Mɔ̃ Jerujalɛm dɩɩ wɩɛlnɩ
4
1 Hu! Aɲaa!Nɩ yɛ dɛ bɔnɩ hɩlɛ ya nɛr!
Nɩ hɩnɛ dɛ kilele kʋɛnɩ ya nɛr!
Nɩ yɛ boka phuusɔ bɩ̃bɩlanɛnɩ a ha hʋ gɛlasɔɔra!
2 Sɩyɔ̃dara kɔɔ ɓɔnanɩ,
A thʋ̃ ɓɔnakɛ a ho dɛ kilele,
Hu! Aɲaa!
Wɛr wɩ gba nɛnɛ̃ dɩ wɩ ho ja bʋlaasɔɔ !
Ja bʋlaasɔɔkɛ bʋla mɩ n mɩnɩ na ɲɛ̃ɛ ya nɛr!
3 Hɔ̃ benanakɛ,
wɩ n har awɩ bisɔ ɩlɛ̃,
Wɩ n haanɛ awɩ bisɔ.
Sɩ ɩ̃ omɩ bɔsɔ kharɛ haar,
A ho siwilə̃sɔɔkɛ n hanɩ bə̃ kparara.
4 Ɲɔlkhaa dor nɔɔ dɩ bibɔrɔɔ delẽbi khɩ,
A ma ɔɔ nɔkə̃əbirə.
Bɩsã bii n bɩɛlɛ dikor na nʋɔ,
Sɩ tibil na n ha wa'.
5 Wɩrɛɛkɛ n kɔɔ khɔnɩ dikor ɓɔna,
Wɩ n khiire kɔmɛra hʋɛsɔra.
Wɩrɛɛkɛ kɔɔ bʋɔnɔnɩ ɲɔ̃koruu,
Nɛnɛ̃, sɔ̃sʋɔnɛ wɩ n khɩɩ na ɲɛ̃ɛ.
6 Ɩ̃ omɩ bɔsɔɔ sopuu kɔ̃tɩnɛ ka,
Gɩ kɔ̃tɩnɛ jɔ sodɔmdaraa sopuusɔ,
Sodɔmɩkɛ wɩ kɔɔ wɩɛlnɩ dapaara sɩ tibil na thaaraa ɲɔ̃a'.
7 Sɩyɔ̃ɔ tookɛ 'laanɛnɩ awɩbara a do Thãgbaada a phu kɔɔ bulolole phɩlphɩlphɩl a jɔ nɛɛjɩ,
A thʋ̃ bulololakɛ a jɔ naƴɩlɛ̃.
Wɩ kɔɔ sɩɛrɔrɛ kpɩ̃ɩkpɩ̃ɩkpɩ̃ɩ a ho lɛ̃bi sɛna,
Dɩ awɩ ƴɛ na n hɩl a ho bokaarɩkɛ wɩ n wenɩ safɩɩr.
8 Sɩ nɛnɛ̃ wɩ fire a biiro tĩtĩtĩ a jɔ dɔkhãbiene,
Wa n jɩ wɩ hʋɛsɔɔra ga.
Wɩ kpɛrɛrɛ a maalna khubə fɛw,
A khɩ ho thɩr khɩɩ.
9 Wɩrɛɛkɛ wɩ kʋʋrnɩ kʋʋra baar
Wɩrɛ lɩɛrɛnɩ kɔmɛra.
Gɩdonɩ fãga pɩ wɛr dɩ wɩ var waa,
A lɩɛrna dɩko bʋɔra.
10 Khɛraakɛrakɛ na n tuonɩ awɩ bisɔɔra ga,
Sɩ wɩ kʋʋrɛ awɩ bisɔ,
Na awɩ thɛthɛɛ ɲɛ̃ a 'lʋɔr,
Dɩ wɩ do war dɩkɔ dɩ wɩ kho,
Ɔbɔɔkɛ ɩ̃ omɩ bɔsɔ hanɩ nɩwɛra.
11 Nĩkhi khɩɩ fʋrɛ Thãgba Kɔ̃tɩn waa a dã thu,
Gɛr gɩ dɩ deer ɔɔ nĩkhi khe dɔ khaa.
A gbɔɔrɛ dɔɔ a pɛ Sɩyɔ̃ dɩɩra,
Dɩɩ hɩ̃ɩ a dana thɛrɛɛ ɓoɓo.
