Nɔ sor Thãgba Kɔ̃tɩnna na nɔ hɛlɛ.
27
1 Thãgba Kɔ̃tɩn sor Mʋɩjɩra ayɩ: 2 «Mɩana Ɩjɩrayɛl bɩsana a sɔ war, aa mɩ sor: "Ado tibil so nʋɔ mɛr Thãgba Kɔ̃tɩnna ayɩ ɩnɩ n ha mɩ tibil, ntɛ punone a hɛl nʋɔra na birse mũsũ nʋɔɔkɛ teananɩ. 3 Ado kuun ha ntɛ, a fʋ yɛna kpelẽdarara, a jalna dana yɛna kpalãtherdarara, awɩ birse mũsũ nɔ na dor sikile mũsũ be kpalaɲɔ yʋɔr, gɩ mɩɛ kha na sikile mũsũ nʋɔɔkɛ fɩ kpanɩ, kɛ dɔnɩ mɛr Thãgba cãa wa sikile mũsũ be. 4 Sɩ ado khɛr ha ntɛ ɔɔ birse mũsũ nɔ na dor sikile mũsũ be kpelẽ yʋɔr. 5 Sɩ a fʋna yɛna yemɔy bɩsanana a jalna dana yɛna kpelẽdarara, kũubiri birse mũsũ nɔ na dor sikile mũsũ be kpelẽ, khebiri birse mũsũ nɔ n do sikile mũsũ be yʋɔr. 6 Sɩ a fʋna beekɛ hananɩ sɩpor bɩɛl a jalna dana yɛna yemɔy bɩsana, kũubiri birse mũsũ nɔ na dor sikile mũsũ be yemɔy, khebiri birse mũsũ nɔ n do sikile mũsũ be yẽther. 7 Sɩ kɔ̃tɩnaakɛ hananɩ yɛna kpalãther, na yɛna kpalãther na dɛbɩrɛdara, kuunɩ birse mũsũ nɔ na dor sikile mũsũ be yʋɔr yemɔy, khɛrɩ birse mũsũ nɔ n do sikile mũsũ be yʋɔr. 8 Sɩ ado ʋrɛ sɔnɩ nʋɔra bɔdaar bulo gɩ, dɩ ga do a na punone na 'lɛ birse mũsũ nʋɔɔkɛ pɩɛrnɩ a na hɛlna nʋɔra ga, wɩ kpaa jalana bonɩ jidaara, bonɩ jidaar n pɩɛraa nʋɔ. Bonɩ jidaar n pɩɛr nʋɔra gɩ mɩɛ kha na punoneekɛ ʋrɛ sɔnɩ nʋɔra hananɩ.9 Ado nʋma gɩ, kɛ wa punonɩ a na jinə bonɩɛ mɛr Thãgba Kɔ̃tɩnna, a ntɛ 'laa nʋ̃ ca wele, mɛr Thãgba Kɔ̃tɩn a ha. Thɩ̃ khaa gɩ. 10 Nʋ̃daar na n debʋa'. A na n debɩ nʋ̃ bʋɔ na nʋ̃ puu agɩbo nʋ̃ puu, na nʋ̃ bʋɔa'. Aa debɩ gɩ thale ʋ na ʋ, wɛr yeɲɔ fɛw gbɛbɩrɛ a do dakhaa. 11 Sɩ ado nʋ̃ bise gɩ jɔfʋ hʋɛra, kɛ wa punonɩ a na jinə bonɩɛ mɛr Thãgba Kɔ̃tɩnna ga, wɩ jalana nʋ̃ dɔɔ a nɛna bonɩ jidaar. 12 Dɩ bonɩ jidaar na pɛrɛ birse mũsũ nʋɔ dɩ ga mɩɛna mɔ̃ ɔɔ bɔ na mɔ̃ ɔɔ puu hanɩ; dɩ bonɩ jidaarɩ nɔra wa fʋrɔ. 13 Sɩ ado nʋ̃daar ƴaal a birse ɔɔ nʋ̃, ntɛ n tɩnɛnɛ nʋmɩɩ birse mũsũ nɔra tɩnɛ paar yemɔy, a gba tɩnɛ pa bɩɛl a dɛbarɔ nʋɔraakɛ bonɩ jidaar sonɩ.
