Jakɔbɩ na ɔɔ cɔdara jaal Ejipiti \ref Jǝn 45.9-28; 26.1-6; Thɩɩ 1.1-5; Ther 26; 1 Kur 2-8
46
1 Ɩjɩrayɛl jaal na thɩ̃ɛ fɛʋʋkɛ a hananɩ. Dɩ a dãa Bɛɛrseba a ji bonɩɛ ɔɔ thɩ Ɩjakɩɩ Thãgbara. 2 Dɩ Thãgba nɩna ɔɔbara Jakɔbɩra dɩtɩnɔ a wɩɩ: «Jakɔbɩ! Jakɔbɩ!» Dɩ Ɩjɩrayɛl tu: «Mɛr kaa!» 3 Dɩ Thãgba so: «Mɛr dʋɔn Thãgba, afɩ thɩɩ Thãgba. Fa n do maar n fʋ fɩ Ejipiti gbuunnǝ ga, gɩdonɩ le ma cʋʋ fɩ dɩ fa debi na do ca kɔ̃tɩ̃ɩ. 4 Mɛrɛ thɛthɛ na gbunona fɩ Ejipiti, mɛrra na kɛrrana fɩ na jʋʋnna. Afɩ khi bɔɔ Jojɛfɩɩ thɛthɛ na fʋɔn fɩ.» 5 Dɩ Jakɔbɩ ther Bɛɛrseba. Dɩ ɔɔ bikũusɔ gbaa pɛ hotororaakɛ Faarɔ̃ kɔɔ thɔnanɩ wɩ gbanaa. Dɩ wɩ gbaar dakha awɩ bɩsãsɔ a pɛr, na awɩ khɛrsɔ dakha. 6 Dɩ wɩ kpar awɩ nʋ̃sɔ a gbana thɩ̃ɛ fɛʋʋkɛ wɩ kɔɔ hananɩ Kanãa. Mɛ̃ gɩ dã, Jakɔbɩ na ɔɔ mǝl fɛw jalnɩ Ejipiti. 7 A kpar ɔɔ bikũusɔ na awɩ bikũusɔ a kpana ɔɔ bikhɛrsɔ na awɩ bikhɛrsɔ, a kpana ɔɔ mǝlsɔ fɛʋrakɛ a jalna Ejipiti.Yɛkɛ Ɩjɩrayɛlɩ bikũusɔ isɔ
8 Yɛkɛ Ɩjɩrayɛlɩ bikũusɔɔ isɔ, kɛ dɔnɩ wɩrɛ jallanɩ Ejipiti. Jakɔbɩɩ thɛthɛ na ɔɔ bikũusɔ gɩ, Ribɛ̃ dʋɔn ɔɔ caca bi. 9 Ribɛ̃ɛ bikũusɔ ha wɩrɛ: Enɔkɩ, Palu, Ɛsɩrɔ̃ na Karamɩ. 10 Simeyɔ̃ɔ bikũusɔɔ ha wɩrɛ: Yemʋwɛl, Yamɛ̃, Ohaadɩ, Yakɛ̃, Sohaar na Sayul, kɛ dɔnɩ Kanãa khɛrɩ bikuun. 11 Levɩɩ bikũusɔ ha wɩrɛ: Gɛɛrsɔn, Kehatɩ na Merarɩ. 12 Judaa bikũusɔ ha wɩrɛ: Ɛɛr, Ɔnã, Sela, Perɛsɩ na Jera; sɩ Ɛɛr na Ɔnã wer khiire le Kanãa dʋɔ. Perɛsɩɩ bikũusɔ ha wɩrɛ: Ɛsɩrɔ̃ na Amul. 13 Ɩsakaarɩ bikũusɔ ha wɩrɛ: Tola, Puva Yobi, na Sɩmɩrɔ̃. 14 Jabʋlɔ̃ɔ bikũusɔ ha wɩrɛ: Serɛ, Elɔ̃ na Yaleyɛl. 15 Wɛr dɔ kuuminǝǝkɛ Jakɔbɩɩ khɛr Lea kɔnɩ Padã-Aram dɩɩra; dɩ Dɩna, kɛ dɔnɩ khebir ɓanɔ. Dɩ Leaa bikũusɔ na ɔɔ bikũusɔɔ bisɔ gbɛbɩrɛ fɛw a ha tɩbɩla kpelẽ yʋɔr yẽther. 16 Gadɩɩ bikũusɔ ha wɩrɛ: Sɩfɩ̃ɔ, Hagɩ, Suni, Ɛsɩbɔ̃, Eri, Arodi, na Areli. 17 Ajɛɛrɩ bikũusɔ ha wɩrɛ: Ɩmɩna, Iseva, Isevɩ, na Beriya na awɩ õkhɛr Sera. Beriya bikũusɔ ha wɩrɛ: Ebɛɛr na Malkɩɛl. 18 Wɛr dɔ Jɩlpaa bikũusɔ. Jɩlpa dɔ ʋrɛ Labã kɔɔ kpanɩ a ha Lea dɩ do ɔɔ thɔ̃daar. Bɩsanaakɛ Jakɔbɩ kʋɔnaanɩ fɛw na ɔɔ mǝlsɔ gbɛbɩrɛ ha tɩbɩla yʋɔr maadõ. 