12 Jamanasɔ na tɩbɩla fɛʋʋkɛ hanɩ thɩɩra,
Na kɔɔ puno na pɛr haar,
Dɩ sodaar na lãlar na punone Jerujalɛm dɩɩ,
Sɩ na lõ na ɔɔ lõfonʋɔa'.
13 Sɩ ɔɔ Thãgbaa mɩmɩɩsɔɔ sopuusɔ dɔ kɩrʋ,
Na ɔɔ bonɩ jidaraa dɩpasɔ.
Gɩdonɩ wɩ kʋʋrɛ tɩɩ sarasɔ,
A deer awɩ tɔmɩn dɩ bɩnɔ.
14 Gɛra gɩ dɩ wa n fi dɩ hʋɛsɔɔra bililili yaar khaa,
Tɔmɩn haar wɩ do a bise.
Tibil na punonakɛ na thar,
Awɩ kẽkẽsɔɔra ga.
15 Tɩbɩla n phã warɛ na nɔ khɩɩ aa:
«Nɩ lɛna sa faa hʋɛ!
Dabisesɔɔkɛ !
Nɩ lɛna sa faa hʋɛ!
Na n tha sara'!»
Dɩ mɔ̃ wɩ hanɩ caalɛlɔ dɩ wa n fi bililili wa n jɩ ka wa jalna',
Ca kpɩɩsɔ mar dɩ wa n mɩɩ kha ayɩ:
«Sa n faa wɩrɛ wɩ too kɩɛr asɩ thɩ̃thɩɩna gaa dɛ!»
16 Thãgba Kɔ̃tɩnɩ thɛthɛ bɩ̃bɩlã wɛr a faa,
A n ƴaal a hɩɩn wɩ bã.
Gɩdonɩ wa hana cʋʋr bonɩ jidarara ga,
Wa n therna tɩɩ kpɛɛna ga.
17 Sɩ hɩɩnɛ hʋɛ waa dɩ yinə vɔɔ sɩ,
Sɩ pɩɛrɛ bule a thʋnɔ ga n ɩ̃a'.
Sɩ kɔɔ ha asɩ bɛbɛr cɔ yʋɔsɔ dɩ sa n pɩɛr ca ʋkhaakɛ na ɩnanɩ na taa sɩ. Sɩ aa puno a taa sa'.
18 Lãlara n gɩɩlɛ asɩ nɛ kasɔ,
Wɩ pɩɛr sɛr sa n gba hʋɛ a jal asɩ pasɔa'.
Asɩ khu pa wɔrɔnɛ,
Asɩ bɔ na hʋnɔ bã,
Asɩ khu pa daan mɛ̃!
19 Asɩ weweesɔɔ nɛ pher,
Wɩ n car a jɔ sɩgbʋrasɔɔkɛ n ubəni ƴũu.
Wɩ weele ser a kpaarna gɔ̃gɔnana,
Wɩ nɔ sɛr bə̃ kparara.
20 Ʋrɛ kɔɔ dʋɔnɩ asɩ yi,
kɛ dɔnɩ ʋrɛ Thãgba Kɔ̃tɩn phiirnɩ,
A təəre ji lãlaraa koraakɛ wɩ kpenɩ.
Sɩrakɛ sɩ n kɔɔ sor ɔɔdara ayɩ:
Ɔr na dɔ nɔɔ dɩ sa 'lɛ too paar ca kpɩɩsɔɔ thɩ̃thɩɩn.
21 Haar n je fɩ dɩphã yaa Edɔ̃ dɩ bɔbʋɔ,
Fa n kãka fɛrkɛ hanɩ Usi bəənnə!
Fɛrɛ dakha wa 'laa farɛ nĩkhiirə fer mɔ̃ wɩ n 'laanɩ ta ɲɔ̃kpõbir,
Fɩ ɲɔ ga n kʋ fɩ, fɩ faa sãɓɔlɔ̃.
22 Sɩyɔ̃ dɩ bɔbʋɔ ya,
Fɩ lɩmɩnɛ anɩ dɩpa helsɔ a pɩ mɛ̃,
Thãgba na fʋ fɩ na jalna dɩ kpɩɩra bã.
Sɩ fɛr Edɔ̃ dɩ bɔbʋɔ wer,
Fɛr a na kɩɩlna dɩphã afɩ dɩpara,
A na nɩnanɛ afɩ sopuusɔ jɩɛra.