Jakɔbɩ bɔnanɛ Jojɛfɩɩ bikũusɔ: Manase na Efɩrayɩm \ref Jǝn 35.3-20; Joj 14.4; 1 Kur 7.1-2
48
1 A thɩ̃ɛsɔɔle ka pɩ, wɩ pɔr so Jojɛfɩra: «Gɩ n kho afɩ thɩ.» Dɩ Jojɛfɩ jalnanɛ ɔɔ bikũusɔ yeɲɔ, Manase na Efɩrayɩm. 2 Dɩ wɩ so Jakɔbɩra: «Afɩ bikuun Jojɛfɩ hale da n ɩ̃». Dɩ Jakɔbɩ dor bʋɔ sa pal ɩɩr a too ɔɔ phɩ̃ para. 3 Dɩ a sor Jojɛfɩra: «Thãgba Punone Fɛʋʋ Hɩ̃daar kɔɔ nɩna mɛr ɔɔbara ɔbɔɔkɛ mɩ kɔɔ hanɩ Luuji, Kanãa dɩɩra, a bɔna mɩ. 4 A so marɛ ɩnɩ cʋʋ mɛr dɩ̃ do bi-kɔn. Ɩna cʋʋ mɛr dɩ ma ler, a na kuur na do ca jɔjʋɔ. A mɩ karɔ pɩ, ɩ̃ mǝl ɩna ha dɩɩle gɩ do awɩda khorr." 5 Nɛnɛ̃, kuuminǝ yeɲɔɔkɛ fɩ kɔɔ kɔnɩ Ejipiti dɩɩra sɩ ma kɔɔ ɩ̃ afɩ pa pa', ɩ̃da wa do. Mɔ̃kɛ mɩ hɩnɩ Ribɛ̃ na Simeyɔ̃, mɛ̃ mɩ hɩ̃ Efɩrayɩm na Manase. 6 Sɩ bɩsanaakɛ fɩ kɔnɩ dɩ wɩ kpa war, na dʋɔn afɩda. Awɩ õkũusɔɔ thɩna wa 'lɛ awɩ thɛthɛɛ thɩ̃. 7 Mɩ thenɩ Padã-Aram dɩ ma n bir Kanãa, a thɔɔ Efɩrata gbe, liir afɩ nɩ Rasɛl khi ɩ̃ ɲɔ̃kɔɔ, dɩ̃ dʋʋ le Efɩrata, kɛ dʋɔnɩ Bɛtɩlɛhɛm; hʋ nʋɔra.8 Dɩ Ɩjɩrayɛl yɩrɛ Jojɛfɩɩ bikũusɔ a bule: «Amɛsɔ ha wɩrɛ?» 9 Dɩ Jojɛfɩ birse ɔɔ thɩ: «Wɛr dɔ ɩ̃ bikũusɔɔkɛ Thãgba ha mɩnɩ, kɛ Ejipiti». Dɩ Ɩjɩrayɛl sʋʋraa: «Tɔ wɩ danana mɩ, ɩ̃ bɔna wɩ.» 10 Ɩjɩrayɛl tɩnɛ dɩ yinǝ vɔɔ; a n yɩ bɔɔbɔɔ bã. Dɩ Jojɛfɩ tɔ wɛr dɩ wɩ dãa. Dɩ a pal wɛr da n pʋɔl wɩ. 11 Agɩpɩ dɩ so Jojɛfɩra: «Ma kɔɔ kpɩɛrna ma bire na yɩ afɩ ƴɛ bi 'lo bã, sɩ Thãgba cʋʋ dɩ̃ bir yɩ fɩ, a yɩnanakɛ afɩ bisɔ.» 12 Dɩ Jojɛfɩ tiir wɩ ɔɔ thɩɩ nɛra sa gburõkhu a gʋɛ ƴɩɛ thɩɩra. 