Jakɔbɩ jaal Faarɔ̃ɔ pa a fʋɔrʋ \ref Jǝn 46.31-34; 45.7, 10,11; Khɩ 103.15-18
47
1 Jojɛfɩ jaal mɩɛ Faarɔ̃, a sʋʋraa: «Ɩ̃ thɩ na ɩ̃ õkũusɔra ther le Kanãa dʋɔ a ɩ̃. Wɩ daan na awɩ nʋ̃ yɩra na nʋ̃ kɔ̃tɩna, na thɩ̃ɛ fɛʋʋkɛ wɩ hananɩ. Wɩ hale Gosɛn bǝǝnnǝ. 2 Dɩ a kpar ɔɔ õkũusɔ yemɔy a jalna nɩna Faarɔ̃. 3 Dɩ Faarɔ̃ bule Jojɛfɩɩ õkũusɔ: «Aɲe dɔ anɩ thɔ̃ɔkɛ nɩ n donɩ?» Dɩ wɩ birsee: «Nʋ̃ yɩra afɩ thɔ̃dara n be asɩ thɩsɔɔ kha.» 4 Sɩ ber a ɩ̃ kɛ anɩ dʋɔ sɩ too gɩdonɩ hʋ̃ɔ na hale dɩ afɩ thɔ̃daraa nʋ̃ yɩrasɔ na khʋʋla'; gɩdonɩ kɔmɛr thʋnɛ khar Kanãa dʋɔ ka. Gɛr gɩ hana afɩ thɔ̃dara hʋɛ wɩ too Gosɛn bǝǝnnǝ.» 5 Dɩ Faarɔ̃ so Jojɛfɩra: «Afɩ pa, afɩ thɩ na afɩ õkũusɔ ɩ̃. 6 Afɩ too, Ejipiti dɩɩ too. Phire pa bʋɔ a thɩnɛnɔ afɩ thɩ, na afɩ õkũusɔ. Dɔ wɩ too le Gosɛn bǝǝnnǝ. Dɩ dakha ado fɩ jɩrɛ wɩ hananɛ tɩbɩla awɩ thɩ̃thɩɩn, kɛ na punonenɩ thɔma wa n hɩɩn, pɛ war wɩ do ɩ̃ nʋ̃ hɩ̃ɩdara.» 7 Dɩ Jojɛfɩ kpar ɔɔ thɩ Jakɔbɩ a pɔna nɩna Faarɔ̃, dɩ Jakɔbɩ bɔnanɛ Faarɔ̃. 8 Dɩ Faarɔ̃ bulele Jakɔbɩ: «Yɛna yemɔ̃ fɩ hana?» 9 Dɩ Jakɔbɩ birsee: «Yɛna tamaa na kpelẽ yʋɔr (130) ha dɛw mɩ khenɩ nʋma dɩ ma n kpaarna dɩɩ dɩɩra. Ɩ̃ yɛ nɔ na puno a dã ɩ̃ thɩsɔa', gɩdonɩ mɩ caananɛ nɩwɛ jɔɔ ɩ̃ yirǝ, sɩrakɛ nʋ̃ kherra wɩ kɔɔ do wer. 10 Dɩ Jakɔbɩ bir bɔna Faarɔ̃ wo, sa ɩɩr ɔɔ ƴɛra a the. 11 Dɩ Jojɛfɩ phiire pa bʋɔ Ejipiti dɩɩra a ha ɔɔ thɩ na ɔɔ õkũusɔ dɩ wɩ tooro. A ha wɛr thɩ bʋɔ Ramɩsɛsɩ bəənə dɩ wɩ hɩ̃, mɔ̃kɛ Faarɔ̃ kɔɔ sʋʋraanɩ. 12 Dɩ Jojɛfɩ ha wɩ gɩrɛ fɛʋʋkɛ na haanɛnɩ ɔɔ thɩ na ɔɔ õkũusɔ na awɩ too fɛw mɔ̃ tibil nʋɔ hanɩ.Jojɛfɩɩ thɔ̃ Ejipiti dɩɩra. \ref Jǝn 41.30-36, 48-57
13 Dɩɩra fɛw, dikor bire na harakɛ dɩkhãa pa ga; gɩdonɩ kɔmɛr thʋnɛ a khar ka. Dɩ Ejipitidara na Kanãadara fɛw na n lɩɛr kɔmɛr. 14 Mũsumookɛ kɔɔ hanɩ Ejipiti dʋɔ, na Kanãa dʋɔ, wɩ thenanɛ dɩkɔ Jojɛfɩra dɩɩ pɩ cacaca. Dɩ Jojɛfɩ khɩɩ fɛw dɩɩ lõ Faarɔ̃ɔ cɔ. 15 Ɔbɔɔkɛ mũsumo ɩnɩ a pɩ Ejipiti, na Kanãa dʋɔ fɛw, Ejipitidara pɔr a so Jojɛfɩra: «Hana sɩ dɩkɔ. Dɩ a mũsumo na hala', gɛr na dɔ kɩrʋ fɩ faa sɩ sɩ khiir ya?» 16 Dɩ Jojɛfɩ so war: «Ado mũsumo pɩrɛ, nɩ ɛna nʋma ɩ̃ debina nɩ dɩkɔ» 17 Dɩ wɩ pɔnanɛ awɩ nʋ̃sɔ Jojɛfɩra a debina dɩkɔ. Dɩ Jojɛfɩ ha wɛr dɩkɔ, sa tee awɩ nʋ̃sɔ: gãgona, na nʋ̃ yɩra, na nʋ̃ kɔ̃tɩna, na kũkǝnǝ. A debina wɛr awɩ nʋ̃sɔ fɛw, dɩkɔ ga yɛɛle. 