Jojɛfɩɩ õkũusɔɔ balaɲɔ jal Ejipiti. \ref Jǝn 42.29-38; 44.24-34
43
1 Kɔmɛr kharɛ Kanãa dɩɩra dɩ ga n pɛr. 2 Ɔbɔɔkɛ Jakɔbɩ na ɔɔ cɔdara khonɩ dɩkɔɔkɛ wɩ thenanɩ Ejipiti dɩɩra dɩɩ pɩ, a sor ɔɔ bikũusɔɔra: «Nɩ kɛrra birrǝ a thɛ dɩkɔ gbe a ɛna.» 3 Dɩ Juda birsee: «kuunile kpãkpãa sarɛ aa, a sɩ bir na pɔ sɩ sa fʋrɔ asɩ õkuun bu a pɔna ga, sa yɩ ɩnɩɩ ƴɛ bi kpɩɩraka'.» 4 Ado fɩ ture wer na ha sɩ asɩ õkuun bu sɩ jalna, sa jaal a na the dɩkɔ na ɩna na ha fɩ. 5 Sɩ ado fa tu sɩ jalla kha ga, sa jalla'; gɩdonɩ kuunile so sarɛ aa, asɩ bir na pɔ sɩ sa fʋrɔ asɩ õkuun bu a pɔna ga, sa yɩ ɩnɩɩ ƴɛ bi kpɩɩraka'. 6 Dɩ Jakɔbɩɩkɛ n dɔnɩ Ɩjɩrayɛl so war: «Nɩ cʋʋ mɛr puure ka. Aɲe wer dɔ kɩrʋ dɩ nɩ so kuunana nɩ hananɛ õkuun buu?» 7 Dɩ wɩ birsee: «kuunile bulene sɩ. A bule ser, a kpãkpaanɔ na asɩ cɔdaraada fɛw aa, asɩ thɩ hale 'lo na yire ya? Aa, sa bir hana õkuun kpɩɩ bã? Dɩ sɩ sʋʋraa mɔna a bulenɩ. Mɔ̃ sa cʋʋ sɩ na kɔɔ jɩ a na yɩ sɩ kpa asɩ õkuunna a pɔna?» 8 Dɩ Juda so ɔɔ thɩ Ɩjɩrayɛlla: «Faa bɩsaanna ɩ̃ jalna. Ado fɩ n ƴaalɛ sɩ hanana yire, fɛrɛ na asɩ bɩsãsɔ na sɛrɛ; dɔ sɩ jalna bɩsaanna gɩ do nɔɔ sɩ 'lɛ yire. 9 Baranɛ na mɛrɛ. Ado ma birnǝǝ ɩna ga, na hɩnɛ mɛrɛ. A ma ɩnaa a ha fa', gba mɩ ɩ̃ do far tɩɩ puu khor. 10 Dɩrakɛ ado sa kɔɔ dĩdĩǝ ga, sa kɔɔ jaal sɩ na ɩ̃ gɩ dã balaɲɔ mɛ̃.»11 Dɩ awɩ thɩ Ɩjɩrayɛl so war; «Gɩdonɩ thale gɩ ha, gɩrɛ na cʋʋnɩ dʋɔn: nɩ gba asɩ dʋɔ thɩ̃ a fɔrɔ jalana, a hana kuunna khaardaa. Nɩ gba thɩ̃ caar dɩɩ dɩɩsɔɔkɛ n hʋnanɩ daw, bi kakɔ na gɩrɛ wɩ n cʋʋnanɩ thɩɩsɔ a gbana thʋʋr na thɩ̃ bes. 12 Nɩ gba mũsũ dɛbɩna a fɔrɔ. Nɩ kɛrana dakha mũsumookɛ wɩ kɔɔ gbanɩ to anɩ lokasɔra; agakpaana' gɩ do wɩ dǝdire. 13 Nɩ kpa anɩ õkuunna a jallana kuun dɔɔrara. 14 Thãgbaakɛ dʋɔnɩ Punone fɛw Hɩ̃daar n cʋɛ kuunile n jɩ nɩ bʋɔra a faa anɩ õkuun na Bɛ̃jamɛ̃ nɩ ɩna. Dɩ a gɩ teena ɩ̃ 'lea bɩsanana wo, ɩ̃ thʋ̃ ɩ̃ 'lee wɩ.
