Wɩ dʋʋrnanɛ Danɩɛlɩ alãkhasɔ yẽther dɔɔra
3
1 Nebukadinejaar jamana cʋʋrɛ thɩl tə̃ə na dɛ dɩ hona tibil a thɩɩn ɓɛlɛnɔɔkɛ wɩ n wenɩ dura, le Babɩlɔn dɩɩra. Ɔɔ ƴũu gbã mãkhananɛ mɛtɛrɛ kpelẽ yʋɔr, dɩ ɔɔ pɛw mãkhana mɛtɛrɛ yẽther.2 Dɩ Nebukadinejaar pɛrɛ dɩ wɩ we kʋmãdasɔ na lẽle thɩ̃ hɩ̃ɩdara na gobanɛrsɔ na sogʋʋrdara na mũsũ fʋrɔdara na jɔfʋ jɩnasɔ na sokɩɩldara na fãgadarasɔ fɛʋʋkɛ hanɩ Babɩlɔn marasɔɔra wɩ pɔ thɩl kɔ̃tɩ̃ phʋɔlɛlaakɛ ɔr Nebukadinejaar jamana kɔɔ mɩnɩ. 3 Dɩ kʋmãdasɔ na lẽle thɩ̃ hɩ̃ɩdara na gobanɛrsɔ na sogʋʋrdara na mũsũ fʋrɔdara na jɔfʋ jɩnasɔ na so kɩɩldara na fãgadarasɔ fɛʋʋkɛ hanɩ Babɩlɔn marara gbɛbɩrɛ kha wɩ phʋɔl thɩl kɔ̃tɩ̃ɩkɛra Nebukadinejaar jamana kɔɔ mɩnɩ. Wɩ pɔr fɛw a jɩɩl thɩl kɔ̃tɩ̃ɩle Nebukadinejaar kɔɔ mɩnɩɩ ƴɛbʋrɔ. 4 Dɩ hulẽbi bedaar hulẽ nɔ kheu ayɩ: «Nɛr tɩbɩla na caarsɔ na tɩbɩla fɛw ca thɩmɩara fɛw, nɩ pɛ nũu jɔfʋraakɛ wɩ 'laanɩ ayɩ: 5 “Ɔbɔɔkɛ na nɩɛnɩ tutuu wire na bel wire na kãkarmã wire na salãgõ wire na kolõjõ wire na bɔbɔ-felẽ wire na nɩ khɩ̃ thɩ̃ caar fɛʋʋ wisɔ, nɩ gburõkhune a na fʋɔrɛ dɛ thɩl kɔ̃tɩ̃ɩkɛ Nebukadinejaar jamana mɩnɩ. 6 Tibil wo tibilikɛ na gburõkhunenɩ a fʋɔra', wa dʋnaanɛ dapaara dɔ kɔ̃tɩɩna.”» 7 Gɛr dɔ kɩrʋ mɔ̃ tɩbɩla fɛw nɩɛnɩ tutuu wire na bel wire na kãkarmã wire na salãgõ wire na kolõjõ wire na nɩ khɩ̃ thɩ̃ caarsɔ fɛʋʋ wisɔ, tɩbɩla ɓibi na caarsɔ thɩmɩara fɛw, wɩ gburõkure a fʋɔr dɛ thɩl kɔ̃tɩ̃ɩlera Nebukadinejaar jamana kɔɔ cʋʋnɩ.
Danɩɛlɩ alãkhasɔ yẽther bor jamanaa thɩl fʋɔr
8 Mɔ̃ gele na pɩnɩ, Kalde dɩ thɩdaar ɩkhasɔ tɔr dã dapaara a ma dɩ wa n pɛr Juifisɔɔra sor. 9 Wɩ gbaar thɩmɩɩr a so Nebukadinejaar jamanana aa: «Thãgba n hana fɩ yi gbãa khorr yaa jamana! 10 Fɩ sor ayɩ, tibil wo tibilikɛ na nɩɛnɛnɩ tutuu wire na bel wire na kãkarmã wire na salãgõ wire na kolõjõ wire na bɔbɔ-felẽ wire na nɩ khɩ̃ thɩ̃ caarsɔ fɛʋʋ wisɔ, wɩ teenanɛ wɩ gburõkhune a fʋɔrɛ dɛ thɩl kɔ̃tɩ̃ɩle. 11 Fɩ sor dakha ayɩ, tibil wo tibilikɛ na gburõkunenɩ a fʋɔra', wa dʋnaanɛ dɔ kɔ̃tɩɩna.” 12 Sɩ Sadɩrakɩ na Mesakɩ na Abɛdɩ-Nego, kɛ dɔnɩ Juifisɔɔkɛ fɩ kɔɔ pɛrnɩ dɩ wa n thɔɔ thɩ̃ɛ Babɩlɔn dɩɩra, tɩbɩla wɛ, wa n therna afɩ jɔfʋa' dɛ jamana ! Wa n fʋɔr afɩ thãgbasɔa', wa n fʋɔrakɛ dɛ thɩl kɔ̃tɩ̃ɩkɛ fɩ kɔɔ mɩna'.
