Jojɛfɩ ber ɔɔ õkũusɔ bɩnɛ wo. \ref Dǝt 8.2,16
44
1 Agɩpɩ Jojɛfɩ sor ɔɔ cɔ hɩ̃ɩdaara a yɩ: «Gba tɩbɩlaakɛɛ lokasɔ a pɩɛr dɩkɔ gɩ hi phi. Pɩɛr mɔ̃ wa punonɩ na gba. Gba dakha awɩ mũsũsɔ a pɛ war fɛw bɩɛlbɩɛl, ntɛ ɔɔ lokara.» 2 Gba dakha ɩ̃ ɲɔ̃kpõbirikɛ wɩ cʋʋnanɩ dɛ bulo a pɩɛr dabuu lokara na ɔɔ diko the mũsũ. Dɩ thɔ̃daarɩle cʋʋ mɔna Jojɛfɩ sʋʋraanɩ.3 Dɩ mɔ̃ dɩɩ wɩlnɩ duuro, wɩ faa wɛr na awɩ kũkǝ̃sɔ dɩ wɩ gba hʋɛ. 4 Dɩ mɔ̃ wɩ gbanɩ hʋɛ a the dɩɩra sɩ wa jal ƴɔɔ pa', Jojɛfɩ tire ɔɔ cɔ hɩ̃ɩdaarɩle aa, a ɩrɛ wea wɩ a fɔ, a bulene wɩ yɛ, aɲe gɩ, dɩ wɩ gba puure a lɩmɩ bɔɔ ya? 5 Ga do ɲɔ̃kpõbirile afɩ kɔ̃tɩ̃ n ɲɔna ɲʋɔna'? Ga do ɔrra a n jɩna gɩrɛ na dananaa? Ga bɔr gɩrɛ wɩ cʋʋnaa' dɛ. 6 Dɩ cɔ hɩ̃ɩdaarɩle wee kpaan a 'li wɩ, a bule wɩ mɔna Jojɛfɩ sʋʋraanɩ. 7 Dɩ wɩ birsee: «Aɲee thɩmɩɩ ca ha gɩrɛ thaa, asɩ kɔ̃tɩ̃ n mɩɩnɩ? Sɛr ɔɔ thɔ̃dara na 'la na cʋʋ thɔ̃ caarɩla'.» 8 A ka kɛrna mũsumookɛ sɩ yɩnɩ asɩ lokasɔɔra Kanãa dɩɩra a ɩna, mɔ̃ ga cʋʋ sɩ sɩ bir sɩ yu mũsumo na dɛ asɩ kɔ̃tɩ̃ɩ cɔ? 9 Ntɛraakɛ fa yɩnɩ thɩ̃ɛ, dɔ a khi. Sɩ sɛrɛ, sɩ do asɩ kɔ̃tɩ̃ɩ deesɔ.» 10 Dɩ cɔ hɩ̃ɩdaarɩle birse wɩ: «ɔ̃hɔ̃! Anɩ thɩmɩɩra na fʋɔn nɩ. Ʋrɛraakɛ ma yɩnɩ thɩ̃ɛ, ɔr na dɔ ɩ̃ dee, sɩ wɩrɛ na sɛnɩ ma hana wɩ thɩ̃a'.» 11 Dɩ fɛw phana a thʋbɩ awɩ loka a khɛr wɩ hɩɩn. 12 Dɩ cɔ hɩ̃ɩdaarɩle khɛr lokana a hɩɩn da n kana. Õkuun kɔ̃tɩn a fʋna a jalna dana dabuu. Dɩ le a yɩ ɲɔ̃kpõbir Bɛ̃jamɛ̃ɛ lokaara. 13 Dɩ Jakɔbɩɩ bikũusɔ ɓǝǝr awɩ kẽkẽsɔ sa gba lokana li, a kɛr dɩ wa n bir dɩɩra. 14 Dɩ mɔ̃ Juda na ɔɔ õkũusɔ danɩ Jojɛfɩɩ cɔ, Jojɛfɩ kɔɔ hale too, dɩ wɩ gburõkhu ɔɔ ƴɛra. 15 Dɩ Jojɛfɩ so war: «Aɲee thɩ̃ ca nɩ cʋʋ thakɛ? Na jɩ mɛrkɛɛ ca punone a jɩ gɩrɛ na ɩnanaa?» 