Fɩl dɩɩrɛ daɓolminənə
12
1 Na jɛna afɩ tidaar afɩ daɓolbi do bɔɔ, bɔɔraakɛ wi puusɔ na danɩ pa', dɩ yɛnasɔ na wɔrɔ̃ fɩ pɩ, fɩ so aa, fa hana daw bã ga. 2 Na jɛna afɩ tidaar ɔbɔɔle wire na dahɩrɛ na sɩpor na ƴepələ̃be na birənɩ pa'. Dɩ ndɔlɔ̃pana na kɛr a ɩ̃ pɩ ɔbɔɔkɛ thãgba ɲʋɔn danɩ a khɩlla'. 3 Ga bɔɔle cɔ bɛbɛra n jɩɩn, wɩrɛ dɔnɩ kuun khena n gũguune, khɛraakɛ n nananɩ jɔ n jɩɩlɛ gɩdonɩ wa jɔra', dɩ khɛraakɛ n hɩnɛnɩ fɛnɛtɩrɩsɔɔra gɩ n birə warɛ. 4 Ga bɔɔle, lõ phɛrɛ yeɲɔɔkɛ eenenɩ hʋɛ n khaanɛ, nã bi bɛɛ wire n wurre, 'lomĩ khɩɩ haarakɛ n weere daan, dɩ nɩ khɩ̃ khɛra fɛʋʋ wi na n the bã. 5 Ga bɔɔle gĩgĩ jʋʋnɛ na hʋ gbaar n kʋrɛ tibil maar. Yʋʋ n bulolole phɩlphɩlphɩl a ho amãadɩ thɩr phɩ̃ɩ. A n puno na bɩ̃ mɔ̃ ɓasʋlãa bɩnɩ bã thɩ̃ mɩlalɛ na n nɩ 'lo bã. Ga bɔɔle, tibil n jaal ɔɔ cɔraakɛ dʋɔnɩ khorr too paar mɛ̃, dɩ bedara n gba hʋɛ dɩ wa n caalɛ. 6 Jɛna afɩ tidaar bɔɔraakɛ afɩ dɛ bulo pɔ̃ɔ na phʋnɩ pa', dɩ afɩ dɛ bʋlabir na cʋɔr pa', afɩ ɲɔ cɛ bʋla na cʋɔr ɲɔbu kaara pa', dɩ ɲɔ cɛ lokaar na phʋ̃ pɩ a ji ɲɔ tɛ kor bɩnɔa'; 7 dɩ afɩ tomɩr na kɛr pɩ a lõ thɩɩraakɛ a kɔɔ thenɩ a do thɩlãkobe, sɩ dɩ thui kɛr bir Thãgbaraakɛ kɔɔ 'laanɛɛna'.8 «Thɩ̃ɛ wo thɩ̃ɛ dor thɩ̃ kananɛ» Ekilejɩasɩ sɔ: «Thɩ̃ kananɛ ha thɩ̃ɛ fɛw.»
Pɩpɩɩ thɩmɩɩ
9 Ekilejɩasɩ na kɔɔ do tɩɩ kpɛsɛ dɩbara ga sɩ a kɔɔ dɩɩrɛ tɩbɩla jɩɩr. A kɔɔ jʋʋrɛ thɩ̃ɛ, a 'lo a hɩɩn. A kɔɔ dʋrɛ dakha sokpaasɔ jɔɔ.
10 Ekilejɩasɩ kɔɔ dor bʋɔ a ƴaal thɩmɩɩ bɔy, thɩmɩaakɛ wɩ kherenɩ dɩɩ telẽ oti dẽdẽdẽ, kɛ dɔnɩ sobɔ thɩmɩa waa gel. 11 Tɩɩ kpɛsɛsɔɔ thɩmɩɩsɔ hor sẽbe, dɩ awɩ sokpasɔɔ ho kpãbeekɛa wɩ n kpanɩ dɩɩ ma. Thɔthɔɔdaar bɩɛlɩ pa gɩ the fɛw kɛ dʋɔnɩ Thãgba.
12 Gɩrɛ sɛnɩ ɩ̃ bikuun dʋɔn: jɩɛ hɩɩn fa n ɓanɔ thɩ̃ɛa'! Fɩ punone khere sɛbɛ gɩ jɔr mɔ̃, sɩ ga pa'. Dɩ dɩɩr jɔjʋɔ n vɔɔrɛ tibili tomɩr.