Gɩrɛ baanɩ thɩ̃ɛ fɛw
7
1 I bɔ wer baar niinikɛ n hʋnanɩ daw,Dɩ tibili khi wi baar ɔɔ kɔ̃ wi.
2 Be cɔ jaal baar fɛtɩ cɔ jaal,
Gɩdonɩ 'liir dʋɔn tɩbɩla fɛw bɩɛlbɩɛlɩ khu pa.
Gɛr gɩ tɩbɩla fɛw teenanɛ wa n kpɩɛrna gɩ.
3 Ha kʋɛrɛ baar mãthɩɩn.
Gɩdonɩ ƴɩɛ punone kʋɛ jɩɛra, sɩ daw hale haara.
4 Cʋɔrɔɔkɛ bɩɩ n kʋnɩ, le tɩɩ kpɛsɛɛ ha n ha,
Sɩ cʋɔrɔɔkɛ ɓole hanɩ, le də̃bəli ha n ha.
5 Nũ pɛrɛ tɩɩ kpɛsɛɛ phaana baar,
Nũ pɛrɛ də̃bəli nɩraakɛ a n khɩnɩ.
6 Mɔ̃ɔkɛ uu phaanɩ dɔɔra bʋla balɔ,
Mɛ̃ də̃bəli mãthɩ̃ ha.
Gele dakha wo, thɩ̃ kananɛ gɩ.
7 Hʋɔlɛ n pɛr tɩɩ kpɛsɛra də̃bəəl cʋʋrɛra,
Dɩ khaarda teere n cʋʋrɛ tibil dɩ 'lee fɩl bʋɔ.
8 Thɩɛnɩ pɩɩr pa baar ɔɔ fʋ pa,
Dɩ ha fʋʋr ba i ƴaalɛ.
9 Fa n phana kɔrɔ a na gba nĩkhiə',
Gɩdonɩ də̃bələ n gbaan nĩkhii khə̃khə̃.
10 Fa n bule aa: «Mɔ̃ dɔ kɩrʋ dɩ mama dɩɩ kɔɔ bɔr a jɔ nĩ dɩɩ» yaa ga,
Gɩdonɩ afɩ buleele na do kpɛsɛ bulela'.
11 Kpɛsɛrɛ bɔrɛ a mãkhana lẽle thɩ̃ gbananɛ, a bɔrakɛ wɩrɛraakɛ n yɛnɩ wire. 12 Gɩdonɩ kpɛsɛrɛ n kɛɛrɛ tibillə mɔ̃kɛ mũsumo n kɛɛnɩ tibillə. Dɩ khorɩkɛ a n 'laanɩ wɩrɛra hanaanɩ dʋɔn wɩ n hananɛ yire a pʋɔr. 13 Hɩnɛnakɛ mɔ̃ Thãgbaa thɔ̃ɔkɛ a cʋʋnɩ hanɩ. Amɛ na punone na naar gɩrɛ a cʋʋnɩ dɩɩ gor? 14 Ado nɔbɔ wire phã, dɔ gɩ da far. Ado thɩlke wire phã dakha, dɔ fɩ kpɩɛr. Gɩdonɩ Thãgba cʋɛ gɛr yeɲɔ fɛw oti, gɩ do nɔɔ tibil na n puno a jɩ gɩrɛ na danaanɩ ƴɛbʋrɔa'.