13 Agɩpɩ dɩ Jojɛfɩ tɔ wɛr yeɲɔra fɛw a pɔnanaa. Dɩ Efɩrayɩmɩɩkɛ a fʋnanɩ ɲɔ̃bɔɔ, ha Ɩjɩrayɛlɩ ɲɔ̃bɩlana. Sɩ Manaseekɛ a fʋnanɩ ɲɔ̃bɩlã ha Ɩjɩrayɛlɩ ɲɔ̃bɔra; dɩ tɔ wɩ a pɔna. 14 Dɩ Ɩjɩrayɛl dɩ̃gɩlã ɲɛ̃ɛ, a 'laa ɲɔ̃bɔɔ a dɛ̃ɛ Efɩrayɩmɩ yʋɔ, kɛ dɔnɩ diine sa dɛ̃ɛ ɲɔ̃bɩlã ɲɔ̃ɔ Manasee yʋɔ, kɛ dɔnɩ caca bi. 15 Dɩ a bɔnanɛ Jojɛfɩ a so:
«Thãgba ʋrɛɛ ƴɛ thɩ̃thɩɩn ɩ̃ thɩ kɔ̃tɩ̃ Abɩraham,
na ɩ̃ thɩ Ɩjakɩ ɩɩrnɩ;
Thãgbaakɛ bɛrra mɩnɩ a dana nĩikɛ,
16 Thɔ̃thɔ̃ thueekɛ taa mɩnɩ
thɩlke caara fɛw n bɔna kuuminǝǝkɛ
wa n wena ɩ̃ i,
na ɩ̃ thɩ kɔ̃tɩ̃ Abɩraham, na ɩ̃ thɩ Ɩjakɩɩ i.
Wɩ kɔna bɩsana jɔɔ a lerra dapaara a he dɩɩ koo.
17 Mɔ̃ Jojɛfɩ yɩɛnɩ dɩɩ do Efɩrayɩmɩ yʋɔ a dɛ̃ɛ ɲɔ̃bɔ ɲɔ̃ɔ, ga daaraa ga. Dɩ a fʋrɛ ɔɔ thɩɩ ɲɔ̃bɔ a ti a kana a dɛ̃ɛ Manasee yʋɔ, 18 sa so ɔɔ thɩra: «Thale ga yaa ɩ̃ thɩ! Mee ʋrɛ dʋɔn kɔ̃tɩn; dɛɛnɛ ɲɔ̃bɔɔ ɔɔ yʋɔ.» 19 Dɩ ɔɔ thɩ bo sa sʋʋraa: «Mɩ jɩrɛ yaa ɩ̃ bikuun. Ɩ̃ bikuun waa mɩ jɩrɛ. Ɔr dakha na dor caar gel a na kɔ̃tɩ̃; sɩ ɔɔ õkuun dĩi na kɔ̃tɩnɛ a na jʋɔ, ɔɔ mǝlsɔ n wɩ jɔr bərəəm. 20 Ga wiilera a bɔna wɩ a so: «Anɩ i Ɩjɩrayɛl bɩsana na we wa n bɔnana ɩkha. Wa n sor wɔɔ: «Thãgba n cʋɛ fɩ, fɩ ho Efɩrayɩm na Manase.» Dɩɩ do a pɛrɛ Efɩrayɩm thale dɩ kʋʋl Manase ƴɩɛ.» 21 Agɩpɩ dɩ so Jojɛfɩra: «Me wer mɩ n khire, sɩ Thãgba na har kha na nɛrɛ. A na cʋʋ nɛr dɩ na kɛr na bir anɩ thɩ kɔ̃tɩ̃sɔɔ dʋɔ. 22 Mɩ n ha fɛr Sɩsɛm bəənikɛ mɩ taanɩ Amɔɔr məlsɔra na ɩ̃ bajɩna, na ɩ̃ tha, mɩ ha fɛr a dɛbɩrɔ wo dɩɩ jɔ gɩrɛɛkɛ dʋɔnɩ afɩ õkũusɔda.»