Nũ pɛ hananɛ bɔ gaarɛra
3
1 Mɩ dor tibilikɛ hieni bɔ gaarɛ,Dɩɩ the gɩrɛrakɛ Kɔ̃tɩn be mɩnɩ na nĩkhi khɩɩ.
2 A thɔɔ mɛr faa,
A tɔr mɛr pɛr dabirəra ɩ̃ jala,
dahɩrɛ na hala'.
3 Mɛr bɩɛla a n 'laarɔ ɲɔ̃ɔ,
Da n be mɩ wire wo wire.
4 A cʋʋ mɛr dɩ̃ khɩ a maal fɛw,
A khaar mɛr khubosɔ.
5 A mɩrɛ dɩ sɔbɩ gʋʋsɔ a kpala mar,
A pɛ marɛ kharɛ na vɔɔrɛ a dii bilə fɛw.
6 A cʋʋ mɛr dɩ ma n cɔ dabirəra,
A ho wɩrɛ khiire kɛkɛkɛ.
7 A mɩrɛ gʋʋ a kpala mar, ma n puno a tha',
A barã mɛr na jɔrkɔ̃ɔkɛ dʋbarɔnɩ a ka.
8 A mɩ hulẽ mɔ̃ wɩ bullo mɩ,
Dɩ khaan hʋɛ fɛw ɩ̃ bɩɛlla.
9 A varɛ ɩ̃ hʋ na boka kɔ̃tɩna tə̃ə tə̃ə,
A vɩr ɩ̃ hʋsɔ a khokhɩa.
10 A debire a ho mar ursɩɩkɛ nɔnɩ thɩ̃ɛ,
Na sidũ'ũukɛ wɔnanɩ.
11 A halɛ ɩ̃ nɛ dɩɩ lɛ̃ hʋɛra; A cɛcɛbɛ mɛr,
A kʋɛ mɩ koo.
12 A 'lar thaa,
A ti mɩ mɔ̃ wɩ n tini thɩrʋ a na tha na sõo.
13 A thaar mɛr khaʋnaa,
Na ɔɔ sẽsɔ fɛw tʋʋra.
14 Mɩ fire do mãthɩ̃ nɔɔ ɩ̃ toora fɛw,
Dɩ wa n khɩna mɩ nɩɛ wire wo wire.
15 A cʋʋ mɛr kharɛ jɔɔ ka,
A ber mɩ kpalʋ dɩ̃ hi.
16 A cʋʋ mɛr dɩ̃ nã bokana na ɲɩma.
A mʋʋ mɩ thɩlãkobera biləbiləbilə.
17 Fɩ dʋna mɛr faa dɩ̃ hʋnɔna ha ɩɩ fĩi,
Dɩ̃ diinə gɩrɛ n dɔnɩ daw.
18 Dɩ mɩ sor: Ɩ̃ ha pɛ pɩrɛ mɛ̃,
Ma hana nũ pɛrɛ Thãgba Kɔ̃tɩnna 'lo bã.
19 Jɛna ɩ̃ gaar
Na mɔ̃ mɩ n fini bililili,
Ma n jɩ ka ma jalna'.
Ɩ̃ yi hana dor kharɛ a ho kpalbii na kpalʋ.
20 Mɩ n jɩna gɛr bɔɔ fɛw kpɩɛrɛra,
Dɩ ɲɛ̃ɛ khiir mɩ.
21 Sɩ yɛkɛ gɩrɛ ma n kpɩɛrnanɩ,
Gɩrɛ na hana mɩnɩ nũ pɛrɛ dʋɔn:
22 Thãgba Kɔ̃tɩnɩ ha bulo hale wire fɛw,
Dɩ ɔɔ naw na n pa'.
23 Gɩ n dor daphaa a na pɛr duuro wo duuro.
Dɩ gɛr gɩ ɔrra ma dɛ̃ɛ nũ pɛrɛ.
25 Thãgba Kɔ̃tɩn bɔrɛ na sobɔr tibiləəkɛ hananɩ nũ pɛrɛ ɔrra,
Kɛ hananɩ ƴaalɛ ɔrra.
26 Gɩ bɔrɛ tibil na n pɩɛr na nɔ pɩrɛ
Taarɛɛkɛ Thãgba Kɔ̃tɩn n 'laanɩ.
27 Gɩ bɔrɛ tibillə da fʋ ɔɔbara
Nɩwɛra ɔɔ daɓol bɔɔ.
28 A tɔɔ dɩbara na nɔ pɩrɛ kɩrkɩrkɩr,
Ɔbɔɔkɛ Kɔ̃tɩn faanɩ nɩwɛ dɩɩ daan.
29 A gʋɛa ƴɩɛ thɩɩra,
Agakpaan nũ pɛrɛ na hale!
30 A fe gbʋa a pɛ ʋrɛraakɛ n ɓaanɛɛnɩ,
A to wɩ nɩɩrʋ a hi phi.
31 Gɩdonɩ Thãgba Kɔ̃tɩn
Na n bo tibil a faa khorra'.
32 A a pɛ tibilə gaarɛ,
Sɩ bʋɔ n bire fʋʋ wo gɩdonɩ ɔɔ ha bulo wabɩrɛ ka.
33 Mɔ̃ a na cʋʋnɩ tibil puure na n daaraa ga,
Mɔ̃ a na pɛnɩ tibilə ha kʋɛrɛ na do ɔɔ ƴaala'.
34 Ɔbɔɔkɛ wɩ n hʋɔlnɩ
khaɩdarara fɛw dɩɩra,
35 Ɔbɔɔkɛ wɩ n khokhɩanɩ tibili hʋ hana
Ƴũu pərdaarɩ ƴɛra,
36 Ɔbɔɔkɛ wɩ n dɩnɩ tibilə kɩɩl paar,
Kɔ̃tɩn na n yɩ gaa?