Jojɛfɩ na ɔɔ õkũusɔɔ balaɲɔ cãa kha. \ref Rɔm 12. 19-21; 1 Tes 5.15
15 Dɩ wɩ gbɛbɩrɛ khaardaa, a gbana mũsũ dɛbɩna, a kpana Bɛ̃jamɛ̃ dɩ wɩ jal a dã jɩɩl Jojɛfɩɩ ƴɛra Ejipiti. 16 Ɔbɔɔkɛ Jojɛfɩ yɩna wɩnɩ Bɛ̃jamɛ̃, a sor ɔɔ cɔ hɩ̃ɩdaarra: «Kpa tɩbɩlaakɛ a kɔnana cʋɔrɔ, a kɔ dɩkha a gbɛbɩrɛ gɩdonɩ ʋlkhɔɔ, sɛr na khɔ kha dikor.» 17 Dɩ kuunile kpa tɩbɩlaale a kɔna Jojɛfɩɩ cɔ mɔna a kɔɔ sʋʋraanɩ. 18 Ɔbɔɔkɛ wɩ thɔɔ wɩnɩ lona Jojɛfɩɩ cɔ, maar fʋlɛ wɛr dɩ wa n so: «Caca mũsumookɛra wɩ kɔɔ gbanɩ toro sar lokanana dɔ nɔɔ dɩ wa n ɩna sɩ kɩɛr, wɩ kpala sar; wɩ fʋlɛ sɩ, sɩ do dea, sɩ wɩ fʋlɛ asɩ kũkǝ̃sɔ.» 19 Dɩ wɩ tɔr wɔrɔ̃ Jojɛfɩɩ cɔ hɩ̃ɩdaar le lõfonʋɔra a mɩɩnaa. 20 Asɩ kɔ̃tɩ̃ yaa, sɩ kɔɔ ɩnɛ kɛ cacara a the dɩkɔ. 21 Agɩpɩ ɔbɔɔkɛ sɩ jalnɩ dã cɔ paar hʋɛra, a na khɛr lokana, sɩ yɩrɛ asɩ mũsũ nɔra oti, dɩɩ hale asɩ lokasɔɔra; gɩ hakɛ dɩ sɩ ɩnɛ. 22 Sa jɩ ntɛɛkɛ gbaanɩ mũsumoole a bir to sar lokanana ga. Sɩ ɩnanɛ dakha mũsũ kpɩɩ sɩ thena dɩkɔ.» 23 Dɩ Jojɛfɩɩ cɔ hɩ̃ɩdaar birse wɩ: «Nɩ hanana ha ɩɩ; na n do maar n fʋna'. Anɩ Thãgbaakɛ dɔnɩ anɩ thɩɩ Thãgba, ɔr tʋɔr lẽle thɩ̃ɛ anɩ lokasɔɔra; a mɛ̃ gaa mɩ teere anɩ mũsũ.» Agɩpɩ dɩ khɛr Simeyɔ̃ dɩ the a jaal war.
24 Dɩ kuunile kpa wɛr a lona Jojɛfɩɩ cɔ a ha wɩ ɲʋɔn dɩ wɩ cɔcɔɔ nɛɛ, a pɛna dakha awɩ kũkǝ̃sɔra dɩkɔ. 25 Dɩ wɩ gbɛbɩrɛ awɩ khaardasɔ dɩ wa n pɩɛrna mɔ̃ Jojɛfɩ na pɔnɩ ʋlkhɔɔ; gɩdonɩ wɩ kɔɔ nɩɛrɛ dɩ wɩ so le wa kho dikor. 26 Ɔbɔɔkɛ Jojɛfɩ lonɩ cʋɔrɔ, wɩ pɔnanɛ awɩ khaardasɔɔkɛ wɩ kɔɔ fʋrɔnɩ ɲɛɛna le cɔ bɩnɔ a haa, sa gburõkhu thɩɩra ɔɔ ƴɛra. 27 Dɩ Jojɛfɩ bule wɩ bɔɔ, sa bule wɩ: «Anɩ thɩ, kuun kɔ̃tɩɩnna nɩ kɔɔ mɩɩnɩ ɔɔda, a khɩɩrɛ bɛ? A hale 'lo na yire bɛ?» 28 Dɩ wɩ tu: «Afɩ thɔ̃daar asɩ thɩ khɩɩrɛ bɔɔbɔɔ. A hananɛ yire 'lo.» Sa jɩɩ gburõkhu a thʋ thɩɩ. 29 Mɔ̃ Jojɛfɩ yɩnɩ Bɛ̃jamɛ̃, ɔɔ õkuun bɩnɔɔkɛ nɩ bɩɛl kɔna wɩnɩ, a bule wer: «Ʋrɛ dɔ anɩ õkuun buukɛra nɩ kɔɔ mɩɩ mɩnɩ bɛ?» Sa bir so: «Thãgba n jɛ fɩ bʋɔra ɩ̃ bikuun.» 30 Dɩ Jojɛfɩ khure khɔrɔ̃khɔrɔ̃; gɩdonɩ ɔɔ õkuuni thu fʋʋrɛ a kar, da n ƴaal a khɩɩ. Dɩ a ɩɩrɛ lõ duu a khɩɩ. 31 Ɔbɔɔkɛ a hulnɩ ƴɩɛ pɩ, a bire the a do bʋɔ sa fʋ haar. Dɩ a sor wɩ ɛna dikor. 32 Dɩ wɩ har Jojɛfɩ ɔɔ diko kpɩɩ, ɔɔ õkũusɔ kpɩɩ, a ha Ejipitidara, kɛ n khɔnɩ le dikor Jojɛfɩɩ pa, awɩda kpɩɩ; gɩdonɩ Ejipitidara na puno na kho kha dɩkɔ na Ebirǝsɔa', awɩ sãasɩ gɩ. 33 Dɩ Jojɛfɩɩ õkũusɔ toore ɔɔ ƴɛra kpakha kpakha, mɔ̃ wɩ jɔnɩ kha: Caca bikuun, mɔ̃ ɔɔ hʋ hana hanɩ mɔ̃ a doni caca bi, a jalna dana diine mɔna a 'luni dakha. Dɩ nʋɔ kpaa wɛr, dɩ wɩ khe wa n hɩɩn kha. 34 Dɩ Jojɛfɩ pɛrɛ dɩ wɩ ha wɩ ɔɔ thɛthɛɛ dikookɛ wɩ thɩɩnʋnɩ. Sɩ a har Bɛ̃jamɛ̃ dɩɩ kuur wɛr fɛʋʋda ɲɛ̃be yemɔy. Dɩ wɩ gbɛbɩrɛ kha a ɲɔ taan a kãkana dɩɩ dã wɩ fɛw.