Juifisɔ fire kʋʋr awɩ lãlaardara. \ref Ɛsɩt.3.5-15; 8. 7-17; khɩ 21. 9-12
9
1 Yɩɛrɩ, sɩpora yʋɔr yeɲɔra, kɛ dɔnɩ Adaar sɩpor, ɔɔ wire yʋɔr yẽthera, wireekɛ wɩ pɛnɩ wɩ cʋɛ juifisɔ mɔ̃ jamanaa thɩmɩɩ na ɔɔ jɔfʋ sonɩ, wireekɛ juifisɔɔ lãlaardara n kpɩɛrnɩ mɔ̃ wa puno wɩnɩ, thɩ̃ɛ ka gbãgarɛ dɩɩ do juifisɔ punone wɩ. 2 Dɩ Asierisi jamanaa dɩra fɛw, juifisɔ kpa der awɩ dɩ kɔ̃tɩ̃sɔɔra wɩ pɩɛr awɩ lãlaardara. Dɩ tibil bɩɛllakɛ na puno jɩɩl a pɩɛr wa', gɩdonɩ maar hor ga hərə wer juifisɔra. 3 Dɩ wɩrɛ dɔnɩ kɔ̃tɩna caarsɔra na jamanaa mɩmɩɩsɔ na kɔ̃tɩnaakɛ hanɩ dɩ gbulonasɔra, na kʋmãdasɔ, na gobanɛrsɔ bulle wa n pɛ juifisɔra gɩdonɩ maar hor ga hǝrǝ wer Maardosera. 4 Maardose 'lire kɔ̃tɩɩnɛ na sobɔr jamanaa cɔ. Dɩ ɔɔ i ther dɩ gbulonǝ fɛʋra, dɩ jɩɩ 'li fãga da n pɛr.5 Dɩ mɛ̃ juifisɔ kʋʋr awɩ lãlaardara, a cɩɩr wɩ na bajɩna, a bũburõ wɩ, a cʋʋ wɩ mɔ̃ wɩ n ƴaalnɩ. 6 Suujɩ dɩ kɔ̃tɩɩna dɩbara, wɩ kɔɔ kʋʋrɛ kona taamɔy (500), 7 a kʋʋrna Paarsãdata, na Dalɩfɔ̃, na Asɩpata, 8 na Porata, na Adalɩa, na Arɩdata, 9 na Paarmasɩta, na Arɩjayɩ, na Arɩdayɩ, na Vayejata. 10 Wɛr dɔ Hamã, Hamedataa bikũusɔ yʋɔr; Amãakɛ dɔnɩ juifisɔɔ lãlaardaar. Sɩ wa kɔɔ thar awɩ thɩ̃birǝ ga. 11 Ga wiilera wɩ mɩɛ jamana tibil nʋɔɔkɛ wɩ kʋʋrnɩ le Suuji, dɩ kɔ̃tɩɩna. 12 Dɩ jamana so ɔɔ khɛr Ɛsɩtɛɛra ayɩ: «Suuji dɩ kɔ̃tɩɩna, juifisɔ kʋʋrɛ kona taamɔy, na Hamãa bikona yʋɔr. Gɩ do yemɔ̃ wɩ kʋʋr dɩ gbulonǝsɔra? Sa bir so ayɩ: Ɛsɩtɛɛr, aɲe dɔ afɩ bɩɛl wo? Ma ha fɛr. Aɲe dɔ afɩ ƴaal? Ma ha cʋʋrɛ». 13 Dɩ Ɛsɩtɛɛr birsee: Ado fɛr jamana ture, hana juifisɔɔkɛ hanɩ Suuji hʋɛ wɩ the cʋɔ wɩ cʋʋ mɔ̃ wɩ cʋʋnɩ nĩ, sɩ wɩ jule Hamãa bikona yʋɔrɩlee khisɔ tɩɩ kʋ thɩrʋra. 14 Dɩ jamana 'laa hʋɛ wɩ cʋɛ ɔmɛ̃. Dɩ wɩ kherẽ sɛbɛ kpɩɩ wo a pɛr dɩɩ do jɔfʋ Suuji dɩɩra. Dɩ wɩ julele Hamãa bikũusɔɔ khisɔ. 15 Dɩ mɛ̃ juifisɔɔkɛ hanɩ Suujɩ dɩɩra the, Adaar sɩporɩ wire yʋɔr yenana a kʋʋr tɩbɩla tãather (300) sɩ wa thar awɩ thɩna ga.
16 Sɩ juifi wɩrɛ hanɩ dɩ gbulonǝsɔra, kɔɔ kpar kha dakha a the wɩ pɩɛr, wɩ kena awɩ lãlaardara, sɩ wɩ taa awɩ yi. Dɩ wɩ kɔɔ kʋʋrɛ tɩbɩla gbɩlanɩ kpalãther yʋɔr yemɔy (75000) awɩ lãlaardaraa thɩ̃thɩɩn, sɩ wa thar awɩ thɩ̃ bɩɛllalaka'. 17 Adaar sɩporɩ wire yʋɔr yẽthera kɔɔ gɩ. Wire yʋɔr yenã wirera, wɩ hɩɩrɛ a cʋʋna fɛtɩ ga wi na daw, 18 sɩ juifisɔɔkɛ hanɩ Suuji, we wer wɩ kɔɔ ther Adaar sɩporɩ wire yʋɔr yẽther na yʋɔr yenana, sa hɩɩr wire yʋɔr yemɔɩra. Ga wi, wɩ hɩɩr a cʋʋna fɛtɩ, wa n kãkana. 19 Gɛr gɩ, juifisɔɔkɛ hanɩ dɩ biirǝ n cʋʋ awɩ fɛtɩ Adaar sɩporɩ wire yʋɔr yenana. Dɩ wɩ 'laana kha dɩkɔ.