13 Dɩ nĩkhi thar Nebukadinejaar, dɩ cɩ̃cɩma a so wɩ pɔna Sadɩrakɩ na Mesakɩ na Abɛdɩ-Nego. Dɩ wɩ kpa wɛr a pɔna jamanaa ƴɛra. 14 Dɩ Nebukadinejaar gbaar thɩmɩɩr a bule wɩ aa: «Sadɩrakɩ na Mesakɩ na Abɛdɩ-Nego, sɩɩdo sobɔr nɩ bo ayɩ na fʋɔr ɩ̃ thãgbasɔa', na fʋɔr dakha dɛ thɩl kɔ̃tɩ̃ɩkɛ mɩ cʋʋnaa? 15 Nɛnɛ̃, nɩ gbɛbɩrɛ pɛ, dɩ ɔbɔɔkɛ na nɩɛnɩ tutuu wire na bel wire na kãkarma wire na salãgõ wire na kolõjõ wire na bɔbɔ-felẽ wire, na nɩ khɩ̃ thɩ̃ caarsɔ fɛʋʋ wisɔ, nɩ gburõkhune a fʋɔrɛ thɩl kɔ̃tɩ̃ɩkɛ mɩ cʋʋnɩ dɛ ! A na fʋɔrʋa', wa dʋʋrna nɛr dapaara dɔ kɔ̃tɩɩnaakɛ. Dɩ thãgba ʋmɔ̃ na punone na taa nɩ ɩ̃ ɲɔ̃kɔɔ?»
16 Dɩ Sadɩrakɩ na Mesakɩ na Abɛdɩ-Nego birse Nebukadinejaar jamana ayɩwɔɔ: «Sa n ƴaal sɩ birse fɩ ga biloola'. 17 A fɩ dʋna sɩ dɔɔra, asɩ Thãgbaakɛ sɩ n fʋɔrnɩ, a hananɛ punone a na taana sɩ. Dɩ a na taa sɛr dɔ kɔ̃tɩɩnaakɛ, a na taana sɩ afɩ ɲɔ̃kɔɔ yaa jamana. 18 Dɩ adorakɛ aa taa sa', sɩ jɛ gɩ do sa fʋɔr afɩ thãgbasɔa yaa jamana. Dɩ sa fʋɔr dɛ thɩl kɔ̃tɩ̃ɩkɛ fɩ cʋʋna'.»
19 Dɩ nĩkhii tha Nebukadinejaar, dɩ sɔ̃ ƴɩɛ Sadɩrakɩ na Mesakɩ na Abɛdɩ-Negosɔɔ ƴɛra. Dɩ gba thɩmɩɩr wo a so aa, wɩ cona dɔɔ gɩ jɩɩ phʋrɔ foo gɩ dɛbɩ ɲẽbe makoɲɔ gɩ jɔ mɔ̃ gɩ n kɔɔ hanɩ. 20 Agɩpɩ, a sor ɔɔ tibil ɩkhasɔraakɛ dɔnɩ tɩɩ khena a jɔ fɛw ɔɔ sɔrasɩsɔɔra, aa wɩ le Sadɩrakɩ na Mesakɩ na Abɛdɩ-Nego a dʋrɛna wɩ dɔ kɔ̃tɩɩna. 21 Dɩ wɩ lire tɩbɩlaale na kẽkenasɔɔkɛra wɩ tonɩ, na awɩ gbɔɔlɔ̃sɔ na awɩ kẽkẽ gbãsɔ na kẽkẽ ɩkhasɔ a dʋʋrna wɩ dɔ kɔ̃tɩɩnaale. 22 Mɔ̃ jamanaa thɩmɩɩra thʋnɩ khɩɩr mɛ̃, wɩ cʋ̃ʋ dɔɔ dɩɩ thʋ̃ phʋrɔ foo a dɛbɩ ɲẽbe makoɲɔ a jɔ mɔ̃ gɩ n kɔɔ phʋrɔnɩ. Dɩ dɔ lɩnanɛ kʋʋrɛ konaakɛ kɔɔ dɔnanɩ Sadɩrakɩ na Mesakɩ na Abɛdɩ-Nego dɔɔra. 23 Dɩ Sadɩrakɩ na Mesakɩ na Abɛdɩ-Nego jiire dɔ kɔ̃tɩɩnaale.