37 Amɛ n sɔ nɔ haar dɩbara dɩ thɩ̃doo n cʋʋ oti ?
Ga do Kɔ̃tɩn n 'laanɛ hʋɛa ?
38 Ga do Ƴũu Pərdaarɩ nɔ thɩmɩra
Thɩlkɩɩr na nɔbɔɔ n thaa?
39 Aɲera tibilikɛ taanɩ hana yire na bir a na n waal wo?
Ntɛ n ka na waalɛ ɔɔ thɛthɛɛ sopuusɔɔra.
40 Sa n jʋrɛ asɩ cʋʋ pasɔ a 'lɔ gɩ na hɩnɛ,
Sɩ kɛra birə Thãgba Kɔ̃tɩnna.
41 Sɩ khɛra asɩ ha a tɛna ɲɛ̃ɛ
Thãgbaraakɛ hanɩ le ƴũu.
42 Sɩ kɔɔ cʋʋrɛ puure, a ɩɩrna lãʋ,
Gɛr gɩ fɛrɛ fa faa a ha sa'.
43 Fɩ gbaar nĩkhii a thi sa wee sɩ kpaan;
Fɩ kʋʋr sɛr sɩ fa jɩ sɩ bʋɔra ga.
44 Fɩ gbaar ndɔlɔ̃paar a thi,
Gɩ do nɔɔ asɩ bɩɛl na n dã fa'.
45 Fɩ cʋʋ sɛr dɩ sɩ ho puuyʋʋ na sɔ̃sʋɔnɛ
Caarsɔɔ thɩ̃thɩɩn.
46 Asɩ lãlaardara
Ɓibi n mɩɩ sarɛ puure ka.
47 Thɩ̃ɛɛkɛ n kɔɔ pɩɛrɛ sɩnɩ dʋɔn maar na ƴɛbirəre,
Bũburone na kʋɛrɛ.
48 Yilẽbe n cel mer a ho mɩɩr ɲʋɔn,
Dɩɩ do kʋɛrɛɛkɛ 'lenɩ ɩ̃ omɩ bɔsɔ dɔ kɩrʋ.
49 Mɩ n bɩrɛ yilẽbe bɔɔ fɛw, ga n kurə', gɩdonɩ ma n hɩɩra'.
50 Dɩ mɛ̃ Thãgba Kɔ̃tɩnɩkɛ hanɩ ƴũu na pəro,
A kpu a hɩɩn a toro yire.
51 Gɩ n kho marɛ haara,
Mɔ̃ mɩ yɩnɩ gɩrɛ na dananɩ ɩ̃ omɩ bɔsɔ.
52 Wɩrɛɛkɛ n laarɛ mɩnɩ sɩ kɩrʋ na hala',
Wɩ n wee mer mɔ̃ wɩ n kpanɩ 'lomĩ ƴaa.
53 Wɩ dʋna mɛr na yire ɲɔ tɛ koro,
A dʋʋrna mɩ bokana wɩ kʋ.
54 Ɲʋɔn kɔɔ thi marɛ,
Dɩ mɩ so mɩɩ: «Ɩ̃da pɩrɛ mɛ̃!»
55 Sɩ mɩ wer afɩ i
Ɲɔ tɛ kor bɩnɔ, yaa Thãgba Kɔ̃tɩn.
56 Dɩ fɩ nɩɛrɛ ɩ̃ wi mɔ̃ mɩ sonɩ ayɩ:
«Fa n khaan nũu ɩ̃ sera bɔɔraakɛ mɩ n we fɩnɩ bulela ga!»
57 Wireekɛ mɩ we fɩnɩ, fɩ tɔr wɔrɔ̃ mɩ,
A so mar aa: «Fa n do maar n fʋ fa'!»
58 Kɔ̃tɩn wei, fɩ teere ɩ̃ sora,
Fɩ taa mɛr khirə.
59 Thãgba Kɔ̃tɩn wei, fɩ yɩrɛ puureekɛ wɩ cʋʋ mɩnɩ,
Tea pɛ mar ɩ̃ hʋ hanana!
60 Fɩ yɩrɛ heluukɛ wɩ tiir marnɩ,
Na awɩ nɔ bɩɛl gʋʋrɩkɛ wɩ n gʋʋrnɩ fɛw mɛrɛra.
61 Thãgba Kɔ̃tɩn wei,
Fɩ nɩɛrɛ mɔ̃ wɩ n nɩɩr mɩnɩ,
Na awɩ nɔ bɩɛl gʋʋrɩkɛ wɩ n gʋʋrnɩ fɛw mɛrɛra.
62 Fɩ nɩɛrɛ gɩrɛ ɩ̃ sodara n mɩɩnɩ mɛrɛra,
Na kpɩɛr puukɛ wɩ n hananɩ mɛrɛra wire wo wire.
63 A wɩ toore yo,
A wɩ jɩɩlɛ yo,
Hɩnɛ gɩrɛ wɩ n cʋʋnɩ:
Ɩ̃dara wɩ n khɩna nɩɛ.
64 Lɩma wɩ ya Thãgba Kɔ̃tɩn,
Gɩ mɩɛ kha na
Puu caarkɛra wɩ kɔɔ cʋʋnɩ na awɩ ɲɛ̃.
65 Khaanɛ wɩ haar,
Gɩ do nɔɔ afɩ sɔ̃ na n kpa war.
66 Wea wɩ kpaanɛ na nĩkhii,
Bũburone wɩ a te thɩɩraakɛ fɛr Thãgba Kɔ̃tɩn hɩnɩ.