19 Jakɔbɩɩ khɛr Rasɛl, ɔɔ bikũusɔ ha wɩrɛ: Jojɛfɩ na Bɛ̃jamɛ̃. 20 Jojɛfɩ kʋɔn kuuminǝ yeɲɔ ɔɔ khɛr Asɩnatɩra, kɛ dɔnɩ Potiferaakɛ dɔnɩ Ɔn gbõdaarɩ bikhɛr, a hanɩ Ejipiti. Wɛr ha wɩrɛ: Manase gɩ na Efɩrayɩm. 21 Bɛ̃jamɛ̃ɛ bikũusɔ ha wɩrɛ: Bela, Bekɛɛr, Asebɛl, Gera, Naamã, Ehi, Rɔsɩ, Mupɛ̃, Hupɛ̃ na Ardɩ. 22 Wɛr dɔ Rasɛlɩ bikũusɔɔkɛ Jakɔbɩ kʋɔnaanɩ na awɩ bisɔ. Wɛr fɛw har tɩbɩla yʋɔr yenã. 23 Dãa bikuun ha ʋrɛ: Husɩm. 24 Nɛfɩtalɩɩ bikũusɔ ha wɩrɛ: Yasɩɛl, Guni, Yesɛɛr, na Sɩlɛm. 25 Wɛr dɔ Bɩɩlaa bikũusɔ na awɩ bisɔ. Bɩɩla dʋɔn ʋrɛ Labã kɔɔ kpanɩ a ha Rasɛl dɩ do ɔɔ thɔ̃daar. Bɩsanaakɛ Jakɔbɩ kʋɔnaanɩ fɛw na awɩ bisɔ har tɩbɩla makoɲɔ. 26 Tɩbɩlaakɛ dɔnɩ Jakɔbɩɩ too, kɛ dɔnɩnakɛ ɔɔ mǝlsɔɔkɛ a jalnanɩ Ejipiti, gbɛbɩrɛ fɛw a ha tɩbɩla kpalãther maadõ (66). Sɩ wa ther ɔɔ bikonaa khɛrsɔ a pɛra'. 27 Jojɛfɩɩ bikũusɔɔkɛ a kɔnɩ Ejipiti, tɩbɩla yeɲɔ gɩ. Tibil nʋɔɔkɛ dɔnɩ Jakɔbɩɩ too, kɛ a jalnanɩ Ejipiti har tɩbɩla kpalãther yʋɔr (70).
Jojɛfɩɩ cãa kha na ɔɔ thɩ Jakɔbɩ Ejipiti.
28 Dɩ Jakɔbɩ thʋ̃ɔ Juda a kʋlɛ nɩ ƴɩɛ a sɔ Jojɛfɩra a caanɛ nɩ Gosɛn bǝǝnnǝ, ɔbɔɔkɛ ɩna pɔnɩ ɩna n dã. 29 Dɩ Jojɛfɩ gbɛbɩ ɔɔ hotoro a the da n jal Gosɛn a cãa ɔɔ thɩ. Bɔɔkɛ ɔɔ thɩ na thenɩ, Jojɛfɩ car a palʋ da n khɩɩna. A palʋ fʋrɔ a khɩɩna ƴɛrr. 30 Dɩ Ɩjɩrayɛl so Jojɛfɩra: «Pha! A mɩ khi nɛnɛ̃ dɩphã mɩ faarɛ haar; gɩdonɩ fɩ hakɛ na yire, dɩ̃ yɩ fɩ.» 31 Dɩ Jojɛfɩ so ɔɔ õkũusɔɔra na ɔɔ thɩɩ cɔ toora: «Ma jaal na mɩɛ Faarɔ̃, ɩ̃ sʋʋraa: "Ɩ̃ õkũusɔ na ɩ̃ thɩɩ cɔ tookɛ kɔɔ hanɩ Kanãa dãa kɛ ɩ̃ pa. 32 Tɩbɩla wɛɛkɛ dɔnɩ nʋ̃ khɛ, wɩ n kher nʋ̃ yɩra na nʋ̃ kɔ̃tɩna. Wɩ ɩnanɛ awɩ nʋ̃ yɩra na nʋ̃ kɔ̃tɩna na thɩ̃ɛ fɛʋʋkɛ wɩ hananɩ.» 33 A Faarɔ̃ we nɩ dawi a bule nɩ: Aɲe dɔ anɩ thɔ̃ɔkɛ nɩ n donɩ? 34 Nɩ sʋɔraa: «Nʋ̃ khɛ afɩ thɔ̃dara do. Bɩsaanɛ sɩ khena nʋma waa mɔna asɩ thɩsɔ kɔɔ hanɩ a dana nɛnɛ̃ɛkɛ.» A nɩ so thale, a na sɩ narɛ nɩ too Gosɛn bǝǝnnǝ, gɩdonɩ Ejipitidara n ƴʋɔnɛ wɩrɛ fɛʋʋkɛ n bɛnɩ nʋ̃ yɩrasɔ.