ƐSƖDƖRASƖ 1

ƐSƖDƖRASƖƖ SƐBƐ

ƖJƖRAYƐL BƖSÃ WƖRƐ JOROBABƐL BIRNƎNI JERUJALƐM

Sirusi jamana faarɛ Ɩjɩrayɛl bɩsana dɩ wɩ kɛr bir awɩ dʋɔ

Caca yɩɛrɩkɛ Sirusikɛ dɔnɩ Pɛrsɩ jamana gbanɩ jamana dʋʋr Babɩlɔn dɩɩra, Thãgba Kɔ̃tɩn pɛrɛ ɔɔ kpɩɛra, gɩ cʋʋ thɩmɩɩrɩkɛ Thãgba Kɔ̃tɩn kɔɔ gbanɩ ɔɔ mɩmɩɩ Jeremɩ a mɩɩna, gɩ dã oti. Dɩ Sirusi pɛrɛ dɩ wɩ mɩɩna nɔ kheu, a ti dakha sɛbɛ dɩɩ gba ɔɔ jamana dɩ fɛw a so aa: 2 Mɛr Sirusikɛ dɔnɩ Pɛrsɩ jamana kɔ̃tɩ̃ɩ, mɩ sor ayɩ: Thãgba Kɔ̃tɩnɩkɛ dɔnɩ Thãgbaakɛ hanɩ le ƴũu ha mɛr jamana dɩɩsɔ fɛw kɛ thɩɩra. Dɩ a pɛ marɛ ɩ̃ mɛ ɩnɩɩ fʋɔr cɔ le Jerujalɛm kɛ hanɩ Juda bǝǝnnǝ. 3 Amɛ hãale nɛrɛra, a the ɔɔ toora? Ɔɔ Thãgba n hana kha na ɔr, a kɛr a bir Jerujalɛm, Judaa dʋɔ a mɩ Thãgba Kɔ̃tɩnɩ cɔ, kɛ dɔnɩ Ɩjɩrayɛlɩ Thãgba. Ɔr dɔ Thãgbaakɛ hanɩle Jerujalɛm. 4 Paar wo paarɩkɛ ɔɔ tookɛra sɛnɩ hanɩ fɛw, wɩrɛ hanɩle bǝ̃ dɔɔra n hana wɩ khaardaakɛ dɔnɩ dɛ bulo na dɛ na thɩ̃ɛ na nʋma na khaarda gɩrɛ thɛnɩ ntɛɛ ƴaala, gɩ do Thãgbaa fʋɔr cɔ mɩda le Jerujalɛm.

5 Le wɩrɛ dɔnɩ cɔdaar kona Judaa mǝlsɔra na Bɛ̃jamɛ̃ɛ mǝlsɔra, na bonɩ jidara na Levɩɩ mǝlsɔ, na wɩrɛ fɛʋʋkɛ Thãgba pɛrnɩ kpɩɛrɛra wɩ jala a mɛ ɔr Thãgba Kɔ̃tɩnɩ fʋɔr cɔ, le Jerujalɛm pal a ɩɩr. 6 Dɩ awɩ cɔ khudarasɔ fɛw bul wer na thɩ̃beekɛ wɩ cʋʋnanɩ dɛ bulo na dɛ na thɩ̃ɛ na nʋma, na thɩ̃ ɓɔnasɔ, a ɓanɔ dakha khaarda gɩrɛ thɛnɩ ntɛɛ ƴaala. 7 Dɩ Sirusi jamana 'laarɛ Thãgba Kɔ̃tɩnɩ fʋɔr cɔ thɩ̃bisɔɔkɛ Nebukadinejaarɩkɛ dʋɔnɩ Babɩlɔn jamana kɔɔ gbanɩ a jalna thɩɩn ɔɔ thãgbaa cɔ. 8 Dɩ Sirusikɛ dɔnɩ Pɛrsɩ jamana pɛrɛ Mɩtɩrɛdatɩ, kɛ dɔnɩ thɩ̃ hɩ̃ɩdaar, dɩ ti thɩ̃bera a ther, a ha Judaa mǝlsɔɔ kɔ̃tɩ̃ɩkɛ n dʋɔnɩ Sɛsɩbasaar. 9 A gɩ nɔ ha gɩrɛ: tasasɔɔkɛ wɩ cʋʋnanɩ dɛ har kpelẽ yʋɔr (30); tasa gɩrɛ wɩ cʋʋnanɩ dɛ bulo ha gbɛlanɩ (1000); khala ha kpelẽ yʋɔr phe bire (29); 10 dɛ ɲɔ̃kpona ha kpelẽ yʋɔr (30); ɲɔ̃kpõ kpɩɩsɔɔkɛ wɩ cʋʋnanɩ dɛ bulo ha taanã na yʋɔr (410); na thɩ̃bi kpɩɩsɔ wo ha gbɩlanɩ (1000). 11 Thɩ̃be fɛʋʋkɛ wɩ cʋʋnanɩ dɛ na dɛ bulo, gɩ gbɛbɩrɛ fɛw a ha gbɩlanɩ yemɔy na taanã (5400). Dɩ Sɛsɩbasaar gbaar fɛw a kɛrna birnǝ, bɔɔraalera wɩrɛ wɩ fʋlɛnɩ jalna Babɩlɔn kɛrnɩ dɩ wa n bir Jerujalɛm.