14 Ado Tibil gba ɔɔ cɔ a ha mɛr Thãgba Kɔ̃tɩn, bonɩ jidaar n pɩɛr birse mũsũ nʋɔ mɔna cʋɔrɩ bɔ agɩbo ɔɔ puu hanɩ; dɩ bonɩ jidaarɩ nɔra wa fʋrɔ. 15 Sɩ ado ʋrɛ 'laanɛnɩ cʋɔrra ƴaalɛ a bir a birse, ntɛ n tɩnɛnɛ cʋɔrɩ birse mũsũ nɔra tɩnɛ paar yemɔy a gba tɩnɛ pa bɩɛl a dɛbarɔ nʋɔraakɛ bonɩ jidaar sonɩ; sa gba ɔɔ cɔ.
16 Ado tibil gba ɔɔ lɛ, kɛ dɔnɩ ɔɔ kũkũ thɩ̃ a ha mɛr Thãgba Kɔ̃tɩn, ɔɔ birse mũsũ nɔ n mɩɛnɛ kha na thɩ̃ diir nʋɔɔkɛ na lonanɩ lɛ dɔɔra. Lɩɛɛkɛ na lonanɩ thɩ̃ diire, ɔɔjɩ kilə tãather, ɔɔ birse mũsũ nɔ na dor sikile mũsũ be kpalaɲɔ yʋɔr. 17 Ado jibile yɩɛra ntɛ 'laa ɔɔ lɛra ga dor birse mũsũ nʋɔɔkɛra wɩ pɛrnɩ wa fʋrɔ. 18 Sɩ ado jibile yɩɛr kar pɩ, sɩ dɩ ntɛ 'laa ɔɔ lɛ, bonɩ jidaar n thera birse mũsũ nʋɔ, sa wuro gɩ mɩɛna yɛ nʋɔɔkɛ sɛnɩ sɩ jibile phaa n dã. 19 Sɩ ado ntɛɛkɛ kɔɔ 'laanɛnɩ lɩɛra ƴaalɛ a bir a birse, ntɛ n tɩnɛnɛ lɩɛɛ birse mũsũ nɔra tɩnɛ paar yemɔy, a gba tɩnɛ pa bɩɛl a dɛbarɔ birse mũsũ nʋɔraakɛ wɩ pɛrnɩ agɩpɩ a gba ɔɔ lɛ. 20 Sɩ ado aa birse ɔɔ lɛa', sɩ dɩ wɩ dolõ tibil kpɩɩra pɩ, a na bir na puno na birse bã. 21 Dɩ a jibile yɩɛr dã dɩ ʋrɛ kɔɔ thɛnɩ lɩɛra faa lɩɛɛle, ga dor mɛr Thãgba Kɔ̃tɩn wɩ ha. Dɩ lɩɛɛle na hor mɛr Thãgba wɩ kana. Dɩ ga dor bonɩ jidaar hɩna. 22 Ado tibil gba lɩɛɛkɛ a thenɩ, kɛ na dɔnɩ ɔɔ kũkũda ga, a ha mɛr Thãgba Kɔ̃tɩn, 23 bonɩ jidaar n thera birse mũsũ nʋɔ gɩ mɩɛ kha na yɛ nʋɔɔkɛ sɛnɩ sɩ jibile yɛ phaa n dã. Ntɛ n lɩma wiilera birse mũsũ nʋɔɔkɛra wɩ pɛrnɩ; mũsumoole na dor mɛr Thãgba Kɔ̃tɩnɩ mũsũ kha. 24 A jibile yɩɛr dã lɩɛɛle n kɛrɛ na bir caca lɛdaara, ʋrɛra wɩ kɔɔ thenɩ, kɛ kɔɔ hɩnanɩ kpefɩ. 25 Mũsũ nʋɔ fɛʋʋkɛ wa pɛrnɩ, gɩ mɩɛnɛna mɛr Thãgba cãa wa sikile mũsũ be. Ga sikile mũsũ bi bɩɛlɩ dʋbɩ har gɩramʋ yʋɔr, kɛ mãkhananɩ geraa kpelẽ.
