Jojɛfɩ nɩnanɛ ɔɔbara ɔɔ õkũusɔ dɩ wɩ jɩɩ. \ref Jǝn 44.33-34; Thtt 7.13; Efɛ 4.32-5.2
45
1 Jojɛfɩ na mar na fʋ dɩbara tɩbɩlalaakɛ hanɩ ɔɔ ƴɛra ga. Dɩ phã: «Nɩ te tɩbɩlaakɛ hanɩ kɛ wɩ thɩɩr!». Tibil bɩɛllakɛ na sɩ ɔbɔɔkɛ Jojɛfɩ n nɩnanɩ dɩbara ɔɔ õkũusɔɔra ga. 2 Dɩ a mar da n khɩɩ dɩ Ejipitidara nɩɛr na Faarɔ̃ɔ cɔdara dakha. 3 Dɩ so ɔɔ õkũusɔɔra: «Mɛr Jojɛfɩ gɩ! Ɩ̃ thɩ hale 'lo na yire? Sɩ ɔɔ õkũusɔ na puno na birsea', gɩdonɩ ɲɛ̃ɛ khiir wer koo ɔɔ ƴɛbʋrɔ. 4 Dɩ a bire so war: «Nɩ tɔ dana mɩ.» Dɩ wɩ tɔr a daan. Dɩ so war: «Mɛr Jojɛfɩ gɩ; anɩ õkuunikɛra nɩ fʋnɩ dolõ dɩ wɩ ɩna kɛ Ejipiti. 5 Sɩ nɛnɛ̃ na n do haar n kʋɛ na'. Na n dɛna doloneekɛ nɩ dolõ mɩnɩ dɩ n ha kɩɛra'; gɩdonɩ Thãgba thɔna mɩ, ɩ̃ kʋlɛ nɩ ƴɩɛ, a ɩna kɛ a taa nɩ, nɩ 'lɛ yire. 6 Yɛna yeɲɔ ha gɩrɛ kɔmɛr lonɩ dɩɩra. Sɩ gɩ sɩrɛ yɛna yemɔy wo, sɩ tibil na kʋʋl a na ba kha thɩ̃a'. 7 Thãgba ka thɔna mɩ ɩ̃ kʋlɛ nɩ ƴɩɛ a ɩna kɛ gɩ do nɔɔ nɩ sɩ anɩ mǝlǝ gbe thɩɩraakɛ, ɩ̃ vǝnǝ nɩ dakha a te nɩ puno nɩ hana yire. 8 Na yɩ gaa, ga do nɛr dɔ nɔɔ dɩ̃ ha kɩɛra'; sɩ Thãgba gɩ. A pɛ marɛ dɩ̃ do Faarɔ̃ɔ khukhu bɩnɔ na kɔ̃tɩn ɔɔ cɔra fɛw, a dona gobanɛr Ejipiti dɩɩra fɛw. 9 Nɩ phana a kɛrra birrǝ ɩ̃ thɩra, a sʋɔraa: Afɩ bikuun Jojɛfɩ sɔ thakɛ: Thãgba pɛ marɛ dɩ̃ do kɔ̃tɩn Ejipiti dɩɩra koo. Fa n dĩdĩǝ ga, ɩna ɩ̃ pa kɔrɔ. 10 Gosɛn dɩɩra fa too fɩ wɔrɔna mɩ, fɛrɛ na afɩ bikũusɔ na afɩ bisɔɔ bɩsãsɔ na afɩ nʋ̃ yɩrasɔ na afɩ nʋ̃ kɔ̃tɩ̃sɔ na thɩ̃ɛ fɛʋʋkɛ fɩ hananɩ. 11 Ma n ha fɛr thɩ̃ɛ fɛw kɛkɛ, gɩdonɩ kɔmɛr kɔ̃tɩ̃ɩ sɩrɛ yɛna yemɔy 'lo; gɩ do nɔɔ fɛrɛ na afɩ too na thɩ̃ɛ fɛʋʋkɛ fɩ hananɩ dɩkha na 'lee na'. 