15 Ɩ̃ yi hana bɔɔ, kɛ phɔnɩ, mɩ yɩrɛ thɩ̃ɛ fɛw. Tibil ʋkha n sarɛ, sɩ dɩ khi na ɔɔ sarra, dɩ tibil ʋkha n puuro, sɩ dɩ pʋɔr dɩɩra na ɔɔ puurə. 16 Fa n gba afɩbara tɩɩ sarʋ jɔɔ ka ga, dɩ fa n gba afɩbara tɩɩ kpɛsɛ a kãasɩrɔa'. Aɲeraakɛ fa kʋɛ afɩbara? 17 Fa n puuro bɩnɛ jɔɔ ka ga, dɩ fa n də̃bəələ'. Aɲeraakɛ fa khi sɩ afɩ bɔ na dã ga? 18 Gɩ bɔrɛ dɩ fa jɩɩ fʋrɔ fɩl dɩɩrɛ yeɲɔɔle bɔɔbɔɔ, sɩ fa n hɛbɩ bɩɛla', gɩdonɩ ʋrɛɛkɛ n maanɩ Thãgba, a thɩ̃doo ha mɔnakɛ sɩ a n yɩrɔrɛ the paar. 19 Kpɛsɛrɛ n har tɩɩ kpɛsɛ punone dɩɩ jɔ gobanɛr yʋɔrɩkɛ hanɩ dɩ bɩɛlaa fãga. 20 Tibil sar bɩɛllakɛ na ha kɛ thɩɩra dɩ cʋʋ bɔɔ, bɔɔ fɛw a n cʋʋ sopuəə ga. 21 Fa n pɛ nũu thɩmɩa fɛʋʋkɛ wɩ n mɩɩna'. Dɩ mɛ̃ fa nɩɛr dɩkhõo aa afɩ thɔ̃daar n nɩɩr fɛra'. 22 Gɩdonɩ fɩ jɩrɛ afɩ hara dɩ fɛrɛ thɛthɛrakɛ kɔɔ nɩɩrɛ ɩkha balamɔ̃ a yɩɛ dakha.
23 Mɩ 'lor gele fɛw na kpɛsɛrɛ a hɩɩn, sa so mɩɩ: «Foo ɩ̃ 'lɛ kpɛsɛrɛ phubi». Sɩ kpɛsɛrɛ bo sa hʋnɔna mɩ fĩi.» 24 Thɩ̃ɛɛkɛ hanɩle gɩrɛ hʋnɔnɛ jɩɩra a ka, gɩ hulonone hulululu, amɛ na punone na jɩ gɩ? 25 Mɩ gbuurore yʋʋ na ɩ̃ ha fɛw ɩ̃ 'lo, ɩ̃ kɩɛl, ɩ̃ ƴaal kpɛsɛrɛ ɩ̃ puno ɩ̃ jɩ thɩ̃ɛsɔ na agɩ kɩr. Dɩ mɩ yɩɛrɛ a jɩ: bɩ̃ puure dor də̃bəəle, dɩ də̃bəəle do yʋ 'leere. 26 Mɩ yɩrɛ thɩ̃ bɩɛlɩkɛ puuronɩnakɛ a jɔ khir : khɛr dor pheru dɩ ɔɔ naw do waya pheru, dɩ ɔɔ ɲɛ̃sɔ do pɛ̃ɛ. Ʋrɛɛkɛ danɩ Thãgbara a n fore khɛrɩlee ɲɔ̃kɔɔ, sɩ ʋrɛ dʋɔnɩ sopuudaar, ɔr a n fʋ. 27 Ekilejɩasɩ sor aa: «Gɛr dɔ thɩ̃ɛɛkɛ mɩ yɩnɩ ɔbɔɔkɛ mɩ 'lonɩ thɩ̃ɛ fɛw kpakha kpakha ɩ̃ puno ɩ̃ jɩ agɩ kɩr. 28 Mɩ ƴaalɛ foo a dana ninnakɛ 'lo sɩ ma yɩɛ pa. Gɛr dʋɔn kona gbɩlanɩɩ thɩ̃thɩɩn, kuun bʋɔ bɩɛl dɩbara mɩ yɩ, sɩ ma yɩ khɛr bʋɔ bɩɛl 'lẽ'lenakɛ khɛra fɛʋʋ thɩ̃thɩɩna ga. 29 Dɩ gɩrɛ dɩbara mɩ yɩnɩ wo, gɛr dʋɔn: “Thãgba cʋʋrɛ tɩbɩla dɩ wɩ telẽ, sɩ wɛr thɛthɛ gõgolone awɩbara.”»