Jakɔbɩ mɩɩrɛ gɩrɛ Thãgba sonɩ ɔɔ bikũusɔra sa khi. \ref Dǝt 33
49
1 Dɩ Jakɔbɩ wer ɔɔ bikũusɔ a so war: «Nɩ ɩna ɩ̃ mɩɛ nɩ gɩrɛɛkɛ na dana nɩnɩ bɩɛlbɩɛl bɔɔraakɛ na ɩnanɩ ƴɛkʋʋlɔ.» 2 Nɩ gbɛba kha pa bɩɛl Jakɔbɩɩ bikũusɔ a pɛ nũu!Nɩ jɩɛ pɛ anɩ thɩ Ɩjɩrayɛl nũu lee!
3 Ribɛ̃ wei, fɛr dʋɔn ɩ̃ caca bi,
fɛr dʋɔn ɩ̃ fãga!
Fɛr dʋɔn caca fãgaakɛ thɛ marnɩ.
Cʋʋra na punonena, fɩ kãasɩrɛ afɩ õkũusɔɔra fɛw.
4 Ɲɔ khaa fɩ n ca wolo wolo wolo,
fa 'li kɔ̃tɩɩnɛ bã,
gɩdonɩ fɩ kãasɩrɛ afɩ thɩɩ khɛrɩ nɛra;
Dɩ mɔ̃ fɩ kãasɩrɔnɩ, fɩ ƴɔ̃ƴɔ̃ɔ mɛr.
5 Simeyɔ̃ na Levɩ, õkona wɛ.
Awɩ kpɩlasɔ, fãga kho kpɩlasɔ gɩ.
6 Ɩ̃ ha na n ɓã kha na wɛr awɩ nɔ bɩɛl gʋʋra ga.
Ɩ̃ kpɩɛr na n lõ awɩ jɛʋa'.
Awɩ nĩkhi jɔra hɩna dɩ wɩ kʋʋrrɔ tɩbɩla.
Awɩ ɓakɩ ɓakɩ cʋʋ dɔ kɩrʋ dɩ wɩ kuur na jɩlãjɩɩsɔ.
7 Sʋ̃ɔ n 'le awɩ nĩkhirǝ, gɩdonɩ a thʋnɛ khɩɩr kpɛ.
Sʋ̃ɔ n 'le awɩ cɩ̃cɩmana, gɩdonɩ a 'leere bɔ jɩɩr!
Ma lee wer Jakɔbɩɩ toora.
Ma jãjalã wɛr Ɩjɩrayɛl dɩɩra koo.
8 Juda wei, fɛr afɩ õkũusɔ na n kpãga.
Fɛr na n kpokpoone afɩ lãlaardara bãbire.
Fɛrra afɩ õkuun bɩnɔsɔɔkɛ nɩ donanɩ thɩ bɩɛl
na n gburõkhu fɛw.
9 Ɩ̃ bikuun Juda, sidũ'ũ ɓolʋ fɩ ho.
Ɩ̃ bikuun wei, thɩ̃ kʋ paar fɩ the dɩ fa n ɩ̃.
A a phɩ̃, sidũ'ũ khaara a n pur nɛɛ sɩ dɩ phɩ̃.
Juda hɔnɩ sidũ'ũ nɩɩ, amɛ na 'la na ɩɩrʋ?
10 Gbãgalãbirikɛ n nɛnanɩ jamana dʋʋr
na the Judaa ɲɔ̃kɔɔa'.
Dɩ gbãgalãbirikɛ n nɛnanɩ kɔ̃tɩɩnɛ
na the ɔɔ kalƴɔɔ dakha ga,
phaphapha ʋrɛ dɔnɩ hɩ̃hɩ̃ bʋɔ n ɩ̃,
ʋrɛɛkɛ caar fɛw na nɩnɩ nũu.
11 Dɩvɛ̃ thɩrʋra a na n li ɔɔ kũkǝ̃,
mɔna gɩ ƴʋɔraanɩ mɛ̃.
Dɩvɛ̃ thɩ kɩra ɓʋɔnakɛ,
sɩ a na lirore kũkǝ̃ nɩrɛɛ dabu.
Dɩvɛ̃ hʋʋraanɩ ɲʋɔn dɩ cɔcɔɔna ɔɔ kẽkẽ,
Dɩvɛ̃ thɩr be a na khɩmɩ
a na n cɔcɔɔna ɔɔ gbɔɔlɔ̃ ɲɔ khaa.
12 Dɩvɛ̃ cʋgʋʋrɛ yinǝ dɩɩ jɩɩ sɩɛr,
dɩ naƴɩlɛ̃ cʋgʋʋ ɲɩma dɩɩ jɩɩ bulolo.
13 Laɲɔ̃ nʋɔrasɔ Jabʋlɔ̃ na too.
Kana batosɔ n jɛnɩ, le a na too.
Ɔɔ dɩ na lɛɛrɛ a na jal na dã Sɩdɔ̃.
14 Ɩsakaar wer, kũkǝ̃ khɩɩ a ho;
dɩ phɩna lokana, bɩɛl ʋ̃ʋ gɛlɔ, bɩɛl ʋ̃ʋ gɛlɔ.
15 A yɩrɛ hɩɩr paar dɩɩ bʋɔraa,
a yɩrɛ dɩɩ, dɩɩ daar.
Ɔɔ ɲɛ̃ gbɛgbɛlsɔ pɩɛrɛ dɩɩ do hẽeda dʋba dɔ nɔɔ.
