EKILEJƖASƖ 11

Tumone na bɔra'

1 Dɔna afɩ dikor faa ɲʋɔnɔ, gɩdonɩ dɩkhõo fa bire na 'lɛ gɩ wo. 2 Tɩnɛnɛ afɩ thɩ̃sɔ a hana tɩbɩla makoɲɔ, agɩborakɛ tɩbɩla makõthersɔ, gɩdonɩ fa jɩ thɩlke ʋrɛ na dananɩ thɩɩra ga. 3 Ɔbɔɔkɛ ndɔlɔ̃pana hinəni ɲʋɔn, gɩ n deere kɛ thɩɩra. Dɩ bil ʋrɛ thɩrʋ jinəni, a bil ʋrɛ wire n phanɩ dɩ pɛr ɲɔ̃bɩlã, agɩbo ɲɔ̃bɔɔ gɩ, dapaalera a jini, lera a n too.

4 Tibilikɛ n hɩnɛnɩ jɩɛ, a na diirə'. Tibilikɛ n hɩnɛnɩ ndɔlɔ̃pana, a na kha jɔa'. 5 Mɔna fa n jɩnɩ kãkɛ jɩɛ n jalna', dɩ fa n jɩ biikɛ hanɩ khɛr pɛmɛdaarɩ bɩnɔ mɔ̃ ɔɔ khubisɔ n gbɛbɩna', mɛna gɩ, fa puno na jɩ Thãgbaa thɔ̃ɔkɛ a n cʋʋna', gɩdonɩ ɔr n cʋɛ thɩ̃ɛ fɛw.

6 A dɩɩ wɩl, duuro phiphiphi diire afɩ thɩ̃, sɩ fa n bo ɲɛɛna dʋɔrɔa'. Gɩdonɩ fa jɩ gɩmɔ̃ na bʋɔnɔna'; a duurdaa na bʋɔnɔ ya, dʋɔrdaa gɩ ya fa ja'. Agɩbo wo gɛr fɛʋra punone bɔr.

7 Dahɩrɛ bɔrɛ yɩra na sobɔr. Dɩ wiree yɩ bɔrɛ yinənə ka. 8 Ado tibil hana yire a cʋʋ yɛna jɔɔ, a na n kãkanɛ yɛnasɔraalera fɛw a cʋʋnɩ. Sɩ a jɛna dakha wi puusɔɔkɛ na kpaanɛnɩ na jɔrɛ na ka. Gɩdonɩ thɩ̃ɛ fɛʋʋkɛ na ɩnanɩ dor thɩ̃ kananɛ.

Daɓol daw hananɛ ɔɔ khu pa

9 Daɓolbir wei, na kãkanɛ afɩ daɓolbi bɔɔ. Dɔ afɩ ha na n ha fɩ daw bɔɔ fɛʋraakɛ fɩ donɩ daɓolbir. Dɩ na cʋɛ mɔ̃kɛ afɩ ha ƴaalnɩ, a na jala mɔ̃kɛ afɩ yi hɩɩn pasɔ hanɩ. Sɩ jɛna dɩ gɩrɛ fɛʋʋkɛra fɩ n cʋʋnɩ, Thãgba na we fer na pɔna kɩɩlʋla. 10 Te ha kʋɛrɛ afɩ hara a faa, a tɔ puure hʋnɔnɛna afɩ tomɩr. Gɩdonɩ daɓol dʋʋr na daw dor thɩ̃ kananɛ.