩ kɔɔ dʋnɩ karɔnɩ na pɩ, mɛr Nebukadinejaar, mɩ ɓar ƴɩɛ ƴũu dɩ fɩlɛ bire lõ mar. Dɩ mɩ dʋbɩrɛ Ƴũu pərdaar. Mɩ kpãgarɛ a dʋbɩna ʋrɛɛkɛ hanɩle khorr. Ɔr dɔ ʋrɛ ɔɔ fãgadaar do hanɩle khorr vʋ̃ʋ, dɩ ɔɔ jamana do hale məle wo məlela fɛw. 32 Wɩrɛ fɛʋʋkɛ n cʋɔnɩ thɩɩra na do thɩ̃ɛ ɔɔ ƴɛra ga. Gɩrɛɛkɛ daaraanɩ, gɛr a n cʋʋna ƴũudara na wɩrɛ n cʋɔnɩ thɩɩra. Tibil bɩɛllakɛ na hale dɩ laanaa, a puno a bulee: «Aɲe fɩ n cʋʋ thaa» yaa ga. 33 Mɔ̃ fɩlɛ lõ marnɩ dabɔɔle, mɩ bire 'lɛ cʋʋrɩkɛ mɩ kɔɔ hananɩ ɩ̃ jamana dora, a 'lɛna ɩ̃ i dʋbɩ na ɩ̃ ɓɔ̃. Dɩ ɩ̃ fɩl 'laadarasɔ na ɩ̃ tɩɩ kɔ̃tɩ̃sɔ bire gba mɩ pɛ ɩ̃ jamana dora, dɩ ɩ̃ kɔ̃tɩ̃ do jɩɩ tɔ dɩ ga n pɛr. 34 Nɛnɛ̃ dɩphã, mɛr Nebukadinejaar, mɩ n kpãgarɛ ƴũu jamana, dɩ ma n fʋɔr dɩ ma n dʋbɩnaa. Gɩdonɩ ɔɔ cʋʋ pasɔ fɛw dor sobɔr, dɩ ɔɔ hʋsɔ sar. A hananɛ punone dɩ wurnə wɩrɛɛkɛ n ɩrɛnɩ na i ƴaalɛ.