A ture a wur da n do dee thɔ̃ khena.
16 Dã na n thɔɔrɛ ɔɔ too, wɩ̃ɩ Ɩjɩrayɛl casɔɔ kha.
17 Dã hor hʋ nɔ sii.
Dɔ̃phaanʋ gɩ hʋ thɩ̃thɩɩn.
Si khaa a n dɔ̃ gãgʋʋ nɔsɔɔrɛra,
dɩ ʋrɛ jʋʋnɛɛnɩ n ji dɩ ƴɛlɛ̃ba.
18 Thãgba Kɔ̃tɩn wei, afɩ taa mɩ n pɛ nũu.
19 Sodara na kpar na dii Gadɩra,
sɩ a na kɛrɛ na saar wɩ fɛw.
20 Ajɛɛrɩ dʋɔ, diko bɔy ƴɔr.
Le jamana diko ɓɔna na n the.
21 Nɛfɩtalɩ hor jʋwala.
Ka a nanɩ, le a n jal.
Dabi bɔy a n kɔ̃.
22 Jojɛfɩ hor thɩr jɔ̃ ɓolʋʋkɛ sɩɛnɩ.
Thɩr jɔ̃ ɓol senanɛ gɩ ɲɔkɔlɔ̃ nʋɔra,
ɔɔ jɛ̃ n lɛɛrɛ dɩɩ jʋʋn gʋʋra ƴũu.
23 Wɩ khɛɛsʋʋrɛ. Wɩ thaarʋʋrɛ.
Ɔɔ lãlaardara thaarʋʋrɛ dɩ wa n gbʋɔrʋ.
24 Sɩ a jɩɛ fʋ ɔɔ tha, ga jɔ̃ kpɩɩraka'.
Dɩ Punone Fɛʋʋ Hɩ̃daarɩkɛ dɔnɩ Jakɔbɩɩ dakpɛ
cʋʋrɛ ɔɔ ɲɛ̃ dɩ ga n jɩɩ khe.
Gɛr dɔ nɔɔ dɩ debi do khekhe.
Nãabʋ̃ʋ gɩ dɩ Ɩjɩrayɛl jǝǝro.
25 Afɩ thɩɩ Thãgba na dʋɔn afɩ bubul.
Punone fɛʋʋ Hɩ̃daar na n bɔna fɛr
na bɔnanɛɛkɛ n thɛnɩ thãgbara ƴũu pǝr,
na bɔnanɛɛkɛ n thɛnɩ thɩɩra tɩɛr,
na bɔnanɛɛkɛ dʋɔnɩ bɩsã lerre, na nʋ̃ lerre.
26 Afɩ thɩɩ bɔnasɔ kɔ̃tɩnɛ a jɔ
ɩ̃ mama thɩ kɔ̃tɩ̃sɔɔ bɔnasɔɔra fĩi;
a thʋ̃ waa a dã khorr gɔ̃gɔnaa khu pa.
Gɩ dɛɛnɛ Jojɛfɩɩ yʋɔ.
Gɩ dɛɛnɛ ɔrra, kɛ dɔnɩ
ɔɔ õkũusɔɔ nũfee yʋ thɩ̃thɩɩn 'lɩmɩ.
27 Bɛ̃jamɛ̃ hor sɩɓɛlɛ̃.
Duuro phiphi a n cɛcɛbɛ thɩ̃doo;
dʋɔrɔ dɩ tɩnɛ lẽle thɩ̃ɛɛkɛ a tagɩnɩ.
28 Wɛr fɛw gbɛba a do Ɩjɩrayɛl caar yʋɔr yeɲɔ.
Dɩ gɛr dɔ gɩrɛ awɩ thɩ mɩɩ wɩnɩ ɔbɔɔkɛ a n bɔna wɩnɩ.
A bɔna wɛr, ntɛ na ɔɔ bɔna ƴɛ kpɩɩ.
Jakɔbɩɩ khi.
29 Agɩpɩ dɩ mɩɩ wɩ ɔɔ nɔka thɩmɩɩ a yɩ: «Ma gbune kaw ɩ̃ thɩ kɔ̃tɩ̃sɔɔra. Nɩ dɔ mɩ boka kaaraakɛ hanɩ Efʋrɔ̃ɔ thɩra, kɛ dɔnɩ Hɛtɩɩ mǝl. 30 Boka kaar gɩ, a ha le thɩɩra Makɩpela, a wɔrɔna Mamire, le Kanãa dɩɩra. Thɩɩ gɩ dɩ Abɩraham the Efʋrɔ̃na, kɛ dɔnɩ Hɛtɩɩ mǝl, dɩɩ do ɔɔ khi dʋ pa. 31 Le wɩ dʋ Abɩraham na ɔɔ khɛr Sara. Lera wɩ dʋ Ɩjakɩ na ɔɔ khɛr Rebeka. Dɩ lera mɩ dʋ Lea. 32 Thɩɩle na boka kaarɩle harɔnɩ, Hɛtɩɩ mǝlsɔɔra wɩ the.» 33 Ɔbɔɔkɛ Jakɔbɩ mɩɩnɩ ɔɔ bɩ̃ thɩmɩɩ ɔɔ bikũusɔ a pɩ, a kɛrɛ phɩ̃ ɔɔ phɩ̃ para dɩ ɔɔ fesu pɩ, dɩ gbũ ɔɔ thɩ kɔ̃tɩ̃sɔɔra.