24 Dɩ maar fʋ Nebukadinejaar jamana, dɩ pal birbir a ɩɩr jɩɩl. Dɩ a gbaar thɩmɩɩr a bule ɔɔ fɩl 'laadara aa: «Ga do tɩbɩla yẽther sɩ kɔɔ li a dʋʋrna dɔɔra gaa?» Dɩ wɩ birsee aa: «Baalɛ na halaa jamana, tɩbɩla yẽther gɩ!» 25 Dɩ so: «Walaa! Sɩ mɩ yɩrɛ kona yenã, wa li wa', dɩ wa n ɩɩr dɔ kɔ̃tɩ̃ bɩnɔ, sɩ dɔɔ na n cʋʋ wɩ thɩ̃ɛa'. Sɩ balanãdaarɩ ƴɛ na n hona thãgba. 26 Agɩpɩ, Nebukadinejaar tɔr pɔ dɔ kɔ̃tɩ̃ nʋɔra, sa phã aa: «Sadɩrakɩ na Mesakɩ na Abɛdɩ-Nego, Thãgba Ƴũu Pərdaarɩ thɔ̃dara wei, nɩ thɩrɛ a ɩna! Dɩ Sadɩrakɩ na Mesakɩ na Abɛdɩ-Nego thɩɩrɛ dɔɔra.
27 Dɩ kʋmãdasɔ na lẽle thɩ̃ hɩ̃ɩdara na gobanɛrsɔ na jamanaa fɩl 'laadarasɔ kpar jɛ, a yɩɛ dɩɩ do dɔɔ na puno a cʋʋ thɩ̃ɛ tɩbɩlalee tomɩra ga. Awɩ yʋsũusɔ na awɩ kẽkẽsɔ na hɩ̃a', dɩ wa n hʋnakɛ dɔ sũu dakha ga. 28 Le Nebukadinejaar gba thɩmɩɩr a so aa: «Sadɩrakɩ na Mesakɩ na Abɛdɩ-Negoo Thãgba hɩna khɩɩrɛ, ɔrkɛ thɔnanɩ ɔɔ thɔ̃thɔ̃ thu dɩ taa ɔɔ thɔ̃daraakɛ hananɩ ha pɛrɛ ɔrra. Wɩ bor mɛr jamanaa jɔfʋ, a tunənəkɛ bɔ gaarɛ, sɩ ɩna fʋɔr thãgba kpɩɩ, a ga do ɩnɩɩ Thãgba gaa ga! 29 Dɩ nɛnɛ̃ɛkɛ jɔfʋʋkɛ, mɩ n pɛrnɩ dʋɔn: «Tibil wo tibil, caar wo caaraakɛ ntɛ thenɩ na ca thɩmɩɩr wo thɩmɩɩrɩkɛ ntɛ n mɩɩnɩ, a ntɛ mɩɩ puure Sadɩrakɩ na Mesakɩ na Abɛdɩ-Negoo Thãgbara, wa cɩrrɛ ntɛ yɩra yɩra yɩra, sɩ ɔɔ cɔ n debɩ gɩ do puuyʋʋ. Gɩdonɩ thãgba kpɩɩ na hale, kɛ hananɩ punone dɩ taana ɔɔ kha ga.» 30 A gele pɩ, Jamana tɔr kɔ̃tɩɩnɛ a dɛbɩ Sadɩrakɩra na Mesakɩ na Abɛdɩ-Negora Babɩlɔn dɩɩra.
Nebukadinejaarɩ balaɲɔ dəəl: Thɩr kɔ̃tɩ̃ɩ
31 Mɛr Nebukadinejaar jamana thɔnana thɩmɩɩrɩkɛ tɩbɩlala fɛw na caarsɔɔra fɛw, na tɩbɩlaa ca thɩmɩsɔɔra fɛʋʋkɛ hanɩ thɩɩra ayɩ: «Ha ɩɩ jɔɔ n hana kha na nɛrɛ!»
32 Mɩ yɩɛrɛ dɩɩ bɔr dɩ ma nɩna jɩɩnsɔ na nɔ kpaa thɩ̃ɛsɔɔkɛ Thãgbaakɛ dʋɔnɩ ƴũu Pərdaar cʋʋ marnɩ.
33 Jɩɩnsɔɔkɛ a nɩnanɩ wabɩrɛ ka!
Dɩ nɔ kpaa thɩ̃ɛsɔɔkɛ a cʋʋnɩ hana punone na sobɔr!
Ɔɔ jamana do, khorr jamana dʋʋr gɩ,
Ɔɔ fãgadaar do n hanale khorr məle wo məlela fɛw.