20 Dɩ Maardose kherẽ gaa thɩ̃sɔɔle fɛw a pɛr sɛbɛra a thɔna ha juifisɔ fɛw, Asierisi jamanaa dɩsɔra, kasɔ wɩ hanɩ, a dɔdɔ gɩ, a ƴɔɔ gɩ. 21 A so warɛ wa n hɩnɛ yɩɛr wo yɩɛr, Adaar sɩporɩ wire yʋɔr yenã na yʋɔr yemɔy wire. 22 Wɩ gba gɩ, gɩ do wireekɛ wɩ 'lɛnɩ taarɛ awɩ sodaraa ɲɔ̃kɔɔ, porɩkɛ awɩ ha kpor fini ado awɩ ha ie, dɩ awɩ bɩwɛ fi do daw na kãkar. Wɩ gba wiresɔɔle a cʋɛ fɛtɩ, a 'laana kha dɩkɔ, a hanana bɔdara thɩ̃ɛ. 23 Dɩ juifisɔ kpar Maardosee nɔkara, a cʋʋ fɛtɩra wɩ kɔɔ cʋʋnɩ cacadaa dɩɩ do jɔfʋ, kɛ wa n cʋʋnɩ yɩɛr yɩɛr. 24 Hamãakɛ dɔnɩ Hamedataa bikuun, kɛ dɔnɩ Agaagɩɩ mǝl, juifisɔɔ lãlaarda, kɔɔ tire kpɩɛrɛ a kʋʋr wɩ. A kɔɔ lɩrɛ lɩɩ juifisɔɔ kʋʋrra, lɩɩra wɩ n we puur. 25 Sɩ mɔ̃ Ɛsɩtɛɛr jalnɩ jamanaa pa, jamana pɛrɛ dɩ wɩ cʋʋ sɛbɛ dɩ puureekɛ Hamã kɔɔ kpɩɛrnɩ a cʋʋ juifisɔ kɛrɛ bir a heenʋʋ yʋɔ. Dɩ mɛ̃ wɩ ju Hamana na ɔɔ bikũusɔ tɩɩ kʋ thɩrʋra.
26 Gɛr gɩ dɩ wɩ we wiresɔɔle puurim fɛtɩ, mɔna thɩmɩɩ bire sonɩ "Puur". Kɩrʋ dʋɔn: "lɩɩ". Juifisɔ n jɩnanɛ gɩrɛ fɛʋʋkɛ Maardose kherenɩ na gɩrɛ wɛr thɛthɛ yɩnɩ a jɩna gɩ. 27 Dɩ wɩ gba gɛr a cʋʋ gɩ dɩɩ do jɔfʋʋkɛ, wa n hɩɩnɩ bɔɔ fɛw, yɩɛr wo yɩɛr, wɛr na awɩ mǝlsɔ, na wɩrɛ na debanɩ na do juifisɔ. Wa cʋʋrɛ fɛtɩ wire yeɲɔɔle, mɔ̃ Maardose kɔɔ mɩɛ wɩnɩ, a gaa bɔ dã. 28 Mǝlle wo mǝlleekɛ na n kpaanɛnɩ na n hɩnɛ Puurim wisɔɔle. Cɔna wo cɔnana fɛw, dɩ gbulona wo dɩ gbulona fɛw, na dɩɩra wo dɩɩra fɛw Juifisɔ thɩ̃thɩɩn na awɩ mǝlsɔɔkɛ na kpaanɛnɩɩ thɩ̃thɩɩn, Puurim wiresɔɔle wa dinǝ gɩ kpɩɩrakɛ, paar wo paarɩkɛ wa hana'.
29 Dɩ jamanaa khɛr Ɛsɩtɛɛr, kɛ dɔnɩ Abɩhayɩl bikhɛr, na juifi kuun Maardose bire khere sɛbɛ kpɩɩ wo Puurim thɩmɩɩra, a ɩɩ balaɲɔdaaraale dɩɩ hana fãga. 30 Dɩ wɩ thɔnanɛ sɛbɛsɔɔkɛ wɩ mɩɩnɩ ha ie thɩmɩɩr na ha faarɛ, a ha juifisɔ fɛw, kɛ hanɩ Asierisi jamanaa dɩ gbulõ tamaa na kpelẽ makoɲɔra (127). 31 Dɩ sɛbɛsɔraalera wɩ jɩɛ ɩɩrɔ Puurim cʋʋ fɛtɩ wiresɔ dɩɩ hɩrɛ, gɩ do nɔɔ wa n cʋʋ gɩ a gɩ wirǝ lɩm mɔna a gɩ nɔ li bɔ na a gɩ bɔ waal bɔɔ hanɩ mɔ̃kɛ Maardose na jamanaa khɛr Ɛsɩtɛɛr kɔɔ pɛrnɩ wɛr Juifisɔra na awɩ mǝlsɔra fɛw. 32 Ɛsɩtɛɛr thɩmɩɩr mɩa mɔ̃ Puurim fɛtɩ cʋʋdaa hanɩ, gɛr gɩ dɩ wɩ khere gɩ a pɛr sɛbɛra.