12 Nɩ to marrɛ yire, dɩ fɛr Bɛ̃jamɛ̃ dakha ɩ̃ õkuun bɩnɔ, fɩ to marrɛ yire a jɩ dɩ mɛr Jojɛfɩ gɩ gbelẽ gbelẽ, mɛr mɩana nɩ. 13 Gɩrɛ fɛʋʋkɛ nɩ yɩna mɩnɩ Ejipiti dɩɩra, ɩ̃ ɲɔ̃korbɔ na thɩ̃ɛ fɛʋʋkɛ nɩ yɩnɩ, nɩ mɩa ɩ̃ thɩ ɔmɛna. Nɩ phana a gbunona ɩ̃ thɩ kɔrɔ kɛkɛ.» 14 Dɩ a palɛ Bɛ̃jamɛ̃ dɩ Bɛ̃jamɛ̃ palʋ dɩ wɩ gbɛbɩ wa n khɩɩ. 15 Dɩ a palɛ dakha ɔɔ õkũusɔ fɛw bɩɛlbɩɛl da n khɩɩna. Gele karɔnɩ pɩ, gɛra ɔɔ õkũusɔ mɩɩnaa dɩphã.Faarɔ̃ sor Jojɛfɩɩ thɩ Jakɔbɩ n deere pɔ Ejipiti. \ref Jǝn 46.1-7 ; 28-30
16 Dɩ tutugore gbaar Faarɔ̃ɔ cɔ fɛw aa, Jojɛfɩɩ õkũusɔ pɔr le, dɩ daw fʋrɛ Faarɔ̃ na ɔɔ cɔdara fɛw. 17 Dɩ Faarɔ̃ sor Jojɛfɩra: «Sɔ afɩ õkũusɔɔra a yɛ: «Wɩ gba awɩ hẽedasɔ a le nʋmana a kɛrra birrǝ kɔna Kanãa dɩɩra. 18 Wɩ kpa awɩ thɩ na awɩ cɔ too a ɩna kɛ ɩ̃ pa. Ma ha wɛr pa bʋɔ wɩ tooro wa n kho Ejipiti thɩ̃ ɓɔna. 19 Fɩ hananɛ hʋɛ a na so war, wɩ gba hotorosɔ kɛkɛ Ejipiti dʋɔ a kɔnana, a gbana awɩ bɩsãsɔ, na awɩ khɛrsɔ, a gbana dakha awɩ thɩ, a kɛrra ɩna. 20 Wa n waalna awɩ thɩ̃sɔɔkɛ wa faanɩ la'; gɩdonɩ Ejipiti thɩ̃ ɓɔna fɛw, wɛr na hɩna.» 21 Dɩ Ɩjɩrayɛl bikũusɔ cʋʋ oti. Dɩ Jojɛfɩ ha wɩ hotorosɔ mɔna Faarɔ̃ɔ nɔka sonɩ, a hana wɩ dakha hʋ gba dɩkɔ. 22 Jojɛfɩ har wɛr fɛw bɩɛlbɩɛl kẽkẽ phana. A ha Bɛ̃jamɛ̃ kẽkẽ phana yemɔy na dɛ bulo be tãather (300). 23 A thɔnanɛ dakha ɔɔ thɩra Ejipiti thɩ̃ ɓɔna, kɛ kũkǝnǝ yʋɔr gbanɩ sɩ kũkǝ̃ khɛra yʋɔr gba dɩkɔɔkɛ wa khonɩ hʋɛra. 24 Agɩpɩ dɩ faa ɔɔ õkũusɔ wɩ kɔna, sa kpãkpãa war ayɩ: «Na n do kpɩɛrɛ n ɲaɲaan nɩ hʋɛra gaa dɛ!»
25 Dɩ wɩ ther Ejipiti a kɛr bir Kanãa dʋɔ, a pɔ dã awɩ thɩ Jakɔbɩɩ pa, 26 a sʋʋraa: «Jojɛfɩ hale 'lo na yire. Dɩrakɛ ɔr dʋɔn kɔ̃tɩn le Ejipiti dɩɩra fɛw». Sɩ awɩ thɩmɩɩ na gba Jakɔbɩ khǝrǝ', gɩdonɩ aa kɔɔ pɛ wɩ haara'. 27 Dɩ wɩ gbaar thɩmɩaakɛ Jojɛfɩ kɔɔ mɩɩ wɩnɩ a mɩgʋʋ. Dɩ yɩ dakha hotorosɔɔkɛ Jojɛfɩ kɔɔ thɔnanɩ wɩ deerenaa pɔna. Liir gɩ gba awɩ thɩ Jakɔbɩra khǝr dɩphã. 28 Dɩ so war: «Na n mɩɩ gɩ bã, gɩ dãa! Ɩ̃ bikuun Jojɛfɩ hale 'lo na yire ya? Ɩ̃ jal ɩ̃ yɩɩrakɛ sɩ ɩ̃ khi.»