Bɩɛl yʋɔr ti jɔfʋ.
26 Tibil bɩɛlakɛ na n gba nʋmɩɩ caca bi a sona nʋɔ ɩnɩ n ha mɛr Thãgba Kɔ̃tɩnna', gɩdonɩ mɔ̃ a 'linɩ dʋʋr cacadaar pɩ, mɛr Thãgba Kɔ̃tɩnɩda a kɔɔ dorakɛ; a na gɩ, a banaa gɩ, mɛr Thãgba Kɔ̃tɩn hɩna. 27 Sɩ ado nʋ̃ bisee cacaa bi gɩ jɔfʋ hʋɛra, nʋ̃daar n birsenee. A 'laanɛ mũsũ nʋɔɔkɛ wa pɛrnɩ, sɩ a tɩnɛnɛ mũsũ nʋɔɔlera tɩnɛ paar yemɔy a gba tɩnɛ pa bɩɛl a dɛbarɔ. Sɩ ado wa bir a birsea' wɩ punone a dolõo mũsũ nʋɔraakɛra wɩ pɛrnɩ.
28 Sɩ thɩ̃ɛ wo thɩ̃ɛɛkɛ tibil gbanɩ ɔɔ thɩna a kana mɛr Thãgba Kɔ̃tɩn, mɛr Thãgba Kɔ̃tɩn hɩna khorr. Wa puno a na bir na dolõ gɩ, agɩbo a na bir na birse gɩ bã; gɩ dɔ tibil, agɩbo nʋmɩ, agɩbo lɩɛɛkɛ dɔnɩnakɛ ɔɔ kũkũ thɩ̃; thɩ̃ɛɛkɛ wɩ thernanɩ mɛr Thãgba Kɔ̃tɩn thale, khorr wɩ kana mɛr Thãgba Kɔ̃tɩn thɩ̃doo. 29 A tibil gɩrakɛ dɩ wɩ kana mɛr Thãgba Kɔ̃tɩn, wa puno na bir na birsee 'lo bã, dɔ wɩ kʋʋ.
30 Thɩ̃ɛ fɛʋʋkɛ dɔnɩ kokol thɩ̃ɛ, na thɩr be ɓibi, kɛ thɩra n senɩ, mɛr Thãgba Kɔ̃tɩn hɩna bɩɛl yʋɔra; thɩ̃ khaa gɩ mɛr Thãgba Kɔ̃tɩnna. 31 Ado tibil ƴaal ɩnɩ n birə a thɛ ɩnɩɩ bɩɛl yʋɔr thɩ̃, a tɩnɛnɛ thɩ̃ doo the nɔra tɩnɛ paar yemɔy, a gba tɩnɛ pa bɩɛl a dɛba the nʋɔra. 32 Ɔbɔɔkɛ na n thernɩ anɩ nʋ̃ kɔ̃tɩ̃sɔ na anɩ nʋ̃ yɩrasɔ kɛ n lonanɩ afɩ gbolbi balɔ dɩ wa n the, nɩ pɩɛr ɲɛ̃be yʋɔrdarara jɩɩn wɩ do mɛr Thãgba Kɔ̃tɩnɩda. Thɩ̃ khaa gɩ. 33 Wa n phiir nʋmɩ, aa bɔrɛ agɩbo ado a puurora', ga hana debira'. A wɩ debɩ ʋ̃ʋ nʋ̃, na ʋ̃, wɛr yeɲɔ fɛw gbɛbɩrɛ a do dakhaa, wa puno na bir na birse wɩ 'lo bã." »
34 Gɛr dʋɔn jɔfʋsɔɔkɛ Thãgba Kɔ̃tɩn hanɩ Mʋɩjɩ Sɩnayɩ gɔ̃gʋɔna ƴũu dɩ ha Ɩjɩrayɛl bɩsana.