10
1 Cĩcĩ khe niinə n cʋʋrɛ niin dɩɩ kpɔ a na hʋ̃ puure. Dɩ mɛna də̃bəəle fɩɩʋ n kʋɛ kpɛsɛrɛ na cʋʋr. 2 Tɩɩ kpɛsɛɛ ha n thɔgʋʋrɛ da n pɛ kpɩɛr bʋɔra sɩ də̃bəli ha n thɔgʋʋ da n pɛ kpɩɛr puurə. 3 Ɔbɔɔkɛ də̃bəl na n kananɩ hʋɛ, gɩdonɩ aa jɩ fɩla', a n sor tɩbɩla fɛʋra wɩ də̃bəəle. 4 Ado afɩ kɔ̃tɩ̃ gbana fɩ nĩkhii, fa n bo afɩ too pa ga; gɩdonɩ ha jo fɩlɛ n taarɛ tibil puu kɔ̃tɩɩna.5 Thɩ̃ puu bɩɛl hale kɛ thɩɩra wo mɩ yɩnɩ, kɛ thɔthɔɔdaar n cʋʋnɩ dɩɩ the dədirə: 6 Gɛr dʋɔn də̃bəlikɛ n 'lɛnɩ ƴɛkʋʋlɛ, sɩ tɩɩ kɔ̃tɩna n ka ha khiro. 7 Mɩ yɩrɛ dea dɩ wa n jʋʋn gãgona, sɩ jamanasɔ ka fi dɩ wa n ɩɩrna nɛɛ a ho dea.
8 Tibilikɛ n kpɩɛnɩ koru, ɔr thɛthɛra n jero. Dɩ ʋrɛɛkɛ conɩ kaar gʋʋra, ɔrra sii na dɔ̃. 9 Tibilikɛ n əəlenɩ bokana, bokaar na ɓɛrɛɛrɛ. Dɩ tibilikɛ n kpaanɛnɩ dɛɛ, thɩlkɩɩr punone daan.
10 Ado kpãkpo nʋɔ ti dɩ fa lea', fãga jʋɔ fa pɛr sɩ a kur thɩ̃ɛ. Dɩ khorɩkɛ kpɛsɛrɛ n 'laanɩ dʋɔn ƴɛkʋʋl jaal.
11 Ado sii dɔ̃ ʋrɛ hananɩ thɩɩ dɩ punona sii, ɔɔ thɩɩle na hana kɩrʋ bã. A n 'lɛrɔ khora'.
12 Tɩɩ kpɛsɛɛ nɔ thɩmɩɩsɔ hinəne bɔ jɩɩr sɩ də̃bəli delẽbirə n kʋɛa. 13 A n fʋrɛ ɔɔ thɩmɩɩsɔ na də̃bəəle. Aa na pɩɩr ɔɔ thɩmɩɩ, dɩ mɩɩ yʋ 'lee thɩmɩɩ dɩɩ puuro ka. 14 Də̃bəl n mɩɩrɛ thɩmɩa jɔɔ ka. Tibil na n jɩ gɩrɛ na dananɩ cʋɔa'. Gɩdonɩ amɛ wer na mɩɛnɛɛ gɩrɛɛkɛ na dananɩ bɔɔkɛ a karɔnɩ pɩ? 15 Də̃bəl n vɔɔrɛ ɔɔ thɔna ka, gɩdonɩ a n jɩ mɔ̃ a na fʋnɩ sɩ a jal dɩ kɔ̃tɩɩna ga.
16 Ga puure dɩɩraakɛ ɔɔ jamana donɩ bɩsã buu, dɩ ɔɔ minisisɔ n too dikor khora duuro phiphiphi! 17 Gɩ da dɩɩraakɛ ɔɔ jamana donɩ nũfe bɩsaan, dɩ ɔɔ minisisɔ na n kho dɩkɔ bɔ bʋɔra gɩ ha wɩ fãga, sɩ wa n ɲɔ taan dɩɩ kʋ wa'! 18 Tibilikɛ n khaalɛnɩ, ɔɔ nãsʋ n wure. Ʋrɛ n dokhonenɩ, ɲʋɔn n 'lune ɔɔ cɔ. 19 Wɩ n gbɛbɩrɛ dɩkɔ kãkara. Dɩ taan n 'laarɛ daw. Dɩ war n 'laarɛ punone thɩ̃ɛ fɛʋʋ cʋʋra. 20 Fa n nɩɩr jamana, dɩrakɛ afɩ kpɩɛra ga. Dɩ fa n nɩɩr tɩɩ kɔ̃tɩ̃ɩ afɩ du bɩnɔɔkɛrakɛ fɩ n phɩna'. A mɛ̃ ga, 'lomin punone gba gɩ a thena, dɩ thɩ̃ ubinə punone gba gɩrɛra fɩ mɩɩnɩ a kpaarna.