Khu pa ca bɩɛlla n pɩɛrɛ tɩbɩla fɛw
9
1 Mɩ kpɩɛrnanɛ thɩ̃ɛsɔɔkɛ fɛw a yɩɛ dɩ tɩɩ sara na tɩɩ kpɛsɛsɔ na thɔ̃ khenaakɛ wɩ n donɩ, Thãgbaa ɲɔ̃kɔɔ gele ha. Tibil na n jɩ ado wa naarɛ ya, wa laarʋʋrɛ ya ga. Thɩ̃ɛ fɛw punone dãa. 2 Thɩ̃ ca bɩɛlla n dana tɩbɩla fɛw: Gɩrɛɛkɛ n dananɩ tɩɩ sarʋ gɩ n daan dakha tɩɩ puu. Gɩrɛɛkɛ n dananɩ ʋrɛɛkɛ bʋɔnɔnɩ a phu, gɩ n daan dakha ʋrɛɛkɛ na phona'. Gɩrɛɛkɛ n dananɩ ʋrɛɛkɛ n jenɩ bonɩɛ, gɩ n daan dakha ʋrɛɛkɛ na n jenɩ bonɩɛa'. Gɩrɛɛkɛ n 'lenɩ tɩɩ bʋɔ, gɩ n 'liri dakha sopuudaar. Gɩrɛɛkɛ n 'lenɩ ʋrɛɛkɛ n ʋlfɛnɛnɩ, gɩ n 'liri dakha ʋrɛɛkɛ n maanɩ ʋlfɛrɛ. 3 Puu kɔ̃tɩ̃ bɩɛl hale wo, puuresɔ fɛʋraakɛ hanɩ kɛ thɩɩra, gɛr dʋɔn khu pa bɩɛlla n pɩɛrɛ tɩbɩla fɛw. Dɩ gɛrra gɩ dɩ tɩbɩlaa ha thʋ̃ hinə puure a pho ka, dɩ də̃bəəle ka war awɩ yi hanana na sobɔr. A gele na pɩ dɩ wɩ gbũ khĩdi dʋɔ. 4 Sɩ ʋrɛɛkɛ hananɩ yire, nũ pɛrɛ haaraarɛ 'lo, gɩdonɩ be yire baar sidũ'ũ khiri. 5 Gɩdonɩ yidara wer jɩrɛ ɩna khiire, sɩ khĩdidara na jɩ thɩ̃a', dɩ wa hana lɩmɩnɛ 'lo bã, gɩdonɩ wɩ diinə wer. 6 Awɩ naw na awɩ laar na awɩ gbugi bũburone. Thɩ̃ɛ fɛʋʋkɛ n cʋɛnɩ kɛ thɩɩra, wa harɔ kpɩɩ bã.Na kãkanɛ afɩ yi hanana fɛw
7 Kɔna a khɔ afɩ dɩko na daw. Ɲɔ afɩ dɩvɛ̃ na ha bʋɔ, gɩdonɩ afɩ thɔ̃sɔ dar Thãgbara pɩ. 8 Na tɔ kẽkẽ bɔy bɔɔ fɛw, a na bʋlana niin afɩ yʋɔ wire fɛw. 9 Na kãkanɛ afɩ yi hanana fɛw nakha khɛrɩkɛ fɩ nanɩ bɔɔraakɛ Thãgba ha fɩnɩ kɛ thɩɩra dɩɩ do dakananɛ. Gɩdonɩ bɔɔlera dʋɔn afɩda afɩ yi hanana thɔmanaakɛ fɩ n cʋʋnɩ kɛ thɩɩra. 10 Thɩ̃ɛ fɛʋʋkɛ afɩ ɲɛ̃ punonɩ na cʋʋ, cʋɛ na afɩ fãga. Gɩdonɩ khĩdidaraa dʋɔɔkɛ fɩ n jalnɩ thɔma na hale, dɩ fɩlɛ gɩ, dɩ jɩɩr gɩ, dɩ kpɛsɛrɛ ga.
Nɔbɔɔ na thɩlkɩɩr n phurore
11 Mɩ yɩɛrɛ wo dɩɩ do kɛ thɩɩra, nɛpɛl khedara na n do ƴɛkʋla bɔɔ fɛw kɔlɔ̃kɔ caara ga, dɩ kuun khena na n do kəədara bɔɔ fɛw kʋʋra ga, dɩ ga do kpɛsɛ jɔdara n 'lɛ dɩkɔ bɔɔ fɛʋa', dɩ ga do wɩrɛ hananɩ jɩɩr n dɔ lẽledara bɔɔ fɛʋa', dɩ ga do thɩ̃ jɩ kpɛna n dɔ nɔbɔdara bɔɔ fɛʋa'. Gɩdonɩ thɩlkɩɩr agɩbo nɔbɔɔ punone a dã wɛr fɛw. 12 Tibil na n jɩ ʋmɔ̃ bɔɔ ɔɔ bɔ na dana'. A hor thʋmaakɛ n lonanɩ jɔɔra dɩɩ fʋ wɩ a to puurera, agɩbo 'lominəəkɛ n lonanɩ pherura. Thale bɔ puu n dã tɩbɩla awɩ kha a phuro wɩ dapaara.
13 Mɩ yɩrɛ dakha kpɛsɛ ca bɩɛlɩkɛ kpaa mɩnɩ nʋɔ na sobɔr kɛ thɩɩra. 14 Dɩ bu bɩɛl kɔɔ hale, aa hana tɩbɩla jɔa'. Dɩ jamana khe bɩɛl jaal a sɔbʋʋ ɩnɩ n kenaa kʋʋr, a pɛr koke nãcel kɔ̃tɩnasɔ a diirəə. 15 Sɩ kuun bɔdaar bɩɛl kɔɔ hale dɩɩraale a hana kpɛsɛrɛ, kɛ na kɔɔ punonenɩ na taa dɩɩle na ɔɔ kpɛsɛ. Sɩ tibil bɩɛllakɛ na kɔɔ hana jɩnanɛ kuun bɔdaaraala'.