Fɩlɛɛkɛ teananɩ ɔbɔɔkɛ fɩ hanɩ jamanaa ƴɛra
8
1 Amɛ hãale a hona kpɛsɛdaar, kɛ n jɩɛnɩ dɩ mɩɛ thɩ̃ɛsɔɔ kɩr? Tibili kpɛsɛ n cʋʋrɛ ɔɔ ƴɛ dɩɩ hɩrɛ, dɩ yɔɔ ƴɩɛkɛ a kɔɔ lini. 2 Mɩ sor mɩɩ: Gɩ bɔrɛ fa n nɩ nũu jamanaa nɔka thɩmɩɩra, gɩ do afɩ ʋlfɛɛkɛ fɩ kɔɔ ʋlfɛnɩ Thãgbaa ƴɛra dɔ kɩrʋ. 3 Fa n phana a bo jamanaada sa ɩɩra', dɩ fa n bo marɔ yʋʋ thɩɛnaakɛ na bʋɔnɔnaa ga. Gɩdonɩ gɩrɛ fɛʋʋkɛ danɩ jamanana gɛr a n cʋʋ. 4 Jamanaa thɩmɩɩ hananɛ fãga ka, amɛ na punone na bulee: «Aɲera fɩ cʋʋ thaa?» 5 Ʋrɛɛkɛ n hɩnɛnɩ Thãgbaa jɔfʋ, a n lõ puurera ga. Tibilikɛ kpɛsɛnɛnɩ, a jɩrɛ kɩɩlʋ hale a na dã ɔɔ bɔra. 6 Gɩdonɩ thɩ̃ɛ fɛw hananɛ agɩ bɔ, dɩ kɩɩlʋ hale thɩ̃ɛ fɛʋra. Gɩdonɩ tibili puu n nɩɩrɛ jɔɔ ka. 7 Tibil na n jɩ gɩrɛɛkɛ na dananɩ ƴɛkʋʋlɔa', amɛ wer na mɩɛnɛɛ mɔ̃ thɩɛna na hanɩ? 8 Tibil na hana fãga ɔɔ yi hanadara a na puno na fʋʋ na fʋrɔa'. Dɩ aa hana punone ɔɔ khi wirə ga. Taarɛ na hale ko caaraala', dɩ puu cʋʋdaraa puu cʋʋ na puno na taa wa'. 9 Mɩ yɩrɛ gele fɛw, a jʋʋrna thɩ̃ɛ fɛʋʋkɛ n cʋɛnɩ kɛ thɩɩra a hɩɩn. Dɩkhãa bɔɔ, tibil n 'lire kɔ̃tɩɩnɛ ɔɔ alãkhara dɩ bir da n ʋʋnaa. 10 Mɩ yɩrɛrakɛ tɩɩ puunə dɩ wɩ khiir dɩ wɩ dʋ wɩ bɔɔbɔɔ dɩ wɩ jal. Dɩ tɩbɩla n ther pa phuurə a jal sɩ na kɛr, a na kpãga wɩ sa diinə puureekɛ wɩ kɔɔ cʋʋnɩ le dɩɩra. Gele dakha wo thɩ̃ kananɛna gɩ. 11 Gɩdonɩ puu cʋʋdaar na n 'li puuree lɩmɩ dapaara khə̃khə̃ ga, gɛr dɔ kɩrʋ dɩ puu cʋʋrɛɛ ƴaal hi tɩbɩla haara. 12 Sopuudaar punone wer a cʋʋ puure a dɛbɩ ɲẽbe tamaa (100), sa hana yire a pʋɔr. Sɩ me wer, mɩ jɩrɛ wɩrɛɛkɛ n maanɩ Thãgba, wɩ n 'lɛr nɔbɔɔ gɩdonɩ wɩ hananɛ maar ɔrra. 13 Sɩ tɩɩ puu wer na 'lɛ nɔbɔɔ ɔɔ yi n pʋɔra'. A na phor jəər khaa, gɩdonɩ aa hana maar Thãgbara ga. 14 Thɩ̃ kana bɩɛl hale n cʋɛnɩ kɛ thɩɩra : Gɛr dʋɔn tɩɩ sara haleekɛ wɩ n cʋʋnɩ mɔ̃ wɩ n cʋʋnɩ tɩɩ puusɔ; dɩ tɩɩ puusɔ haleekɛ wɩ n cʋʋnɩ dakha mɔ̃ wɩ n cʋʋnɩ tɩɩ sara. Dɩ mɩ sor mɩɩ gele dakha wo, thɩ̃ kananɛna gɩ. 15 Mɩ mɩɩrɛ daʋʋda jɔɔ, gɩdonɩ thɩ̃ɛɛkɛ bʋɔnɔnɩ tibilə kɛ thɩɩra, gɛr dʋɔn a na n khɔ a na ɲɔna a na kãkanɛna. Gɩdonɩ gɛr dʋɔn ɔɔda thɔmanaakɛ a n donɩ bɔɔraakɛ Thãgba haanɩ yire kɛ thɩɩra. 16 Ɔbɔɔkɛ mɩ tini kpɩɛrɛ ɩ̃ ƴaal kpɛsɛrɛ, mɩ jʋʋrɛ dakha thɔmaakɛ n dʋɔnɩ kɛ thɩɩra a yɩɛ dɩ tibil na n yɩ daan dɩwɩllɔ na dɩtɩnɔa'. 17 Mɩ yɩrɛ thɩ̃ɛ fɛʋʋkɛ Thãgba cʋʋnɩ. Mɩ yɩɛrɛ dɩ tibil na puno na jɩ kɩrʋ thɩɛnaakɛ n cʋɛnɩ kɛ thɩɩra ga. Tibil vɔɔrɛ wer a ƴaal, sɩ ga do a na punone na jɩ ga. Adorakɛ tɩɩ kpɛsɛ so ɩnɩ jɩ gɛr, sɩ a na mar na jɩrɔ kɩrʋa'.