16 Dɩ Juda birse: «Aɲe sa so asɩ kɔ̃tɩna? Mɔ̃ sa mɩɩ? Mɔ̃ sa mɩɩ sɩ gɩ do asɩda daarɛ? Thãgba yɩrɛ dɩ paar afɩ thɔ̃darara. Nɩ gba sɩ sɛrɛ na ʋrɛraakɛra nɩ yɩnɩ ɲɔ̃kpõbir sɩ do nar dea.» 17 Dɩ Jojɛfɩ so: «Ma puno na cʋʋ thɩ̃ɛ thala'. Kuunaakɛ mɩ yɩnɩ ɩ̃ ɲɔ̃kpõbir, ɔr na dʋɔn ɩ̃ dee. Nɛrɛ, nɩ kɛrra birrǝ anɩ thɩra na ha ɩɩ.» 18 Dɩ le Juda tɔ pɔ a sʋʋraa: «Jɛ sɩ bʋɔra kɔ̃tɩn. Fa n gbana sɩ nĩkhiǝ'. Sɩ afɩ thɔ̃daar n puno a mɩɩ thɩ̃ɛ gbe; gɩdonɩ fɛrɛ na Faarɔ̃ bɩɛla nɩ do. 19 Cacara sɩ kɔɔ ɩnɩ, fɩ kɔɔ bule ser ado asɩ thɩ hale, na asɩ õkuun kpɩɩ. 20 Dɩ sɩ ture: «Asɩ thɩ hale a tɩ̃, na asɩ õkuun buukɛ a kɔnɩ ɔɔ tɩ̃ bɔɔ. A naarɛ ka gɩdonɩ ɔr dɔ bɩɛlɩkɛ sɛnɩ awɩ nɩ kɔna. Bɩɛl khire. 21 Dɩ fɩ so sɛr afɩ thɔ̃darara, sɩ kpaa ɛna fɩ tʋʋraa yire. 22 Dɩ sɩ so far, bɩsaanɩle na puno na the ɔɔ thɩɩ kalƴɔa'; a a the ɔɔ thɩ na khire. 23 Dɩ fɩ so; a sa ɩna asɩ õkuun buǝ', sa yɩ afɩ ƴɛ bi fɩɩʋraka'." 24 Ɔbɔɔkɛ sɩ kɛrnɩ bir afɩ thɔ̃daar asɩ thɩra, sɩ sʋʋraarɛ gɩrɛ fɛʋʋkɛ fɩ sonɩ. 25 Dɩ asɩ thɩ bire thɔ̃ sɩ, sɩ birrǝ ɩna a thɛ dɩkɔ gbe. 26 Dɩ sɩ birsee: Sa puno na jal saagado asɩ õkuun bu sɩ jalna gaa ga; gɩdonɩ kuunile sor, a sa pɔnaa ga, sa bir na yɩ ɩnɩɩ ƴɛ bǝ'. 27 Dɩ afɩ thɔ̃daar asɩ thɩ so: «Nɩ jɩrɛ dɩ kuuminǝ yeɲɔ ɩ̃ khɛr kɔ̃; 28 bɩɛl na hale bã, agakpaanaa dɩkha cɛcɛbɛnɛɛ, gɩdonɩ a dana nĩ, ma yɩa'. 29 Dɩ a nɩ kpa ʋrɛ a jalna, sɩ dɩkha dãa, ga dor na cʋʋrɛ dɩ mɛr kuun kɔ̃tɩ̃ yʋ bulo na gbunǝ ha helle khĩdi dʋɔ.» 30 Dɩ nɛnɛ̃ a sɩ kɛr a bir afɩ thɔ̃daar asɩ thɩra, sɩ aa yɩ bɩsaanɩka', mɔna a lʋʋnɩ haar thaa, 31 asɩ thɩ na khire. Dɩ ga do sɛr cʋɛ asɩ thɩ kuun kɔ̃tɩ̃ yʋ bulo dɩ khinǝ ha kpore. 32 Mɛr afɩ thɔ̃daar kɔɔ 'laarɛ dɩbara ado barãdaa bɩsaanɩkɛɛdara. Mɩ kɔɔ sor ɩ̃ thɩra, a ma kɛrna bɩsaanɩkɛ, a birnǝ haa ga, a gba mɩ ɩ̃ dʋʋraa tɩɩ puu khor. 33 Dɩ mɩ n bɩɛl fɛr: Dɔ mɛr afɩ thɔ̃daar n too, ɩ̃ do far dee, sɩ a kɛr a bir na ɔɔ õkũusɔ. 34 Mɔ̃ ma kɛr na bir ɩ̃ thɩra, sɩ bɩsaan n too? Pha! Ɩ̃ yi bi na n yɩ puureekɛ na dananɩ ɩ̃ tha'.»