18 Ɔbɔɔkɛ yɩɛr fini pɩ, wɩ bire pɔ Jojɛfɩra a sʋʋraa: «Sa mʋ̃ fara' asɩ kɔ̃tɩ̃. Mũsumo pɩrɛ. Dɩ sɩ kɔɔ kpar nʋma fɛw dakha a ɩna ha nɩ. Sa hana thɩ̃ kpɩɩ, fɩ yɩ sɩnɩ gɩrɛ bã kɔ̃tɩn. Asɩ thɛthɛɛ tomɩrra sɛ dɩbara na thɩɩsɔ. 19 Fɩ yɩ sɩ khiire afɩ ƴɛra sɩ thɩɩsɔɔra n too ya? Thɛ sɩ na dɩkɔ, sɛrɛ na asɩ thɩsɔɔra fɛw sɩ do Faarɔ̃ɔ deesɔ. Hana sɩ thɩ̃ diire gɩ do nɔɔ sɩ hana yire; sa n khiire sa faa dɩɩ gɩ kpoloa'.» 20 Dɩ Jojɛfɩ ther Ejipiti thɩɩ fɛw dɩɩ do Faarɔ̃ɔda; gɩdonɩ kɔmɛr hor ga hǝrǝ wer, dɩ wɛr fɛw bɩɛlbɩɛl dolõ awɩ lɛsɔ, dɩ dɩɩra fɛw debi a do Faarɔ̃ɔda. 21 Dɩ Jojɛfɩ deere dɩ kpulõbidara fɛw a thena dɩ kɔ̃tɩnana a pɛr Ejipitidara ɓibi dee dʋʋrra. 22 Gbõdaraa thɩsɔ dɩbara aa tha', gɩdonɩ jɔfʋ kɔɔ hale dɩ Faarɔ̃ pɛr dɩɩ do gɛr taa wɩ; dɩ wɩ hana dɩkɔɔkɛ Faarɔ̃ n ha wɩnɩ gɛr dɔ kɩrʋ wa dolonɩ awɩ thɩsɔa'. 23 Dɩ Jojɛfɩ so tɩbɩlala: «Mɩ the ner nĩ gɩrɛ na anɩ thɩsɔ fɛw dɩ nɩ too Faarɔ̃ɔ too. Thɩ̃ diire ha gɩrɛ na kʋʋlnɩ na n diir. 24 A kha bɔɔ dã, na tɩnɛnɛ tɩnɛ paar yemɔy: nɩ ha Faarɔ̃ tɩnɛ pa bɩɛl, sɩ nɩ gba tɩnɛ paar yenãale nɩ bir na n diir, na n haana dakha anɩbara na anɩ bɩsãsɔ na anɩ cɔdara. 25 Dɩ wɩ birsee: «Fɩ ka taa sɛrrakɛ dɩ sɩ hana yire. Fɩ hana sarɛ ha bulole ka. Sɩ ture sɩ do Faarɔ̃ɔ deesɔ. 26 Dɩ Jojɛfɩ pɛrɛ jɔfʋ dɩɩ too a dana ninakɛ 'lo. Dɩ Ejipiti dɩɩra fɛw Faarɔ̃ hɩna tɩnɛ pa bɩɛl, tɩnɛ paar yemɔɩra kokol thɩɛna. Gbõdaraa thɩsɔ dɩbara Faarɔ̃ na hɩ̃a'.
Jakɔbɩɩ pɩpɩɩ yɛsɔ. \ref Jǝn 49.29-32; 59.4-13
27 Ɩjɩrayɛldara toore Gosɛn bǝǝnnǝ le Ejipiti dɩɩra a hana thɩɩsɔ; a thʋ̃ ler a jɔr ka. 28 Jakɔbɩ cʋʋrɛ yɛna yʋɔr makoɲɔ Ejipiti dɩɩra. Ɔɔ yɛ nɔɔkɛ a cʋʋnɩnakɛ fɛw har yɛna tamaa na kpalaɲɔ makoɲɔ (147). 29 Dɩ Ɩjɩrayɛl jɩrɛ ɔɔ khi bɔ n wɔrɔnɛ dɩ we ɔɔ bikuun Jojɛfɩ a sʋʋraa: «Ado fɩ ƴaalɛ fɩ cʋɛ mɩ bɔɔ mɩ n bɩɛl fɛr, tɔ afɩ ɲɔ̃ ɩ̃ nɔ huur ballɔ a sɔ mar sobɔr na bɩ̃ bʋɔ: Mɩ n bɩɛl fɛr, fa n dʋ mɩ Ejipita'. 30 A mɩ khi, gba mɩ thɛna Ejipiti a jallana mɩ dɔ ɩ̃ thɩsɔɔ kara.» Dɩ Jojɛfɩ sʋʋraa: «Ma cʋʋrɛ gɩrɛɛkɛ fɩ so marnɩ oti.» 31 Dɩ Jakɔbɩ kpãkpaanaa aa: «Ʋlfɛnɛna mɩ.» Dɩ Jojɛfɩ ʋlfɛnaa. Agɩpɩ dɩ Jakɔbɩ gburõkhu ɔɔ phɩ̃pa yʋɔ a fʋɔr (Thãgba).